E Pei o Apu Auro

O APU—e maeu lo latou matagofie i le vaai ma suamalie i le tofo! Ua faaaogāina e le Tusi Paia lenei fualaau ʻaina suamalie i se upu faatusa e faatupu ai manatu, i lona faapea mai: “O le upu ua fai faatatauina, o moli [“apu,” NW] auro ia i ato ario togitogi faamamanuina.” (Faataoto 25:11) O le ā le uiga o lenei faaupuga?

“O moli [“apu”] auro . . . i ato ario togitogi faamamanuina,” atonu e faatatau i se galuega taulima e vaneina, e pei o se laulausii (tray) siliva ua faamamanuina, o loo iai i luga ni fualaau ʻaina auro. Talu ai o loo taʻua i uluai fuaiupu o lenei mataupu le faalatalata atu i se tupu, e mafai ona faatatauina lenei fuaiupu i meaalofa e avatuina i se tupu—o teuteu auro e pei o ni apu o loo i luga o laulausii siliva. (Faataoto 25:6, 7) E moni, o se vaaiga matagofie e ofo ai!

E faapena foi le matagofie o upu e ono ma tatau, e mamalu, ma fetaui lelei ma le taimi, e tusa lava pe tusia pe saunoaina. E faafiafiaina ai, e faalaeiauina ai, ma aogā i le tele o auala. Ua sili lava ona pei “o moli [“apu”] auro . . . i ato ario togitogi faamamanuina” ia afioga tauatua faagaeeina o le Tusi Paia.

E pei ona faataitaia e le upu poto a le tupu o Solomona i le Faataoto 25:11, sa ia “sailia . . . ia maua upu e faafiafia aʻi; o mea ua tusia foi e tonu ia, o upu moni lava.” (Failauga 12:10; Faataoto 25:1) I senituri mulimuli ane, sa tusi mai ai le aposetolo Kerisiano o Pauro e faapea: “O Tusi Paia uma lava e mai le Agaga o le Atua ia, e aoga foi ia.” (2 Timoteo 3:16) Ioe, ua iai i le Tusi Paia fautuaga aogā, o valoaga, o ata e fai i upu, ma upu moni malamalama ma le matagofie, ua sili atu i galuega a mataisau sili ona atamamai. E lē gata i lea, so o se tasi e mauaina le poto mai le Afioga a le Atua, le Tusi Paia, ua ia mauaina se oloa tautele ma e mafai ona olioli i le faamoemoe o le ola e faavavau.—Faataoto 4:7-9; Ioane 17:3.