Fesoasoani i Lau Tama Talavou Ina ia Agaigai i Luma ma Manuia Ai

1, 2. O ā luʻi, ae o ā tulaga olioli e mafai ona aumaia e tausaga talavou?

O LE iai o se talavou i le aiga e matuā ese lava mai le iai o se tamaitiiti e lima pe sefulu tausaga le matua. O tausaga talavou e aumaia ai o latou lava luʻi ma faafitauli, ae mafai foi ona aumaia ai tulaga olioli ma taui lelei. O faaaoaoga e pei o Iosefa, o Tavita, o Iosia, ma Timoteo e faaalia ai e mafai e tagata talavou ona gaoioi i se uiga taʻumatuaina ma maua ai foi se faiā lelei ma Ieova. (Kenese 37:2-11; 1 Samuelu 16:11-13; 2 Tupu 22:3-7; Galuega 16:1, 2) E toatele talavou i aso nei ua latou faamaonia maia lea lava manatu. Atonu o loo e iloa nisi o i latou.

² Peitai, mo nisi, o tausaga o le talavou o ni tausaga o faalavelave. Ua oo i tagata ua matutua aʻe faalogona lelei ma faalogona tiga. Atonu e mananao tama ma teine talavou ina ia faateleina atili so latou olaga tutoatasi, ma atonu latou te feita i tapulaa ua faatulai atu e o latou mātua. Peitai, o na talavou e lē o lava pea so latou tomai ma o loo latou manaomia fesoasoani alofa ma le onosai mai o latou mātua. Ioe, o tausaga talavou e mafai ona fiafia, ae mafai foi ona lavelave tele​—e lē gata i mātua ae mo talavou. E mafai faapefea ona maua e talavou se fesoasoani a o faagasolo nei tausaga?

3. I le ā le auala e mafai ai e mātua ona avatu i a latou fanau ua matutua aʻe se avanoa lelei i le olaga?

³ O mātua o loo usitaia fautuaga a le Tusi Paia ua latou avatu i a latou fanau ua matutua aʻe se avanoa e sili ona lelei ua maua, ia agaʻi ai i luma ma le manuia a o fesagai ma na tofotofoga i le avea ma se tagata matua maufaatuatuaina. I atunuu uma ma i le faagasologa o vaitaimi uma, ua faamanuiaina ai i le taulau manuia, mātua ma talavou o ē latou te faatatauina faatasi mataupu silisili o le Tusi Paia.​—Salamo 119:1.

O FESOOTAIGA E FAAMAONI MA SAʻOLOTO

4. Aisea ua matuā tāua ai talanoaga maufaatuatuaina a o faagasolo tausaga talavou?

⁴ Ua faapea mai le Tusi Paia: “E faaleaogaina fuafuaga pe a leai se talanoaga maufaatuatuaina.” (Faataoto 15:22, NW) Afai sa manaomia talanoaga maufaatuatuaina a o laiti le fanau, ua sili atu ai la ona matuā tāua a o faagasolo tausaga talavou​—pe afai ua itiiti ni taimi e faaalu e talavou i le aiga ae ua tele taimi e faaalu ma uo aʻoga po o isi aumea. Pe a leai se talanoaga maufaatuatuaina​—se fesootaiga e faamaoni ma saʻoloto i le va o fanau ma mātua​—e mafai ona avea talavou o ni tagata ese i le aiga. E mafai la faapefea ona tausia pea le iai o ni fesootaiga?

5. Ua faalaeiauina fanau talavou ina ia manatu faapefea i le mataupu o le fesootai atu i o latou mātua?

⁵ E ao uma i talavou ma mātua ona faia a latou vaega i lenei tulaga. E moni, atonu ua sili atu ona faafaigata i tamaiti ua matutua aʻe ona talanoa atu i o latou mātua nai lo le tulaga sa latou iai a o laiti. Ae ui i lea, ia manatua “a leai se taʻitaʻiga poto, e malaia le nuu; a o le toatele o faipule e faaolaina ai.” (Faataoto 11:14, NW) E faatatau atu nei upu i tagata uma lava, o ē talavou faapea ma ē matutua. O fanau talavou o ē ua latou iloa lenei mea o le a malamalama la, o loo latou manaomia pea ni taʻiala tomai, talu ai o loo latou fesagai ma mataupu e sili atu ona lavelave nai lo le taimi muamua. E tatau ona latou mātauina o o latou mātua talitonu ua agavaa lelei e avea ma faufautua auā ua sili atu lo latou poto masani i le olaga ma ua faamaonia lo latou manatu alofa i le tele o tausaga. O lea, i lenei vaitaimi o o latou olaga, o le a lē liliu ese ai talavou atamamai mai o latou mātua.

