Faaaloalo Faale-Atua mo le Toto

“O lea ou te taʻutino atu ai ia te outou i lenei lava aso, ou te mamā aʻu i le toto o tagata uma.”—GALUEGA 20:26.

1 E faapefea i upu a Paulo i le Galuega 20:26 ona atagia ai le silafaga a Ieova i le toto?

O NA upu a le aposetolo o Paulo o se Kerisiano ua atagia mai ai lona faaaloalo mo le toto, le suāvai o le ola. I le faagasologa o loo sau o lenei talanoaga, o le a tatou iloiloina ai po o le a na faauiga i ai e Paulo lenā faamatalaga. Peitaʻi seʻi o tatou manatunatu muamua po o le ā fa a Le Na Foafoaina tagata ma manu o solu, e faatatau i le toto. Ua uma ona tatou matauina ua silasila Ieova i le toto, o le sui lea o le ola, ia faapaiaina. O ē faamasaa ma le faasaua po o le lē faaeteete le toto, a e maise lava le toto o le tagata, e toto lima i latou i luma o le Atua. A e pe le o i ai ea ni auala e faaaogāina ai le toto mo le lelei o le fanau a tagata?

2. (a) A i se ā na avea ai le ʻaina o le toto ma agasala e tauia i le oti mo tagata Isaraelu? (e) Sa faapefea ona aogā mo tagata Isaraelu le tausia o lena tulafono?

² O le tulafono a le Atua ia Isaraelu e tusa ma le toto sa matuā faamamafaina faapea: Aua tou te aai i le toto o se mea ola; auā o le ola (solu) [ola, King James Version; American Standard Version] o mea uma o lo latou toto lava lea; ai se ʻai ai e vavaeeseina o ia.” O lenei agasala e iʻu ai i le oti mo tagata Isaraelu po o tagata e aumau ai ona o le ʻaina o le toto, tusa lava pe sa manaomia mo le fagaina o le tino. A o leʻi ʻaina le aano, e tatau ona latou sasaa le toto ma ufiufi ai i le palapala, ma o le faia faapea e tusa lea ua toe foʻi atu le ola i le Atua. (Levitiko 17:13, 14) O lena le tulafono tauatua. O le tausia pea, sa faatumauina ai tagata Isaraelu i se faiā manuia faaleagaga ma Ieova, le Puna o le ola. E le gata i lea sa faafiafiaina ai foʻi i latou i se aogā lona lua o le faatumau ina o le soifua maloloina faaletino.

Le Toto o le Keriso

3. (a) Ai se ā ua matilatila ai le “tāua” o le toto o Iesu? (e) E faapefea i Tusitusiga Eperu ona faasino i le lumanai i le taulaga a Iesu?

³ A e, sa i le finagalo o Ieova se tasi aogā e sili atu o le faaaogāina o le toto. o le togiolaina lea o le fanau a tagata mai le agasala ma le oti e ala i le “toto tāua” o Keriso Iesu. E oʻo lava i le taimi a o leʻi “faavaeina le lalolagi” (e ala i le fanaua mai e Atamu agasala ma Eva fanau o le a togiolaina), na uluaʻi silafia e Ieova pe o le a faapefea ona ia laveaiina le fanau a tagata. (1 Peteru 1:18-20; Roma 6:22, 23) O le “toto foi o Iesu Keriso lona Alo e faamamāina ai i tatou i agasala uma lava” (1 Ioane 1:7) Ona o le tāua tele o lenei faaaogāina o le toto ua finagalo ai Ieova ia tusia i Tusitusiga Eperu le tele o ituaiga ma ata e faasino i le lumanai i le taulaga lelei atoatoa a Iesu.—Eperu 8:1,4,5; Roma 15:4.

