“O le Fua o le Agaga” e Faamamaluina ai le Atua

“Ua faamamaluina loʻu Tamā ona o lenei mea, i lo outou saga fua tele mai.”—IOA. 15:8.

1, 2. (a) O ā avanoa e mafai ona tatou faalaeiauina ai isi? (e) O le ā le meaalofa mai iā Ieova e faaleleia ai o tatou agavaa e auauna ai iā te ia?

IA MĀTAU mai vaaiga nei e lua: Ua iloa atu e se tasi tuafafine, o loo popolevale foliga o le isi tuafafine talavou. Ona ia faia loa lea o se fuafuaga e la te galulue faatasi i le talaʻiga. Ua la talatalanoa a o savavali, ma faamatala atu e le tuafafine talavou le māfuaaga ua ia popolevale ai. Mulimuli ane i lenā aso, ua tatalo le tuafafine talavou ma faafetai iā Ieova, ona o le alofa naunau o le tuafafine matua; ma sa fetaui lelei ma lona tulaga o iai. I se isi nofoaga, e leʻi leva ona taunuu mai se ulugalii sa talaʻi i se isi atunuu. Ina ua latou faatasitasi ma isi ma la faamatala atu tala o mea na tutupu, o loo faalogologo lelei lava se uso talavou i a la tala. I tausaga mulimuli ane, a o sauniuni le uso talavou lea mo lona tofiga i se isi atunuu, ua ia toe mafaufau i tala a lea ulugalii, na māfua ai ona manaʻo e avea o ia ma misionare.

² Atonu o na vaaiga, ua e toe manatua ai se tagata na fesoasoani i lou olaga, po o se tagata sa e fesoasoani i ai. E moni, e seāseā suia le olaga o se tagata i se talanoaga se tasi, ae e tulaʻi mai avanoa i aso taʻitasi e tatou te faalaeiau ma faamalosia ai isi. Seʻi faapea e iai se fesoasoani e mafai ona faaleleia ai ou agavaa ma ou uiga, ma ua atili ai ona aogā mo ou uso ma le Atua. Pe lē o se mea lelei ea lenā? O le mea moni, ua aumai e Ieova se meaalofa faapena—o lona agaga paia. (Luka 11:13) A o galue le agaga o le Atua i o tatou olaga, e faatupu ai ni uiga matagofie iā i tatou, ma faaleleia ai vala uma o la tatou auaunaga i le Atua. Maʻeu se meaalofa ofoofogia!—Faitau le Kalatia 5:22, 23.

3. (a) E faapefea ona faamamaluina le Atua i lo tatou atiaʻe o “le fua o le agaga”? (e) O ā fesili o le a tatou iloiloina?

³ O uiga e faatupuina e le agaga paia, e atagia ai uiga o Lē e puna mai ai lea agaga, o Ieova le Atua. (Kolo. 3:9, 10) Sa faailoa mai e Iesu le māfuaaga autū e ao ai ona faataʻitaʻi atu Kerisiano uma i le Atua, i lona faapea atu i ona aposetolo: “Ua faamamaluina loʻu Tamā ona o lenei mea, i lo outou saga fua tele mai.”a (Ioa. 15:8) A o tatou atiaʻe “le fua o le agaga,” e iloatino lea i le auala tatou te tautatala ma amioaʻi, ma e avatu ai le viiga i lo tatou Atua. (Mata. 5:16) O ā auala e ese ai le fua o le agaga, mai i uiga o le lalolagi a Satani? E faapefea ona tatou atiaʻe le fua o le agaga? Aiseā e ono faigatā ai ona tatou faia faapea? O le a tatou iloiloina nei fesili, a o talanoaina vala muamua e tolu o le fua o le agaga—alofa, olioli, ma le filemu.

