O Kerisiano Solitu i se Lalolagi ua Pisipisia i le Toto

“O se na te faamaligiina le toto o le tagata, e faamaligiina lona lava toto e le tagata; auā o le faatusa o le Atua na fai ai e ia le tagata.”—KENESE 9:6.

1. O ā mea tutupu i le lalolagi talu mai le 1914 ua avea ma mafuaaga o le popole?

O VASA loloa o le toto, o le faitau selau miliona o tagata, ua faamasaaina i taua talu mai le 1914. Ma o le ā le faamoemoe mo le lumanai? O le faatamaia o aai e lua o Iapani i le 1945 na faaumatia ai le 200,000 o ola ma taʻitaʻiina mulimuli ane ai i se talitonuga fou, na faaupu e malo malolosi ma ua talafeagai lona tusia o “MAD” (Mutually Assured Destruction) Ua avea lenei ma faavae tutusa o le tau fai faamataʻu, ua fausia i luga aʻe o faupuega o mea tau niukelea e ono olopalaina ai lo tatou lalolagi mo ni taimi se tele. Ua aveina e vaa maulu nei mea tau mataʻutia i oga sami, ma talu ai nei o le faamataʻu mai o taua i le vateatea ua faateleina la e mataʻutia. E oʻo lava i le fefaamataʻu aʻi ua luluina nei lona faavae. E i ai ea se auala e sola ese ai mai lenei maʻi valea?

2. O le ā na valoia e Iesu e tusa ai ma nei aso, a e faatasi ai ma le ā le faamautinoaga mo Kerisiano?

² Ioe, e i ai. Peitaʻi e lē sau mai le filifiliga a nuu. Sa valoia e Iesu e uiga i lo latou fememeaʻi i le taimi nei: “E i ai foʻi faailoga i le la, ma le masina, ma fetu; o i le lalolagi foi le atuatuvale o nuu i le fememeaʻi; e ū foi le sami i le sousou; e oti foi tagata i le matatau ma le faatalitali i mea e oo mai i le lalolagi; auā e luluina ʻau a le lagi.” Sa faaiʻuina e Iesu lena valoaga faatasi ma le faamautinoaga faapea o Kerisiano o ē “mataala . . . e sao mai ia mea uma ua tāli oo mai.”—Luka 21:24, 26, 36.

Tausisia o le Filemu Ma le Atua

3. (a) O faapefea ona auauna nuu i faanaunauga o “le alii o lenei lalolagi”? (e) O le a faapefea ona faaleleia e Ieova le finauga?

³ O nuu, a e maise i latou o faaauupegaina i mea tau niukelea, o loo avatu i tauvaga mo le pulea o le lalolagi, e ono manatu ai i le faaumatiaina atoatoa o le lalolagi. Ua faataunuu e lenei mea faanaunauga “o le alii [atua] o lenei lalolagi.” O nuu “ua pulega faatasi . . . e tetee atu ia Ieova ma le na ia faauuina [Keriso],” o le ua nofo tupu nei i le lagi. A tuuina mai e Ieova le faatonuga, ona fasia lea e Keriso o na nuu e pei ona fasia i se tootoo uamea. Ona oʻo mai lea o le faataunuuga o le folafolaga: “E le pine a e solia e le Atua o lē aumaia le filemu Satani i lalo o outou vae.”—2 Korinito 4:4; King James Version; Salamo 2:2, 6-9; Roma 16:20.

4. Atonu e faapefea ona tatou sailia le filemu ma le Atua? (1 Peteru 3:11)

⁴ O i tatou, i la tatou vaega, e tatau ona sailia le filemu ma lena Atua. E ao faapefea ona tatou faia? O se tasi o mea, e tatau ona tatou moomoo ia maua le silafaga a le Atua e tusa ai ma le paia o le ola faaletagata ma le tāua o le ola i le toto o loo tafe i alātoto ma uaua.

