Ua uma ona fetalai atu o Iesu i nei mea, ona pō ai lea o ona fofoga e se leoleo o loo tū ai i inā ma faapea atu: “E te tautala ea faapena i le faitaulaga sili?” Ae ua silafia e Iesu e na te leʻi faia se mea leaga. O lea ua tali atu ai o ia: “Afai ua sesē saʻu upu, ia taʻu mai le mea ua sesē ai, ae afai ua saʻo, aiseā la ua e pō mai ai iā te aʻu?” (Ioane 18:22, 23) Ina ua māeʻa lenā, ona faatonuina lea e Ana ina ia taʻitaʻi atu Iesu iā Kaiafa.

O le taimi lea ua faapotopoto uma ane ai i le maota o Kaiafa, i latou ua faia aʻe ai le Saniterini: o lē o loo avea ma ositaulaga sili, ʻautoeaina o le nuu ma le ʻautusiupu. E tusa ai ma le Tulafono, e lē tatau ona faia se faamasinoga faapea i le pō o le Paseka. Peitaʻi, e lē o taofia ai i latou mai i le faataunuuina o la latou faufauga leaga.

E toetoe lava o sui uma o le Saniterini e tutusa o latou manatu e uiga iā Iesu. Ina ua uma le toe faatūina e Iesu o Lasalo, na filifili le Saniterini e tatau ona fasiotia Iesu. (Ioane 11:47-53) E leʻi leva tele atu foʻi, na taupulepule ai taʻitaʻi lotu e puʻe Iesu ma fasioti o ia. (Mataio 26:3, 4) O le mea moni, e tusa ua leva ona faia e le Saniterini le faaiʻuga e faasalaina Iesu i le oti, a o leʻi faia lona faamasinoga.

Ina ua puʻea Iesu i le faatoʻaga o Ketesemane, ona sosola ai lea o ona aposetolo ona o le fefefe. Peitaʻi, e leʻi faaauau ona sosola ese aposetolo e toʻalua, o Peteru “ma le isi soo” e foliga mai o Ioane. (Ioane 18:15; 19:35; 21:24) Atonu e la te maua atu lava Iesu a o taʻitaʻi atu o ia i le maota o Ana. Ina ua auina atu e Ana Iesu i le ositaulaga sili o Kaiafa, ua mulimuli mamao atu i ai Peteru ma Ioane. Ua lē mautonu i laʻua po o le ā le mea e fai. E lē gata o loo popole i le tulaga lamatia ua iai o la ola, ae o loo la popole foʻi po o le ā le mea o le a tupu i lo la Matai.