6. O le ā le uiga o le a iai i ni mātua e atamamai ma alolofa, i le fesootai atu i a latou fanau talavou?

⁶ O fesootaiga saʻoloto o lona uiga o le a taumafai malosi mātua ia faaavanoa atu so latou taimi pe a manao le talavou e fia talanoa. Pe afai o oe o se matua, ia mautinoa o loo tatala pea lau itu o fesootaiga. Atonu e lē faigofie lenei mea. Ua faapea mai le Tusi Paia e iai “ona po e faalologo ai, ma ona po e tautala ai.” (Failauga 3:7) Pe a lagona e lau tama talavou o le taimi lea mo ia e talanoa atu ai, atonu o le taimi la lea mo oe e faalologo ai. Atonu ua e faataatia ese lena taimi mo suesuega totino, o malologa, po o ni galuega i le fale. Peitai, afai e manao lau tama talavou e talanoa atu ia te oe, ia e taumafai e toe fetuunai au fuafuaga ae faalogologo atu. Auā pe a lē faia faapea, atonu o le a ia lē toe taumafai loa. Ia manatua le faaaoaoga a Iesu. I se tasi aso, sa ia fuafuaina ai se taimi e mālōlō ai. Ae ina ua lolofi ane tagata ma tumutumu i ona autafa, na toe tolopo lana malologa ae amata ona aʻoaʻo atu ia i latou. (Mareko 6:30-34) O le toatele o talavou latou te iloa le tele o meafai i olaga o o latou mātua, peitai latou te manaomia le faamautinoaga e faapea o le a fesoasoani atu pea o latou mātua pe a latou manaomia. O lea la, ia faaavanoa atu oe ma ia e taumafai e loto malamalama.

7. O le ā e manaomia i mātua ona ʻalo ese mai ai?

⁷ Ia taumafai e manatua pe na faapeī le taimi a o avea oe o se talavou, ma ia aua neʻi mou atu lou uiga agamālie! E manaomia ona olioli mātua i le iai faatasi ma a latou fanau. Pe a iai se taimi e avanoa, o faapeī ona faaaogā e mātua? Pe afai e masani ona latou mananao e faaaogā o latou taimi avanoa e faia ai mea e lē o faaaofia ai o latou aiga, o le a vave lava ona mātaulia e a latou fanau talavou. Pe a oo ina faia e tamaiti ua matutua aʻe se faaiuga faapea, e sili atu ona manatu mamafa mai a latou uo aʻoga ia i latou nai lo o o latou mātua, o lona uiga la ua amata ona iai faafitauli.

O MEA E AO ONA TALANOA I AI

8. E mafai faapefea ona faaalia atu i le fanau le agaga talisapaia mo le faamaoni, le galue mamafa, ma amioga talafeagai?

⁸ Pe afai e lei aʻoaʻoina e mātua a latou fanau ina ia talisapaia le faamaoni ma le galue mamafa, ua matuā mautinoa la le tatau loa ona faia faapea a o faagasolo tausaga talavou. (1 Tesalonia 4:11; 2 Tesalonia 3:10) E tāua foi mo i latou ona faamautinoa o loo talitonu ma le loto atoa a latou fanau i le tāua o le ola i se olaga amio lelei ma le mamā. (Faataoto 20:11) E tele ina fesootai se matua i nei vala e ala atu i faaaoaoga. E pei lava o ni tane lē talitonu e mafai ona “maua i latou i le amio lelei a avā, a e leai se upu,” e faapena foi ona mafai e fanau talavou ona aʻoaʻoina mataupu silisili saʻo e ala i amio a o latou mātua. (1 Peteru 3:1) Peitai, e lē taitai ona lava le tau ina iai o faaaoaoga, auā ua taaʻina foi le fanau i le tele o faaaoaoga leaga ma le fetaomi mai o manatu taufaasese i fafo atu o le aiga. O mātua alolofa la e manaomia ona latou iloa manatu o a latou fanau talavou i mea o loo latou vāai ma faalogo i ai, ma e manaomia ai i lenei tulaga se talanoaga uigā.​—Faataoto 20:5.

9, 10. Aisea e ao ai i mātua ona mautinoa ua faatonuina a latou fanau e faatatau i mataupu o faiga faaleituaiga, ma e mafai faapefea ona latou faia lenei mea?