Le Alofa Silisili

4. O le ā le ituaiga o alofa, na aʻoaʻoina e Iesu ona soo ina ia faaalia?

⁴ O le alofa lea e maua mai le agaga paia, e matuā eseese ma le alofa o loo taatele i le lalolagi. E faapefea? O lea alofa e atagia mai ai le alofa o le Atua. Sa faamatilatila mai e Iesu lea eseesega i lana Lauga i le Mauga. (Faitau le Mataio 5:43-48.) Sa ia taʻua faapea e oo foʻi i tagata agasala, e latou te faia i isi e pei ona fai mai e isi iā i latou. O lea “alofa,” e lē aofia ai le faia o ni gaoioiga faataulaga, ae ua na o le toe taui atu o le agalelei mai o isi. Afai e tatou te mananaʻo ʻe avea i tatou ma atalii o lo tatou Tamā o i le lagi,’ e tatau la ona ese mai i tatou. Nai lo o lo tatou faia o isi e pei ona fai mai iā i tatou, e ao ona manatu ma feagai ma tagata, i le auala e faia ai i latou e Ieova. Ae faapefea ona tatou alolofa i o tatou fili, e pei ona faatonuina e Iesu?

5. E faapefea ona tatou faaalia le alofa i ē e faasauā mai?

⁵ Seʻi manatu i se tasi faataʻitaʻiga mai le Tusi Paia. A o talaʻi Paulo ma Sila i Filipi, na puʻea i laʻua ma matuā sasaina, faafalepuipuiina, ma faamau o la vae i laau. Atonu sa faasauā le leoleo o le falepuipui iā i laʻua. Ina ua faafuaseʻi ona faasaʻolotoina i laʻua ona o se mafuiʻe, pe sa la fiafia ona ua maua se avanoa e toe taui ma sui ai i le leoleo o le falepuipui? E leai. Ona o lo la alofa faataulaga, na uunaʻia ai i laʻua e gaoioi vave mo le lelei o le leoleo o le falepuipui, ma mafai ai ona avea o ia ma lona aiga atoa o ni ē talitonu. (Galu. 16:19-34) Ua faia foʻi faapea e le toʻatele o o tatou uso i aso nei, e ala i le “faamanuia atu pea i ē ua sauā mai.”—Roma 12:14.

6. E faapefea ona tatou faaalia le alofa faataulaga mo o tatou uso? (Tagaʻi i le pusa i le itulau 21.)

⁶ O le alofa mo uso talitonu e aofia ai ma se isi gaoioiga e sili atu. “E tatau foʻi . . . ona foaʻi atu o tatou ola mo o tatou uso.” (Faitau le 1 Ioane 3:16-18.) Ae e tele atu taimi e mafai ai ona tatou faaalia le alofa i isi auala. O se faataʻitaʻiga, afai ua e faatigā i se uso e ala i au gaoioiga po o se tala foʻi ua e fai, e mafai ona faaalia le alofa e ala i lou tausolomua e toe faaleleia le lua faiā. (Mata. 5:23, 24) Ae faapefea pe afai ua faatigā mai se tasi iā te oe? O e “nofosauni e faamagalo,” pe e te teulotoina mea ua e lē fiafia ai? (Sala. 86:5) O le alofa silisili lea e maua mai i le agaga paia, e mafai ai ona tatou lē amanaʻia masei lāiti o isi, ma faamagalo atu, “e pei ona finagalo malie Ieova e faamagalo” iā i tatou.—Kolo. 3:13, 14; 1 Pete. 4:8.

7, 8. (a) E faapefea ona fesootaʻi le alofa i le Atua ma le alofa i tagata? (e) E faapefea ona faateleina lo tatou alofa mo Ieova? (Tagaʻi i le faataʻitaʻiga i lalo.)

⁷ E faapefea ona tatou atiaʻe le alofa faataulaga mo o tatou uso? E ala i le faateleina o lo tatou alofa mo le Atua. (Efe. 5:1, 2; 1 Ioa. 4:9-11, 20, 21) O taimi e tatou te mafuta ai ma Ieova e ala i le faitauina o le Tusi Paia, mafaufau loloto, ma le tatalo, e faamalosia ai o tatou loto ma faateleina ai lo tatou alofa, mo lo tatou Tamā i le lagi. Ae peitaʻi, e manaʻomia ona tatou faaavanoa se taimi ina ia faalatalata atu ai i le Atua.

⁸ Ina ia faataʻitaʻi: Seʻi faapea e na o le tasi lava le itula i le aso e te maua ina ia faitau ai le Tusi Paia, mafaufau loloto i ai, ma tatalo i le Atua. Pe e te lē manumanu ea i lenā itula, ina ia leai se mea e faalavelavea ai lou taimi e mafuta ai iā Ieova? E moni, e lē taofia e se isi lo tatou tatalo atu i le Atua, ma le faitauina o le Tusi Paia i le taimi tatou te mananaʻo ai. Ae e manaʻomia pea ona tatou faia ni gaoioiga, ina ia lē aafia ai le taimi lea tatou te mafuta ai ma le Atua, ona o le vevesi o mea fai o lenei olaga. Po o e taumafai malosi e faaavanoa lou taimi e faalatalata atu ai iā Ieova i aso taʻitasi?

