Faasusuluina o le Malamalama i Taimi o Aposetolo

“Ua susulu mai le malamalama mo lē amiotonu, ua oo foi le olioli i e sao o latou loto.”—SALAMO 97:11, NW.

1. Ua faapefea i Molimau a Ieova i aso nei ona pei o uluai Kerisiano?

MAEU le tāua ia i tatou o ni Kerisiano moni o na upu o le Salamo 97:11! Ua faaauau pea ona “susulu mai le malamalama” mo i tatou. E mautinoa lava, o nisi o i tatou ua tatou vāai atu i le faasusuluina mai e Ieova o le malamalama i le faitau sefulu o tausaga. Ua faamanatu mai ai ia i tatou e nei mea uma le Faataoto 4:18, lea e faapea lona faitauina: “A o le ala o e amiotonu, e tusa ia ma le malamalama o le ao, o loo tupu pea lona malamalama e oo i le tutonu o le la.” I lo tatou talisapaiaina o le Tusi Paia nai lo uputuu, ua avea ai i tatou o Molimau a Ieova ua pei o uluai Kerisiano. O o latou uiga e mafai ona iloa manino mai i tusi o talafaasolopito o le Tusi Paia na uluai tusia i le gagana Eleni, ma ona tusi na tusia i le faagaeega mai le Atua.

2. O ā ni uluai faasusuluina mai o le malamalama na maua e uluai soo o Iesu?

² O se tasi o uluai faasusuluina mai o le malamalama na mauaina e uluai soo o Keriso o mea ia e faatatau i le Mesia. Na taʻu atu e Aneterea i lona uso o Simona Peteru e faapea: “Ua ma maua le Mesia.” (Ioane 1:41) I se taimi mulimuli ane, na faapogaia ai e le Tamā i le lagi le aposetolo o Peteru ina ia ona molimau atu i lena mea ina ua ia fai atu ia Iesu Keriso e faapea: “O oe o le Keriso, o le Alo o le Atua soifua.”—Mataio 16:16, 17; Ioane 6:68, 69.

Malamalama e Tusa ma la Latou Galuega Talaʻi

3, 4. Ina ua mavae lona toe faatuina aʻe, o le ā le faasusuluina atu o le malamalama na avatu e Iesu i ona soo e faatatau i la latou galuega i le lumanai?

³ Ina ua mavae lona toe faatuina aʻe, na faasusulu mai ai e Iesu le malamalama e tusa ai ma se tiute fai ua tuu atu i ona soo uma lava. E manino mai o soo e 500 na faapotopoto i Kalilaia na ia tulei atu i ai e faapea: “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia; ia outou aʻoaʻo atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava, e oo lava i le gataaga o le lalolagi.” (Mataio 28:19, 20; 1 Korinito 15:6) Talu mai lea taimi, o soo uma lava o Keriso e tatau ona avea ma ni ē e talaʻi, ma o la latou galuega talaʻi e le faatapulaaina mai “i mamoe o le aiga o Isaraelu ua le iloa.” (Mataio 10:6) E faapena foi ona latou le toe faia le papatisoga a Ioane e avea o le faailoga o le salamō mo le faamagaloina o agasala. Nai lo le faia faapea, e tatau ona latou papatisoina tagata “i le suafa o le Tamā, ma le Atalii, ma le Agaga Paia.”

⁴ A o toeitiiti lava oo i le taimi e afio aʻe ai Iesu i le lagi, na fesili atu ai ona aposetolo faamaoni e toʻa 11 ia te ia e faapea: “Le Alii e, o ona po nei ea e te toe fuatai mai ai le malo ia Isaraelu?” Nai lo lona taliina atu o lena fesili, na tuuina atu ai e Iesu nisi faatonuga atili e tusa ai ma la latou galuega talaʻi i lona faapea atu ia i latou: “O le a maua e outou le mana, pe a afio ifo le Agaga Paia i luga ia te outou; e fai foi outou ma molimau ia te au i Ierusalema ma, Iutaia uma lava, ma Samaria, e oo lava i le tuluʻiga o le lalolagi.” A o lei oo ane i lea taimi, sa na o Ieova lava na avea ai i latou ma molimau, peitai ane, ua avea nei foi i latou ma molimau a Keriso.—Galuega 1:6-8.

5, 6. O ā ni faasusuluina atu o le malamalama na maua e soo o Iesu i le Penetekoso?

⁵ I le na o le sefulu aso mulimuli ane, maeu le faasusuluina manino o le malamalama na maua e soo o Iesu! I le aso o le Penetekoso 33 T.A., o le taimi muamua lava lea faatoʻā latou malamalama atoatoa ai i le Ioelu 2:28, 29: “E iu ina ou [o Ieova lea] liligi ifo ai loʻu Agaga i luga i tagata uma; ona perofeta ai lea o outou atalii ma o outou afafine, e fai miti o outou toeaina, e iloa faaaliga e o outou taulelea. Ou te liligi ifo foi loʻu Agaga i auauna ma auauna fafine, i ia ona aso.” Na vaaia e soo o Iesu le agaga paia, e pei se laulaufaiva afi, o faapepepepe i ulu o i latou uma—e tusa ma le 120 tane ma fafine—na faapotopoto i Ierusalema.—Galuega 1:12-15; 2:1-4.

⁶ E le gata i lena, i le aso o le Penetekoso, na faatoʻā malamalama ai foi soo e faapea na faatatau atu upu o le Salamo 16:10 ia Iesu ua toe faatuina. Na taʻua e le faisalamo e faapea: “Auā e te [o Ieova le Atua] le tuua aʻu i le tuugamau; e te le tuu atu lou tagata paia ia oo i ai le pala.” Na iloa e le au soo o na upu e le mafai ona faatatau atu i le tupu o Tavita, auā sa i ai pea lona tuugamau ma i latou seia oo ane i lena lava aso. E le tioa ona matuā talitonu ma papatisoina le toʻa 3,000 na faalogo i lena malamalamaga fou i lena lava aso!—Galuega 2:14-41.

7. O le ā le malamalamaga manino na maua e le aposetolo o Peteru i le taimi o lana asiasiga i le taʻitaʻi ʻau Roma o Konelio?

