O le ā le Manatu o le Tusi Paia i le Nofofua ma le Faaipoipo?

I nisi aganuu, e manatu tagata e lē mafai e se tasi ona maua le fiafia seʻiloga e faaipoipo. Peitaʻi, e lē o tagata uma ua faaipoipo o loo maua le fiafia, ma e lē o tagata nofofua uma foʻi o loo faanoanoa. O le mea moni, o loo taʻua i le Tusi Paia o le nofofua ma le faaipoipo o ni meaalofa.

1. O ā nisi aogā o le nofofua?

Ua faapea mai le Tusi Paia: “O lē e faaipoipo e manuia o ia, a o lē e lē faaipoipo e sili atu lona manuia.” (Faitau le 1 Korinito 7:32, 33, 38.) O ā auala e ʻsili atu ai le manuia’ o le tagata nofofua? O Kerisiano nofofua, e lē manaʻomia ona tausia manaʻoga o se paaga. O lona uiga e tele atu lo latou saʻolotoga. Mo se faataʻitaʻiga, ua mafai e nisi ona faalautele atu la latou faiva i nisi auala, e pei o le malaga atu i isi atunuu e talaʻi ai le tala lelei. Ae sili atu i lenā, ua latou faaaogā le tele o le taimi e mafuta vavalalata atu ai iā Ieova.

2. O ā nisi aogā o le faaipoipo faaletulafono?

I le pei o le nofofua, e maua foʻi aogā i le faaipoipo. Ua faapea mai le Tusi Paia “e sili ona lelei o le toʻalua nai lo o le toʻatasi.” (Failauga 4:9) E moni lenei manatu, aemaise lava i Kerisiano o loo faatatauina mataupu silisili o le Tusi Paia i a latou faaipoipoga. O ulugalii ua faaipoipo faaletulafono, ua latou osia se feagaiga ina ia alofa, faaaloalo ma faapelepele le tasi i le isi. O le iʻuga, e masani ona latou lagona ai le malupuipuia nai lo ulugalii o loo nonofo faatasi ae lē faaipoipo. O le a lagona ai foʻi e le fanau le malupuipuia.

3. O le ā le silafaga a Ieova i le faaipoipoga?

Ina ua faavaeina e Ieova le uluaʻi faaipoipoga, na ia faapea mai: “E tuua . . . e le tane lona tamā ma lona tinā, ma nonofo faatasi ma lana avā.” (Kenese 2:24) E finagalo Ieova e faaalia e se tane ma se avā le alofa, ma nonofo faatasi seʻia oo i le oti. E pau le māfuaaga e na te faatagaina ai le teteʻa, pe a faamaonia ua mulilua se tasi o le paaga. I lenei tulaga, e tuu atu e Ieova i le paaga o loo mamā le aiā e filifili ai pe e tatala le faaipoipoga pe leai.a (Mataio 19:9) E lē faatagaina e Ieova le tele o paaga i le taimi e tasi.​—1 Timoteo 3:2.

SAʻILIʻILI ATILI

4. Ia faaaogā lelei le meaalofa o le nofofua

Na vaai Iesu i le nofofua o se meaalofa. (Mataio 19:11, 12) Faitau le Mataio 4:23, ona talanoa lea i le fesili lenei:

• Na faapefea ona faaaogā e Iesu le meaalofa o le nofofua e auauna ai iā Ieova ma fesoasoani ai i isi?

E maua e Kerisiano nofofua le fiafia e ala i le faaaogā o latou olaga e pei foʻi ona faia e Iesu. Faaali le VITIŌ, ona talanoa lea i le fesili lenei:

VITIŌ: O Ē Nofofua Faamaoni (3:11)

• O ā auala e mafai ona faaaogā ai e Kerisiano o latou tulaga nofofua?

E te silafia?

E lē o aumaia i le Tusi Paia se tausaga faatulagaina e tatau ona faaipoipo ai se tasi. Peitaʻi, o loo faalaeiau mai e tatau i se tasi ona faatali seʻia “teʻa le malaulau o lona talavou.” Talu ai o le taimi o le malaulau o le talavou, e malolosi ai faalogona ma faigatā ai ona faia se filifiliga atamai.​—1 Korinito 7:36.