5. O ā faaaʻoaʻoga e faaalia ai e tauia e Ieova le faamasaa toto faasaua?

⁵ O Ieova O Le Na Foafoaina le tagata ma le fetafeaʻi ofoofogia o le toto e tauaveina mea ʻai manaomia mo le tino faaletagata, ina ia faatumauina mo le tino faaletagata. Ina ua uma ona faatino e Kaino le uluaʻi fasioti tagata, na folafola e le Atua o loo tagi mai le toto o Apelu e tatau ona tauia. Mulimuli ane, o sē na tupuga mai ia Kaino, o Lameko, na avea o se fasioti tagata ma taʻua ai faafatusolo le tatau ona fasiotia o ia, o lenei tagata toto lima o le a tauia. I se taimi, na faatumuina ai lea lalolagi iuvale i le saua. O lea na auina mai ai e Ieova le lolo e faaumatia le uluaʻi lalolagi o le fanau a tagata. Na o le aiga na tausisia le filemu o Noa, o le uiga o lona igoa “Mapusaga,” sa faasaoina.—Kenese 4:8-12,23,24; 6:13; 7:1.

6. O le ā le tulafono a le Atua e tusa ai ma le toto, ma o ai ua saisaitia ai?

⁶ Ona faailoa atu lea e Ieova lona finagalo e faatatau i le toto ia Noa. Na ia taualugaina i lona faapea atu; “O se na te faamaligiina le toto o le tagata, e faamaligiina lona lava toto e le tagata; auā o le faatusa o le Atua na fai ai e ia le tagata.” (Kenese 9:3-6) O le fanau uma a tagata i aso nei e tupuga mai ia Noa; o lea, o lenei tulafono tauatua ua faamamafaina ai le faaaloalo mo le ola ua saisaitia ai le fanau o ē faanaunau i le faamaoniga mai le Atua. Ua faapea mai foʻi lona ono o Tulafono e Sefulu, “Aua e te fasioti tagata.” O tagata toto lima ua manaomia ni gaoioiga tatau ma se taui.—Esoto 20:13; 21:12; Teuteronome 21:1-9; Eperu 10:30.

7. (a) Ai se ā sa talafeagai ai mo Ieova ona faatonuina Isaraelu e sii taua? (e)  O le ā le ituaiga o taua e auai Kerisiano i aso nei?

⁷ Talu ai o le faamaligiina o le toto sa manino lelei lona faasaina, ai se ā la na faatagaina ai e Ieova le nuu o Isaraelu ma faatonuina e auai i taua? E tatau ona tatou manatua o taua faapaiaina na, sa faaumatia atoatoa ai e Ieova o le Faamasino o le lalolagi uma nuu sa tapuai i temoni. Mo se faaaʻoaʻoga, o tagata Kanana sa avea ma tagata na teʻi ua nonofo fua i Nuu o le Folafolaga ma sa mulimuli i se ituaiga o olaga faatemoni, olaga lē mamā e lamatia ai tagata paia o Ieova. Na faia e Ieova ia “luai” mai e le nuu ia tagata leaga mai lo latou oganuu, e ala i le faaaogāina o taua faaleatua. (Levitiko 18:1-30; Teuteronome 7:1-6, 24) Ua taʻu saʻoina e lenei mea le taua faaleagaga a Kerisiano i aso nei.—2 Korinito 10:3-5; Efeso 6:11-18.

8. O le ā e faaalia ai le lē faamaonia e Ieova o le faamasaa o le toto o ē le sala?

⁸ A e peitaʻi, sa leʻi faamaonia e Ieova le soona faamasaa fua o le toto. O lea, ua tusia ai e uiga i se tupu o Iuta: “Ua faamasaa foi e Manase toto o e le sala e tele lava, ua na matuā faatumuina a i Ierusalema.” E ui ina salamo Manase mulimuli ane ma faamaulalo ia lava i luma o Ieova, a e na tumau pea lena agasala o le toto o lima i ona luga ma lona au aiga. O le atalii o le atalii o Manase, o le sa mataʻu i le Atua, le Tupu o Iosia, na gaoioi ma le tonu e faamamā le nuu ma toe faafoisia le tapuaiga moni. Peitaʻi na te leʻi mafaia ona aveesea lena toto o lima. I le taimi o le pulega a le atalii o Iosia o Ioakima, na gaoioi ai Ieova e aumaia Nepukanesa ia faasagatau ia Iuta, ma faaoo le faamasinoga faasaga i lena nuu. “O le afioga lava a Ieova na oo ai lea mea ia Iuta, ina ia na ave ese ia te i latou i ona luma ona o agasala a Manase, e tusa ma mea uma na ia faia; auā foi le toto o e le sala na ia faamaligiina, auā na ia faatumuina Ierusalema i le toto o e le sala; na le mafai e Ieova ona faamagaloina ai.”—2 Tupu 21:16; 24:1-4; 2 Nofoaiga a Tupu 33:10-13.

