O le Soifuaga o Iesu ma Lana Faiva

Faamaloloina o se Tagata na Fanau mai o Tauaso

INA UA taumafai tagata Iutaia e fetogi Iesu i maa a o iai o ia i le malumalu, na lafi o ia ma maliu ese atu faalilolilo. Ae na te leʻi tuua ai Ierusalema. Mulimuli ane, i le aso Sapati, a o savavali o ia ma ona soʻo i le aai na latou vaaia ai se tagata o lē na fanau mai lava o tauaso. “Rapi e, po o ai ea na agasala,” ua fesili atu ai le au soʻo ia Iesu, “po o ia nei, po o ona mātua, ina ua fanau mai o ia o tauaso?”

Atonu sa talitonu le au soʻo e pei ona sa talitonu ai nisi rapi faapea, e mafai ona agasala le tagata a o iai i le manava o lona tinā. Peitai na tali atu Iesu: “E lei agasala lenei tagata, po o ona mātua; a e peitai ina ia faaalia ai o galuega a le Atua ia te ia.” O le tauaso o le tagata, e lē o ni iʻuga o se sese faapitoa po o se agasala na faia e le tagata po o ona mātua. O le agasala a le uluai tagata o Atamu ua iʻu ai i le lē lelei atoatoa o le fanau uma a tagata, ma i lea ua nofo toilalo ai i āuga leaga e pei o le fanau mai o tauaso. Ona o lenei pona i le tagata ua maua ai le avanoa mo Iesu e faia ai se faaaliga o galuega a le Atua.

Sa faamamafa atu e Iesu le faanatinati i le faia o nei galuega. “E tatau ona ou faia galuega a le ua auina mai au, manū o ao;” ua fetalai mai ai o ia. “E oo i le po, e le mafaia e se tasi ona galue ai. Manū ou i ai i le lalolagi, o aʻu o le malamalama o le lalolagi.” Ua lē pine ae oo mai le taimi e maliu ai Iesu o le a tuuina atu ai o ia i le pouliuli o le tuugamau, o i inā e lē toe mafai ai ona ia faia se mea. Ae i le taimi nei, o ia o le puna o le faamalamalamaina o le lalolagi.

Ina ua mavae ona fetalai atu o nei mea, ona feanu lea o Iesu i le palapala ma palu faatasi ma lona faua ma ua faia ai se ōmea. Ona ia nini lea o mata o le tagata tauaso ma fetalai atu: “Alu ia, ina mulumulu i le taelega i Seloa.” Na usiusitai le tagata. Ma ina ua ia faia faapea, ua mafai loa ona ia pupula! Maeu le olioli na ia te ia i lona toe foi atu, ina ua mafai ona ia vaai mo le uluai taimi o lona olaga!

Ua ofo ē latou te tuaoi ma ē latou te iloa o ia. “E le o ia ea lenei sa nofo ma ole atu i mea?” na latou fesili atu ai. “O ia lenei” ua tali atu ai nisi. Peitai o nisi e lē talitonu i ai: “Ua foliga ia te ia.” O lea ua faapea atu ai le tamaloa: “O aʻu lava lenei.”

Na fia iloa e tagata, “Pe na faapefea ona faapupulaina ou mata?”

“O le tasi tagata e igoa ia Iesu ua na faia le palapala, ua nini aʻi oʻu mata; ua fai mai foi ia te au, Alu ia i le taelega i Seloa, ma ia mulumulu ai. Ona ou alu ai lea, ma ou mulumuluina, ona ou vaai ai lea.”

Ua latou fesili atu, “Po o fea o i ai o ia?”

Ua tali atu ai o ia, “Ou te le iloa.”

Ua taʻitaʻi atu nei lē sa tauaso e tagata i o latou taʻitaʻi lotu, le au Faresaio. Na fesili atu foi le au Faresaio ia te ia pe na faapefea ona toe pupula ona mata. “Na tuu mai e ia le palapala i oʻu mata, na ou mulumuluina, o lenei ua ou vaai,” o le faamatalaga lea a le tamaloa.

Ma le mautinoa lava, sa tatau ona olioli le au Faresaio i lenei tagata aisi ua faamaloloina! Peitai na i lo lena na latou upu vale ia Iesu. “E le mai le Atua lenei tagata,” ua latou fai mai ai. Aiseā ua latou fai mai ai faapena? “Auā ua le tausi e ia le sapati.” Ma i lea sa tau manatu ai isi Faresaio: “Pe mafai faapefea e se tagata agasala ona fai o faailoga faapena?” O lea sa feeseeseai ai i latou.

O lea la, ua latou fesili atu ai i le tagata: “Pe se a lau upu ia te ia, auā ua faapupulaina e ia i ou mata?”

Ua tali atu o ia, “O le perofeta lava ia.”

Na mumusu le au Faresaio e talitonu i lenei mea. Ua latou mautinoa faapea e tatau ona iai se mea lilo i le va o Iesu ma lenei tagata ina ia faaseseina ai tagata. O lea ina ia foia le mataupu, na latou aami atu ai loa i mātua o le tagata aisi ina ia fesili atu ia te i laua. Ioane 8:59; 9:1-18.

◆ O le ā na mafua ai ona tauaso le tagata, ae lē o le ā?

◆ O le ā le po lea e lē mafai ona galue ai se tagata?

◆ Ina ua faamaloloina le tagata, o le ā le uiga faaalia o i latou o ē iloa o ia?

◆ Na faapefea ona feeseeseai le au Faresaio i le faamaloloina o le tagata?