4. O ā ni faaataata ua aumaia i le tala sa faamauina i le Kenese mataupu 22?

⁴ I senituri a o leʻi tuuina atu e Ieova le Tulafono ia Isaraelu, na faatonuina e Ieova Aperaamo e osia se taulaga ia Isaako i le Mauga o Moria. O lea sa faataʻitaʻi ai e le Atua le faapefea ona ia osia le taulaga i lona Alo pele e toatasi o Iesu. O le usiusitai ma le loto o Isaako i lenei tala ofoofogia sa faaatagia ai le usiusitai o Iesu i le finagalo o lona Tamā i le sasaaina atu o lona toto ola e fai ma taulaga.—Kenese 22:1-3,9-14; Eperu 11:17-19; Filipi 2:8.

5. Sa faapefea i taulaga o le Tulafono faa-Mose ona loloto i uiga faaleagaga?

⁵ Na saunia foʻi i le Tulafono faa-Mose le “ata o mea lelei atali,” faasino i luma i le taulaga a Iesu mo le fanau a tagata. Sa faatagaina e le Tulafono le na o le tasi le faaaogāina o le toto—mo taulaga o manu ia Ieova. O na taulaga sa le na o ni sauniga fai. A e loloto i uiga faaleagaga. I ona auiliiliga, sa latou faaataina mai le taulaga a Iesu ma mea uma o le a faataunuuina ai e auala mai i lena taulaga.—Eperu 10:1; Kolose 2:16,17.

6. O taulaga i le Aso Togiola na faaatagia ai le faasaolotoina mai o ā vaega e lua? I ā auala?

⁶ Mo se faaaʻoaʻoga, o le taulimaina e Arona o taulaga i le Aso Togiola sa faatagia mai ai le faapefea e le Ositaulaga Sili, o Iesu, ona faaaogā le tāua o lona lava toto tāua paia e saunia ai le faaolataga, muamua mo faitaulaga o lona “aiga” o le 144,000 o Kerisiano faauuina ina ia taʻu amiotonuina i latou ma maua le tofi o tupu ma faitaulaga faatasi ma ia i le lagi. Ona sosoʻo lea ma le taulaga e sui ai le “nuu” na faaatagia ai le togiolaina e Iesu o le fanau uma a tagata o ē o le a maua le ola e faavavau i i nei i le lalolagi. E oʻo lava i le taimi nei, “o se motu o tagata e toatele” mai lenei vaega ua taʻuamiotonuina mo le faasaoina mai le puapuaga tele o fotuaʻi mai. Talu ai “ua ta foi o latou ofu, ma ua faasinasinaina o latou ofu i le toto o le Tamai Mamoe,” ma faaalia lo latou faatuatua i le faia o le auaunaga paia i le Atua.—Levitiko 16:6,15, 18-22; Eperu 9:11,12; Faaaliga 14:1,4; 7:9,14,15.

7. Ai se ā tatou te olioli ai i le faataunuuina o na ata faaanamua?

⁷ ‘O le ola o loo i le toto.’ Sa lelei atoatoa le toto o Iesu, ua iʻu ai ina ofoina atu e lana taulaga le ola lelei atoatoa mo i latou uma o ē tausisia le faatuatua. Maeu le faafiafiaina o i tatou ona o na ata anamua ua faataunuuina i le taulaga alofa a Iesu!—Levitiko 17:14; Galuega 20:28.

Toto—O Se Finauga Tau Amio

8, 9. (a) O ā nisi o galuega ofoofogia a le toto? (e) E faapefea ona tatou faaalia le faaaloalo faa-leatua i le auala ua faia ai i tatou, e pei o Tavita?

⁸ Ua atagia mai le poto ofoofogia i le auala ua fuafuaina ai le toto. O evolusionisi o loo lē ma iloa pea ona faamatala le tupuaga o le ola, o loo taumafai e taʻu mai ia i tatou faapea o lo tatou toto ola na teʻi lava ua i ai. Paga le faigata ona talitonuina!