O Le Tulaga mo Kerisiano

9. O le ā le tulaga na faataatia e Iesu mo Kerisiano e tusa ai ma le faaamasaaina o le toto?

⁹ Ua tatou faatalitalia o Iesu, le Faavae o le faa-Kerisiano o le a na faataʻatia le tulaga mo Kerisiano e tusa ai ma le faaaloalo i le faamaligiiina o le toto. Pe sa ia faia lea? E leʻi pine lava, ina ua uma ona ia amataina le Faamanatuga o lona maliu, sa faamautinoa e Iesu ua i ai i ona soʻo ni pelu se lua. Mo le a le fuafuaga? Ia faavaeina ai se mataupu silisili tāua, e manaomia ona iloa e Kerisiano uma lava. Ina ua o mai fitafita e puʻe Iesu i Ketesemane, na seʻi le pelu a Peteru osovale, ma tipiina ai le taliga taumatau o Maliko, o le auauna a le faitaulaga sili o Iutaia. Pe le o o se tulaga mamalu ea le tau ina fai ma sui o le Alo o le Atua? Sa leʻi manatu faapena Iesu. Sa ia faaleleia le taliga o le auauna ma faamanatu atu ia Peteru e mafai e Lona Tamā faalelagi ona auina mai lekeona e 12 o agelu e fesoasoani ia Iesu. Na taʻua e Iesu i ina le vaega muamua o le mataupu silisili: “O i latou uma o e tago i le pelu, e oti i latou i le pelu.”—Mataio 26:51-53; Luka 22:36, 38, 49-51 Ioane 18:10, 11.

10. (a) O le ā le mataupu silisili tāua ua faataatiaina i le Ioane 17:14, 16, ma le Ioa 18:36? O ā laasaga na iʻu ina faasaoina ai Kerisiano o le uluaʻi senituri?

¹⁰ Sa manatua e Kerisiano o le uluaʻi senituri le tatalo naunautaʻi a Iesu ia Ieova, na ia fetalai ai e uiga i ona soo: “E le ni ō le lalolagi i latou, faapei o aʻu; ou te le so le lalolagi aʻu.” Na latou manatua le tali faamalamalamaina a Iesu na fai ia Ponotio Pilato: “E le mai le lalolagi nei loʻu malo; afai ana mai le lalolagi nei loʻu malo, po ua tau aʻu auauna, ina nei tuuina atu aʻu ia Iutaia; a o lenei, e le mai iinei loʻu malo.” (Ioane 17:14, 16; 18:36) I na aso, o vasega o tagata Iutaia sa fetauai, e le gata i upu ae i le faamasaaina o le toto. Peitaʻi sa leʻi miomiō faatasi ai soʻo o Iesu i ia tauiviga mo ni suiga. E tusa ma le 30 tausaga sa latou faatalitali ai i Ierusalema. Ona latou usiusitai lea i le faailoga faavaloaga a Iesu e ala i le “sosola i mauga.” O lo latou tulaga solitu ma la latou solaaga na iʻu ai i lo latou faaolataga.—Mataio 24:15, 16.

11, 12. (a) O le ā le filifiliga sa tatau ona faia e Konelio ma Sekio Paulo ina ua avea ma tagata talitonu.? (e) O fea la te maua ma ai fesoasoani ina ia faia ai filifiliga saʻo? (i) O le ā ua faaalia e lenei mea mo i tatou i aso nei?

¹¹ Atonu e fesili nisi, ‘A e faapefea Konelio le taʻitaʻi ʻau o le toaselau ma Sekio Paulo le suikone sula i Kuperu? Pe sa leʻi auaufaatasi ea nei tagata ma le vaegaau?’ Ioe, i le taimi lea na latou taliaina ai le feau Kerisiano. E ui ina le o taʻu maia e Tusitusiga Paia po o le ā na faia e Konelio ma isi ina ua mavae lo latou liliu. E lē taumatea o Sekio Paulo o se tagata atamai, sa “matuā ofo i le mataupu a le Alii [Ieova],” na ia iloiloina vave ma le faaeteete lona tulaga faalelalolagi e tusa ai ma le malamalamaga o lona faatuatuaga foi ma faia ai se faaiʻuga tatau. Atonu sa faia foʻi faapena e Konelio. (Galuega 10:1, 2, 44-48; 13:7, 12) E leai se faamaumauga faapea na taʻu atu e le au aposetolo ia i latou po o a gaoioiga e tatau ona faia. Sa latou iloa mai a latou lava suʻesuʻega o le Afioga a le Atua.—Isaia 2:2-4; Mika 4:3.