⁷ Mo le tele o senituri, na talisapaia ai e Isaraelu mea na fetalai atu ai le Atua ia i latou e faapea: “Ua na o outou lava ua ou iloa i aiga uma o le lalolagi.” (Amosa 3:2) O le mea la lea, na mautinoa lava sa avea o se faasusulu manino atu o le malamalama na mauaina e le aposetolo o Peteru ma i latou o ē na latou ō i le fale o le taʻitaʻi ʻau Roma, o Konelio, ina ua afio ifo le agaga paia i le taimi muamua lava i ē talitonu le peritomeina o Nuuese. E mataina lea mea, talu ai o le taimi muamua lava lea ua foai atu ai le agaga paia a o lei oo ina papatiso. A e peitai sa manaomia ona faia o lena mea. Pe ana le faia faapea, semanu e leai se auala e mafai ona iloa ai e Peteru e faapea, ua agavaa na tagata le peritomeina o Nuuese mo le papatisoga. I le talisapaia atoatoa o le tāua o lenei mea uigaese, na fesili atu ai Peteru e faapea: “E mafai ea e se tasi ona vavao i le vai, ina ia le papatisoina ai i latou nei [tagata o Nuuese], o e ua maua le Agaga Paia pei o i tatou nei?” O le mea moni lava, e leai se tasi na faatasi ai na mafai ona ia taofia ma le tonu, o lea la na faia ai lava le papatisoga o nei tagata o Nuuese.—Galuega 10:44-48; faatusatusa i le Galuega 8:14-17.

Lē Toe Manaomia le Peritomeina

8. Aisea na faafaigata ai i nisi o uluai Kerisiano ona faamatuu atu le peritomeina?

⁸ O se faasusuluina atili mai o le malamalama na aliali mai lea e tusa ai ma le fesili i le mataupu o le peritomeina. O le tu masani o le peritomeina na amata mai i le 1919 T.L.M. i le feagaiga a Ieova ma Aperaamo. Na poloai atu le Atua ia Aperaamo i lea taimi e faapea, e tatau ona peritomeina o ia ma taulelea uma o lona au aiga. (Kenese 17:9-14, 23-27) O lea, na avea ai le peritomeina ma faailoga e iloa ai i latou e tupuga mai ia Aperaamo. Ma maeu so latou mitamita na i ai ona o lea tu masani! O le iuga, na avea ai le “le peritomeina,” o se faaupuga e inosia. (Isaia 52:1; 1 Samuelu 17:26, 27) Ua faafaigofie ai la ona iloaina le mafuaaga na mananao ai nisi Kerisiano Iutaia ina ia tausisia pea lea faailoga. O nisi o i latou na matuā talanoa atu lava ia Paulo ma Panapa i lenei mataupu. Ina ia maua se iuga, na ō atu ai Paulo ma isi i Ierusalema ina ia latou fesili atu i le vaega pule faa-Kerisiano.—Galuega 15:1, 2.

9. O ā ni faasusuluina mai o le malamalama na faaali atu i le uluai vaega pule, e pei ona tusia i le Galuega mataupu e 15?

⁹ I lea taimi, sa le ala mai i se vavega manino na maua ai e na uluai Kerisiano le malamalama e faapea o le peritomeina ua le toe avea o se mea e manaomia mo auauna a Ieova. Nai lo lena, na latou mauaina lena faateleina o le malamalama e ala i le sailiili i le Tusi Paia, vaavaai atu i le agaga paia mo le taʻitaʻiga ma faalogo atu i le faaliliuina e Peteru ma Paulo o tagata o Nuuese le peritomeina. (Galuega 15:6-21) Na faaoo atu le faaiuga i se tusi e faapea le faitauina o sona vaega: “Auā ua lelei i le Agaga Paia ma i matou nei, ia le faaee atu se tasi avega ia te outou, na o nei mea e tatau: ia faamamao outou i mea e fasia mo tupua, ma le toto, ma mea titina, ma le faitaaga.” (Galuega 15:28, 29) O lea na tuusaoloto mai ai uluai Kerisiano mai le poloaiga ina ia peritomeina ma mai i isi mea na faatonuina e le Tulafono Faa-Mose. Ma na mafai ai foi ona taʻu atu e Paulo i Kerisiano i Kalatia e faapea: “I le saʻolotoga ua faasaʻoloto mai ai Keriso ia te i tatou.”—Kalatia 5:1.

Malamalama o i Talalelei

10. O ā nisi o faasusuluina mai o le malamalama na faaalia mai i le Talalelei a Mataio?

¹⁰ O le Talalelei a Mataio na tusia e tusa ma le 41 T.A., e le fesiligia le i ai o le tele o le faasusuluina mai o le malamalama e aogā mo ē e faitau i ai. Pe a faatusatusa atu i ai, e toaitiiti lava Kerisiano o le uluai senituri na faalogo moni atu a o talatalaina atu atili e Iesu ana aʻoaʻoga. I se tulaga maʻoti, na faatāua mai ai le Malo e avea ma matua o le talaʻiga a Iesu i le Talalelei a Mataio. Ma maeu le faamamafa atu e Iesu o le tāua o le i ai o le vaaiga saʻo! Maeu se faasusulu atu o le malamalama na i ai i lana Lauga i luga o le Mauga, i ana faataoto (e pei ona faamauina i le mataupu e 13), ma lana valoaga sili i le mataupu e 24 ma le 25! O nei mea uma na faailoa atu i uluai Kerisiano i tala o faamaumauina i le Talalelei a Mataio, na tusia ina ua mavae le valu tausaga talu mai le uluai Penetekoso i le 33 T.A.

11. O le ā e mafai ona taʻua e faatatau i mataupu o i le Talalelei a Luka ma Mareko?

¹¹ E tusa ma le 15 tausaga mulimuli ane, na tusia ai e Luka lana Talalelei. A o tele ina tutusa ma tala o faamauina i le Mataio, e 59 pasene isi tala ese o i ai. Na tusia e Luka vavega e ono na faia e Iesu, ma e sili atu i le faaluaina le tele o Ana talafaatusa e le o taʻua maia e isi tusitala o le Talalelei. E aliali mai i ni nai tausaga mulimuli ane, na tusia ai e Mareko lana Talalelei, ma faatāua ai Iesu Keriso o se tagata e gaoioi e tusa ma ana upu, o se faivavega. A o toe taʻua e Mareko tala o mea na tutupu ua uma ona faamauina e Mataio ma Luka, na ia tusia ai se faataoto e tasi sa lei tusia e Mataio ma Luka. I lena talafaatusa, na faatusa ai e Iesu le Malo o le Atua i fatu e tatupu, tutupu maualuluga, ma mulimuli ane ona fua mai ai lea o ni fua.a—Mareko 4:26-29.