⁹ O lo tatou toto lē mafaamatalaina ua na faatino ni galuega ofoofgia. Ua na avatua le okesene faatumau ola ma mea ʻai manaomia i vaega uma o lo tatou tino. Na te aveesea le otaota. Na te tauaveina sela papae latou te faafouina manuʻa mitimiti pe tuga foʻi. E fesoasoani ia pulea le vevela po o le malulu o le tino. O o tatou tino e ese lava mai isi; o tagata suʻesuʻe i le tupuaga o meaola i Egelani ua latou taʻua faapea i le faaaogāina o “tulagalima DNA” e ala i le suʻeina o le toto o le a faailoa mai ai le tagata solitulagono. O le toto o se totoga faatasi ma le tele o vaega o le tino ua mafua ai ona tautala ma le ofo Tavita: “Ieova e, ua e suʻesuʻe mai ia te au, ua e silafia lava aʻu. Ou te vivii atu ia te oe, auā na faia aʻu e ala ai ona matautia ma ofo tele ai”!—Salamo 139:1,14.

10. (a) O ai e tatau ona filifilia pe faapefea ona faaaogāina le toto? (e) O ā faatonuga manino na tuuina atu e le Atua ia Noa ma Isaraelu? (i) O ā faaaʻoaʻo ua faaalia ai o le toto e paia tusa lava pe tulai mai ni faalavelave faafuaseʻi?

¹⁰ E le tatau ea i Le Na Foafoaina ma le amiotonu le fanau a tagata, ma Fuafuaina o tatou toto, ona avea ma Le e filiflia pe faapefea ona faaaoga tatau lena alātoto o le ola? (Iopu 36:3) Ioe ua ia faia faapea i se auala lē masalomia. Na ia faailoa atu i lo tatou augatamā o Noa: “A o le aano o manu o i ai le ola, o lona toto foi lea, aua tou te aai ai.” (Kenese 9:4) Ma i le toe taʻua i lana Tulafono ia Isaraelu, na ia taʻua manino ai: “A o le toto, aua lava e te ʻai ai; auā o le toto o le ola lava lea; aua e te ʻai le ola faatasi ma le tino. Aua e te ʻai ai, e te sasaaina lea i le eleele e pei o le suāvai.” (Teuteronome 12:23, 24) E le tioa i ai i le manatu o Tavita lenei faatonu a o lamatia ola o ana tagata tau e toatolu auā le aumaia o se vaiinu mo ia mai le vaieli i Peteelema. Na ia “liligi atu ia Ieova” e fai ma sui o lo latou toto ola. (2 Samuelu 23:15-17) E le tatau ona alofia le paia o le toto e oʻo lava i faalavelave faafuasei.—Tagai foʻi i le 1 Samuelu 14:31-34.

I le Faapotopotoga Kerisiano

11, 12. (a) O le ā le tino na taʻitaʻia e le agaga sa faia le faaiʻuga i le fesii tau aʻoaʻoga i le uluaʻi senituri? (e) O le ā le tulaga faalelotu na na tuuina i ai e lenei tino le ʻaina o le toto? (i) Ai se ā ua faatutusaina ai le tuiina o le toto ma le ʻaina o le toto e ala i le fofoga?

¹¹ E mafai ea ona e vaaia faalemafaufau se afeafe i Ierusalema o le uluaʻi senituri? O i ina sa faatasi i ai aposetolo o Iesu ma isi toeaina o le faapotopotoga Kerisiano. o le ā le mataupu o la latou talanoaga? Sa o mai Paulo ma Panapa mai Anetioka e faataatia i o latou luma se faafitauli ua tulaʻi mai e uiga i le peritomeina. Sa filifilia e le fono i ina faapea o Kerisiano fou uma e lē manaomia ona peritomeina faaletino i latou.—Galuega 15:1,2,6,13,14,19,20.