¹² Ua faapena foʻi, Kerisiano i aso nei, ona lē tatau ona faatonuina totino isi e faatatau i tulaga e ao ona latou faia i mataupu e fesootaʻi ma le solitu faa-Kerisiano. E tatau i tagata taitoatasi ona faia lana lava filifiliga mautinoa e tusa ai ma lona malamalamaga i mataupu silisili faale-Tusi Paia.—Kalatia 6:4, 5.

I Aso Nei

13. Sa faapefea ona feagai ai Tagata Aʻoga o le Tusi Paia i taumafaiga e alofia le toto o lima e le Taua l a le Lalolagi?

¹³ O le 1914 na muaʻi osofaia ai e faiga taua atoatoa le vaaiga i le lalolagi. O alagā manuia uma o nuu, e aofia ai lo latou malosi faaletagata, na auai faatasi i faiga taua. O le toatele o Tagata Aʻoga o le Tusi Paia, e pei ona sa faaigoaina ai Molimau a Ieova i lena taimi, sa faia taumafaiga lelei e alofia ai le toto o lima. Sa ogoogo le sauaina o i latou, e pei lava ona fetalai Iesu o le a faia ia i latou.—Ioane 15:17-20.

14, 15. (a) Sa faapefea ona saunia e Ieova taʻiala i le Taua ll a le Lalolagi? (e) O le ā le tulaga manino na tutū ai Molimau a Ieova talu mai ai? (i) Sa faapefea ona eseese lenei tulaga ma mea na faia e tagata lotu o le lalolagi?

¹⁴ Ina ua toe gapa foʻi feteʻenaiga faalekelope i le 1939, sa aumaia e Ieova taʻiala manino mo ana auauna. I le lua masina o le folafolaina o le taua, o lenei taʻiala na auala mai i se mataupu o suʻesuʻega faale-Tusi Paia na faaulutalaina “Solitu” i le lomiga o Le Olomatamata Novema 1,1939. Sa faaiʻuina i le fuaiupu lenei: “O i latou uma o i le itu a le Alii e solitu e tusa ai ma nuu o tau, ma o le a matuā tuuina atu atoatoa mo le TIOKARATE sili ma lana Tupu.”

¹⁵ O le a na iʻu i ai? I le avea o se au uso i le lalolagi atoa, sa tutusa uma Molimau a Ieova e malilie aʻiaʻi i le taumamao mai le faamasaaina o le toto o tagata lē sala, e aofia ai o latou uso i isi atunuu. A e fesasiaʻi tagata Katoliko lava latou, Porotesano, Puta ma isi, sa usiusitai soʻo moni o Iesu i lana poloaiga fou: “Faapei ona ou alofa atu ia te outou, ia fealofani foi outou.”—Ioane 13:34.

16. (a) Sa faapefea ona faaalia e Molimau a Ieova o i latou o ni tagatanuu ua sao le amio? (e) Sa faapefea ona maumautūtū Molimau i le totogia o mea a le Atua i le Atua, faatasi ai ma ā iʻuga i nisi o taimi?

¹⁶ Sa faaauau pea e nei Kerisiano ona latou totogi atu mea a Kaisara ia Kaisara. Sa latou usiusitai i tulafono o le atunuu o ni tagatanuu amio saʻo. (Mataio 22:17-21; Roma 13:1-7) Peitaʻi o le mea e sili ona tāua, la latou toe totogi atu i le Atua ana lava mea, e aofia ai o latou ola tuuina atu ma le tapuaiga faa-Kerisiano. A e, ina ua faatonuina e Kaisara ia avatua mea a le Atua, sa latou gaoioi e talafeagai ma mataupu silisili ua taʻua i le Galuega 4:19 ma le 5:29. Afai o se finauga i le faamasaaina o le toto, le lē auai i so o se galuega faavaegaau, le filifiliga o ituaiga auaunaga, po o le faalo i se faatusa e pei o le fuʻa faaleatunuu, e tausisia pea e Kerisiano le tulaga o le leai o se faagutugutulua. O nisi mea na tutupu sa oʻo lava ina fasiotia ai i latou ona o lenei tulaga.—Mataio 24:9; Faaaliga 2:10.

