Ua Faatoilaloina le Atuatuvale e le Faamoemoe!

I LE Webster’s Ninth New Collegiate Dictionary, ua faamatalaina ai le atuatuvale o le “matuā leiloa lava o le faamoemoe.” E manino lava la faapea, ina ia manumalo i le atuatuvale, tatou te manaomia le faamoemoe!

O se tagata ua lē manuia ma oo ina ola i se olaga mativa, o le a lē atuatuvale nauā pe afai e iai sona faamoemoe. E mafai e le faamoemoe ona avatu e oo lava ia i latou o mamaʻi i mafatiaga o le mafaufau le lototele ma le malosi e tumau ai. Ae e tatau i le faamoemoe ona maufaatuatuaina! O le ā le uiga o lenei mea?

Le Faavae mo le Faamoemoe

Manatu i le mea na tupu ia Sara, le avā a le tamā matua o Aperaamo. A o latalata atu i le 90 tausaga lona matua, sa pa pea o ia ma sa tele tausaga o atuatuvale o ia ona o le fia maua o sana tama. Ae ina ua 99 tausaga o lana tane, na toe taʻua ai e Ieova se folafolaga na ia muaʻi faia i le tele o tausaga ua mavae—e faapea o le a maua moni e Aperaamo se “fanau,” po o se suli. Sa iloa lelei e Aperaamo faapea o se folafolaga maufaatuatuaina lenei. Seʻi manatu i le fiafia atonu na ia Sara ina ua tupu faavavega lenei mea e fiafia ai, ma na ia fanaua ai loa Isaako! (Kenese 12:2, 3; 17:1-4, 19; 21:2) Sa leʻi tuuseseina le faatuatua o Aperaamo i le Atua, e pei ona faamatalaina e le aposetolo o Paulo: “E lei masalo vale [Aperaamo] ma le le faatuatua i le mea na folafolaina e le Atua, a ua malosi tele o ia i le faatuatua ua vivii atu i le Atua.”—Roma 4:20.

I le tusi atu i tagata Iutaia o ē na avea ma Kerisiano i ona aso, sa taʻu atu i ai e Paulo faapea e mafai lava ona latou faalagolago i le folafolaga a le Atua e uiga i le faaolataga e ala ia Iesu mo mafuaaga tāua e lua. I le taʻua o le folafolaga a le Atua ia Aperaamo ma Lana tautoga tauatua na aumai faatasi ai, na finau mai ai le aposetolo: “E tauto tagata i lē e sili, o la latou tautoga o le iʻuga lea o fefinauaiga uma, ona o se faamaoniga faaletulafono lea ia i latou. E faapea foi le Atua, ina ua ia fuafuaina e faailoa atili mai le tele o mea i suli o le folafolaga e uiga i le lē masuia o lana fuafuaga, na ia faia ai se tautoga, ina ia mafai ai e ala i mea e lē masuia e lua, e lē mafai ona pepelo ai le Atua, ona maua ai e i tatou o ē na sosola atu i le sulufaiga le faalaeiauga malosi ina ia taofi mau i le faamoemoe ua tuu i o tatou luma.” (Eperu 6:16-18, NW) Ioe, e moni ma maufaatuatuaina folafolaga a le Atua. O Ieova e ou le malosi uma lava ma e tutasi o ia i le mafai ona faamautinoa ai le faataunuuina o lana lava afioga.

Faamoemoe—ʻE Mautinoa ma ua Mausali’

Na tusi mai Paulo faapea o le faamoemoe faa-Kerisiano “e [mautinoa] ma ua mausali.” (Eperu 6:19) Sa iloa e Paulo le pogai o lona faamoemoe. Ua ia faamatala mai e faapea: “Ua ulu atu [le faamoemoe, NW] i totonu o le ie puipui.” O le ā le uiga o lenei mea? Sa faia e Paulo se faasinoga manino i le malumalu anamua i Ierusalema. I totonu o lenei malumalu sa iai se vaega e Silisili ona Paia, sa vavae ese mai le malumalu atoa i se ie puipui po o se pupuni. (Esoto 26:31, 33; Mataio 27:51) E moni, o le malumalu faitino sa i Ierusalema ua leva ona faaumatia. O lea la, i aso nei, o le ā ua fai ma sui o lenei mea e Silisili ona Paia?