¹² I le taʻua o le faaiʻuga, na aoteleina ai e le vaega pule i lena taimi mea e manaomia sa tumau pea i luga o Kerisiano. Sa latou faapea ane: “Auā ua lelei i le Agaga Paia ma i matou nei, ia le faaee atu se tasi avega ia te outou, na o nei mea e tatau; ia taumamao outou i mea e fasia mo tupua, ma le toto, ma mea itina, ma le faitaaga; afai tou te taumamao ma nei mea, e lelei ai outou. Ia outou manuia.” (Galuega 15:28, 29) O lea o le ifo i tupua, o le ʻaina o le toto, ma le faitaaga ua tuuina i le tulaga faalelotu lava e tasi. E tatau i Kerisiano ona alo ese mai nei mea uma ina ia faatumauina ai le soifua maloloina lelei faaleagaga, ma auai i le faataunuuina o folafolaga a le Atua. E faatatau i le toto, ua tutusa lava le ʻaina e ala i le fofoga ma le tuiina e ala i uaua. O le fuafuaga lava e tasi—ina ia tausia ma fagaina ai le tino. E pei ona faamanino atu e le vaega pule, o le lē taulau ona alo ese mai le toto o le solia lea o le tulafono a le Atua.

13. (a) O le taumamao ma le toto ua iʻu ai i ā nisi puipuiga faaopoopo mo Molimau a Ieova? (e) Ua faapefea ona auauna isi tulafono tauatua e puipuia ai tagata o le Atua?

¹³ O le faateleina ua i ai nei o le AIDS, fiva samasama, ma isi faamaʻi e mafua mai i le tuiga o le toto ua faaalia ai o le soifua lelei faaletino ua aofia ai foʻi i le tausia o tulafono a le Atua. I taimi faale-Tusi Paia, na aaoina atu ai e le Atua ia Isaraelu tulafono faapitoa mo mea taumafa, le puipuia, faatumauina o le soifua, ma le tumamā sa talafeagai lelei ma lo latou i ai i le vaomatua. (Levitiko 11:2-8; 13:2-5; Teuteronome 23:10-13) I le tau sia o na tulafono, sa le gata ina faatumauina ai e Isaraelu se faiā vavalalata faaleagaga ma lo latou Atua, a e sa puipuia ai foʻi i latou faaletino mai faamaʻi sa pagatia ai o latou tuaoi. O le senituri ua mavae na faatoʻa amata ai ona talisapaia e fomaʻi o vailaau le atamai o le faatinoina o nisi o na tulafono. O le toatele ua oʻo foʻi ina latou iloa, le talafeagai o le tulafono a le Atua i le toto.

14. Ina ua usiusitai Isaraelu, o ā faamalologa ma faamanuiaga sa i ai mo i latou?

¹⁴ Pe a usiusitai Isaraelu sa faataunuu e le Atua ia i latou le folafolaga: “Afai e te matuā faalogo i le leo o Ieova lou Atua, ma e fai le amio tonu i ona luma, ma e uai mai ou taliga i ana poloaiga, ma e tausi i ana sauniga uma lava, ou te le tuuina atu ia te oe se tasi o ia maʻi na ou tuuina atu ia Aikupito; auā o aʻu o Ieova, o le na te faamaloloina oe.” A e sili atu ona tāua, o le usiusitai na agai atu ai Isaraelu i le laina mo faamanuiaga o le Malo i le lumanai.—Esoto 15:26; 19:5,6.

15. O ā faaaʻoaʻoga lata mai nei ua faataʻitaʻia ai le faapefea ona faamanuiaina i tatou ona o le usiusitai i poloaiga a le Atua?

¹⁵ Ua talisapaia e Molimau a Ieova le tele o aogā ua aumaia e vailaau i aso nei. Mo se faaaʻoaʻoga ina ua faaumatiaina le Maota o le Malo e latalata i Sini i Ausetalia, i se pomu a tagata tau faamataʻu i le tausaga ua teʻa ma e silia i le 50 Molimau na manunuʻa sa faanatinati atu i se faalemaʻi lata ane, ma sa latou matuā faafetai ona sa lava ma totoe vailaau e lē o le toto na tuiina e fomaʻi mo i latou. Sa faamanuiaina i latou uma na manunuʻa. E ao ona faafetai i latou mo le nei tuiga sa talafeagai ma tulafono a le Atua. E faaopoopo i ai, e leai se tasi o i latou na lamatia ona o aafiaga i faamaʻi e ono aumaia e le tuiina o le toto.

