“O le Atua o le Filemu” na Te Tausia Ē ua Puapuagatia

UA FAAMANINO mai e le Tusi Paia e faapea, sa masani lelei Tavita o aso anamua ma puapuaga. Mo le tele o tausaga, sa ola ai o ia o se tagata fesolasolatai, ona o le tulituliloa pea e se tupu amioleaga ma le loto maaa, o lē sa naunau e fasioti ia te ia. I lena taimi o puapuaga, na lafilafi solo ai Tavita i nofoaga tuufua. Ae sa ia faia foi se mea e sili atu. Sa ia tatalo faatauanau atu ia Ieova e faatatau i ona puapuaga. “Na ou alaga ia Ieova i loʻu leo mo se fesoasoani,” na ia tusia ai mulimuli ane e faatatau i lona puapuaga. “Na ou faailoa atu pea ia te ia oʻu popolega; na ou tagi atu pea ia te ia ona o loʻu puapuaga.”—Salamo 142:1, 2, NW.

I aso nei, atonu o le a faatauemu ai nisi i le faalagolago atu o Tavita i le Atua. Atonu o le a latou faapea mai, o le tatalo, ua na o se mea e tua i ai ina ia faafilemu ai le mafaufau, ae i se tulaga aogā, o se mea e faamaimau ai le taimi. Ae peitai, sa lei tuu sese le faatuatua o Tavita i le Atua, auā na iu lava ina faatoilaloina ona fili. I le toe tepa i tua i mea na oo ia te ia, na tusia ai e Tavita e faapea: “Na valaau atu lenei tagata ua tigaina, ona faafofoga mai ai lea o Ieova, ma na faaola ia te ia i ona puapuaga uma lava.” (Salamo 34:6) O le Atua moni lea na liliu atu i ai Tavita, o loo taʻua i isi mea “o le Atua o le filemu.” (Filipi 4:9, NW; Eperu 13:20) Po o le a ia aumaia ea se mapusaga mai puapuaga, ma iu ai i le filemu mo i tatou?

E Manatu Mai Ieova ia te Oe

E lē mamao Ieova mai puapuaga o ona tagata. (Salamo 34:15) E liuliualo mai o ia i manaoga o ana auauna e lē gata i le avea o se faapotopotoga, ae o tagata taitoatasi foi o ē matatau ia te ia. Ina ua faapaiaina le malumalu i Ierusalema anamua, na faatoga atu Solomona ia Ieova ina ia faafofoga mai i “talosaga uma ma aioi uma e fai [“atu mo lona finagalo malie,” NW] e se tasi tagata, po o lou nuu o Isaraelu uma, o e ua iloa uma taitoatasi o lona maʻi, ma lona tiga.” (2 Nofoaiga a Tupu 6:29) E pei ona faailoa mai e Solomona e faapea, e tofu lava le tagata taitoatasi ma puapuaga eseese e tatau ona onosaia. I se tasi tagata atonu o loo puapuagatia i se maʻi faaletino. A o le isi, o faalogona mafatia. O nisi atonu o mafatia i le maliu o se tasi e pele. O le leai o se galuega, tulaga faigata tau tamaoaiga, ma faafitauli o le aiga, o puapuaga masani lava na i nei taimi faigata.

Mafaufau mo sina minute e uiga i ‘lou lava puapuaga ma lou tiga.’ I nisi taimi, atonu e oo ai ia te oe le lagona e pei ona oo i le faisalamo o Tavita, o lē na tusia e faapea: “Ua ou faatalitali foi i se na te faamatalaloto mai, a e leai lava se tasi, ma ni e faamafanafana mai, a e leai se isi na ou maua.” Ae peitai, e mafai ona faamautinoaina oe e faapea, o loo manatu mai le Atua e tusa ai ma lou tulaga, auā na tusi mai mulimuli ane Tavita i le salamo lava lea e faapea: “Auā o loo faafofoga Ieova i e matitiva, e le ʻinoʻino foi o ia i ona tagata ua noanoatia.”—Salamo 69:20, 33.

I le faatatauina o upu a Tavita i se uiga lautele, e mafai ona tatou mautinoa atoatoa, e faafofoga mai Lē na Foafoaina le tagata i tatalo a i latou ua noanoatia, i se gagana faafaatusa, ona o o latou puapuaga. E lē gata i lea, e tali mai o ia i a latou faatoga. Iloilo faamatalaga ia e mulimuli mai e faaalia ai e alofa mutimutivale Ieova i ē puapuagatia.