12. O le ā le tele ua saunia mai e le Talalelei a Ioane e faatatau i le faasusuluina atili mai o le malamalama?

¹² Ona i ai foi lea ma le Talalelei a Ioane lea na tusiaina i le silia ma le 30 tausaga talu ona mavae le tusiaina e Mareko o lana tusi. Maeu le tele o le malamalama na aumaia e Ioane i le faiva a Iesu, a e maise lava o le tele o faasinoga i Lona soifuaga muamua lea sa i ai a o lei avea o ia ma tagata! E na o Ioane lava na ia aumaia le tala i le faatuina o Lasalo, ma e na o ia foi na ia aumaia le tele o fetalaiga lelei a Iesu i ona aposetolo faamaoni e faapena ma lana tatalo faamafanafana loto i le po na faalataina ai o ia, e pei ona faamauina i le mataupu e 13 e oo i le 17. O le mea moni, ua taʻua e faapea o le 92 pasene o le Talalelei a Ioane e matuā ese lava mai isi tusi.

Faasusuluina o le Malamalama i Tusi a Paulo

13. Aisea ua manatu ai nisi i le tusi a Paulo i Roma e pei o se isi Talalelei?

¹³ Na faaaogaina faapitoa le aposetolo o Paulo e aumaia le malamalama o le upu moni i le olaga Faa-Kerisiano i taimi o le au aposetolo. Mo se faataʻitaʻiga, o le tusi a Paulo i Roma, na tusia i le 56 T.A.—e tusa o le taimi tonu foi lea na tusia ai e Luka lana Talalelei. I lenei tusi, na faamatilatila atu ai e Paulo e faapea, e maua le amiotonu ona o le alofa tunoa o le Atua ma e ala mai i le faatuatua ia Iesu Keriso. O le faatāuaina e Paulo o lenei vala o le tala lelei na manatu ai isi i lana tusi atu i Roma na pei o se Talalelei lona lima lea.

14-16. (a) I lana uluai tusi i Kerisiano i Korinito, o le a le malamalama na faasusulu atu e Paulo e faatatau i le manaomia o le autasi? (e) O le ā le malamalama na faasusulu atu atili e tusa ai i amio, o loo i le tusi Muamua i Korinito?

¹⁴ Na tusi atu Paulo i nisi o mataupu patino na fai ma faalavelave i Kerisiano i Korinito. O lana tusi i Korinito na aofia ai le tele o fautuaga faagaeeina ua aogā mo Kerisiano e oo mai lava i o tatou aso. I le faatomuaga, sa tatau ai ia te ia ona faamalamalama atu i Kerisiano mea sese na latou faia i le faia lea o ni a latou amioga faaituau atu i nisi tagata. Na faasaʻoina e le aposetolo i latou e ala lea i lona taʻu atu ma le loto tele ia i latou e faapea: “Le au uso e, ou te aioi atu ia te outou i le suafa o lo tatou Alii o Iesu Keriso, ina ia tasi la outou upu uma lava, ina neʻi i ai ni maseiga ia te outou; a ia maopoopo lava i le loto e tasi ma le manatu e tasi.”—1 Korinito 1:10-15.

¹⁵ O amioga le mamā sa tuu ai pea i le faapotopotoga Kerisiano i Korinito. Na nonofo se tasi tamaloa ma le avā a lona tamā, o lea na faia ai ‘le faitaaga sa le o taʻua i nuu ese.’ Na tusi atu ma le manino Paulo e faapea: “O lenei, ia faateaeseina e outou lena tagata amio leaga ia te outou.” (1 Korinito 5:1, 11-13) O se mea lena sa fou i le faapotopotoga Kerisiano—o le faateaina. O se tasi mataupu na manaomia ai e le faapotopotoga i Korinito le faamalamalamaina na faatatau lea i le mea moni o le aveina e nisi o ona sui, o o latou uso faaleagaga i faamasinoga faalelalolagi ina ia foia ai finauga. Na aoaia ma le malosi e Paulo i latou ona o le faia faapea.—1 Korinito 6:5-8.

¹⁶ O se tasi o mataupu na fai ma mala i le faapotopotoga i Korinito sa aafia ai tulaga tau feusuaiga. I le 1 Korinito mataupu e 7, na faaalia ai e Paulo e faapea ona o le taatele o amioga faaleituaiga le mamā, na lelei ai i tane uma lava ona taitasi ma lana avā, ia taitasi foi fafine uma lava ma a latou tane. Na faaalia foi e Paulo e faapea, a o mafai e e o nofofua ona auauna ia Ieova ma le itiiti o le fetosoaiina solo, a e e le o tagata uma ua latou maua lenei mea alofa o le nofofua. Ma afai e oti le tane a se fafine, o le a saoloto o ia e toe faaipoipo a e “tau lava i le ua le Alii.”—1 Korinito 7:39.

17. O le ā le malamalama na faasusulu mai e Paulo e faatatau i le aʻoaʻoga i le toetu?

¹⁷ Maeu le faasusuluina mai o le malamalama ina ua faaaogā e le Alii ia Paulo e faapupulaina mai ai le mataupu i le toetu! O le ā le ituaiga tino o le a toe faatutuina aʻe ai Kerisiano faauuina? Na tusi mai Paulo e faapea, “e luluina le tino faaletino, e toe faatuina mai o le tino faaleagaga.” E leai se tino faaletino o le a aveina aʻe i le lagi, talu ai “e le mafaia ona avea o le malo o le Atua ma tofi o i latou ua i ai tino aano ma toto.” Na faaopoopo mai Paulo e faapea, e le momoe Kerisiano uma i le oti, a e i le vaitaimi o le faatasi mai o Keriso, o le a toe faatutuina faafuasei aʻe ai isi i le ola pea e le toe oo lava i ai le oti, i le taimi lava e maliu ai.—1 Korinito 15:43-53.