I le lagi lava, i le mea o afio tupu ai le Atua lava ia! Na faamatala mai e Paulo lenei mea ina ua ia faapea mai, ina ua uma ona afio aʻe Iesu i le lagi, “ua le ulu atu . . . i le mea paia ua faia e lima [le malumalu i Ierusalema], o le faatusa lea o le mea moni, a o le lagi lava, ina ia iloa ai nei o ia i luma o le Atua mo i tatou.” (Eperu 9:24) O lea, o le faamoemoe faa-Kerisiano, lea e fesoasoani ia i tatou ina ia tau faasaga i le atuatuvale, e lē faalagolago i faiga faapolotiki a tagata, ae i se faatulagaga faalelagi. E faalagolago i Lē na tofia e le Atua, o Iesu Keriso, o lē na tuuina mai lona soifua e fai ma togiola mo a tatou agasala ma o lē ua faaali atu nei i luma o le Atua mo i tatou. (1 Ioane 2:1, 2) E lē gata i lea, e pei ona faaalia soo i itulau o lenei mekasini, o Iesu lava lenei o lē ua tofia e le Atua e pule o le Tupu i le Malo faalelagi o le Atua, ma sa ia faia faapea talu mai le 1914. Ua lē pine ona aveesea lea e lenei Malo faalelagi mea ua mafua ai ona atuatuvale le toatele o tagata.

Faamoemoe—O “se Taula o le Agaga”

Sa faaaogā e Paulo se tala faatusa i se taula ina ia faatalitonu ai lana aufaitau faapea, o lo latou faamoemoe mo le faaolataga e ala ia Iesu sa matuā lelei lona faavae. Na ia faamatalaina faapea, “ua ia i tatou lena faamoemoe pei se taula o le agaga.”—Eperu 6:19.

O taula, sa iloa lelei lava e tagata faimalaga e pei o Paulo. O taula i aso anamua e tutusa lelei lava ma taula i ona po nei, e masani ona faia i uamea e iai vaega e lua pei ni nifo e taofi ai i le ilititai. I le malaga agaʻi atu i Roma i le tausaga pe tusa o le 58 T.A., sa oo ai le vaa o Paulo i se tulaga mataʻutia ina ua fatia i luga o le papa. Ae ina ua latalata atu le vaa i le papaʻu, “ona lafo ifo lea e i latou [le auvaa] o taula e fa i le taumuli.” Faafetai mo na taula, ona sa mafai ai e le vaa ona sao mai i le afā.—Galuega 27:29, 39, 40, 44.

O le ā la e tatau ona e fai ina ia mafai ai ona saogalemu lou faamoemoe e pei o se taula, ina ia mafai ai ona e folau atu ma le saogalemu mai faigata tau tamaoaiga, maʻi o le tino ma faalogona ootia, ma po o ā lava nisi “afā” e oso ane i lou ala? Muamua, ia e mautinoa e oe lava o folafolaga a le Tusi Paia e mau faatuatuaina. “Ia tofotofo i mea uma lava.” (1 Tesalonia 5:21) Mo se faaaʻoaʻoga, pe a toe talanoa atu Molimau a Ieova ia te oe, ia faalogologo i mea o latou fai atu ai. Afai e seāseā ona asiasi atu ia te oe i le mea o e nofo ai, ia saili ia i latou i se Maota o le Malo o latalata ane. O le a lē faamalosia oe e te aufaatasi ma i latou, ae e valaaulia oe ina ia e talia le faia o se suesuega i se mataupu faale-Tusi Paia e aunoa ma se totogi, ua fuafuaina ina ia faia i so o se mea, ma so o se taimi e talafeagai ma oe.

O lena suesuega o le a faamautinoa atu ai ia te oe faapea o le Atua “na te tauia mai o e matuā saili ia te ia.” (Eperu 11:6) O le a e aʻoaʻoina ai faapea ua lē o toe umi se taimi, ona aveesea lea e le Malo o le Atua i lalo o le pulega a le Tupu o Keriso Iesu, le iʻuvale ma uiga lē tutusa ua faapogaia ai le atuatuvale o le toatele i aso nei. I lalo o le Malo, o le a toe faafoisia ai lenei lalolagi i se parataiso, ma o le a aumaia e le Atua le ola e faavavau ia i latou o ē alolofa ia te ia. (Salamo 37:29; Faaaliga 21:4) Maeu se faamoemoe mamalu!

Ia faitau ma le faaeteete le Tusi Paia ina ia iloa ai le moni o lenei faamoemoe. Ia ona e galue lea ina ia atiina aʻe se faiā vavalalata totino ma le Atua, i le avea o oe o sana uō e pei ona sa iai Aperaamo. (Iakopo 2:23) Ona o Ieova o le “Faafofoga tatalo,” ia taʻu atu ia te ia ou popolega. Pe a faamaoni lau tatalo atu, ona fesoasoani lea o lau tatalo e faamāmā lau avega ma manumalo i lou atuatuvale. E mafai e le agaga o le Atua ona oo ina tatala le ala e suia ai le tulaga o loo e mafatia ai.—Salamo 55:22; 65:2; 1 Ioane 5:14, 15.

Ia “Taofi Mau”!