“Olioli Ona o le Agaga Paia”

9. O le ā le mea e iloga ai le olioli lea e maua mai i le agaga paia?

⁹ O le mea e iloga ai le fua o le agaga, o le iai pea i taimi uma. Ua faamaonia lenei mea i le vala lona lua o le fua o le agaga, o le olioli. E pei le olioli o se laau e mafai ona olaola lelei e ui e lē lelei le siʻomaga o loo ola ai. O le toʻatele o auauna a le Atua i le lalolagi aoao, ua latou “taliaina le upu ma le olioli ona o le agaga paia, e ui i le tele o puapuaga.” (1 Tesa. 1:6) Ua feagai isi ma faigatā ma le lē mauaina o mea e manaʻomia. Peitaʻi, ua faamalosia i latou e Ieova e ala i lona agaga, ina ia “tutumau atoatoa ma ia faapalepale, atoa ma le olioli.” (Kolo. 1:11) O le ā le puna o lea olioli?

10. O le ā le puna o lo tatou olioli?

¹⁰ I le lē pei o “ʻoa e lē tumau” a le lalolagi a Satani, e tumau pea le aogā o ʻoa faaleagaga e tatou te mauaina mai iā Ieova. (1 Timo. 6:17; Mata. 6:19, 20) Ua tuu mai e le Atua se faamoemoe e tatou te fiafia ai, o le ola e faavavau. Ua tatou olioli i le avea ma vaega o se ʻauuso Kerisiano i le lalolagi aoao. Ae sili i nei mea uma, e faavae lo tatou olioli i la tatou faiā ma le Atua. E tatou te malamalama i faalogona sa iā Tavita, e ui lava na iai se taimi na ola fesolasolataʻi ai, ae na ia viiviia Ieova i lana pese e faapea: “Auā o lou alofa faamaoni e sili lea i le ola, e faamanū atu foʻi oʻu laugutu iā te oe. O le mea lea ou te vivii atu ai iā te oe i loʻu olaga atoa.” (Sala. 63:3, 4) Po o ā lava faigatā, ae e faatumulia pea o tatou loto i le viiaina o le Atua.

11. Aiseā e tāua ai ona tatou auauna iā Ieova ma le olioli?

¹¹ Sa uunaʻia e le aposetolo o Paulo Kerisiano: “Ia olioli e lē aunoa i le Alii. Ou te toe fai atu foʻi, Ia olioli!” (Fili. 4:4) Aiseā e tāua ai mo Kerisiano ona latou auauna iā Ieova ma le olioli? Ona o le mataupu sa lāgā e Satani e uiga i le pule silisili ese a Ieova. Ua faapea mai Satani, o ē uma o loo auauna i le Atua, e lē o faia ona e latou te loto i ai. (Iopu 1:9-11) Afai e tatou te auauna iā Ieova ona o se tiute, ae aunoa ma le olioli, ua lē atoa ai, la tatou taulaga o viiga. E tatou te taumafai la ina ia utagia le timaʻiga a le faisalamo: “Ia auauna atu iā Ieova ma le fiafia. Ia ō mai foʻi i ona luma ma le alaga fiafia.” (Sala. 100:2) O le auaunaga e faia ma le loto i ai, faapea ma le olioli e faamamaluina ai le Atua.

12, 13. O le ā e mafai ona tatou fai, ina ia manumalo ai i faalogona lē lelei?

¹² O le mea moni, e oo foʻi i auauna tuuina atu a Ieova e iai taimi e lotovaivai ai, ma faigatā ona maua se vaaiga mautinoa. (Fili. 2:25-30) O le ā e mafai ona fesoasoani iā i tatou i taimi faapea? Ua faapea mai le Efeso 5:18, 19: “Ia faaauau ona faatumulia i le agaga, ia outou talatalanoa i salamo, ma viiga o le Atua, ma pese faaleagaga. Ia outou pepese i viiga iā Ieova i o outou loto.” E faapefea ona tatou faatatauina na fautuaga?