18. O le ā le malamalama e faatatau i le lumanai o loo i le uluai tusi a Paulo na tusi atu i Tesalonia?

¹⁸ I lana tusi atu i Kerisiano i Tesalonia, na faaaogā ai Paulo ina ia faasusulu atu le malamalama e faatatau i le lumanai. O le aso o Ieova o le a sau e pei o se gaoi i le po. Na faamatala mai foi faapea e Paulo: “Auā pe a latou fai ane, ‘O loo filemu, ua le afaina,’ ona oo lea ia te i latou o le fano faafuasei, faapei o le faatiga o le fafine to a fanau mai, latou te le sosola ai lava.”—1 Tesalonia 5:2, 3.

19, 20. O ā ni faasusuluina mai o le malamalama na maua e Kerisiano i Ierusalema ma Iutaia i le tusi a Paulo i Eperu?

¹⁹ I le tusiaina atu o lana tusi i Eperu, na faailoa atu ai e Paulo le malamalama ua faasusuluina mai i uluai Kerisiano i Ierusalema ma Iutaia. Maeu le malosi na ia faailoa atu ai le silisili atu o le faiga tau tapuaiga faa-Kerisiano nai lo le faiga faaletapuaiga Faa-Mose! Nai lo le mulimuli atu i le Tulafono na faaooina mai e ala i agelu, ua i ai i Kerisiano le faatuatua i se faaolataga na uluai taʻua mai e le Alo o le Atua, o lē silisili atu i lo avefeau faaagelu. (Eperu 2:2-4) Sa avea Mose e na o se tautua i le fale o le Atua. A e peitai ane, e pule Iesu Keriso i le aiga atoa. O Keriso o se faitaulaga sili e uiga faatasi ma Mekisateko, e i ai sona tulaga e silisili atu ona maualuga nai lo le au faitaulaga mai le ituaiga o Arona. Na faasino mai foi e Paulo e faapea, na le mafai e tagata Isaraelu ona ulu atu i le malologa o le Atua ona o le leai o se faatuatua ma le le usiusitai, a e e ulu atu i ai Kerisiano ona o lo latou faamaoni ma le usiusitai.—Eperu 3:1–4:11.

²⁰ Ua faapena foi ona silisili atu le feagaiga fou nai lo le feagaiga o le Tulafono. E pei ona valoia mai i le 600 tausaga ua tuanai i le Ieremia 31:31-34, o i latou o i le feagaiga fou, ua tusia tulafono a le Atua i o latou loto ma maua le faamagaloga moni o agasala. Nai lo le i ai o se ositaulaga sili e ofoina atu taulaga i tausaga taitasi mo ana lava agasala faapena foi ma le nuu, ua i ai i Kerisiano lo latou Faitaulaga Sili o Iesu Keriso, o le e leai se agasala ma ua ia faia faatasi le taulaga mo agasala. Nai lo le ulu atu i se mea paia na faia e lima e faaoo atu i ai lana taulaga, na ulu atu o ia i le lagi lava, ina ia iloa ai o ia i luma o Ieova. E faaopoopo atu i ai, o taulaga e osia i manu i lalo o le feagaiga o le Tulafono Faa-Mose e le mafai ona aveesea atoatoa ai agasala, ana mafai semanū e le faia i tausaga uma. A e o le taulaga a Keriso, na faatasi ona faia, e le toe faia lava, ma e aveesea ai agasala. Na faasusulu atu e nei mea uma le malamalama i le malumalu faaleagaga, i le lotoā o loo faapea ona auauna atu ai i aso nei le vaega totoe faauuina ma “isi mamoe.”—Ioane 10:16; Eperu 9:24-28.

21. O le ā ua faaalia mai i lenei talanoaga e tusa ai ma le faataunuuina o le Salamo 97:11 ma le Faataoto 4:18 i taimi o aposetolo?

²¹ E lē lava le avanoa i le pepa e taʻuina atu ai nisi faaaʻoaʻoga o le faasusuluina atu o le malamalama, e pei ona taʻua i tusi a le aposetolo o Peteru ma faapena foi i tusi a soo o Iakopo ma Iuta. A e peitai, o mea o taʻua i luga, e tatau ona lava lena e faaalia ai e faapea, o le Salamo 97:11 ma le Faataoto 4:18 sa i ai ni o la faataunuuga ofoofogia i le vaitaimi o aposetolo. Na amata ai ona see ese le upu moni mai i mea na fai ma taʻitaʻitama ma ata, i o latou faataunuuga ma mea moni.—Kalatia 3:23-25; 4:21-26.

22. O le ā na tupu ina ua mavae le maliliu o aposetolo, ma o le ā o le a faailoa mai e le isi mataupu o sosoo mai?

²² Ina ua mavae le maliliu o aposetolo o Iesu ma le tulai mai o le faaaposetasi lea na valoiaina, na tau pulapula ai le susulu o le upu moni. (2 Tesalonia 2:1-11) E ui lava i lea, e tusa ai ma folafolaga a Iesu, ina ua mavae le tele o senituri ona toe taliu mai ai lea o le Matai ma maua mai le “auauna faamaoni ma le mafaufau,” o avatu i ana “auauna” a latou mea e ʻai i ona itu aso tatau. O le iuga, na faapea ai loa ona tofia e Iesu Keriso lena auauna “e pule i ana mea uma.” (Mataio 24:45-47) O ā ni faasusuluina mai o le malamalama na sosoo mai ai? O le a talanoaina lenei mea i le mataupu lea o loo sosoo mai.

[Faaopoopoga i lalo]

Faasusuluina mai o le Malamalama—Tele ma Iti (Vaega Muamua)

“A o le ala o e amiotonu, e tusa ia ma le malamalama o le ao, o loo tupu pea lona malamalama e oo i le tutonu o le la.”—FAATAOTO 4:18.