“Mamā . . . i le Toto o Tagata Uma”

16. I le pei o Paulo, o le ā le uiga e tatau ona tatou faaalia agai i le auaunaga paia?

¹⁶ A e peitaʻi, seʻi o tatou toe liliu atu i le uluaʻi senituri. Ua mavae le fitu o tausaga talu ona faalogo Paulo ma Panapa ia Iakopo o folafola le faasaina o le ifo i tupua, le toto, ma le faitaaga. I lena taimi ua mavae sa faia e Paulo malaga faamisionare se lua i Asia Itiiti ma oʻo atu ai i Eropa i Sasae. I lona toe foʻi mai, e ala i Meleto, sa mafai ona ia talanoa atu i toeaina Efeso, na ō ane e fetaiaia ma ia. Sa ia faamanatu atu le tuuina atu atoatoa o ia e “auauna i le Alii ma le loto maulalo lava, ma le maligi tele o loimata, ma faaosoosoga.” O tatou faataulagaina ea i tatou lava i aso nei i le foaiina atu atoatoa o i tatou lava i le auaunaga ia Ieova? E tatau ona tatou faia faapea.—Galuega 20:17-19.

17. I le pei o Paulo, e faapefea ona tatou faia la tatou auaunaga?

¹⁷ Sa faapefea ona faatino e Paulo lena auaunaga? Na ia molimau i soo se mea na ia maua i ai tagata, a e maise i o latou aiga, ma e tusa lava po o le ā la latou lotu. Sa leʻi solomuli o ia i le faatonuina o na toeaina, ma e le taumate sa latou ō faatasi ma ia a o ia aʻoaʻo “i luma o le nuu, atoa foi ma lea fale ma lea fale.” Sa le na o i latou na maua aogā mai le auaunaga maelega a Paulo, auā sa ‘molitino o ia ia Iutaia atoa ma Eleni i le salamo i le Atua, ma le faatuatua i le Alii o Iesu.’ Matau le upu lena “molitino.” Pe o tatou galulue molitino ea i aso nei i le vaaia po o ua maua e ituaiga o tagata uma, ma vaega o aganuu uma, le molimau?—Galuega 20:20,21; Faaaliga 14:6,7.

18. (a) I le pei o Paulo, e tatau faapefea ona faaaafia o tatou solu i le auaunaga i le Atua? (e) I le pei o Paulo, e faapefea ona tatou faaauau pea a o feagai ai ma le faateleina o omiga?

¹⁸ O le upu “molitino” ua i ai foʻi i upu a Paulo e sosoʻo ai: “A e ou te le manatua se tasi mea, o loʻu lava ola foi ou te le naunau i ai, seʻi ou faauma loʻu momoʻe ma le olioli, atoa ma le faiva ua ou maua mai le Alii o Iesu, ou te molitino atu le tala lelei o le alofa tunoa o le Atua.” (Galuega 20:24) O le a leai se aogā i lona solu po o le ola, pe ia lē faataunuuina lana auaunaga. E faapena ea lou faalogona agai i lau faiva? A o agai atu nei aso i le mutaaga, ma a o i ai omiga, sauaga, maʻi, po o le agai atu i le tagata matua, pe o tatou faaalia pea le agaga e pei o Paulo i le silia ma molitino ia i i latou ua “tatau“ i ai?—Mataio 10:12,13; 2 Timoteo 2:3,4; 4:5,7.

19. Ai se a na mafai ai ona faapea mai Paulo, “Ou te mamā aʻu i le toto o tagata uma”?

¹⁹ Sa leʻi faatalitalia e Paulo e toe vaai i na toeaina Efeso. Peitaʻi ma le mautinoa atoatoa sa mafai ona ia fai atu ia i latou: “Ou te taʻutino atu ai ia te outou i lenei lava aso, ou te mamā aʻu i le toto o tagata uma.” I le a le auala? E leʻi faamasaa e Paulo le toto i ni faiga taua. Na te leʻi ʻaina le toto. Peitaʻi sa sili ona naunau o ia i ola o isi, e pei ona faaata mai e o latou toto. Na te leʻi manao e vaai atu ua maimau o latou ola i le Aso o le Faamasinoga a le Atua ona o lona le taulau ona avatu se molimau molitino. E leʻi solomuli o ia ma le taʻu atu i toeaina ma isi “le finagalo uma o le Atua.”—Galuega 20:26, 27.

