Tusi o le Tusi Paia Numera 53—2 Tesalonia
Lē na Tusia: Paulo
Nofoaga na Tusia Ai: Korinito
Māeʻa Ona Tusia: Pe tusa o le 51 T.A.
E LEʻI leva talu ona tusi atu le tusi muamua a le aposetolo o Paulo i Tesalonia, ae tusi atu loa lana tusi lona lua. Ua tatou iloa le felataʻi o taimi na tusia ai nei tusi, ma le auina mai foʻi i le aai o Korinito, ona o loo toe momoli atu faatasi ma Paulo alofaaga o Siluano ma Timoteo i le faapotopotoga i Tesalonia. O i latou uma o ni auauna femalagaaʻi o le uluaʻi faapotopotoga Kerisiano, ma e leai se faamaumauga e iloa ai na toe ō faatasi i latou nei e toʻatolu ina ua mavae lo latou iai i Korinito. (2 Tesa. 1:1; Galu. 18:5, 18) O le mataupu na talanoaina ma le auala na talanoa atu ai, e faailoa ai na iloa e Paulo le manaʻomia vave ona faasaʻoina le faapotopotoga e tusa ai o le mea sesē na latou faia.
2 Na faamaonia lelei le moni aʻiaʻi o le tusi e pei lava o le Tesalonia Muamua. O loo siiina mai foʻi e Irenaeus (senituri lona lua T.A.) faapea foʻi isi tusitala anamua e aofia ai Justin Martyr (o le senituri foʻi lona lua), lea e foliga mai o loo faasino atu i le 2 Tesalonia 2:3 ina ua tusi e faatatau i le “tagata o le amioleaga [agasala].” O loo maua foʻi lenei mau i tusitusiga anamua ia o loo iai le Tesalonia Muamua. E ui lava e lē o maua i le Chester Beatty Papyrus Nu. 2 (P4 6 ), ae e mautinoa o loo iai i itulau muamua e lua o itulau e fitu ia o loo misi e sosoo ma le Tesalonia Muamua.
3 O le ā le fuafuaga o lenei tusi? Ua tatou iloa i le apoapoaʻiga na avatu e Paulo i Tesalonia, sa finau mai nisi i le faapotopotoga e faapea ua toeitiiti lava ona faatasi mai lea o le Alii, ma o ē na faia nei taumatematega na latou talaʻia ma le maelega lenei talitonuga, ma faavevesi ai le faapotopotoga. E foliga mai na faaaogā e nisi lenei mea e fai ma faamolemolega ina ia lē galulue ai e tausia i latou lava. (2 Tesa. 3:11) I le tusi muamua a Paulo na ia faasino atu ai i le faatasi mai o le Alii, ma e lē taumatea ina ua faalogo nei tagata a o faitauina le tusi, sa vave lava ona latou mimilo sesē upu a Paulo ma faauiga sesē le tusi i Kerisiano. Na ono mafai foʻi ona latou faapea atu o loo faamatalaina i le tusi a Paulo “ua oo mai le aso o Ieova.”—2:1, 2.
4 E foliga mai na maua e Paulo se tala e faatatau i lenei tulaga, atonu e mai le tagata lea na auina atu le tusi muamua i le faapotopotoga, ma o lea ua naunau ai o ia e faasaʻoina manatu o ona uso sa alofa faapelepele i ai. O lea, a o iai faatasi Paulo ma ana aumea e toʻalua i le 51 T.A., na auina atu ai se tusi mai Korinito i le faapotopotoga i Tesalonia. E faaopoopo atu i le faasaʻoina o manatu sesē i le faatasi mai o Keriso, o loo avatu ai foʻi e Paulo se faalaeiauga māfana ina ia tumau mausalī i le upu moni.
LE POGAI E AOGĀ AI
10 Ua faaaofia e lenei tusi puupuu faagaeeina i Tesalonia se vaega tele o upu moni faa-Kerisiano, ia e aogā ona iloiloina. Seʻi iloilo aʻoaʻoga faavae ma mataupu silisili o loo mulimuli mai: O Ieova o le Atua o le faaolataga, ma ua ia faapaiaina e ala i le agaga ma le faatuatua i le upu moni (2:13); e tatau i Kerisiano ona tutumau i sauāga ina ia taʻuaogāina ai i le Malo o le Atua (1:4, 5); e aoaoina faatasi Kerisiano i le faatasi mai o le Alii o Iesu Keriso (2:1); o le a aumaia e Ieova le faamasinoga tonu i ē e lē usiusitaʻi i le tala lelei (1:5-8); o i latou ua valaauina o le a faamamaluina faatasi ma Keriso Iesu e tusa ma le agalelei faifua o le Atua (1:12); ua valaauina i latou e ala i le talaʻiga o le tala lelei (2:14); o le faatuatua o se mea tāua e manaʻomia (1:3, 4, 10, 11; 2:13; 3:2); e talafeagai ona galue le tagata lava ia e tausi ai o ia i le faiva; pe afai e lē galue se tagata, o le a oo ina paiē ma isuisu fua i mea e leai sa latou feʻau i ai (3:8-12); o le alofa o le Atua e ō faatasi ma le tumau (3:5). Maʻeu ni faamatalaga faalaeiau o loo maua i lenei tusi puupuu ua faagaeeina e le Atua!
11 I lenei tusi na faaalia ai e Paulo le manatu mamafa mo le lelei faaleagaga o ona uso i Tesalonia, le autasi ma le taulau manuia o le faapotopotoga. Na ia faasaʻoina i latou i le taimi e oo mai ai le aso o Ieova, i le faapea atu, e tatau ona faaalia muamua mai le “tagata o le amioleaga,” e nofo o ia “i le malumalu o Le Atua, e faaalialia ai o ia lava o se atua.” Ae ui i lea, o i latou ua “taʻuaogāina . . . i le malo o le Atua,” e mafai ona mautinoa atoatoa o le a faailoa mai le Alii o Iesu mai le lagi, e aumai le taui ma sui i le afi mumū, “o le taimi lea e sau ai e faamamaluina o ia faatasi ma le ʻaupaia, ma e ofo ai i lenā aso ē uma e faatuatua.”—2:3, 4; 1:5, 10.