⁹ Ua patino le moni o lenei manatu pe a oo mai i mataupu tau i faiga faaleituaiga. Mātua e, pe tou te matamumuli ea e talanoa faiga faaleituaiga ma a outou fanau? E tusa lava pe tou te matamumuli, ia faia pea se taumafaiga e faia ai faapea, auā e mautinoa lava o le a iloa e a outou fanau le mataupu lena mai se isi. Pe afai latou te lē iloa mai ia te outou, ia o ai na iloa po o ā faamatalaga sese o le a latou maua? I le Tusi Paia, e lē o alofia ai e Ieova mataupu o tulaga faaleituaiga, ma e lē tatau foi la i mātua ona alofia.​—Faataoto 4:1-4; 5:1-21.

¹⁰ E faafetaia, ona ua iai i le Tusi Paia taʻiala manino i le mataupu o amioga faaleituaiga, ma ua faasalalauina e le Sosaiete o le Olomatamata le tele o faamatalaga aogā e faaalia ai o lenei taʻiala o loo faatatauina pea i le lalolagi i ona po nei. Aisea e lē faaaogā lelei ai lenei fesoasoani? Mo se faaaoaoga, aisea e lē autaluina ai ma o outou atalii po o outou afafine mataupu talafeagai o loo i le Tusi 1 ma le 2 o le tusi Questions Young People Ask​—Answers That Work? Atonu tou te matuā ofo i iuga e maua mai ai.

11. O le ā le auala e sili atu ona uigā mo mātua ina ia aʻoaʻo atu ai i a latou fanau le auala e auauna ai ia Ieova?

¹¹ O le ā le mataupu e sili ona tāua e tatau i mātua ma fanau ona talanoaina? Na faasino atu i ai le aposetolo o Paulo ina ua ia tusi: “Ia tausi atu [i a outou fanau] i aoaiga ma apoapoaiga a le Alii.” (Efeso 6:4) E manaomia ona aʻoaʻoina pea fanau e uiga ia Ieova. Ae maise lava, e manaomia ona aʻoaʻoina i latou ia alolofa ia te ia, ma e tatau ona latou mananao e auauna ia te ia. I lenei foi la itu, e mafai ona tele ni mea e aʻoaʻoina mai faaaoaoga. Pe afai e vāai tamaiti ua tau matutua aʻe o loo alolofa o latou mātua i le Atua ʻma o latou loto atoa ma o latou ola atoa ma o latou manatu atoa,’ ma o loo fua mai ai i lenei itu ni fua lelei i olaga o o latou mātua, atonu la o le a taaʻina lelei ai foi i latou e faia faapena. (Mataio 22:37) E faapena foi pe afai e vāai talavou o loo iai i o latou mātua se vaaiga talafeagai i mea faitino, i le faamuamuaina o le Malo o le Atua, o le a fesoasoani lena ia i latou e atiina aʻe le uiga faalemafaufau lava lena.​—Failauga 7:12; Mataio 6:31-33.

12, 13. O ā manatu tāua e tatau ona manatua pe a e fia taulau manuia i le suesuega a le aiga?

¹² O se suesuega faale-Tusi Paia a le aiga i vaiaso taitasi o se fesoasoani mataina lea i le fesootai atu i tagata talavou i mea aogā faaleagaga. (Salamo 119:33, 34; Faataoto 4:20-23) O le iai o se suesuega faifai pea faapena e matuā tāua lava. (Salamo 1:1-3) E ao i mātua ma a latou fanau ona iloa e tatau ona faatulaga muamua le suesuega a le aiga nai lo isi mea, ae e lē o le faamuamua o isi mea. E lē gata i lea, e manaomia tele se vaaiga saʻo pe afai e tatau ona uigā le suesuega a le aiga. Na faapea mai se tasi tamā: “O le ki, o le taumafai lea o lē o loo faafoeina le suesuega e faamausalī se siomaga toafilemu ae faaaloalo, a o faagasolo le suesuega a le aiga​—e lē soona sasaluina ae e lē o le soona faatalalē foi i ai. O le paleni saʻo atonu e lē faigofie pea ona maua, ma o le a manaomia pea e talavou le faasaʻoina o o latou uiga. Pe afai e lē taulau mai mea i se tasi taimi, ia naunautai ma taulai atu le vaai i le isi taimi.” Na faapea mai foi lenei lava tamā, pe a faia lana tatalo a o lei faia suesuega uma, na te talosaga patino atu ai mo le fesoasoani a Ieova ina ia maua manatu saʻo e i latou uma o loo aofia ai.​—Salamo 119:66.