1. Aisea ua auauai malie mai ai le faaalia mai o le upu moni?

O LE faamaoniga lenei o le poto mai le Atua, i le ogatusa ma le Faataoto 4:18, o le faaalia mai o upu moni faaleagaga ua auauai malie mai e ala i le faasusulu mai o le malamalama. I le mataupu na mavae atu, na tatou iloa ai pe na faapefea ona faataunuu lenei mau i taimi o aposetolo. Pe ana fai e faailoa mai se vaega tele o upu moni uma mai le Tusi Paia i se taimi e tasi, semanū e faatauasoina ai ma fenuminumiai ai—e pei lava o āuga e oo i ai pe a ulu mai i se ana pogisa ma taia i se malamalama pupula mai le la. E le gata i lea, o le faaalia auauai mai o le upu moni e faamalosia ai le faatuatua o Kerisiano i se auala faifai pea. E faapupula atili ai lo latou faamoemoe ma faamanino atili ai le ala o latou savavali ai.

“Le Auauna Faamaoni ma le Mafaufau”

2. Na faailoa mai e Iesu o ai o le a na ia faaaogaina e aumaia ai le malamalama faaleagaga i ona soo, ma o ai o faia aʻe ai lena mea faigaluega?

² I taimi o aposetolo, na silafia ai e Iesu Keriso le talafeagai ona faaaogā le mana e avatu ai i ona soo le uluai faasusuluina o le malamalama. Ua i ai ia i tatou ni faaaʻoaʻoga se lua o lenei mea: i le Penetekoso 33 T.A. ma le faaliliuina o Konelio i le 36 T.A. I le faagasologa mai o taimi, na silafia ai e Keriso le talafeagai ona faaaogā se mea faigaluega e faia aʻe i tagata, e pei ona uluai taʻua mai e faapea: “O ai foi le auauna faamaoni ma le mafaufau, ua tofia e lona alii e pule i ana auauna, ia avatu a latou mea e ʻai i ona itu aso? Amuia lea auauna, pe a sau lona alii e maua o ia o loo faapea ona fai. E moni, ou te fai atu ia te outou, e tofia o ia e pule i ana mea uma.” (Mataio 24:45-47) O lenei auauna e le mafai ona avea ma tagata e toatasi ona sa tatau ia te ia ona saunia mea e ʻai faaleagaga mai le taimi na amata ai le faapotopotoga Kerisiano i le Penetekoso, seia oo i le taimi e sau ai le Matai, o Iesu Keriso, e asiasi. Ua faaalia e mea moni e faapea o lenei vasega o le auauna faamaoni ma le mafaufau e faia aʻe i se vasega o Kerisiano uma faauuina i luga o le lalolagi i so o se taimi lava.

3. O ai na aofia ai i uluai sui o le vasega o le auauna?

³ O ai i latou na aofia ai o uluai sui o le vasega o le auauna faamaoni ma le mafaufau? O se tasi o i latou ia o le aposetolo o Peteru, o le na usitaia le poloaiga a Iesu: “Ia e fafaga i aʻu mamoe.” (Ioane 21:17) O isi uluai sui o le vasega o le auauna na aofia ai Mataio, o lē na tusia le Talalelei na faaigoa i lona igoa, ma Paulo, Iakopo, ma Iuta, o e na tusia tusi faagaeeina. O le aposetolo o Ioane, o le na tusia le tusi o Faaaliga, lana Talalelei, ma ana tusi, sa avea foi ma se sui o le vasega o le auauna faamaoni ma le mafaufau. Na tusia e nei tane tusi o le Tusi Paia e tusa ma le faatonuga Iesu.

4. O ai “ana auauna”?

⁴ Afai o ē e faauuina o se vaega, e tusa lava po o fea o latou nonofo ai i le lalolagi, o sui o le vasega o le auauna, o ai la “ana auauna”? O i latou lava ia o e ua faauuina, peitai ua tagai mai i ai i se isi itu e ese—i le avea ma tagata taitoatasi. Ioe, i le avea ma tagata taitoatasi i totonu o le vasega o le “auauna,” po o le i ai i “ana auauna,” e faalagolago lava pe o latou avatuina mea e ʻai po o le aai i mea e ʻai. Seʻi fai se faataʻitaʻiga: E pei ona faamauina i le 2 Peteru 3:15, 16, na faatatau atu ai upu a Peteru i tusi a Paulo. I le faitauina o na tusi, na avea ai Peteru ma se tasi o ana auauna o ʻai i le mea e ʻai faaleagaga na saunia e Paulo o se sui o le vasega o le auauna.

5. (a) O le ā na tupu i le auauna i le vaitaimi o senituri ina ua mavae le au aposetolo? (e) O le ā le gasologa na tuputupu aʻe i le afa mulimuli o le senituri lona 19?

⁵ I lenei vala, na faapea mai ai le tusi God’s Kingdom of a Thousand Years Has Approached: “I le pe na faapefea ona i ai ma tautua le ‘auauna faamaoni ma le mafaufau’ i senituri talu ona mavae le maliliu o aposetolo ma le Matai o Iesu Keriso, e le o ia i tatou se ata manino ua faamaumauina. E manino na fafaga e lea āuga tupulaga o le vasega a ‘auauna’ le isi tupulaga fai aʻe ma faasolo mai ai lava. (2 Timoteo 2:2) Peitai ane i le afa mulimuli o le senituri lona sefulu iva, na i ai ni tagata e matatau i le Atua o ē e naunau i mea e ʻai faaleagaga mai le Tusi Paia ma na faanaunau foi latou e fafagaina mai ai i latou . . . Na faia ai ni vasega e suesueina ai le Tusi Paia ma agaigai ai i luma i le malamalamaga o upu moni autū o i Tusitusiga Paia. O tagata suesue o le Tusi Paia le manatu faapito na naunau e tufa atu nei vaega tāua o mea e ʻai faaleagaga i isi. Na ia i latou le agaga faamaoni o le ‘auauna’ na tofiaina ina ia faaoo atu i ‘ana auauna’ mea na manaomia faaleagaga o ‘mea e ʻai i lona taimi e tatau ai.’ Na ‘mafaufau’ i latou i le iloaina e faapea o le taimi tonu lea ma le tatau, ma o le ala sili lea e tufaina atu ai mea e ʻai. Na latou maumauai i le tautuaina atu o mea e ʻai.”—Itulau 344-345.a