20. (a) Ina ia ō gatasi ma lapataiga faifai pea a Ieova ia Esekielu, o le a le tiute tauave e tatau ona faataulauina i aso nei? (e) O le ā le taunuuga mo i tatou ma ē faalogo ia i tatou?

²⁰ A o fotuaʻi mai le “puapuaga tele” ua sili atu ona faanatinati le manaomia o na folafola le finagalo uma o le Atua. Ua tali tutusa ma le tulaga na i ai pe tusa ma le 2,600 tausaga ua mavae ina ua agai ane le faaumatiaga o Ierusalema. Na oʻo ane le afioga a Ieova i lana perofeta o Esekielu, faapea: “Le atalii e o le tagata, ua ou faia oe ma tagata vaai i le aiga o Isaraelu; o le mea lea ia e faalogo mai ai upu a loʻu gutu, ma e apoapoai atu ia te i latou mai ia te au. A ou fai atu i le ua amio leaga, E oti lava oe; a ē le apoapoai atu ia te ia, ma ē le fai atu i ai e apoapoai atu i le ua amio leaga ia liliu ese i lona ala leaga, ina ia ola ai o ia; e oti lena tagata amio leaga i lana amioletonu, a o lona toto ou te taui atu lea ia te oe.” (Esekielu 3:17-21; 33:7-9) O auauna faauuina a Ieova ma a latou aumea o le “motu o tagata e toatele” ua i ai le tiute tauave faapena i aso nei. E tatau ona molitino la tatou molimau. O lea auala atonu e faasaoina ai i tatou i le aso o le toasa o le Atua, faatasi ai ma i latou e faalogo ia i tatou.—Isaia 26:20, 21; 1 Timoteo 4:16; Faaaliga 7:9, 14, 15.

21. O a auala atonu tatou te faaalia ai le faaaloalo tauatua mo le toto, ma o le a le iʻuga?

²¹ I mataupu tau i le solitu faa-Kerisiano, le taumamao mai le toto, le avatua o se molimau molitino, ma le faaalia o le faatuatua i le taulaga tāua a Iesu, seʻi o tatou manatunatu taitoatasi ia usiusitai i le finagalo uma o le Atua. O le faia faapea o le a tatou auai faatasi i faataunuuga fiafia o le Salamo 33:10-12: “E faaleaogaina e Ieova o taupulepulega o nuu ese; e faaiuvaleina e ia o mafaufauga a tagata. E tu le pule a Ieova . . . Amuia le nuu ua Atua ia Ieova.”

E Faapefea ona e Tali?

◻ O le ā se tasi o faaaogāina o le toto e aumaia ai faamanuiaga tumau?

◻ E faapefea ona tatou maua aogā e ala i le taumamao mai le toto?

◻ Atonu e faapefea ona tausia i tatou ia “mamā . . . i le toto o tagata uma”?

◻ O le ā le faaaʻoaʻoga o le molitino e tatau ona tatou mulimuli ai?

[Faamatalaga faaopoopo i le itulau 23]

I le Wall Street Journal o Mati 20, 1986, i lalo o le ulutala: “O Fale Teu Toto Ua Lē Saogalemu Mai i le AIDS.” Ua faitauina faapea le uluaʻi palakalafa: “Ua itiiti le saogalemu o le toto faasoasoa i Amerika na i lo le saogalemu o faalapotopotoga teu toto o le auala sili ona faigofie lea mo le faasalalauina o le Acquired Immune Deficiency Syndrome i tua atu o lo vaega mataʻutia o loo i le faitauaofai lautele o tagata. O suʻesuʻega i sela o le AIDS ua masani ona faailoa mai ai faapea toto faameaalofa ua lē mafai ona mautinoa le lē faaleagaina. A e sili atu ona leaga, ua le mananao fale teu toto ina ia faia ni fuafuaga e faaleleia ai le saogalemu o tuiga.”