Latou Te Leʻi Faagutugutulua

17. (a) E tusa ai ma se tasi tusi, sa faapefea ona tausia e Nasi Molimau a Ieova? (e) I le fetaiaiga ma luʻi, sa faapefea ona ese ai Molimau a Ieova mai isi?

¹⁷ O se tusi lata mai nei sa faaulutalaina Of Gods and Men na taʻua ai faapea i le taimi o le Pulega a Hitila, o Molimau a Ieova o se vaega faalelotu sa faapuapuagatiaina “i teteʻega e sili ona mataʻutia.” E leʻi faagutugutulua Molimau a Ieova. O nisi tagata mai lotu i Siamani sa mulimuli i faifeau o vaegaau i le taua, ma avatua sauniga faale-lotu i le setete o Siamani ma maua ai le “faailoga” o le manu feai faapolotiki “i o latou lima taumatau, po o latou muaulu.” (Faaaliga 13:16) Ua latou avatua ai le lima taumatau malosi e lagolagoina ai taumafaiga faapolotiki i Siamani ma iloa matilatila ai lo latou tulaga i le faaneʻeneʻe atu ia Hitila ma le faalo i le fuʻa sa i ai le faatusa o le koluse.

18 (a) O ā faamaumauga e faaalia ai pe sa avea Molimau a Ieova o ni “ē ‘solitu’ faapolotiki”? (e) E faapefea i lenei talafaasolopito ona aafia ai i tatou taitoatasi i aso nei?

¹⁸ O le a le tulaga na tutū ai Kerisiano moni? Ua faapea mai le suʻesuʻega ua taʻua i luga: “Sa na o Molimau a Ieova lava e leʻi taliaina lena faiga malo. Sa latou teteʻe malosi atu ma o le iʻuga o le afa o i latou sa faafalepuipuiina ma le kuata na fasiotia . . . Sa ese i latou [mai isi lotu], e le faalelalolagi i le itu faapea e lē sailia ni faamaoniga aloaia po o ni taui o le lalolagi o mea faitino ma latou te leʻi manatu o i latou ni ona sui. O i latou o ‘ē solitu’ i faiga polotiki talu ai o i latou e mo se isi lalolagi—a le Atua . . . Latou te le sailia pe ofoina atu ni faamatalaga faagutugutulua . . . E lē auauna i le vaegaau, pe palota, po o le tuuina atu le faalo a Hitila ua tusa lea o le ioe atu i mea o manaomia mai e lenei lalolagi na i lo mea o manaomia e le Atua.” O le sailia o le filemu ma le leai o se saua i Molimau a Ieova na matauina foʻi i totonu o nofoaga sa saisaitia ai. E faapefefea? Sa “na o Molimau a Ieova lava na faataga e seleina ʻava a fitafita S.S. na faaaogā ai tafi ʻaulei talu ai na o i latou sa faatuatuaina e lē fasioti tagata.”

19. O faapefea ona mulimuli Molimau a Ieova i le faaaʻoaʻoga lototele a Iesu, faatasi ai ma ā iʻuga?

¹⁹ I le faagasologa o le taua lona lua a le lalolagi, sa avea ai Molimau a Ieova o se faaaʻoaʻoga maoae o le solitu faa-Kerisiano. I le lalolagi aoao, latou te maumauaʻi ma loto tetele e mulimuli i le faaaʻoaʻoga a Iesu e “le ni o le lalolagi”; sa latou manumalo i lenei lalolagi ua toto lima e pei ona sa faia e Iesu.—Ioane 17:16; 16:33; 1 Ioane 5:4.

Mauaina o le Lafitaga Mai le Toto o Lima

20. (a) Ai se ā ua faanatinati ai le sola ese mai tapuaiga sese? (e) Ua na o fea e maua ai le lafitaga moni i aso nei?

