Ia Faasolosolo—Fai se Agaʻigaʻi i Luma

INA ua faatoʻā amata lava ona e faamasani i le faatatauina o mataupu silisili o le Tusi Paia, sa faasolosolo ona suia le tulaga loloto ua mauaa o le auala e te manatunatu, e tautala, ma amioaʻi ai. O le tele lava o nei mea na e faia a o e leʻi auai i le Aʻoga o le Faiva Faatiokarate. I le taimi nei atonu o lenā ua e faasolosolo mai i le tulaga ua e tuuina atu lou ola iā Ieova. Pe o lona uiga ea ua lē o toe manaʻomia ona e agaʻi i luma? E leai. O lou papatisoga ua na o se amataga lenā.

E tusa o le taimi a ua leva ona auauna le soo o Timoteo e avea ma toeaina Kerisiano, na fai atu ai Paulo iā te ia ina ia “mafaufau” e lē gata i le fautuaga ua tuu atu iā te ia, ae atoa ma faaeaga o le auaunaga ua faatuatuaina atu mo lana tausiga—ina ia “faamasani ai” i ia mea—ina ia “iloa ai e tagata uma [lona] alualu i luma.” (1 Timo. 4:12-15) E tusa lava pe faatoʻā amata ona e mulimuli i le ala o le upu moni, po ua tele sou poto masani i le soifuaga faa-Kerisiano, ae ao ona e fiafia e agaʻigaʻi i luma.

Le Atamai ma le Liliuina

I le Efeso 3:14-19, tatou te faitau ai e faapea sa tatalo le aposetolo o Paulo mo ana aumea talitonu ina ia “mafai . . . ona iloa lelei . . . le uiga o le lautele, ma le umi, ma le loloto, ma le maualuga” o le upu moni. O le pogai lea, na faaee atu ai e Iesu meaalofa i tagata ina ia aʻoaʻo atu, faasaʻo, ma ati aʻe le faapotopotoga. O le manatunatu e lē aunoa i le Afioga faagaeeina a le Atua, faatasi ai ma le taʻitaʻiga mai faiaʻoga ua iai le poto masani, e mafai ona fesoasoani iā i tatou ina ia ‘tuputupu aʻe ai’ faaleagaga.—Efe. 4:11-15.

O lenā tuputupu aʻe e aofia ai le “toe fuataiina manao o [lou] loto.” E aofia ai i lenei mea le faatulaga o se faanaunauga malosi faalemafaufau ina ia talafeagai ma faanaunauga o le Atua ma Keriso. E aofia ai le faafetaui atu e lē aunoa i o la manatu, ina ia mafai ai ona ‘faaofuina i le tagata fou.’ (Efe. 4:23, 24) Pe a e suʻesuʻeina faamatalaga a Evagelia, pe e te manatu i nei tala o le soifuaga o Keriso o se ata faataʻitaʻi mo oe e mulimuli ai? Pe e te saʻili ina ia mātauina ni uiga patino sa faaalia e Iesu ma fai se taumafaiga malosi ina ia faataʻitaʻia ia uiga i lou olaga?—1 Pete. 2:21.

O mataupu e te faaaofia i talanoaga e mafai ona iloa ai le mamao ua oo i ai lenā agaʻigaʻi i luma. O i latou ua oofu i le tagata fou latou te lē auai i talanoaga e lē faamaoni, e faaleagaina ai, e matagā, pe leai se uiga fiafia o faaali atu ai. Na i lo lenā, latou te tautatala i “upu lelei e ati ae ai . . . e tupu ai le lelei i e faalogologo i ai.” (Efe. 4:25, 26, 29, 31; 5:3, 4; Iuta 16) O a latou talanoaga ma faamatalaga e lē gata i o latou lava aiga ae i sauniga a le faapotopotoga, e faaalia ai ua liliuina e le upu moni o latou olaga.

Afai e te lē o toe “felafoaiina e pei o peau, ma feaveaiina i matagi uma lava o matāupu,” o le isi lenā faamaoniga o lou agaʻigaʻi i luma. (Efe. 4:14) O le a faapefea ona e gaoioi, mo se faaaʻoaʻoga, pe a lofitūina oe i le fou mai o le tele o manatu ma ituaiga eseese o faafiafiaga? Pe o faaosoosoina oe ina ia faaaogā se taimi o loo fai ai gaoioiga faaleagaga ina ia tuliloa ai na mea? O le faia faapea e matuā āfaina ai lava le agaʻigaʻi i luma faaleagaga. E sili ai ona atamai le faatau mai o le taimi mo mea faaleagaga.—Efe. 5:15, 16.

