ʻAe faapefea i latou ua maliliu, e pei o ē pele ia te aʻu?’ atonu o le a e fesili ai. Na taʻu atu e Iesu lava ia i a Mareta faapea o isi, ‘e ui lava ina oti, ae o le a toe ola mai.’ (Ioane 11:25) O le a faia lena i le toetu faalelalolagi. I le taimi o le pulega a Keriso ma lana 144,000 o tupu ma faitaulaga lagolago, o le faitau miliona o ē ua maliliu ua manatua ma le finagalo malie i ai le Atua, o le a toe faatutuina mai ma o le a iai so latou avanoa atoatoa e aʻoaʻo ai i le tapuaiga moni a Ieova. Afai e faamaoni, o le a latou maua le taui o le ola e faavavau i se parataiso i le lalolagi aoao. O le a faia lena i le “aso gataaga”, lea na faasino i ai Mareta e pei ona ia ioe faatasi i ai ma Iesu faapea o le a toe ola mai lona tuagane o Lasalo.—Ioane 5:28, 29; 11:24; Luka 23:43.

Ioe, o le toetu o Iesu o le faamaoniga sili lea o le aogā o le faamoemoe o le toetu. O lea ua ia i tatou foi se faavae mausalī mo le faatuatua atu ma le lē fesiligia i le mana ma le alofa o Ieova le Atua. E mafai foi e i tatou ona faaupu atu le talitonuga sa ia Mareta: ‘Tatou te iloa o le a tutū ē ua oti i le toetu i le aso gataaga!’