¹³ Pe a lofitūina i faalogona lē lelei, e mafai ona tatou talosagaina Ieova e ala i le tatalo, ma mafaufau loloto i mea lelei. (Faitau le Filipi 4:6-9.) Ua iloa e nisi faapea, o le usuusu a o tāina pese o le Malo, e faafiafiaina ai i latou ma e fesoasoani ina ia toe mafaufau ai i mea lelei. Ua faapea mai se uso na feagai ma se tulaga faigatā, ma oo iā te ia lagona o le fiu ma le lē fiafia: “E lē gata i aʻu tatalo faatauanau, ae na ou manatuaina foʻi ni nai pese o le Malo. Na ou lagona ai le toʻafilemu ina ua ou usuina pese e viia ai Ieova. Ma, i lenā vaitaimi, sa tatalaina ai le tusi, Faalatalata Atu iā Ieova. Na soo faalua le tusi i laʻu faitau i le tausaga na sosoo ai, ma na matuā faamalieina ai loʻu loto. E mautinoa sa faamanuia mai Ieova i aʻu taumafaiga.”

“Le Fusi o le Filemu”

14. O le ā se vala e matilatila ai le filemu lea e maua mai i le agaga paia?

¹⁴ I a tatou tauaofiaga faavaomalo, e lagona e le ʻauusufono mai atunuu eseese le māfana o faatasitasiga faa-Kerisiano. E matilatila ai se tasi o vala o le filemu, o loo olioli ai tagata o Ieova i aso nei—o lo tatou autasi i le lalolagi aoao. E ofo isi i le mātauina o loo faatasitasi tagata e latou te manatu e feʻainaʻi, ae ua autasia i latou ona o le “matuā naunau e tausia le autasi i le agaga i le fusi o le filemu.” (Efe. 4:3) E mataʻina lenei autasi, pe a manatu i lo latou tulaga sa iai muamua.

15, 16. (a) O le ā le talaaga o Peteru, ma sa faapefea ona avea lea ma luʻitau iā te ia? (e) Sa faapefea ona fesoasoani Ieova iā Peteru e faasaʻo lona manatu?

¹⁵ O se luʻitau le taumafai e autasia tagata mai talaaga eseese. Ina ia tatou malamalama i mea e ao ona faatoʻilaloina ina ia maua ai le autasi, seʻi o tatou tilofaʻia le faaaʻoaʻoga a le aposetolo o Peteru i le uluaʻi senituri. E tatou te iloa lona manatu e uiga i tagata o Nuu Ese lē peritomeina i ana upu e faapea: “Ua outou iloa lelei e sā i le tulafono, ona faatasi atu pe talanoa se Iutaia i se tagata o se isi atunuu. Ae ui i lea, ua faailoa mai e le Atua iā te aʻu, e lē tatau ona ou taʻua se tasi e leaga pe e lē mamā.” (Galu. 10:24-29; 11:1-3) Ona o le tū masani i na aso, e foliga mai sa ola aʻe Peteru ma le talitonuga e tusa ai ma le Tulafono, e na o tagata Iutaia e tatau ona alolofa i ai. Atonu sa avea o se manatu masani iā Peteru, le vaai i tagata o Nuu Ese o ni fili, ma e ʻinoʻino i ai.b

¹⁶ Seʻi manatu i le lē mautonu o Peteru ina ua ulufale atu i le fale o Konelio. Pe e mafai e se tasi sa iai muamua faalogona lē lelei e uiga i tagata o Nuu Ese, ona “felagolagomaʻi” pe aufaatasi ma i latou i le “fusi o le filemu”? (Efe. 4:3, 16) Ioe, ona i ni nai aso muamua atu, sa tatalaina e le agaga o le Atua le loto o Peteru, ma faasaʻo ai e ia ona manatu ma manumalo ai i faalogona o le faailoga tagata. Sa faailoa atu e le Atua i se faaaliga, e lē aafia lana silafaga i tagata ona o o latou ituaiga ma atunuu. (Galu. 10:10-15) O lea, sa faapea atu ai Peteru iā Konelio: “E moni ua ou iloa, e lē faailogaina tagata e le Atua, ae o lē e mataʻu iā te ia i nuu uma lava, ma fai le amiotonu, e talia e ia.” (Galu. 10:34, 35) Sa suia le manatu o Peteru, ma aufaatasi ai ma “le ʻauuso atoa.”—1 Pete. 2:17.