Ina ua uma ona fautuaina ona uso a soʻo ina “ia tofotofo i mea uma lava,” ona faaopoopo mai lea o Paulo: “Ia taofi mau i le mea lelei.” (1 Tesalonia 5:21) O le tasi o auala e faia ai lenei mea, o le auaufaatasi lea ma tagata o ē o loo taofi mau foi i le faamoemoe faa-Kerisiano. Na lapatai mai le tupu poto o Solomona: “O lē latou te feoai ma tagata popoto, e poto lava ia; a o le uo a e valelea, e leaga ai lava ia.” (Faataoto 13:20) Aua neʻi faatagaina lou faafiatonu po o faalogona leaga e taofia ai oe mai le saili atu o aumea lelei. Mo se faaaʻoaʻoga, i Molimau a Ieova, o loo iai tagata sa aunoa ma se faamoemoe i aso ua mavae. Ae o lo latou suesueina o le Tusi Paia, faatasi ma se aufaatasiga fiafia ma uso talitonu, ua faamalosia ai la latou faiā ma Ieova ma saunia ai mo i latou se faamoemoe maufaatuatuaina e pei o se taula. Pe faatoilaloina moni e lenei mea le atuatuvale? O le mea moni lava lena.

Manatu i le tulaga o Annmarie, o lē sa oo ina atuatuvale ona sa puapuagatia o ia mai ni manuʻa i lima o lana tane sauā. Ua ia faamatala mai faapea: “Sa ou filifili o le a ou pule i loʻu ola, ae ona o se mafuaaga na ou filifili ai ou te tatalo muamua i le Atua. Ou te manatua loʻu faapea atu, ‘Aiseā e te lē fesoasoani mai ai ia te aʻu? Ua leva ona ou faamoemoe atu ia te oe, ae leai se tali mai.’ Sa ou faaiʻuina loa laʻu tatalo ma le manatu faapea e leai se fuafuaga i le olaga, e sili ai la ona ou oti. I le taimi lava lena, sa tuʻituʻi mai ai loa le faitotoa. Sa ou manatu e faagalo, i le faamoemoe faapea po o ai lava o iai i inā e iʻu lava ina alu ese.

“Sa tuʻituʻi mai pea, ma sa lē mafai ona ou nofo. Sa ou soloi ese oʻu loimata ma alu atu e vaai po o ai sa i le faitotoa, ma le faamoemoe ina ia vave ona alu ese le tagata ae seʻi fai le mea sa ou manao e fai. Ae,” fai mai Annmarie, “faafetai ia Ieova, e leʻi tupu lena mea, auā ina ua ou tatalaina le faitotoa, sa ou iloa ai fafine e toalua o loo tutū mai. O le mea moni, sa ou matuā fenuminumiai, ma sa ou lē malamalama i mea na la fai mai ai. Ae na la ofo mai ia te aʻu se tusi o le a faamatala mai ai faapea e iai le fuafuaga o le olaga. O le mea tonu lava lena sa ou manaomia ina ia toe faagaee ai loʻu naunau i le olaga.” Sa fuafua e lana auasiasi se suesuega faale-Tusi Paia e lē aunoa ma ia. Sa aʻoaʻo e Annmarie ina ia avea ma uō a le Atua. O lenei mea, na iʻu ina avatu ai ia te ia se faamoemoe i le olaga. Ua fesoasoani nei la o ia i isi ina ia atiina aʻe le faalagolago i le Atua.

Atonu sa e faamoemoe mo se iʻuga o le atuatuvale e aunoa ma le iloaina o mea uma sa aafia ai. Ae afai sa e tatalo: “Ia oo mai lou malo. Ia faia lou finagalo i le lalolagi, e pei ona faia i le lagi,” ia ua e tatalo la mo le oo mai o le Malo o le Atua i lalo o le pulega a Iesu Keriso, lea o le a na faaumatia mea ua faapogaia ai ona atuatuvale tagata loto saʻo. (Mataio 6:10) O lau suesuega totino o le Tusi Paia ma le auaufaatasi e lē aunoa ma isi o loo iai lena lava mautinoa, o le a faamalosia ai lau uʻu i le faamoemoe mo le Malo o Ieova ina ia oo mai ma aumaia le Parataiso i lo tatou lalolagi. (1 Timoteo 6:12, 19) O le faamoemoe mamalu lenei o loo faalauiloa e lenei mekasini i lomiga uma. Ia fusimau ma le loto atoa le faamoemoe ina ia tau ai faasaga i le atuatuvale. E moni, o le faamoemoe foi “e le mā ai.”—Roma 5:5.

[Ata i le itulau 7]

O le suesueina o le Tusi Paia e aumaia ai ia i tatou le faamoemoe e pei “o se taula o le agaga”