²⁰ Ua vali mūmū e faalapotopotoga lotu itulau o talafaasolopito e ala i le faamasaaina o le toto ē lē sala i taua faalotu, taua “paia”, ma sauaga matuiā. Sa latou faia maleia ma pule tautalatasi e fiafia tele i le faamasaa toto. Sa latou malilie ina ua lafoina e na pule tautalatasi Molimau a Ieova i le falepuipui ma nofoaga e puipuia ai ma maliliu ai le toatele o i latou. Sa latou avatua le lagolagosua i taʻitaʻi na fasiotia molimau e ala i le tafanaina ma le vavaeeseina o o latou ulu. O nei faiga faalotu e lē mafai ona latou sosolaese ai mai le faamasinoga amiotonu a Ieova. O le a lē tolopoina. O le a lē tolopoina foʻi e se tagata alofa i le amoitonu lona solaese mai lotu sese—ua pisipisia i le toto o “Papelonia le Sili”—ma sailia le lafitaga i le faalapotopotoga a le Atua.—Faaaliga 18:2, 4, 21, 24

21. O le ā sa faaataina mai i le fuafuaga a le Atua tau i aai o sulufaiga?

²¹ O le toatele o i tatou a o leʻi suʻesuʻeina le Afioga a le Atua, atonu sa faamasaaina le toto o tagata po o le avea foʻi ma sui o lotu po o faalapotopotoga faapolotiki ua toto lima. O lenei tulaga ua faatusaina ai i tatou i le fasioti tagata e leʻi mafaufauina i Isaraelu. E mafai ona sola o ia i se tasi o aai faapitoa e ono, e maua ai le lafitaga ma, mulimuli ane, o le a faasaolotoina pe a maliu le ositaulaga sili. I aso nei, o lona uiga o le taliaina ma tumau ai i lalo o aogā o le auaunaga ola a le Ositaulaga Sili o Iesu Keriso. O le tumau ai i ina i le auaufaatasi ma tagata faauuina o le Atua, atonu e faasaoina ai i tatou pe a faaoo e Iesu Keriso o “le na te tauia ma sui le toto” i aso nei, le faamasinoga a le Atua i luga o tagata ua toto lima. O le “motu o tagata e toatele” o ē ua sosola nei i le faalapotopotoga a le Atua, e tatau ona nonofo ai i lena lafitaga seia ‘maliu’ Keriso i lona tulaga o le Ositaulga Sili, e tusa ai ma le faaiʻuina o lana galuega o le togiola.—Numera 35:6-8, 15, 22-25; 1 Korinito 15:22-26; Faaaliga 7:9, 14.

22. E tusa ai ma le Isaia 2:4, e faapefea ona ese o le UN ma le nuu paia o le Atua?

²² I le pa o le palasa a le UN i Niu Ioka, U.S.A. atonu o le a e faitauina ai upu nei e faavae i le Isaia 2:4 (King James Verion): “Ona latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine; E le sii atu le pelu a le tasi nuu i le tasi nuu, latou te le toe aʻoaʻo foi i taua.” A e o ai ua gaoioi talafeagai ma na upu i aso nei? E le o faia e se sui e tasi o i latou ua taʻua o Malo Aufaatasi. Ua na o le “nuu” faalekelope lava e tolu miliona ma le sili atu o Molimau a Ieova o ē saili i le filemu ua latou faataʻitaʻia ma le manino le faapefea ona faatumauina le solitu faa-Kerisiano i se lalolagi ua pisipisia i le toto.

Fesili Autalu

◻ Atonu e faapefea ona tatou sailia le filemu ma le Atua?

◻ E faapefea ona silasila Ieova i le faamasaa toto saua?

◻ O le ā le uiga o le solitu faa-Kerisiano?

◻ O ā faaaʻoaʻoga lelei o le faamaoni ua ia i tatou?

◻ E faapefea ona tatou maua le lafitaga mo le faasaoina?