17. Aiseā e mataʻina ai le autasi ua maua e tagata o le Atua?

¹⁷ O le tulaga na oo iā Peteru, ua fesoasoani iā i tatou e talisapaia ai suiga mataʻina, ua faia e tagata o le Atua i aso nei. (Faitau le Isaia 2:3, 4.) E faitau miliona tagata “mai i atunuu uma, ma ituaiga, ma nuu, ma gagana,” ua suia o latou manatu ia ōgatusa ma “le finagalo o le Atua, lea e lelei, e mālie, ma lelei atoatoa.” (Faaa. 7:9; Roma 12:2) O le toʻatele o i latou nei sa feitagaʻi, feʻainaʻi ma fevaevaeaʻi ona o taaʻiga a le lalolagi a Satani. Ae ona o le suʻesuʻeina o le Afioga a le Atua, ma le fesoasoani a le agaga paia, ua latou iloa ai ona “tausisi i mea e faatupu ai le filemu.” (Roma 14:19) Ua viia le Atua ona o le autasi ua maua mai ai.

18, 19. (a) E faapefea ona tatou saosaolaumea i le filemu ma le autasi i le faapotopotoga? (e) O le ā o le a iloiloina i le mataupu e sosoo ai?

¹⁸ E faapefea ona tatou saosaolaumea i le filemu ma le autasi o loo iai i tagata o le Atua? O loo iai i le tele o faapotopotoga i latou ua siitia mai isi atunuu. Atonu e ese a latou aganuu, ma e lē lelei foʻi la latou tautatala i la tatou gagana. Pe tatou te taumafai e faamasani iā i latou na? Ua fautuaina e le Tusi Paia le faia faapea. I lana tusi i le faapotopotoga i Roma, lea sa aofia ai tagata Iutaia ma tagata o Nuu Ese, na ia tusia: “Ia talia e le tasi le isi, e faapei foʻi ona talia i tatou e Keriso, ina ia faamamaluina ai le Atua.” (Roma 15:7) Po o iai se tasi i lau faapotopotoga e mafai ona e faamasani i ai?

¹⁹ O ā isi mea e mafai ona tatou fai, ina ia taʻitaʻia ai o tatou olaga e le agaga paia? O le a iloiloina i le mataupu e sosoo ai lenei fesili, a o talanoaina vala o totoe o le fua o le agaga.

Po o Taʻitaʻia Oe e le Agaga o le Atua?

“E lelei lou agaga; ia taʻitaʻia ai aʻu i le laueleele o ē ua amio saʻo.”—SALA. 143:10.

1, 2. (a) Taʻu mai ni taimi sa faaaogā ai e Ieova lona agaga paia ona o ana auauna. (e) Pe e na o ni taimi faapitoa e galue ai le agaga paia? Faamatala.

O LE ā e te mafaufau i ai pe a taʻua gaoioiga a le agaga paia? Pe e te faaata i lou mafaufau gaoioiga malolosi sa faia e Kitiona ma Samasoni? (Faama. 6:33, 34; 15:14, 15) Atonu e te mafaufau i le lototetele o uluaʻi Kerisiano, po o le toʻafilemu o Setefano a o ia tulaʻi i luma o le Saniterini. (Galu. 4:31; 6:15) Ae faapefea le olioli e maua i tauaofiaga faavaomalo i aso nei, le faamaoni o uso o loo falepuipui ona o le solitū, ma le faatuputeleina o le galuega talaʻi? O nei faaaʻoaʻoga uma, o faamaoniga ia o gaoioiga a le agaga paia.

² Pe e na o ni taimi faapitoa e gaoioi ai le agaga paia, pe seʻi vaganā ua iai se mea uiga ese ua tupu? E leai. Ua taʻua i le Tusi Paia, o Kerisiano e latou te, “savavali pea i la le agaga,” ʻtaʻitaʻiina e le agaga,’ ma “ola i la le agaga.” (Kala. 5:16, 18, 25) E taʻu mai i nei faaupuga, e mafai ona galue pea le agaga paia i o tatou olaga. I aso taʻitasi, e ao ona tatou talosagaina le taʻitaʻiga a Ieova i o tatou mafaufauga, upu, ma galuega, e ala i lona agaga. (Faitau le Salamo 143:10.) Pe afai e galue le agaga i o tatou olaga, e tatou te maua ai le fua o le agaga e faafouina ai isi, ma viia ai le Atua.

