O le Soifuaga o Iesu ma Lana Faiva

Le Tala Faatusa e Uiga i Taleni

UA FAAAUAU e Iesu le talanoaga ma ona aposetolo i le Mauga o Olive e ala i lona taʻu atu ia te i latou o se isi tala faatusa, o lona lua lea i se faasologa o tala faatusa e tolu. I ni nai aso muamua atu, a o iai o ia i Ieriko, na ia faamatala atu ai le tala faatusa e uiga i mina ina ia faaalia ai faapea o le Malo o loo mamao lava i le lumanai. O le tala faatusa ua ia faamatala atu nei, a o loo iai nisi o vala tali tutusa, ua faamatalaina ai i lona faataunuuga gaoioiga o le a faia i le taimi o le faatasi mai o Keriso i le mana o le Malo. Ua faataʻitaʻia ai faapea o ona soʻo e tatau ona galulue a o iai pea i luga o le lalolagi ina ia faateleina “o ana mea.”

Ua amata e Iesu e faapea: “E faapei [o lona uiga, o tulaga e fesootai atu i le Malo] o le tagata foi na alu malaga, ua valaau i ana auauna, ona tuuina atu ai lea e ia o ana mea ia te i latou.” O Iesu o le tagata o lē a o leʻi malaga i le mea mamao i le lagi, ua tuuina atu i ana auauna—o soʻo ina ia iai i le faasologa mo le Malo faalelagi—ana mea. O nei mea e lē o ni mea faitino ae ua fai ma sui o le fanua ua totoina, lea ua ia fausia ai se tulaga e mafai ai ona aumaia nisi soʻo.

Ua tuu atu e Iesu ana mea i ana auauna mo sina taimi puupuu a o toetoe lava afio aʻe i le lagi. E faapefea? E ala i le faatonuina o i latou ina ia galulue pea i le atiina aʻe o le fanua e ala i le talaʻia o le feau o le Malo i tuluʻiga aupito mamao o le lalolagi. E pei ona fetalai Iesu: “Ua avatu e ia taleni e lima i le tasi, a e lua a le tasi, a e tasi i le tasi; ua faatatau i le mea ua mafai ai e le tagata; ona alu loa lea o ia i lana malaga.”

O taleni e valu—o mea a Keriso—o lea ua tufatufaina atu e tusa ma le tomai, po o mea faaleagaga e mafaia e ia auauna. O auauna ua fai ma sui mo vasega o soʻo. I le uluai senituri, o le vasega na maua taleni e lima e manino lava na aofia ai le au aposetolo. Ona faaauau lea ona faamatala e Iesu faapea o auauna o ē na maua taleni e lima ma taleni e lua sa faaluaina mea na latou maua e ala i la latou talaʻiga o le Malo ma le faia o soʻo. Ae peitai, o le auauna o lē na maua le taleni e tasi na ia nanā ai i le eleele.

“Ua mavae po e tele,” ua faaauau atu ai Iesu, “ona sau ai lea o le alii o ia auauna, ua faamasino i ana mea ua ia te i latou.” Sa leʻi faia lea mea seia oo i lona 20 senituri, pe ā ma le 1,900 tausaga ua mavae, faapea na toe afio mai ai Keriso ina ia faamasinoina mea, o lea, e moni lava, “ua mavae po e tele.” Ona faamatala lea e Iesu:

“Ona sau ai lea o le ua i ai taleni e lima, ua au mai isi taleni e lima, ua faapea mai, Le alii e, na e tuuina mai ia te au taleni e lima; faauta, ua ou maua ai isi taleni e lima. Ona fai atu ai lea o lona alii ia te ia, Ua lelei ia, le auauna lelei e, ma le faamaoni, ua e faamaoni i nai mea itiiti, ou te tofia oe e pule i mea e tele; ina ulufale mai ia i le fiafia o lou alii.” Sa faapena foi i le auauna na maua taleni e lua ona faaluaina o ana taleni, ma na ia maua le faamalo lava lea ma le taui e tasi.

Ae faapefea la, ona ulu atu nei auauna faamaoni i le fiafia o lo la Alii? Ia, o le olioli o lo la Alii, o Iesu Keriso, sa o le mauaina o le Malo ina ua malaga atu o ia i lona Tamā i le lagi. E tusa ai ma na auauna faamaoni i ona po nei, ua latou olioli tele i le tuuina atu ia i latou o tiute tauave ma faanaunauga atili o le Malo, ma a o faaiʻuina la latou auaunaga faalelalolagi, o le a maua e i latou i le iʻuga le olioli i le toe faatutuina i le Malo faalelagi. Ae faapefea le auauna lona tolu?

“Le alii e, na ou iloa o oe o le tagata faigata,” ua faitio atu ai lenei auauna. “Ona ou fefe ai lea, ua ou alu ma ou nā lau taleni i le eleele; faauta, o lau mea lea.” Sa matuā mautinoa lava le musu o le auauna e galue i le atiina aʻe o le laueleele e ala i le talaʻiga ma le faia o soʻo. O lea ua taʻua ai o ia e le matai o “Le auauna leaga e, ma le paie” ma na faailoa atu loa lona faamasinoga: “Ia outou fao le taleni nai ia te ia . . . Ia outou tulia foi le auauna le aoga i le pouliuli i fafo, e i ai le taufaitagiaue ma le lilivau o nifo.” O i latou o lenei vasega o le auauna leaga, ua lafoina i fafo, ma ua faoa mai ia i latou so o se olioli faaleagaga.

Ua faataatia e lenei mea se lesona aogā mo i latou uma lava o ē ua faapea o soʻo o Keriso. E tatau ona latou galulue mo le faateleina o mea a lo latou Matai faalelagi e ala i le auai atoatoa i le galuega talaʻi pe afai latou te mananao ia olioli i lana faamalo ma le taui ma pe afai ia alofia le lafoina o i latou i fafo i le pogisa ma matuā faaumatia ai. Pe o e filiga i le faaaogāina o ou tomai e tusa ai ma lenei mea? Mataio 25:14-30.

◆ O le ā le lesona ua aʻoaʻoina e lenei tala faatusa o sosoo mai?

◆ O ai auauna, ma o ā mea na tuuina atu ia i latou?

◆ O afea e sau ai le matai ina ia faamasinoina mea, ma o le ā na ia maua?

◆ O le ā le olioli e ulu atu i ai le auauna faamaoni, ma o le ā ua tupu i le auauna amio leaga?