Uluai Faasusuluina mai o le Malamalama i Ona Po Nei

6. O le ā le mea moni ua tu matilatila i le fesootai atu i le faaalia faasolosolo mai o le upu moni?

⁶ O se tasi o mea moni ua tu matilatila mai i le fesootai atu ia i latou e faaaogā e Ieova e aumaia lenei faatelega faasolosolo o le malamalama faaleagaga ona latou te le fia viiviia ai i latou lava. O le manatu o C. T. Russell, o le uluai peresitene lea o le Sosaiete o le Olo Matamata na faapea, na fiafia le Alii e faaaogā a latou taleni faatauvaa. E faatatau i igoa faifai na faanaunau ona fili e faaaogā, na faailoa atu ma le maumauai e Russell e faapea, na te lei feiloai lava ma sē na faapea mai o ia o se “Russellite” ma e leai lava se mea na taʻua o se “Russellism.” O le viiga uma na tuu atu lea i le Atua

7. O le ā le faamaoniga na tuuina atu e le uso o Russell ma aumea na latou galulue faatasi e faamaonia ai o i latou moni lava o loo auaufaatasi atu i le auauna faamaoni ma le mafaufau?

⁷ I le fua atu i iuga, e aunoa ma se masalomia sa taʻitaʻia e le agaga o Ieova taumafaiga a le uso o Russell ma i latou na faatasitasi ma ia. Na latou avatua faamaoniga o le aufaatasi atu i le auauna faamaoni ma le mafaufau. E ui ina toatele taʻitaʻi lotu o faailoa mai o le Tusi Paia o le Afioga faagaeeina a le Atua ma o Iesu o le Alo o le Atua, a e ua latou talia i le lautele aʻoaʻoga sese faa-Papelonia, e pei o le Tolutasi, le le oti o le solu po o le agaga, ma le faapuapuagatiaina e faavavau. I le ōgatasi ai ma folafolaga a Iesu, o le agaga paia na māfua ai i taumafaiga loto maulalo a le uso o Russell ma ana aumea ona faasusulu atu le upu moni nai lo se isi lava taimi. (Ioane 16:13) O na Tagata Aʻoga faauuina i le Tusi Paia na aumaia ni faamaoniga e faapea e mautinoa lava o se vaega o le vasega o le auauna faamaoni ma le mafaufau, o lana galuega o le saunia lea o mea e ʻai faaleagaga mo auauna a le Matai. O a latou taumafaiga na avea o se fesoasoani tele i le aoaoina mai o e faauuina.

8. O ā mea moni autū e faatatau ia Ieova, le Tusi Paia, Iesu Keriso, ma le agaga paia, na malamalama manino i ai Tagata Aʻoga o le Tusi Paia?

⁸ O se mea ofoofogia le vaaia o le alofagia tele e Ieova, e ala i lona agaga paia, na uluai Tagata Aʻoga o le Tusi Paia i le faasusulu atu i ai o le malamalama. I le amataga, na latou faamautuina ai ma le mausali le i ai o Le na Foafoaina mea ma e na o ia e ona le suafa o Ieova. (Salamo 83:18; Roma 1:20) Na latou iloa e faapea e fa uiga autū o Ieova—o le malosi, faamasinotonu, atamai, ma le alofa. (Kenese 17:1; Teuteronome 32:4; Roma 11:33; 1 Ioane 4:8) Na faamautuina e nei uluai Kerisiano e faapea o le Tusi Paia o le Afioga faagaeeina a le Atua ma o le upu moni. (Ioane 17:17; 2 Timoteo 3:16, 17) E faaopoopo atu i ai, na latou talitonu o le Alo o le Atua, o Iesu Keriso, na foafoaina ma na ia foaiina atu lona ola o se taulaga togiola mo tagata uma. (Mataio 20:28; Kolose 1:15) O le agaga paia o le mana galue o le Atua, e lē tāitāi lava ona avea o se vaega lona tolu o se peresona o le Tolutasi.—Galuega 2:17.

9. (a) O ā upu moni na malamalama manino i ai Tagata Aʻoga o le Tusi Paia e faatatau i le natura o le tagata ma lona faamoemoe o loo i ai i le Tusi Paia? (e) O ā isi upu moni na iloa manino e auauna a Ieova?

⁹ Na iloa manino foi e Tagata Aʻoga o le Tusi Paia e faapea, o le tagata e lē o i ai sona solu po o se agaga e ola pea pe a mavae lona oti, a e o se solu e mafai ona oti. Na latou iloa lelei e faapea “o le oti, o le totogi lea o le agasala,” a e le o le faapuapuagatiaina e faavavau i se nofoaga e pei o le susunuina i seoli. (Roma 5:12; 6:23; Kenese 2:7; Esekielu 18:4) Na latou iloa foi ma le manino e faapea o le aʻoaʻoga faaevolusione e le faale-Tusi Paia, a e e matuā aunoa ma le faavaea mai i ni mea moni. (Kenese, mataupu 1 ma le 2) Na latou matauina ai foi o loo i le Tusi Paia ni faamoemoega se lua—o le tasi e mo le lagi mo le 144,000 o soo faauuina o mulimuli i tulagaaao o Keriso, a o le isi faamoemoe e mo le lalolagi parataiso, mo le “motu o tagata e toatele” e le mafaitaulia o “isi mamoe.” (Faaaliga 7:9; 14:1; Ioane 10:16) O na uluai Tagata Aʻoga o le Tusi Paia na latou iloa e faapea, o le lalolagi e tumau lea e faavavau ma o le a le susunuina, e pei ona aʻoaʻoina e le tele o lotu. (Failauga 1:4; Luka 23:43) Na latou aʻoaʻoina foi e faapea o le toe afio mai o Keriso e le vaaia ma o le a ia faaoo atu le faamasinoga i atunuu ma aumaia ai loa se lalolagi parataiso.—Galuega 10:42; Roma 8:19-21; 1 Peteru 3:18.

10. O ā upu moni na aʻoaʻoina e Tagata Aʻoga o le Tusi Paia e faatatau i le papatisoga, o se faaeseesega manino o faifeau mai le au lotu, ma le Faamanatuina o le maliu o Keriso?