¹³ O le faafoeina o le suesuega a le aiga o le tiute tauave lena a mātua talitonu. E moni, o nisi mātua atonu e lē iai so latou agavaa i le avea ma faiaʻoga lelei, ma atonu e faigata ia i latou ona sailia ni auala e faatupu ai le naunau fiafia i le suesuega a le aiga. E ui i lea, pe afai e te alofa i lau fanau talavou i “le amio ma le faamaoni,” o le a e faanaunau la e fesoasoani ia i latou i se auala lotomaulalo ma le faamaoni ina ia agaigai i luma i le itu faaleagaga. (1 Ioane 3:18) Atonu e iai ni taimi latou te faitio ai, ae mautinoa o le a latou lagonaina lou matuā naunau atu mo lo latou lelei.

14. E mafai faapefea ona faatatauina le Teuteronome 11:18, 19, pe a fesootai atu i fanau talavou e uiga i mea faaleagaga?

¹⁴ O le suesuega a le aiga ua lē na o lea le taimi e fesootai atu ai i mataupu e tāua faaleagaga. Po o e manatua ea le poloaiga a Ieova i mātua? Na ia fetalai: “Ia outou tuu nei upu i o outou loto ma o outou manatu, ia fusi foi e fai ma faailoga i o outou lima, e avea foi ma pale i le va o outou mata. Ia outou aʻoaʻo atu ai i a outou fanau, ma tautalatala aʻi pe a e nofo i lou fale, pe a e savali foi i le ala, pe a e taoto, pe a e tulai foi.” (Teuteronome 11:18, 19; tagai foi i le Teuteronome 6:6, 7.) E lē o le uiga o lenei mea e faapea, e tatau i mātua ona talaʻi atu pea lava pea i a latou fanau. Ae o le ulu alofa o se aiga e tatau pea lava ona mataala e saili avanoa e atiina aʻe ai le manatu faaleagaga o lona aiga.

AOAIGA MA LE FAAALOALO

15, 16. (a) O ā uiga o aoaiga? (e) O ai ua iai le tiute tauave mo le faaooina atu o aoaiga, ae o ai ua iai le tiute tauave ina ia faamautinoa o le a utagiaina aoaiga?

¹⁵ O aoaiga, o le toleniina lea e faasaʻo ai, ma e aofia ai fesootaiga. O aoaiga e tele ina faauiga atu i faasaʻoga nai lo faasalaga​—e ui atonu e talafeagai foi faasalaga. Sa manaomia e lau fanau aoaiga a o laiti, ma o lenei ua avea ma talavou, o loo latou manaomia pea nisi o aoaiga, atonu pe ua sili atu nei ona latou manaomia. O fanau talavou e atamamai latou te iloa le moni o lenei manatu.

¹⁶ Ua faapea mai le Tusi Paia: “E tetee atu e le vale le aʻoaʻo atu a lona tamā; a o lē usiusitai i le aoaiga, e faautauta lava ia.” (Faataoto 15:5) E tele mea ua tatou aʻoaʻoina mai lenei mau. E atagia mai ai e faapea, o le a iai taimi e avatu ai aoaiga. E lē mafai e se talavou ona ʻusitaia aoaiga’ pe afai e lē o avatuina. Ua tuuina atu e Ieova i mātua le tiute tauave mo le faaooina atu o aoaiga, ae maise lava i le tamā. Peitai, o le faalogologo atu i na aoaiga o le tiute tauave lena a le talavou. O le a tele atu mea na te aʻoaʻoina ma e lē tele ai ni mea sese na te faia pe afai na te utagiaina aoaiga atamai a lona tamā ma lona tinā. (Faataoto 1:8) Ua faapea mai le Tusi Paia: “O le mativa ma le faamāina, e i ai ia i le na te teena mea e aʻoaʻoina; a o le ua usiusitai i le aoaiga, e mamalu lava ia.”​—Faataoto 13:18.

