“Aʻoaʻo ia le Tama”

INA ia taulau manuia i le faia o se togalaau, e manaomia ai le faia o ni gaoioiga e sili atu na i lo o le tau ina faasalalau solo o fatu i le eleele, ona toe foi mai lea ina ua mavae ni nai masina ina ia seleseleina. E tele se galuega mamafa e aofia ai i le sauniunia o le eleele, lūlūina o fatu, ma le faasūsūina ma teuteuina tamai laau ina ia mafai ai ona tutupu ma oo ina matutua.

O lenei faagasologa, ua mafai ona faataitaia lelei ai le moni o upu i le Faataoto 22:6, lea o loo faapea mai: “Aʻoaʻo ia le tama e tusa ma lona ala; a oo ina toeaina lava o ia, e le teʻa ese ai.” O le mea moni, o le toleniga a mātua o se vala autū lea e taulau manuia ai i le tausia o se tamaitiiti.

Ae peitai, i le lalolagi tuufau i aso nei, e toatele mātua ua lē taulau ona latou utagia lenei fautuaga. Pe a latou mulimuli i le poto faalelalolagi e faapea, e tatau i tamaiti ona faamasani ina ia taulimaina e i latou o latou lava faafitauli, e masani lava ona tuua na tamaiti e fai lava i latou e aunoa ma se fesoasoani. O se faiga faapena ua lamatia gofie ai talavou i taaʻiga a tagata lē taupulea, ma tagata lē faamaoni.—Faataoto 13:20.

Maeu le sili atu ona lelei mo mātua le totō o mataupu silisili faa-Kerisiano i loto o a latou fanau e ala i toleniga faaleatua a o laiti lava! O le ā le taimi e tatau ona amata ai? Fai mai le aposetolo o Paulo: “Talu foi ina o e tama itiiti [tamameamea].” O le tulaga lena sa iai le tama talavou o Timoteo. Na tamau e lona tinā o Eunike, ma le tinā o lona tinā o Loi “tusi paia” i le loto o Timoteo ina ia mafai ai ona ia “aʻoaʻoina” ma “ua mautinoa” i ai. O le ā le iuga? O se toleniga faapena, na faia ai se vaega tāua ‘i le faapotoina o ia e iu ai i le faaolataga.’—2 Timoteo 1:5; 3:14, 15.

E faapena foi i aso nei, o mātua e ‘lē faapalapala i le faia o le amio lelei’ o le a selesele mai taui faamanuiaina “pe afai [latou] te le faavaivai.” (Kalatia 6:9) Fai mai le tupu poto o Solomona: “E matua olioli lava le tamā o le ua amiotonu.”—Faataoto 23:24.