¹⁰ Na iloaina foi e Tagata Aʻoga o le Tusi Paia e faapea, o le papatisoga faale-Tusi Paia e le o se mataupu e tau o le faatulutulu o vai i le pepe, a e peitai ina ia talafeagai ma le poloaiga a Iesu i le Mataio 28:19, 20, o le papatisoga o le faatofuina o e talitonu ua uma ona aʻoaʻoina. Na latou iloa foi e faapea e leai se faavae faale-Tusi Paia mo se faaesea o faifeau mai le au lotu. (Mataio 23:8-10) I le tuufaafeagai ai, o Kerisiano uma lava e tatau ona avea i latou ma ē e talaʻia le tala lelei. (Galuega 1:8) Na talisapaia e Tagata Aʻoga o le Tusi Paia e faapea, o le Faamanatuga o le maliu o Iesu e tatau ona faia faatasi i le tausaga, ia Nisani 14. E le gata i lea, na latou iloa foi o le Eseta o se aso mālōlō e faapaupau. E faaopoopo atu i ai, o na suli faauuina na mautinoa lelei e faapea na lagolagoina e le Atua la latou galuega, ma na latou le aoina ai ni peleti. (Mataio 10:8) Mai i le taimi na faatoʻā amata ai, na latou malamalama lelei ai e tatau ona ola Kerisiano e tusa ai ma mataupu silisili mai le Tusi Paia, e aofia ai le atiina aʻe lea o fua o le agaga paia o le Atua.—Kalatia 5:22, 23.

Faateleina o le Faasusuluina mai o le Malamalama

11. O le ā le malamalama na faasusulu atu i le galuega a Kerisiano ma i le faataoto a Iesu i mamoe ma oti?

¹¹ A e maise lava talu mai le 1919, na faamanuiaina ai auauna a Ieova i le faateleina o le faasusuluina mai o le malamalama. Maeu se pupula mai o le faaalia mai o le malamalama i le tauaofiaga i Cedar Point i le 1922 a o faamamafa atu e J. F. Rutherford, le peresitene lona lua o le Sosaiete o le Olo Matamata le manatu faapea o le tiute tauave autū o auauna a Ieova o le “faalauiloa, faalauiloa, faalauiloa, le Tupu ma lona malo”! I le tausaga lava na sosoo ai, na manino ai le susulu mai o le malamalama e faatatau i le faataoto i mamoe ma oti. Na vaaia ai e faapea e tatau ona faataunuuina lenei valoaga i le vaitaimi lenei o le aso o le Alii, a e le i le Meleniuma i le lumanai e pei ona sa manatu i ai muamua. I le taimi o le Meleniuma, o le a le toe mamaʻi ai uso o Keriso, e faapena foi ona le toe faafalepuipuiina ai i latou. E le gata i lea, i le iuga o le Meleniuma, o Ieova e faia le faamasinoga, a e le o Iesu Keriso.—Mataio 25:31-46.

12. O le ā le faasusuluina mai o le malamalama sa i ai e faatatau ia Amaketo?

¹² I le 1926, na faaalia mai ai se tasi faasusuluina manino mai o le malamalama e faapea, o le taua o Amaketo e le o se fouvalega mai le lautele e pei ona sa manatu muamua i ai Tagata Aʻoga o le Tusi Paia. A e o se taua o le a faapea ona faaalia mai ai e Ieova lona mana ina ia faatalitonuina tagata uma lava o ia o le Atua.—Faaaliga 16:14-16; 19:17-21.

Kirisimasi—O se Aso Mālōlō Faapaupau

13. (a) O le ā le malamalama na faasusulu atu i le faamanatuina o le Kirisimasi? (e) Aisea na le toe faamanatuina ai aso fanau? (Ia aofia ai ma le faaopoopoga i le pito i lalo.)

¹³ E lei umi talu mai lea mea, o se faasusuluina mai o le malamalama na māfua ai ona le toe faamanatuina e Tagata Aʻoga o le Tusi Paia le Kirisimasi. A o lei oo ane i lena taimi, na faamanatu ai pea e Tagata Aʻoga o le Tusi Paia le Kirisimasi i le lalolagi aoao, ma o lona faamanatuina i Brooklyn sa avea o se tausamiga tele. Peitai ane, na iloaina e faapea o le faamanatuina o Tesema 25 sa o se mea moni faapaupau, ma na filifilia e Kerisinetoma aposetate ina ia faafaigofie ai ona faaliliu mai tagata faapaupau. E le gata i lea, na iloaina foi sa le mafai ona fanau mai Iesu i se tau malulu, ona talu ai o le taimi na fanau mai ai o ia, sa i fafo leoleo mamoe o loo faatataa a latou lafu i le fanua—o se mea e le mafai ona latou faia i le po o le taufaaiuiuga o Tesema. (Luka 2:8) Nai lo lea, ua faailoa mai e le Tusi Paia e faapea na fanau mai Iesu e tusa o Oketopa 1. Na iloa foi e Tagata Aʻoga o le Tusi Paia e faapea o tagata e pei ona taʻua o le au makoi na asiasi atu ia Iesu pe a ma le lua tausaga talu ona fanau mai o Iesu, o ni tagata faapaupau e saili faailoga i fetu.b

O se Igoa Fou

14. Aisea na le matuā manino ai le igoa Tagata Aʻoga o le Tusi Paia mo tagata o Ieova?

¹⁴ I le 1931, na faasusulu mai ai ma le manino le malamalama o le upu moni i na Tagata Aʻoga o le Tusi Paia i se igoa fou faale-Tusi Paia e talafeagai lelei. Na malamalama tagata o Ieova e le mafai ona latou talia so o se igoa lautele ua faaigoaina ai i latou e isi, e pei o le Russellites, Millennial Dawnists, ma le “no hellers.”c A e na amata foi ona latou talisapaia e faapea o le igoa na latou tauaveina—International Bible Students—sa matuā le manino le faailoaina atu ai o i latou. Sa tele nisi mea na aofia ai nai lo o ni Tagata Aʻoga o le Tusi Paia. E le gata i lea, sa toatele foi isi tagata suesue o le Tusi Paia a e e lē tāitāi tutusa ma Tagata Aʻoga o le Tusi Paia.