O le auala e tou te feutagaʻi ai ma isi tagata e mafai foʻi ona faaalia ai le agaʻigaʻi i luma faaleagaga. Po ua e faamasani ea e ‘femutimutivaleai lou alofa, ia e faamagalo atu’ i ou uso ma tuafāfine?—Efe. 4:32.

O lou alualu i luma i le faia o mea i le auala a Ieova e ao ona faaalia e lē gata i le faapotopotoga ae o le aiga. E ao foʻi ona mātauina i aʻoga, i nofoaga faitele, ma i le nofoaga e te galue ai i se galuega totogi. (Efe. 5:21–6:9) Afai e atoatoa ona e faaalia uiga faale-Atua i tulaga uma lava e pei ona taʻua, o lona uiga o lenā ua iloa atu lou agaʻigaʻi i luma.

Faaaogā Lau Meaalofa

Ua tuu mai e Ieova iā i tatou taʻitoʻatasi tomai ma taleni. Na te faatalitalia i tatou ina ia faaaogā nei tomai mo isi i se auala e mafai ai, e ala atu iā i tatou, ona ia faaalia lona agalelei faifua. Na tusi le aposetolo o Paulo e faatatau i lenei mea: “Ia taitoatasi ma auauna o le tasi i le tasi i lea lava mea, e pei ona maua e ia o le mea alofa, e pei o auauna pule lelei a le alofa tunoa . . . o le Atua.” (1 Pete. 4:10) O faapefea ona e faatulagaina ou tiutefai?

Ua faaauau mai Peteru e faapea: “Afai e tautala se tasi, ia tusa ma afioga a le Atua.” (1 Pete. 4:11) O loo avatu e le mau lenei le faamamafa i le tiute tauave o le tautala, ina ia matuā talafeagai ma le Afioga a le Atua, ina ia viia ai le Atua. E ao foʻi ona viia Ieova i le uiga e tautala atu ai. E mafai e le toleniga o loo maua i le Aʻoga o le Faiva Faatiokarate ona fesoasoani iā te oe ina ia faaaogā lau meaalofa i le auala lenā—le viiaina o le Atua e ala i le auala e te fesoasoani ai i isi. Pe afai e fai lenā ma ou sini, o le a faapefea ona e fuaina lou agaʻigaʻi i luma i le aʻoga?

Na i lo le manatunatu po ua fia ni manatu ua uma ona e galue ai i lau pepa e faatonutonuina ai le tautala, po o ituaiga tofiga ua aumai iā te oe, ia manatunatu i le tele ua faaleleia ai e le toleniga le tulaga o lau taulaga o viiga. E sauniunia e le aʻoga i tatou ina ia uigā atili i le faiva i le fanua. O lea la fesili ifo iā te oe lava: ‘Po ua ou sauni moni ea i mea o le a ou fai atu ai i le auaunaga i le fanua? Po ua ou faamasani ea e faaali le naunau totino iā i latou o loo oʻu molimau atu i ai? Po o oʻu faataatiaina se faavae mo ni toe asiga e ala i le tuua o tagata ma se fesili e talanoaina i le isi taimi? Afai o ma suʻesuʻeina ma se isi le Tusi Paia, po o oʻu galue ina ia faaleleia loʻu tulaga o se faiaʻoga o lē e pāʻia le loto?’

Aua le faavasegaina le agaʻigaʻi i luma e fua i na o faaeaga o le auaunaga o loo avatu iā te oe. E iloa lou alualu i luma, e lē i le tofiga, ae o le mea e te faia i le tofiga. Afai e avatu se tofiga lea e aofia ai le aʻoaʻo atu, fesili ifo iā te oe: ‘Pe sa iā te aʻu moni ea le tomai e aʻoaʻo atu? Pe sa ou taulimaina ea le mataupu i se auala na faia ai se suiga mataʻina i olaga o i latou sa faalogologo i ai?’