3. (a) Aiseā e manaʻomia ai ona taʻitaʻia i tatou e le agaga paia? (e) O ā fesili o le a tatou iloiloina?

³ Aiseā e tāua ai le taʻitaʻia o i tatou e le agaga paia? Ona o loo iai se isi malosi o loo taumafai e pulea i tatou, o se malosi e tetee i le gaoioiga a le agaga paia. O lenā malosi o loo faaupuina i le Tusi Paia, o “le tino” lea o loo faatatau atu i faanaunauga agasala a o tatou tino augavale, lea na tuufaasolo mai iā Atamu. (Faitau le Kalatia 5:17.) O le ā e aofia ai i le taʻitaʻia o i tatou e le agaga o le Atua? Pe e iai ni gaoioiga aogā e mafai ona tatou mulimulitaʻia, ina ia tetee atu ai i tuʻinanauga o le tino agasala? Seʻi o tatou iloiloina la nei fesili a o tatou talanoaina vala e ono, o loo totoe o “le fua o le agaga,” o le “faapalepale, o le agalelei, o le mataalofa, o le faatuatua, o le agamalu, ma le amio pulea.”—Kala. 5:22, 23.

O le Agamalu ma le Faapalepale e Faatupu ai le Filemu i le Faapotopotoga

4. E faapefea ona saosaolaumea le agamalu ma le faapalepale, i le filemu o le faapotopotoga?

⁴ Faitau le Kolose 3:12, 13. I le faapotopotoga, e galulue faatasi le agamalu ma le faapalepale e faatupuina le filemu. E fesoasoani nei vala e lua o le fua o le agaga iā i tatou, e feagai ai ma isi i le faaaloalo, ma toʻafilemu ai pea i tulaga vevesi e ono tulaʻi mai, ma ʻalofia ai le toe taui atu, pe a fai mai e isi ni tala lē lelei pe agaleaga mai foʻi. Pe afai e iai ni feeseeseaʻiga ma se uso Kerisiano, o le a fesoasoani le faapalepale, po o le onosaʻi e tatou te lē fiu ai i lo tatou uso po o se tuafafine, ae faia mea uma e foʻia ai le faafitauli. Pe e manaʻomia moni le agamalu ma le faapalepale i le faapotopotoga? Ioe, ona o i tatou uma lava e lē lelei atoatoa.

5. O le ā le mea na tupu iā Paulo ma Panapa, ma o le ā o loo faamatilatila mai ai?

⁵ Seʻi manatu i le mea na tupu iā Paulo ma Panapa. Sa la galulue soosootauʻau mo le tele o tausaga i le faaauilumaina o le tala lelei. E tofu i laʻua ma uiga lelei. Peitaʻi, sa iai se taimi na “matuā feita [ai] i laʻua ma fefinauaʻi, ona la ō eseese ai lea.” (Galu. 15:36-39) O lenei mea na tupu, e faamatilatila mai ai, e oo lava i auauna faamaoni a le Atua, e iai taimi e ono tutupu ai ni fefinauaʻiga. Pe a iai se mea e lē malie ai se Kerisiano i se isi uso, o le ā e ao ona faia e lea Kerisiano, ina ia ʻalofia ai le tupu aʻe o se misa ma fai ai so la va?

6, 7. (a) O le ā le fautuaga a le Tusi Paia e ao ona tatou mulimuli ai, a o leʻi oo ina vevesi se talanoaga? (e) O ā aogā o le ʻfaalogologo lelei, ae aua le vave ona tautala, ma aua foʻi le vave ona ita’?

⁶ Ua taʻua i le mau, na faafuaseʻi ona tupu le fefinauaʻiga a Paulo ma Panapa, ma na “matuā feita i laʻua.” Pe a iloa e se Kerisiano ua amata ona oso lona ita a o talanoaina se mataupu ma se uso, o se tulaga atamai le utagiaina o le fautuaga o loo i le Iakopo 1:19, 20: “Ia faalogologo lelei tagata uma, ae aua le vave ona tautala, ma aua foʻi le vave ona ita. Auā o le ita o le tagata e lē tupu mai ai le amiotonu mai le Atua.” E fua lava i le tulaga o loo iai, ae e mafai ona taumafai le uso e sui le mataupu, tolopō le talanoaga, po o le alu ese foʻi a o leʻi oo ina vevesi.—Faata. 12:16; 17:14; 29:11.