[Pusa i le itulau 18]

O Faamaumauga o le Faatuatua, Lototele, ma le Faamaoni

O le tusi New Religious Movements: A Perspective for Understanding Society ua faaaopoopo mai atili i e faamaoni o Molimau a Ieova i le feagai ma sauaga faa-Nasi: “O lo latou mumusu e gauai, na tuuina atu ai e Molimau a Ieova se luʻi i le manatu mo se malo faatautalatasi e pulea atoatoa le sosaiete fou, ma o lenei luʻi, faatasi ma le taututu i lona faasaoina ua faaalia ai le faateʻia o tufuga o le sosaiete fou. O le tele o le sauaina o Molimau, o le tele foʻi lea o lo latou tuuina atu o se luʻi moni faalemafaufau. O auala o sauaga sa latou faaaogāina muamua ma sa masani ona taulau i isi, e pei o le faatigainaina, faafalepuipuiina ma tauemua sa lē iʻu ina liliuina ai Molimau i tulaga faa-Nasi a o le mea moni sa faamalosia ai i latou. Sa lē mautonu tagata Nasi ona o lenei tali atu e leʻi mafaufauina.”

“Sa matuitui le taua i le va o nei itu feteʻenaʻi e lua, a e maise, i le tele o auala sa i ai le lē mautinoa o Nasi e ui ina malolosi faaletino, a e na itiiti le pipii atu i o latou lava talitonuga, ma itiiti foʻi le mautinoa o le faasaoina o la latou Pulega mo le 1,000 tausaga. E leʻi faaletonu molimau a Ieova i lo latou tulaga, auā sa faamaonia lo latou faatuatua talu mai le taimi o Apelu. A o solipalaina e Nasi teteʻega ma tau faamautinoa o latou tagata lagolago, e masani foʻi ona latou faaaogāina faaupuga mai lotu Kerisiano vaevaeina, sa mautinoa e Molimau le faamoni atoatoa ma le lē maluelue o ō latou sui, e oʻo lava i le oti.”

O le a avea o se aso fiafia pe a faaiʻuina lenei manumalo o le faamaoni faa-Kerisiano. (Roma 8:35-39) Ma, i lalo o le pulega a le Malo o le “Alii o le Filemu,” o Iesu Keriso, “e leai se mea e gata mai ai ona tele o lona malo ma le filemu o lona malo.”—Isaia 9:6, 7.

[Pusa i le itulau 19]

Talavou O E Tausisi I Le Faamaoni

O Tala o loo mulimuli mai na siiina mai i tusitusiga na faasalalauina lata mai nei e se tagata i Europa o mea na ia vaai i ai. Ua faaalia ai le fesagai ma le lototele o Molimau talavou ma le luʻi e “le ni o le lalolagi.”—Ioane 17:14.

‘1945, Mati 12: Sa faia ai faamasinoga o pulega malosi tau le tulafono. E toalua taulelea o Ieova na tuuaia. O le moliga: o le mumusu e aʻoaʻoina faafitafita (e tusa ai ma le agaga o la la tapuaiga). O lē pito i itiiti, e leʻi atoa lona 20 tausaga, sa faasalaina i le 15 tausaga e faalepuipui. A o le e matua, na faasalaina i le oti, ma sa aumaia loa i lona nuu e faasalaina ai luma o le lautele e fai ma faaaʻoaʻoga o le taufaamataʻu. O ia o lona 14 o tagata ua faasalaina. Talosia ia malolo filemu o ia. O lenei mea na matuā aafia ai aʻu. E le mafai ona e gaoioi i sea ituaiga auala faasaga i tagata o Ieova. O le tulaga na latou faia i le tama, e lē o se aʻoaʻoga e lapataʻi ai a e ua avea ma maturo. O ia o se tama tino malosi. Ua ou faanoanoa mo ia.

‘I le aoauli, na matou maua ai auiliiliga o le faasalaga o lenei tama talavou, faapea na faia i luma o se vasega o tagata i le maketi. O se tasi fitafita sa tu i le laina na iloina ai le malae na fana e ia ia lava ona o le masiasi a o leʻi faia le faasalaga. Na faia faapea e ia ona sa manao le taʻitaʻi ʻau e fesoasoani atu o ia i le tamaloa na te sisiina tagata. Peitaʻi e leʻi naunau o ia e faia faapea. Sa sili ia te ia le faauma i lona lava ola. E leai se upu na tautala ai.’ I le toetu, maeu le fiafia o le a i ai i na ituaiga o talavou ona sa latou filifilia ia oʻo i ai le tiga o le oti na i lo le aveesea o se nofoaga i le faiga fou o mea a Ieova!—Faatusatusa Hosea 13:14.