17. O le ā le paleni lelei e manaomia e mātua ona taulai atu i ai pe a faaooina atu aoaiga?

¹⁷ I le aoaiina o fanau talavou, e manaomia ai e mātua ona paleni lelei. E tatau ona latou alofia le soona pulepuletutū ina neʻi o latou faaitaita ai i a latou fanau, atonu e iu lava ina faaleagaina ai lagona mautinoa o a latou fanau ia i latou lava. (Kolose 3:21) Ae e lē mananao foi mātua e soona tuufau atu ma lē maua ai e a latou fanau talavou ni aʻoaʻoga tāua. O lena uiga faatuufau e mafai ona matautia ona āuga. Ua faapea mai le Faataoto 29:17: “Ia e aoai i lou atalii, ona e maua ai lea se filemu; e tupu ai le fiafia i lou loto.” Peitai i le fuaiupu e 21 (NW), ua faapea mai: “Pe afai e faamatanana se tasi i lana auauna e afua mai ina o itiiti, i lona olaga mulimuli ane o le a oo ina avea o ia ma sē e lē loto faafetai.” E ui lava o loo tautala lenei fuaiupu e faatatau i se auauna, ae tutusa foi lona faatatauina atu i so o se talavou i le auaiga.

18. O le ā ua faamaonia mai e aoaiga, ma o le ā ua alofia pe a tuuina atu e mātua aoaiga e faifai pea?

¹⁸ O le upu moni, o aoaiga talafeagai o se faamaoniga lea o le alofa o se matua i lana tama. (Eperu 12:6, 11) Pe afai o oe o se matua, ua e silafia la e faigata le tausisia o ni aoaiga talafeagai e faifai pea. Mo le tausia o le filemu, atonu e foliga mai e sili atu ona faigofie le faataga o se talavou o loo faaauau pea ona lē usiusitai e faia le mea o loo ia manao ai. Peitai e mulimuli ane, afai o le a faaauau ai pea se matua i lenei faiga, o le a ia selesele mai ai se auaiga ua lē mafai ona puleaina.​—Faataoto 29:15; Kalatia 6:9.

GALULUE MA TAAALO

19, 20. E mafai faapefea e mātua ona faatautaia ma le atamai le mataupu o faafiafiaga ma tafaoga mo a latou fanau talavou?

¹⁹ I taimi muamua, sa masani ona faatalitalia le fanau ina ia latou fesoasoani i galuega i le fale pe i le faatoaga. I aso nei ua toatele fanau talavou ua tele o latou taimi avanoa e faamāumau solo. Ina ia faaaogā na taimi, ua saunia ai e le lalolagi o faiga faapisinisi le anoanoai o mea e faaaogā uma ai avanoa faafiafia. E lē gata i lena, ae o le mea moni ua itiiti lava se faatāuaina e le lalolagi o tapulaa a le Tusi Paia i amioga tatau, ma ua e iloa ai mea e ono faatalitalia ai le oo mai o se mala matautia.

²⁰ I lea, o le matua e faautauta na te tausisia le aiā e faia ai e ia faaiuga mulimuli e faatatau i faafiafiaga ma tafaoga. Ae ia aua neʻi galo, o loo faasolo aʻe ina matua le talavou. I tausaga taitasi e mautinoa o le a ia faamoemoe ai ina ia tele se manatu atu ia te ia e pei o se tagata matua. Ua atamai ai la mo se matua ona tele se avanoa e tuu atu i ai i le filifilia o faafiafiaga ma tafaoga a o faasolo aʻe ina matua le talavou​—pe afai o na filifiliga e atagia mai ai le agaigai i luma i le taʻumatuaina faaleagaga. I nisi taimi, atonu e faia ai e le talavou ni filifiliga lē atamai i musika, i aumea, ma isi mea. Pe a tupu lenei tulaga, e tatau ona talanoaina faatasi ma le talavou ina ia faia ai filifiliga e sili atu ona lelei i le lumanai.

21. O le a faapefea i le faautauta i le tele o le taimi e faaalu i faafiafiaga ma tafaoga ona puipuia ai se talavou?

²¹ O le ā le tele o se taimi e faaavanoa mo faafiafiaga ma tafaoga? I nisi atunuu ua faaseseina ai talavou e talitonu faapea ua faataga i latou i faafiafiaga faalausosoo. Atonu la o le a fuafuaina ai e se talavou lana faasologa ina ia uma le isi “faafiafiaga” faasolo atu i le isi. E pule mātua i le faaooina atu o le aʻoaʻoga e faapea e tatau ona faaaogā foi le taimi i isi mea, e pei o le suesuega a le aiga, suesuega totino, le auaumea faatasi ma tagata ua taʻumatuaina faaleagaga, o sauniga faa-Kerisiano, ma le faia o feau i le aiga. O lenei faiga o le a lē tineia ai e “mea faafiafia o le olaga nei,” le Afioga a le Atua.​—Luka 8:11-15.

