Soifuaga o Iesu ma lana Faiva

O le ā E Faatagaina i le Sapati?

O LE tasi Sapati ua asiasi atu ai Iesu i le Sunako e latalata ane i le Sami Kalilaia. Sa i ai i ina le tagata e gase lona lima taumatau. Ua lamalama e le au tusiupu ma le au Faresaio pe faamalolo e Iesu o ia. Mulimuli ane ua latou fesili atu: “E tatau ea ona faamalolo i le sapati?”

Ua talitonu taʻitaʻi lotu Iutaia e tatau ona faamalolo i le Sapati pe afai ua i ai le ola i se tulaga mataʻutia. Ua latou aʻoaʻo, mo se faaaʻoaʻoga, faapea o se mea e lē tusa ma le tulafono pe a faasaʻo se ponaivi pe fusi se manuʻa i le Sapati. O lea o le tuufesili ai le au tusiupu ma Faresaio ona o le fia maua o se mea e molia ai o ia.

A e peitaʻi ua silafia e Iesu o latou manatunatu. Ua ia silafia foʻi i le taimi lena, ua latou faaofi mai se vaaiga e matuā le tusa ma le Tusi Paia e faavae ai le solia o le aso Sapati e tusa ma mea ua faasāina e pei o le galue. O lea, na faataʻatia ai e Iesu se laasaga mo le fetaʻiaʻiga uiga ese e ala i lona fetalai atu i le tagata ua gase lona lima: “Ina tulai ia, ma tu mai i totonu.”

Ua liliu atu nei i le au tusiupu ma Faresaio, ua fetalai atu Iesu: “O ai ea so outou e ana le mamoe e tasi, afai foi e paū o ia i le lua i le sapati, e le tago ea i ai, ma avae i luga?” Talu ai o le mamoe e fai ma sui i mea tau tupe, latou te le mafai ona tuʻu ai i le lua seʻia oo i le aso e sosoʻo ai auā atonu o le a maʻi ma lē maua ai se tau e tele. A e le gata foʻi i lea, fai mai le Tusi Paia: “Ua faapelepele le tagata amiotonu i lana manu.”

Ua faaauau pea Iesu i lona sii maia o se faataoto: “E le sili lava ea le tagata i le mamoe? o lea e tatau ai ona agalelei i le sapati.” Ona ua le taulau ona latou faamaonia se sese o ni manatu alofa faavae i mataupu silisili, ua lē mautali ai nei taʻitaʻi lotu.

Ua silasila solo ia te i latou ma le toasa, ona ua tiga lona finagalo talu le valea ma le maaʻa o o latou loto. Ona ia fetalai atu lea i le tagata: “Ina faaloaloa ia lou lima.” Ona faaloaloa ai lea e ia ona malolo ai lea o lona lima.

Na i lo o le fiafia ua faamaloloina le lima o le tamāloa, ua ō i fafo le au Faresaio ma taupulepule ma le au Herotia ina ia fasioti ia Iesu. O lenei itu faapolotiki e foliga mai sa auai le vaega o failotu Satukaio. E pei ona lauiloa, o lenei itu faapolotiki e feteenaʻi ma le au Faresaio i le tulaga lautele, a e ua autasi i lo latou matuā teteʻe atu ia Iesu. Mataio 12:9-14; Mareko 3:1-6; Luka 6:6-11; Faataoto 12:10; Esoto 20:8-10.

◆ O le ā le pogai o le fetaiaʻiga mataina i le va o Iesu ma taʻitaʻi lotu Iutaia?

◆ O le ā le talitonuga o Iutaia e uiga i le faamaloloina o maʻi i le Sapati?

◆ O le ā le faataʻitaʻiga na faaaogā e Iesu e faaalialia ai le sese o la latou vaaiga?