15. O le ā le igoa na taliaina e Tagata Aʻoga o le Tusi Paia i le 1931, ma aisea na talafeagai ai lea igoa?

¹⁵ Na faapefea ona maua e Tagata Aʻoga o le Tusi Paia se igoa fou? Mo le tele o tausaga, na faasilisilia ai e Le Olo Matamata le suafa o Ieova. O lea, na sili ona fetaui ai le taliaina e Tagata Aʻoga o le Tusi Paia le igoa o i le Isaia 43:10: “Ua fetalai mai Ieova, O outou o aʻu molimau, ma laʻu auauna o le na aʻu filifilia; ina ia outou iloa, ma ia outou faatuatua mai ia te au, ma ia outou lagona, o aʻu lava o ia; e leai se atua na gaosia e muamua ia te au; e leai foi se tasi e mulimuli ia te au.”

Le Tusi Vindication ma le “Motu o Tagata e Toatele”

16. Aisea na le faatatau atu ai valoaga o le toe faafoisiaina i Iutaia faaletino na toe foi atu i Palesitina, a e o ai e faatatau i ai?

¹⁶ I le tusi lona lua o le Vindication, na lomia e le Sosaiete o le Olo Matamata i le 1932, na faaalia mai ai e se malamalama na faasusulu mai e faapea o valoaga e faatatau i le toe faafoisiaina na faamauina e Isaia, Ieremia, Esekielu, ma isi perofeta sa lei faatatauina i Iutaia faaletino (e pei ona sa manatu i ai muamua), i latou ia na toe foi atu i Palesitina ma le leai o se talitonu ma ni faanaunauga faapolotiki. Nai lo lea, o nei valoaga o le toe faafoisiaina na i ai se faataunuuga itiiti ina ua toe foi mai Iutaia mai le faaaunuuaina i Papelonia i le 537 T.L.M., a e na i ai se faataunuuga tele i le laveaiina o Isaraelu faaleagaga ma na amata ai le toe faafoisiaina i le 1919 ma iu ai i le manuia o le parataiso faaleagaga o olioli ai auauna moni a Ieova i aso nei.

17, 18. (a) I le taimi tonu, e ala i se faasusuluina mai o le malamalama, o le ā na faailoa mai o le fuafuaga autū a Ieova? (e) O le ā le faasusuluina mai o le malamalama na tupu i le 1935 e faatatau i le Faaaliga 7:9-17?

¹⁷ I le taimi tonu, na faailoa mai ai e le faasusuluina mai o le malamalama e faapea o le fuafuaga autū a Ieova e le o le faaolaina o tagata, a e o le faaeaina o lana pule silisiliese. Na vaaia ai o le matua sili ona tāua o le Tusi Paia e le o le togiola, a e o le Malo, aua o le a na faaeaina le pule silisiliese a Ieova. Maeu se faasusuluina mai o le malamalama na i ai i lena mea! Na le faamuamuaina ai loa e Kerisiano tuuina atu lo latou ō atu i le lagi.

¹⁸ I le 1935, na faailoa mai ai e se susulu manino mai o le malamalama e faapea o le motu o tagata e toatele o taʻua i le Faaaliga 7:9-17 sa le o se vaega lona lua mo le lagi. Sa manatu muamua i ai e faapea o i latou o taʻua i na fuaiupu sa faatatau atu lea i nisi o e na faauuina sa le faamaoni aʻiaʻi ma o loo tutū i luma o le nofoalii nai lo le tietie i nofoalii o ni tupu ma ositaulaga faatasi ma Iesu Keriso. A e peitai ane, e leai ma se mea e taʻua o le itiiti o sina faamaoni. E lua lava mea, o le faamaoni po o le le faamaoni. O lea na iloa ai e faapea o lenei valoaga na faatatau atu i le motu o tagata e toatele e le mafaitaulia mai atunuu uma lava o loo aoaoina nei ma o lo latou faamoemoe e mo le lalolagi. O i latou o “mamoe” o taʻua i le Mataio 25:31-46 ma o “isi mamoe” o i le Ioane 10:16.

O le Koluse—E Lē o se Faailoga Faa-Kerisiano

19, 20. Aisea e le mafai ai ona avea le koluse ma se faailoga o le Faa-Kerisiano moni?

¹⁹ I le tele o tausaga na faia ai e Tagata Aʻoga o le Tusi Paia le koluse o se faailoga lauiloa o le Faa-Kerisiano. Sa faia foi ni a latou pine o loo i ai le ata o le “palealii ma le koluse.” E tusa ai ma le King James Version, na fetalai atu ai Iesu i ona soo ina ia amoina a latou “koluse,” ma e toatele na talitonu e faapea na faaooina le maliu ia te ia i luga o se koluse. (Mataio 16:24; 27:32) Mo le faitau sefulu o tausaga, na aliali mai ai lenei faailoga i le faavaa o le mekasini o le Olo Matamata.

²⁰ O le tusi o le Riches, na lomia e le Sosaiete i le 1936, na faamanino mai ai e faapea sa fasiotia Iesu Keriso i luga o se pou saʻo, po o se laau, a e le o se koluse. E tusa ai ma se tasi upu sii mai se tasi tusi, o le upu Eleni (stau·rosʹ) ua faaliliuina “koluse” i le King James Version ua “faailoa mai ai se uiga autu e faatatau atu i se pou saʻo po o se laau. [E tatau] ona faaesea mai i manatu faalelotu o ni laau felavasai se lua. . . . O le manatu mulimuli e faapea o ni laau felavasai se lua na pogai mai i Kaletaia anamua, ma na faaaogā ai o se faatusa o le atua o Tamusa.” Nai lo le tapuaia, e tatau ona vaai i le auupega na faasatauroina ai Iesu o se mea inosia.

21. O le ā o le a talanoaina i le isi mataupu o sosoo mai?

²¹ O loo i ai faataʻitaʻiga atili o le faasusuluina mai o le malamalama i mea tetele ma mea atonu e manatu i ai o ni mea iti. Mo se talanoaina o nei mea, faamolemole tagai i le mataupu o sosoo mai.

[Faaopoopoga i lalo]