“Aua le agaleaga i se fafine ua oti lana tane, po o se mātuaoti. Afai e te agaleaga lava i ai, ona alaga mai lea o ia ia te au, ou te faalogo lava i lona alaga mai. E matuā tupu ai loʻu ita.”—Esoto 22:22-24.

“Pe lē faia ea e le Atua le faamasinoga mo ē na ia filifilia, o loo alalaga atu ia te ia i le ao ma le po e ui lava o loo onosai pea o ia ia te i latou?”—Luka 18:7, NW.

“Auā e laveai e ia o lē mativa i lona alaga mai; atoa ma le ua puapuagatia, ma le ua leai sona fesoasoani. E alofa atu ia i le ua vaivai ma le ua mativa; e faaola lava e ia e ua matitiva. E laveai o ia ia i latou ai le saua ma le faamalo; e silisili foi o latou toto i lona manatu.”—Salamo 72:12-14.

“O lē pai atu ia te outou [tagata o le Atua o i le lalolagi], ua pāia e ia le tamatamai mata o lona fofoga.”—Sakaria 2:8.

O nai faaaoaoga ia e faaalia ai le matuā naunau mai o Lē na Foafoaina i tatou mo le lelei o ona tagata. I lea, e lelei ai ona tatou mulimuli i le apoapoaiga a le aposetolo o Peteru e faapea: “Ia tuuina atu ia te ia mea uma tou te popole ai, auā o loo manatu mai o ia ia te outou.” (1 Peteru 5:7) Ae o le a faapefea ona fesoasoani mai le Atua ia i tatou i taimi o puapuaga?

Le Auala e Fesoasoani ai le Atua i Ē Puapuagatia

E pei ona tatou iloaina, ina ua mafatia Tavita i puapuaga, sa ia tatalo faatauanau atu i le Atua mo se taitaiga. I le taimi lava e tasi, o ia lava sa tausolomua e faaleleia le tulaga mafatia, i le faaaogaina o le atamai e sola ese ai mai ē o loo tulituliloa ia te ia. I lea, o le faalagolago ia Ieova faatasi ma taumafaiga totino na mafai ai ona tumau Tavita i ona puapuaga. O le ā se lesona e mafai ona tatou aʻoaʻoina mai lenei mea?

Pe a tatou fesagai ma puapuaga, e mautinoa e lē sese mo i tatou ona tausolomua i le foiaina o le faafitauli. Mo se faaaoaoga, pe afai ua iloa e se Kerisiano ua leai sana galuega, po o le a ia lē faia ea ni taumafaiga e sailia se galuega? Po o mafatia foi o ia i se maʻi o le tino, po o le a ia lē alu ea e vaai se fomai? O le mea moni, e oo lava ia Iesu, o lē sa iai le mana e faamālōlō ai ituaiga uma o maʻi, na ia faailoa mai e faapea, e ‘manaomia e le tagata maʻi se fomai.’ (Mataio 9:12; faatusatusa i le 1 Timoteo 5:23.) E moni, e lē mafai ona aveesea nisi o puapuaga; ae tau lava o le onosaia. Ae peitai, o se Kerisiano moni, e lē manatu i puapuaga e faapea o se mea tatau e pei ona manatu ai nisi tagata. (Faatusatusa i le 1 Tupu 18:28.) Nai lo lea, e na te faia laasaga uma na te mafaia e fesagai ai ma lona puapuaga.

I le taimi lava e tasi, o le mea tatau ona tuuina atu le mataupu ia Ieova i le tatalo. Aisea? Muamua, e ala i le faalagolago atu i Lē na Faia i tatou, o le a fesoasoani ia i tatou e ‘mautinoa ai mea e sili ona tāua.’ (Filipi 1:10) Mo se faataitaiga, pe a saili mo se galuega, o le tatalo faatasi ma le faalagolago i le Atua, o le a fesoasoani ai ia i tatou ina ia aua neʻi taliaina se galuega e feteenai ma mataupu silisili o le Tusi Paia. O le a tatou alofia ai foi le ‘sese ese mai le faatuatua’ ona o le manao tele i tupe. (1 Timoteo 6:10) O le mea moni, pe a faia ni filifiliga faigata—e faatatau i se galuega po o se isi lava vala o le olaga—e manaomia ona tatou mulimuli i le apoapoaiga a Tavita: “Ia e tuuina atu ia Ieova o mea e te popole vale ai; o ia lava na te tausia oe; na te le tuuna e faavavau le amiotonu ia faagaeetia.”—Salamo 55:22.