22. O le ā e tatau ona faapaleni lelei faatasi ma faafiafiaga ma tafaoga i le olaga o se talavou?

²² Na faapea mai le tupu o Solomona: “Ua ou iloa e leai se mea lelei ia te i latou, na ona ia olioli le tagata, ma ia fai mea lelei i lona olaga nei. I le ma lea, ia taitasi le tagata ma ʻai, ma inu, ma fiafia i mea lelei i ana galuega uma; o le mea foaiina mai lea e le Atua.” (Failauga 3:12, 13) Ioe, o le olioli o se vaega o le olaga paleni lelei. E faapea foi i le galue mamafa. E toatele talavou i aso nei latou te lē o iloa le faamalieina e maua mai le galue mamafa po o le lagona o lo latou faaaloalogia o i latou lava e maua mai le tauivi ma se faafitauli ma foiaina. O nisi latou te lē o maua le avanoa e atiina aʻe ai se tomai po o se poto faapitoa lea e mafai ona latou tausia ai i latou lava a o faasolo le olaga. O se luʻi tele lenei mo le matua. Pe o le a e faamautinoa ea o loo maua e lau tama talavou na avanoa? Pe afai e mafai ona e taulau manuia i le aʻoaʻoina o lau tama talavou ina ia faatāua ma olioli e galue mamafa, o le a atiina aʻe ai e ia se vaaiga aogā o le a aumaia ai se olaga manuia.

MAI LE TALAVOU SEIA OO INA AVEA MA TAGATA MATUA

23. E mafai faapefea e mātua ona faalaeiau i a latou fanau talavou?

²³ E tusa lava po o iai ni ou faafitauli i lau tama talavou, ae o loo moni pea le mau: “E le uma le alofa.” (1 Korinito 13:8) Aua lava neʻi mou atu le faaalia o le alofa lena e mautinoa o loo e lagonaina. Fesili ifo ia te oe lava, ʻPo o oʻu faamālō atu ea i tamaiti taitoatasi pe a latou taulau manuia i le taulimaina o faafitauli po o le foiaina o toʻatugā? Po o oʻu puʻea ea avanoa e faaali atu ai loʻu alofa ma le talisapaia mo laʻu fanau, a o lei toe mou atu na avanoa? E ui lava e iai taimi atonu e iai ni lē femalamalamai, ae afai o mautinoa e talavou lou alofa ia i latou, e tele lava ina latou toe faaali maia lena alofa.

24. O le ā le mataupu silisili faale-Tusi Paia ua moni i le avea o se tulafono faalauaitele i le tausia aʻe o fanau, ae o le ā e tatau ona manatua?

²⁴ O le mea moni, a o tutupu aʻe le fanau e avea ma tagata matutua, o le a mulimuli ane latou faia ni filifiliga e sili ona faigata mo i latou lava. I nisi tulaga atonu e lē fiafia ai mātua i na filifiliga. E faapefea pe afai ua filifili le la tama e lē toe auauna atu ia Ieova le Atua? E mafai ona tupu lenei mea. E oo lava i nisi o atalii agaga o Ieova sa latou teena ana fautuaga ma faaalia lo latou fouvale. (Kenese 6:2; Iuta 6) O fanau e lē o ni komepiuta, lea e mafai ona faapolokalame ina ia gaoioi mai i le auala tatou te mananao ai. O i latou o ni foafoaga e iai a latou filifiliga saʻoloto, ma latou te tali atu ia Ieova mo filifiliga ua latou faia. Peitai o loo moni pea le Faataoto 22:6 i le avea o se tulafono faalauaitele: “Aʻoaʻo ia i le tama e tusa ma lona ala; a oo ina toeaina lava o ia, e le teʻa ese ai.”

25. O le ā le auala e sili ona lelei mo mātua e faaalia ai le loto faafetai ia Ieova mo le faaeaga o le avea ma mātua?

²⁵ O lea la, ia faaali atu i lau fanau le tele o lou alofa. Ia faia le mea sili e te mafaia e mulimuli ai i mataupu silisili o le Tusi Paia i le tausia aʻe o i latou. Ia faataatia se faaaoaoga lelei o le amio Atua. Ona e avatu ai lea i lau fanau le avanoa e sili ona lelei latou te tutupu aʻe ai e avea o ni tagata matutua e faamoemoeina, ma matataʻu i le Atua. O le auala e sili ona lelei lenei mo mātua e faaalia ai le loto faafetai ia Ieova mo le faaeaga o le avea ma mātua.