LESONA 14
E Faapefea Ona Faafiafiaina le Atua i la Tatou Tapuaʻiga?
E pei ona tatou talanoaina i le lesona ua mavae, e lē o lotu uma e finagalo malie i ai le Atua. Peitaʻi, e mafai ona tatou tapuaʻi i Lē na foafoaina i tatou, i se auala e faafiafiaina ai o ia. O le ā le ituaiga “tapuaʻiga” e talia e le Atua? (Iakopo 1:27) Iloilo aʻoaʻoga a le Tusi Paia.
1. O le ā e tatau ona faavae ai la tatou tapuaʻiga?
E tatau ona faavae la tatou tapuaʻiga i le Tusi Paia. Na tatalo atu Iesu i le Atua e faapea: “O lau afioga o le upu moni lea.” (Ioane 17:17) O nisi lotu e latou te lē amanaʻia le upu moni o loo i le Afioga faagaeeina a le Atua, le Tusi Paia. Ua latou suia i aʻoaʻoga ma tū masani a tagata. Peitaʻi, e lē fiafia le finagalo o Ieova iā i latou e ʻteena poloaʻiga a le Atua.’ (Faitau le Mareko 7:9.) I le isi itu, e tatou te faafiafiaina le Atua pe afai e faavae la tatou tapuaʻiga i le Tusi Paia, ma mulimuli i fautuaga o loo iai.
2. O le ā le auala e tatau ona tatou tapuaʻi ai iā Ieova?
E tatau ona tuuina atu atoatoa la tatou tapuaʻiga iā Ieova, auā o ia o Lē na foafoaina i tatou. (Faaaliga 4:11) O lona uiga e tatau ona tatou alolofa ma tapuaʻi tau lava o ia, e aunoa ma le faaaogāina o tupua ma faatusa ua tā.—Faitau le Isaia 42:8.
E tatau ona ʻpaia ma mālie’ iā Ieova la tatou tapuaʻiga. (Roma 12:1) O lona uiga, e tatau ona tatou ola e ōgatusa ma ana tapulaa tauamio. Mo se faataʻitaʻiga, o i latou e alolofa iā Ieova, e fiafia i ana taʻiala mo faaipoipoga ma mulimuli i ai. E latou te ʻalofia foʻi gaoioiga lē lelei e pei o le ulaula tapaa, po o le faaaogā sesē o fualaau faasāina ma le ʻava malosi.a
3. Aiseā e tatau ai ona tatou tapuaʻi faatasi iā Ieova ma o tatou uso talitonu?
O sauniga i vaiaso taʻitasi ua tatou maua ai le avanoa e ʻvivii atu ai iā Ieova i le faapotopotoga.’ (Salamo 111:1, 2) O se tasi o auala e faia ai faapea, o le usu atu lea o viiga i le Atua. (Faitau le Salamo 104:33.) Ua faatonuina i tatou e Ieova e auai i sauniga ona e alofa iā i tatou, ma e na te silafia o le a fesoasoani sauniga ina ia tatou maua ai se olaga fiafia e faavavau. Pe a tatou auai i sauniga, o le a faalaeiauina ai isi faapea foʻi ma tatou.
SAʻILIʻILI ATILI
Iloilo pe aiseā e lē faatagaina ai e Ieova le faaaogā o faatusa i tapuaʻiga. Aʻoaʻo auala tāua e mafai ai ona tatou vivii atu i le Atua.
4. E lē tatau ona faaaogāina faatusa i la tatou tapuaʻiga
E faapefea ona tatou iloa o le faia o lenā mea e lē fiafia ai le finagalo o le Atua? Faaali le VITIŌ, ona talanoa lea i le fesili lenei:
O le ā na tupu ina ua taumafai nisi tagata o le Atua i taimi o le Tusi Paia, e faaaogā faatusa e tapuaʻi atu ai iā te ia?
E taumafai nisi tagata e faalatalata atu i le Atua e ala i le faaaogā o faatusa i a latou tapuaʻiga. Ae pe lē o le māfuaaga lenā ua mamao ese ai le Atua mai iā i latou? Faitau le Esoto 20:4-6 ma le Salamo 106:35, 36, ona talanoa lea i fesili nei:
O ā faatusa o loo faaaogā e tagata i a latou tapuaʻiga?
O ā faalogona o Ieova i le faaaogāina o faatusa?
O le ā sou manatu i le faaaogāina o faatusa?
5. O le tapuaʻi tau lava o Ieova, e tuusaʻoloto ai i tatou mai manatu sesē
Mātau pe faapefea i le tapuaʻi atu iā Ieova i le auala saʻo, ona tatou saʻoloto ai mai i manatu sesē. Faaali le VITIŌ.
Faitau le Salamo 91:14, ona talanoa lea i le fesili lenei:
O le ā ua folafola mai e Ieova o le a ia faia, pe a faailoa atu lo tatou alofa e ala i le tapuaʻi tau lava o ia?
6. E tatou te tapuaʻi atu i le Atua i sauniga a le faapotopotoga
E tatou te vivii iā Ieova ma faalaeiau isi, e ala i le usu o viiga ma faia o tatou sao i sauniga. Faitau le Salamo 22:22, ona talanoa lea i fesili nei:
Pe na e fiafia e faalogo i tali a isi i sauniga?
Pe e te manaʻo e sauni sau tali e fai i le sauniga?
7. E fiafia le finagalo o Ieova pe a faailoa atu i isi mea ua tatou aʻoaʻoina
E tele auala e mafai ona faailoa atu ai upu moni o le Tusi Paia i isi. Faitau le Salamo 9:1 ma le 34:1, ona talanoa lea i le fesili lenei:
O le ā se mea na e aʻoaʻoina mai le Tusi Paia e te fia faailoa atu i isi?
UA FAAPEA MAI NISI: “E talia e le Atua lotu uma, e lē afāina la po o le ā le auala e tapuaʻi atu ai.”
O le ā sou manatu?
AOTELEGA
E tatou te faafiafia Lē na foafoaina i tatou e ala i le tapuaʻi tau lava o ia, vivii iā te ia i sauniga a le faapotopotoga, ma faailoa atu i isi mea ua tatou aʻoaʻoina.
Fesili Autalu
Ua faapefea ona faailoa mai e le Atua le auala e tatau ona tatou tapuaʻi atu ai?
Aiseā e tatau ai ona tatou tapuaʻi tau lava o Ieova?
Aiseā e tatau ai ona tatou tapuaʻi faatasi ma i latou e mananaʻo e faafiafia le Atua?
MANATU FAAOPOOPO
I le tala “Ou te Lē o Toe Nofo Pologa i Tupua,” mātau pe na faapafea ona saʻoloto se fafine mai i le faaaogāina o tupua e tapuaʻi ai.
“E Mafai e le Tusi Paia Ona Suia Olaga” (Le Olomatamata, Iulai 1, 2011)
O le ā e fesoasoani iā te oe e fai ai se tali i sauniga?
“Ia Vivii iā Ieova i le Faapotopotoga” (Le Olomatamata, Ianuari 2019)
Mātau pe na faapefea ona maua e se tama talavou aogā mai i sauniga, e ui lava na faigatā ona ia auai ai.
E toʻatele tagata e talitonu o le koluse o se faailoga e iloa ai le faa-Kerisiano. Ae pe e tatau ona faaaogā i la tatou tapuaʻiga?
“Aiseā e Lē Faaaogāina ai e Molimau a Ieova le Koluse i la Latou Tapuaʻiga?” Mataupu i le jw.org)
a O le a talanoaina nei mataupu i lesona o loo mulimuli mai.