O le tatalo foi, ua fesoasoani ia i tatou ina ia tausia lo tatou paleni faalemafaufau, ina ia lē lofituina i tatou i o tatou puapuaga. Na tusi mai le aposetolo o Paulo e faapea: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai.” O le ā le iuga? “O le manuia [“filemu”] foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.” (Filipi 4:6, 7) Ioe, filemu, le filemu mai le Atua. O lena filemu “o loo silisili lava i mea uma e manatu i ai,” e mafai ona faatoafilemuina ai i tatou pe a tatou mafatia i le tiga o faalogona ootia. E ‘leoleoina ai foi o tatou loto ma mafaufau,’ e fesoasoani ai ia i tatou e alofia le faia o se gaoioiga faatopetope ma le lē atamai, lea e mafai ona faaopoopo i o tatou puapuaga.—Failauga 7:7.

E tele foi isi mea e faia e le tatalo. E mafai ona iloa ai le eseesega i le tulaga e iu i ai. Manatu i se faaaoaoga faale-Tusi Paia. Ina ua tuuina le aposetolo o Paulo i le falepuipui i Roma, sa ia faalaeiauina uso Kerisiano ina ia tatalo mo ia. Aisea? Na ia tusi atu e faapea: “Ua atili loʻu aioi atu ia te outou e fai lena mea, ina ia vave ona toe tuuina atu ai o aʻu ia te outou.” (Eperu 13:19) Sa iloa e Paulo e faapea, o tatalo faatauanau a ona uso talitonu e mafai ona fesoasoani i le vave tatalaina o ia.—Filemoni 22.

Po o le a suia e le tatalo le iuga o lou puapuaga? Atonu e mafai. E ui i lea, e tatau ona tatou iloa e faapea e lē o taimi uma o le a tali mai ai Ieova i a tatou tatalo i le auala lea tatou te faatalitalia. Mo se faaaoaoga, na tatalo pea lava pea Paulo e faatatau i “le mea matuitui i le tino”—atonu o se faafitauli i le tino e tusa ai ma lana vaai. Nai lo o le aveesea o le maʻi, na taʻu atu e le Atua ia Paulo: “O loʻu nei alofa tunoa e lava lea e fesoasoani ia te oe; auā o le vaivai e faaatoaina ai loʻu mana.”—2 Korinito 12:7-9.

O lea, i nisi taimi, o le a lē aveesea ai o tatou puapuaga. Nai lo lea, o le a tatou maua ai le avanoa e faamaonia ai lo tatou faalagolago atu i Lē na Faia i tatou. (Galuega 14:22) E lē gata i lea, e mafai ona faamautinoa ai ia i tatou e faapea, e tusa lava pe lē aveesea e Ieova le puapuaga, o le a ia “sauni . . . se mea e sao ai, ina ia [tatou] lavā oono.” (1 Korinito 10:13) Ioe, e mo se mafuaaga tāua ua taʻua ai Ieova “o le Atua foi e ana le faamafanafanaga uma; o le na te faamafanafanaina mai ia te i [tatou] i lo [tatou] puapuaga uma lava.” (2 Korinito 1:3, 4) E na te foaiina mai ia te i tatou le mea tatou te manaomia ina ia tumau ai faatasi ma le matuā tele o le filemu.

Ua Lē Pine—Ae Oo Mai se Lalolagi e Aunoa ma ni Puapuaga!

Ua folafola mai e Lē na Foafoaina Mea e faapea, e ala i lona Malo, o le a lē pine ona ia aveesea atoatoa lea o puapuaga uma o le tagata. O le a faapefea ona ia faataunuuina lenei mea? I le aveesea lea o Satani le Tiapolo, le pogai sili o tulaga faigata ma o le fili aupito sili o le filemu, o lē ua faailoa mai e le Tusi Paia e faapea o “le atua o le lalolagi nei.” (2 Korinito 4:4) Ae ua toeitiiti ona faamutaina loa lea o lana pulega i luga o tagata. O le faaumatia atoatoa o Satani, o le a faaavanoa ai le auala mo faamanuiaga e lē mafaitaulia e maua e i latou o ē matatau i le Atua. Ua folafola mai e le Tusi Paia e faapea, o Ieova, o le a “soloiesea loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:1-4.

