Maua le Poto e Ala i le “Faasalaina”

UA FAAPEA mai le Faataoto 21:11: “A faasalaina le ua tauemu, ua faapotoina ai le ua faigofie; a aʻoaʻoina foi le tagata poto, na te maua le poto.”

E masani ona faafaigata i lē “ua faigofie” ona ia talisapaiaina le pogai e mafua ai ona sese se amioga. E ui i lea, atonu i se taimi o le a ia matauina ai “le tauemu”—o le tagata lea e amuamu i mataupu silisili o le Afioga a le Atua—ua oo ina aafia i lana amioleaga ma mafatia ai i “puapuaga ma le atuatuvale.” (Faataoto 1:27) I le Tulafono faa-Mose, sa tatau ona faaee atu se ‘faasalaga’ (King James Version) talafeagai, pe i le tulaga moni lava o se ‘taui,’ i le tagata faimea sese.—Faatusatusa i le Esoto 21:22; Teuteronome 22:19.

O le a faapefea ona aafia ai lē ua faigofie? Ona o le vaai atu i le iʻuga o le faia o le mea sese, e ono ‘poto’ ai o ia ma filifili ai loa ina ia lē mulimuli atu foi o ia i lea lava ala. (Faatusatusa i le Faataoto 19:25.) I se faaeseesega, ua leva ona iloa e “le tagata poto” mai mea na tofo i ai, i lana maitau, ma lona malamalama i mataupu silisili a le Tusi Paia e faapea, o sea laasaga o amioga e lē taʻuaogāina ma e faamalaiaina. E lē manao pea o ia e vaai atu i le iʻuga malaia o sea gaoioiga ua faamautinoa atu i ai ona o lona sese. Ona ia maua ai lea o ‘malamalamaga’ fou mai faatonuga, na i lo le tofo i ni mea e sili ona tiga.