Le Uiga o le Faataoto

Aiseā e Tauanau ai Sogi a Lē Inoino?

O SE tagata poto na faagaeeina e le Atua sa ia faia lenei faamatalaga: “E faamaoni manua mai le uo; a o sogi a lē ʻinoʻino mai, o mea ia e tatau ona faatauanauina.” (Faataoto 27:6, NW) E mafai faapefea ona malamalama i nei upu?

O se tagata e alofa ia te oe, o le a na tuuina atu se manua faafaatusa ia te oe i se auala faamaoni. Atonu o le a na fautuaina oe ma le alofa i lona loto ma le faamoemoe o le a e lelei ai. E te lē tau tauanauina se uo moni mo se fesoasoani faapena e oo foi i se aʻoaʻiga pe a e manaomia. Ma maeu se atamai mo oe pe a e talia ma le loto fiafia le fautuaga manaomia, se faitioga e faatonu ai, po o se aʻoaʻiga talafeagai!

Ae peitai, afai e te manao e faia e se tagata o lē e inoino ia te oe se mea lelei mo oe, e tatau ona e tauanauina o ia. Aiseā? Auā o lona inoino, e tusa ai ma le tulaga masani, o le a lē mafai ai e ia ona sogi atu ia te oe. Na i lo o lea, o le a faanaunau o ia e agaleaga atu ia te oe. So o se agalelei tatau lava la o le a ia faaalia atu ia te oe, o le a mafai ona e maua mai ia te ia ma le tele o faigata ma lou matuā faatauanauina.

O se mea e fiafia ai e tusa ai ma lenei mea, o se tasi lea o faataoto a Iesu Keriso. Sa ia fetalai ai i se tasi taimi e uiga i se fafine ua oti lana tane, o lē na ia maua se faamasinoga mai se tasi faamasino o lē e lē mataʻu i le Atua, pe faaaloalo foi i se tagata. Na faapefea ona manuia ai o ia? Sa faia lava e le faamasino ina ia maua e le fafine le mapusaga na ia manaomia ona talu ai sa ia faatauanauina o ia. Sa faaaogā e Iesu lenei tala faafaatusa ina ia tamau ai i ona soʻo le manaoga ina ia latou “tatalo soo e tatau ai, a e aua le faavaivai.”—Luka 18:1-8.

E Faapefea ona Faatoateleina Ē Amiotonu pe a Fano Ē Amio Leaga?

Ua taʻua i le Faataoto 28:28 faapea: “A tulai mai ē amio leaga ua lalafi ai tagata; a e a fano i latou, ua faatoateleina ē amiotonu.” Ua faapefea ona moni lenei faataoto? E mafai ona “tulai mai” ē amio leaga i le pule, atonu i le avea o ni pule sauā. I lea lava taimi, o loo lafi ai le tagata amiotonu. O le a ia faia faapea ona atonu o lona mataʻu i lo latou faasauā. A ea? O le mea moni ona ua “pule ai le tasi tagata i le tasi, e leaga ai o ia lava.” —Failauga 8:9.

Ae peitai, pe a faaumatia o ē amio leaga, ona “faatoateleina” ai lea o tagata amiotonu. Faapefea? Atonu ona ua ō mai tagata amiotonu mai mea na lalafi ai ma faailoa mai i latou i le lautele. Ona o lea ua foliga mai ai ua faateleina po ua faatoateleina lo latou faitau aofai ona ua leai se mafuaaga e saga lalafi ai i latou. Afai la e pule loa ē amiotonu, ona latou faasalaina loa lea o ē fai mea sese ma faatinoina ai amioga tonu. O le auala foi lena e ono mafai ona faaitiitia ai ē amio leaga ma faatoateleina ai ē amiotonu.—Faatusatusa i le Faataoto 28:12; 29:2.

Ua lē o toe mamao ona vaaia lea e tagata amiotonu o ē amio leaga ua faaumatia nai le laueleele i le “aso o le toasa o Ieova” ua lata tele mai. O le mea lea, ia saili ai le amiotonu ma le agamalu ina ia ōgatusa ma tapulaa a le Atua, ma atonu o le a mafai ona faasaoina atu ai oe i le lalolagi fou a le Atua, o inā o le a matuā faatoateleina ai ē amiotonu.—Sefanaia 2:2, 3; 2 Peteru 3:11-13.