Po o se mea uigaese i lau faalogo se lalolagi e aunoa ma ni puapuaga? Ua tatou masani i le ola ma puapuaga, o lea ua faigata ai ona tatou vaai faalemafaufau i le lē toe iai o ia tulaga. Ae o le saoloto mai le mataʻu, popole, ma mala, o mea tonu lava na ua fuafuaina e le Atua mo tagata i le foafoaga, ma o le a taulau lava lana fuafuaga.—Isaia 55:10, 11.

O le faamoemoe lena na maua e Sonia, Fabiana, ma Ana, ia na taʻua i le uluai mataupu. O Sonia, o lē na maliliu lana fanau e toalua i le AIDS, na maua le tele o le filemu mai le faamoemoe lea o loo taʻua i le Tusi Paia—le toetu o ē amiotonu ma ē amioletonu. (Galuega 24:15) Ua faapea mai o ia: “E tasi lava le mea ou te mautinoa, o lo tatou faamoemoe ua matuā aveesea ai so o se tiga.”

A o nofo ai pea i le nofoaga o tamaiti ua aumatuā, na asiasi atu ai se tasi o Molimau a Ieova ia Ana. Fai mai a ia: “Sa ia faasino mai ia te au le suafa o Ieova i le Tusi Paia, ma sa maligi oʻu loimata ona o le olioli. Sa ou matuā manaomia lava se fesoasoani, ma sa ou aʻoaʻoina ai o loo iai se Atua o loo silasila alofa mai ia i tatou.” Ina ua tuua e Ana le nofoaga o tamaiti aumatuā, sa ia talia se suesuega faale-Tusi Paia ma aʻoaʻo atili ai e uiga i folafolaga a Ieova. Ona ia tuuina atu lea o lona ola ia Ieova ma faatinoina i le papatisoga. “Talu mai lena taimi, o loo faaauau pea ona ou faalagolago ia Ieova e ala i le tatalo, ma ua faamafanafanaina ai aʻu i loʻu mautinoa o le a ia fesoasoani mai ia te au.”

Ua maua foi e Fabiana le tele o faamafanafanaga ma le filemu o le mafaufau mai ona puapuaga e ala i lona aʻoaʻoina e uiga i folafolaga a le Atua mo le lumanai. “O le aʻoaʻoina o le upu moni mai le Tusi Paia, ua pei o le tuua o se nofoaga matuā pogisa ma le faanoanoa ma ulu atu i se potu malamalama, manino ma matagofie.”—Faatusatusa i le Salamo 118:5.

Ae o le a faapefea ma o afea o le a oo mai ai le filemu moni i le lalolagi aoao? Seʻi o tatou tilofaia i le isi mataupu o sosoo mai.

[Pusa i le itulau 6]

Le Tele o Tafa Eseese o Puapuaga

▪ Pe tusa ma le kuata o le faitau aofai o le lalolagi o loo ola i le matuā mativa, ma le isi faitau miliona o loo ola i ni tulaga sili ona leaga, ua faamatauina ai lo latou faasaoina.

▪ E sili atu i le 200 miliona tamaiti e lē o mauaina ni meaʻai paleni lelei mo le tino.

▪ I tausaga taitasi, e feoti ai i le manava tatā le tusa ma le tolu miliona tamaiti i lalo ifo o le lima tausaga.

▪ O faamaʻi pipisi na feoti ai le 16.5 miliona tagata i le tausaga e 1993 lava ia. Talu ai ona o le eseese o le faatulagaina o faamaʻi i nisi o atunuu, atonu e matuā sili atu ona maualuga le aofaiga saʻo.

▪ O se fua faatatau e tusa ma le 500 miliona tagata ua aafia i se ituaiga o faafitauli o le mafaufau.

▪ Ua sili atu ona vave faateleina le aofai o tagata talavou e pule i o latou ola nai lo o se isi lava tupulaga.

▪ Ua taʻua i le Unesco Courier e faapea: “O le fiaʻai ma le leai o ni galuega ua avea ma ila o le lalolagi. E 35 miliona tagata ua leai ni galuega i atunuu e sili atu ona mauoa e fitu, ma i Pasili lava ia, e 20 miliona tagata faigaluega ae e lē o lava meaʻai e ʻaai ai.”

[Ata i le itulau 7]

O le tatalo e mafai ona fesoasoani ia i tatou e tepa taulaʻi atu ai i le folafolaga a le Atua e uiga i se lalolagi e aunoa ma ni puapuaga