⁷ O ā ni aogā o le usitaʻia o lenei fautuaga? O le taumafai e faatoʻafilemu le mafaufau, tatalo mo lea mataupu, ma mafaufau po o le ā le tali talafeagai e fai atu, e faaalia ai o loo taʻitaʻia sea Kerisiano e le agaga o le Atua. (Faata. 15:1, 28) O le taaʻiga a le agaga, e na te faaalia ai le agamalu ma le faapalepale. O le faia faapea, ua ia utagia ai le fautuaga o loo i le Efeso 4:26, 29: “Pe a outou ita, aua neʻi agasala ai . . . Ia aua neʻi alu atu se upuleaga mai i o outou gutu, a ia fai atu ni upu lelei e atiaʻe ai i taimi e tatau ai, ina ia aogā i ē o faalogologo i ai.” A tatou oofu i le agamalu ma le faapalepale, ua tatou saosaolaumea ai, i le filemu ma le autasi o le faapotopotoga.

Ia Faafouina Lou Aiga i le Agalelei ma le Mataalofa

8, 9. O le ā le agalelei ma le mataalofa, ma o le ā le aafiaga o na uiga i se aiga?

⁸ Faitau le Efeso 4:31, 32; 5:8, 9. E pei ona faafouina se tasi i se savili mālū ma se vaiinu mālūlū i se aso vevela, e faapena foʻi ona faafouina se tasi i le agalelei ma le mataalofa. A iai na uiga i se aiga, o le a toʻafimālie le aiga atoa. O le agalelei o se uiga lelei e māfua ona o le naunau moni i isi, e faaalia i galuega fesoasoani ma upu alofa e fai atu. O le mataalofa, e talitutusa ma le agalelei, o se uiga lelei e faaalia i gaoioiga e aogā i isi. E iloa i le agaga foaʻi. (Galu. 9:36, 39; 16:14, 15) Ae e iai se isi mea e aofia ai i le mataalofa.

⁹ O le tagata e mataalofa o se tagata e amiolelei tele. E aofia ai e lē gata i mea e tatou te faia, ae e sili atu i lenā, o lo tatou tagata moni. E tai pei o se fualaau ʻaina, ua pula lelei ma suamalie i le ʻai, e leai se faalētonu i fafo ma totonu. I se auala talitutusa o loo iai le mataalofa e maua mai i le agaga paia, i vala uma o le olaga o se Kerisiano.

10. O le ā e mafai ona fai ina ia fesoasoani i tagata o le aiga e atiaʻe le fua o le agaga?

¹⁰ O le ā e ono fesoasoani i tagata uma o se aiga Kerisiano, ina ia faaalia le agalelei ma le mataalofa? E tāua le vaegafai a le poto saʻo mai le Afioga a le Atua. (Kolo. 3:9, 10) O nisi ulu o aiga, ua latou faaaofia le suʻesuʻeina o le fua o le agaga paia, i Tapuaʻiga Afiafi a le Aiga i vaiaso taʻitasi. E lē faigatā le faatulagaina o lea ituaiga o suʻesuʻega. Faaaogā auala eseese e saʻiliʻili ai faamatalaga i lau lava gagana, ma fili mai ni mataupu o loo talanoaina ai vala eseese o le fua o le agaga. Atonu tou te talanoaina ni nai palakalafa i vaiaso taʻitasi, ma faaalu ni nai vaiaso i vala taʻitasi. A o faasolo le suʻesuʻeina o mataupu, faitau ma talanoa i mau faasino. Ia vaai i auala e faatatauina ai mea o loo aʻoaʻoina, ma ia tatalo mo le faamanuiaga a Ieova i au taumafaiga. (1 Timo. 4:15; 1 Ioa. 5:14, 15) Pe mafai moni e na suʻesuʻega ona faaleleia ai feutagaʻiga i totonu o le aiga?

11, 12. O ā aogā sa mauaina e ni ulugalii Kerisiano se toʻalua mai le suʻesuʻeina o le agalelei?

