Le Poto o le Atua—E Faapefea Ona Faaalia?

“E INOSIA le poto o le mativa, ua le faalogoina foi ana upu.” I nei upu, na faaiʻu ai e le tupu poto o Solomona se tala e uiga i se tagata maulalo ae e poto o lē na faasaoina se aai atoa mai se faaumatiaga. Ae o le mea e faanoanoa ai, e “leai se tagata na ia manatua lea tagata mativa.”—Failauga 9:14-16.

O tagata, ua tele lava ina vaai maulalo i tagata e faalētele ni a latou mea, e tusa lava pe e faia e nei tagata matitiva ni galuega e sili ona lelei. Sa faapena foʻi e tusa ai ma le tulaga o Iesu. Na valoia e Isaia e uiga ia te ia: “Ua inosia ma tuulafoaiina o ia e tagata; o le tagata faanoanoa, ua masani foi ma le tiga.” (Isaia 53:3) Na inosia Iesu e nisi ona sa lē iai sona tulaga maualuga pe lauiloa foʻi e pei o taʻitaʻi i ona aso. Ae peitaʻi, sa ia maua le poto na sili mamao atu i lo o le poto o so o se tagata agasala. Sa mumusu tagata o le nuu o Iesu e faailoaina atu e faapea, o lenei ‘atalii o le tufuga’ sa ia faaalia lena poto ma faia na galuega mamana. Ae peitaʻi, o se sesē matuā matuiā lena mea, auā ua faapea mai le faamatalaga, o Iesu “ua le tele foi ni vavega na na faia i lea mea, ona o lo latou le faatuatua.” Pagā se mea na misia e na tagata!—Mataio 13:54-58.

Seʻi aua lava neʻi o tatou faia lena lava measesē. Na fetalai Iesu: “E taʻuamiotonuina le poto i ana galuega.” O i latou o loo faia le galuega a le Atua ma faailoa atu le poto mai le lagi ua faaesea ai i latou, e lē ona o ni o latou tulaga po o tulaga i le vafealoaʻi, ae e ala i “fua lelei” e latou te faaalia—lo latou faatuatua faale-Tusi Paia ma galuega.—Mataio 7:18-20; 11:19, LF.