O le timaʻiga ina ia faaaogā lau meaalofa e manaʻomia ai ona e tausolomua. Pe e te taulamua i le galulue ma isi i le faiva i le fanua? Pe e te mataʻitūina avanoa e fesoasoani ai i tagata o la outou faapotopotoga o ē e fou mai, e talavou, pe e mamaʻi? Pe e te tauofo e faamamā le Maota o le Malo po le fesoasoani i vala eseese i tauaofiaga ma fonotaga? Pe e mafai ona e galue faavaitaimi o se paeonia lagolago? Pe e mafai ona e auauna o se paeonia sauatoa po o le fesoasoani foʻi i se faapotopotoga o loo sili ona manaʻomia ai le fesoasoani? Afai o oe o se uso, po o e aapa atu ina ia ausia agavaa faale-Tusi Paia e avea ai ma auauna o le faiva ma toeaina? O lou lotomalie e ofo atu le fesoasoani ma talia tiute tauave o se faailoga lea o lou agaʻigaʻi i luma.—Sala. 110:3.

Le Vaega e Fai e le Poto Masani

Afai e tapulaa mea e mafai ona e fai ona o le leai o se poto masani i le soifuaga faa-Kerisiano, aua neʻi galo, e mafai e le Afioga a le Atua ona “faapoto ai lē e leai se poto masani.” (Sala. 19:7, NW; 119:130; Faata. 1:1-4) O le faatatauina o fautuaga mai le Tusi Paia e mafai ai ona tatou maua aogā mai i le atamai lelei atoatoa o Ieova, lea e matuā sili atu lona aogā na i lo so o se mea tatou te aʻoaʻoina mai i le na o le poto masani lava. Peitaʻi, a o tatou faia se agaʻigaʻi i luma i la tatou auaunaga iā Ieova, tatou te maua ai se poto masani e aogā tele. E faapefea ona tatou faaaogāina lelei lenā poto masani?

Pe afai ua oo i tulaga eseese o le soifuaga, e ono faaosoosoina ai se tagata e faapea mai: ‘Ua uma ona oo muamua le tulaga lenei iā te aʻu. Ua ou iloa le mea e fai.’ Pe o se gaoioiga atamai ea le faia faapea? Ua fautua mai le Faataoto 3:7: “Aua e te faafiapoto.” E ao i le poto masani ona faalauteleina ai la tatou vaaiga i vala eseese e iloiloina, pe a feagai ai ma tulaga i le olaga. Peitaʻi afai o tatou faia se agaʻigaʻi i luma faaleagaga, e ao i lo tatou poto masani ona faamamafaina ai i o tatou manatu ma loto e faapea, tatou te manaʻomia le faamanuia a Ieova ina ia taulau ai. E iloa la lo tatou agaʻigaʻi i luma, e lē i lo tatou fesagaʻia ma le mautinoa iā i tatou lava o tulaga o mea e tutupu mai, peitaʻi e ala i lo tatou nofosauni e liliu atu iā Ieova mo le taʻitaʻiga i o tatou olaga. E faaalia atu i lo tatou mautinoa e faapea, e leai se mea e mafai ona tupu e aunoa ma lona faatagaina ma e ala i lo tatou faatumauina o se faiā maufaatuatuaina ma le māfana ma lo tatou Tamā faalelagi.

Ia Faaauau Ona Momoʻe Punouaʻi

E ui lava i le matua faaleagaga sa iai le aposetolo o Paulo ma o ia foʻi o se Kerisiano faauuina, ae sa ia amanaʻiaina le manaʻoga ina ia faaauau ona “momoʻe punou aʻi” ina ia maua le sini o le ola. (Fili. 3:13-16) Pe e iā te oe lenā vaaiga?

O le ā le tele ua e faia ai se agaʻigaʻi i luma? Ia fua lou tuputupu aʻe i le atoatoa ua iai lou faaofuina o oe i le tagata fou, i le atoatoa ua e gauaʻi atu ai i le pule silisili ese a Ieova, ma le maelega o loo e faaaogāina ai au meaalofa i le viiaina o Ieova. A o e mauaina aogā mai i aʻoaʻoga o le Aʻoga o le Faiva Faatiokarate, e ao ona faasolosolo ona mātauina i le auala e te tautala ma e aʻoaʻo atu ai, uiga o loo faamatilatila i le Afioga a le Atua. Ia taulaʻi atu i nei vala o lou tuputupu aʻe. Ioe, ia e fiafia i ai, ona faigofie lea ona mātauina lou agaʻigaʻi i luma.