5. Ia filifili ma le atamai lau paaga

O le filifilia o se paaga, o se tasi o filifiliga e sili ona tāua. Faitau le Mataio 19:4-6, 9, ona talanoa lea i le fesili lenei:

• Aiseā e lē tatau ai i se Kerisiano ona vave faaipoipo e aunoa ma le filifili lelei?

E mafai ona fesoasoani le Tusi Paia iā te oe i le auala e filifilia ai se paaga faaipoipo. Ae o le mea e sili ona tāua, ia saʻili se paaga faaipoipo e alofa iā Ieova.b Faitau le 1 Korinito 7:39 ma le 2 Korinito 6:14, ona talanoa lea i fesili nei:

• Aiseā e tatau ai ona faaipoipo tau lava o ē tatou te tapuaʻi faatasi?

• O ā faalogona o Ieova pe a tatou filifili e faaipoipo i se tasi e lē alofa iā te Ia?

6. Ia vaai i le faaipoipoga e pei ona silasila i ai Ieova

I Isaraelu anamua, na faateʻa e nisi tane a latou avā ona o ni māfuaaga manatu faapito. Faitau le Malaki 2:13, 14, 16, ona talanoa lea i le fesili lenei:

• Aiseā e inosia ai e Ieova le tatala o le faaipoipoga ona o se māfuaaga e lē faale-Tusi Paia?

Faaali le VITIŌ, ona talanoa lea i le fesili lenei:

VITIŌ: O le Faaipoipoga o se Faatasiga Tumau (4:30)

• Pe a e faaipoipo i se tasi e lē talitonu, o le ā e tatau ona e faia ina ia taulau manuia ai lau faaipoipoga?

7. Ia faatatauina tapulaa a Ieova mo faaipoipoga

VITIŌ: E Mafai Ona E Ausia Tapulaa a Ieova mo Faaipoipoga (4:14)

Faitau le Eperu 13:4, ona talanoa lea i fesili nei:

• Pe e te manatu e talafeagai lelei tapulaa a Ieova mo faaipoipoga? Aiseā?

E faatalitalia e Ieova Kerisiano ina ia lesitala faaletulafono a latou faaipoipoga po o talagā faaipoipoga, e pei ona faia e le tele o atunuu. Faitau le Tito 3:1, ona talanoa lea i le fesili lenei:

• Pe afai ua e faaipoipo, po ua e mautinoa ua lesitalaina faaletulafono i le malo lau faaipoipoga?

AOTELEGA

O le nofofua ma le faaipoipo o ni meaalofa mai iā Ieova. E mafai ona maua ai le fiafia ma le faamalieina, pe a ola e ōgatusa ma le finagalo o Ieova.

Fesili Autalu

• E faapefea ona faaaogā tatau e se tasi lona tulaga nofofua?

• Aiseā ua faapea mai ai le Tusi Paia e faaipoipo tau lava o ē tatou te tapuaʻi faatasi?

• O le ā le māfuaaga faale-Tusi Paia e tasi mo le tatalaina o se faaipoipoga?

MANATU FAAOPOOPO

O le ā le uiga o le faaipoipo “tau lava o lē ua i le Alii”?

“Fesili Mai le ʻAufaitau” (Le Olomatamata, Iulai 1, 2004)

Maimoa i vitiō nei e lua, e fesoasoani iā te oe e faia ai filifiliga lelei i tuugātala ma le faaipoipoga.

Sauniuni mo se Faaipoipoga (11:53)

Iloilo pe aiseā na manatu ai se uso, ua sili atu mea ua ia maua mai iā Ieova nai lo mea na ia faataulaga.

Na Ou Faamoemoe o le a Ia Aʻoaʻoina le Upu Moni (1:56)

O ā mea e manaʻomia ona iloilo e se tasi a o leʻi faia se filifiliga e tatala le faaipoipoga pe nonofo eseese?

“Ia Faamamaluina le Faatulagaga na ʻTuufaatasia e le Atua’” (Le Olomatamata, Tesema 2018)