¹¹ Sa mananaʻo se ulugalii talavou ina ia taulau manuia le la faaipoipoga, o lea sa la faia ai ni saʻiliʻiliga loloto i le fua o le agaga. O ā aogā ua la mauaina? Ua faapea mai le avā: “Ina ua ma aʻoaʻoina o le agalelei e aofia ai le faamaoni i le va o le ulugalii, ua telē se aafiaga i le ma faiā e oo mai lava i le aso nei. Ua ma iloa ai le manaʻomia ona fefaamagaloaʻi ma ia lolo atu le tasi i le isi. Ma ua fesoasoani iā i maʻua ina ia iloa ai le taimi e tatau ai ona faapea atu ʻfaafetai’ ma le ʻfaamalie atu.’”

¹² O se isi foʻi ulugalii Kerisiano na oo i ai faafitauli i le la faaipoipoga, na la mātauina ua tau leai se agalelei i le la faiā. Na la manatu e lelei ona suʻesuʻe faatasi le mataupu e faatatau i le agalelei. Ma o le ā le iʻuga? Ua taʻua e le tane: “Ua iloa mai le ma suʻesuʻega e faapea, e manaʻomia ona talitonuina lau paaga, nai lo le masalosalo i ana tala, ma mātaʻitū uiga lelei o le isi. Na amata ai loa ona naunau le tasi i manaʻoga o le isi. O le agalelei, e aofia ai le tuu atu i si aʻu avā e faamatala mai ona faalogona, e aunoa ma loʻu ita. O lona uiga sa manaʻomia ona tuu ese loʻu faamaualuga. Ina ua amata ona ma faataʻitaʻia le agalelei i la ma faaipoipoga, ua mou malie atu ai le feʻainaʻi. Ma ua pei ua tuu ese atu se avega mamafa.” Pe e aogā i lou aiga le suʻesuʻeina o le fua o le agaga?

Faaalia Pea le Faatuatua pe a na o Oe

13. O le ā le lamatiaga i lo tatou itu faaleagaga e manaʻomia ona puipuia mai ai?

¹³ E ao ona taʻitaʻia se Kerisiano e le agaga o le Atua, pe a iai ma tagata pe na o ia foʻi. I aso nei, ua faateteleina le iai o ata ma faafiafiaga matagā i le lalolagi a Satani. Ua lamatia ai lo tatou itu faaleagaga. O le ā e ao ona faia e se Kerisiano? Ua fautuaina i tatou e le Afioga a le Atua: “Inā lafoaʻi ia o mea eleelea uma ma le amioleaga lea e lē aogā, ae ia talia ma le agamalu le upu ua aʻoaʻoina, lea ua mafai ai ona faasaoina o outou ola.” (Iako. 1:21) Seʻi o tatou iloiloina le faatuatua, o se isi vala o le fua o le agaga, lea e mafai ona fesoasoani iā i tatou ina ia tumau ai pea ona mamā i luma o Ieova.

14. Aiseā e faigofie ai ona faia mea sesē pe a leai se faatuatua?

¹⁴ Afai e iā i tatou le faatuatua, o lona uiga e moni Ieova le Atua iā i tatou. Afai e lē moni le Atua iā i tatou, e faigofie lava ona faia mea sesē. Manatu i le mea na tupu i tagata o le Atua i aso anamua. Na faailoa mai e Ieova i le perofeta o Esekielu le faia o mea sesē e tagata i taimi sa na o i latou ai, i lona faapea atu: “Le atalii e o le tagata, po ua e vaai atu i mea o loo faia e toeaina o le aiga o Isaraelu i le pōuliuli, ua taʻitasi ma alu i le potu pito i totonu ua iai ana tupua ua tā? Auā ua latou faapea ane, ʻE lē o silasila mai Ieova iā i tatou. Ua tuua e Ieova le atunuu.’” (Eseki. 8:12) Po o e mātauina se tasi o māfuaaga o le faafitauli? Latou te leʻi talitonu o loo silasila mai le Atua i mea o loo latou faia. O lona uiga ua pei e lē o soifua Ieova iā i latou.

15. E faapefea ona puipuia i tatou ona o le malosi o lo tatou faatuatua iā Ieova?

¹⁵ Seʻi tagaʻi i le eseesega ma le faataʻitaʻiga iā Iosefa. E ui sa mamao ese o ia mai lona aiga ma lona nuu, ae sa teena e Iosefa le faia o le mulilua ma le avā a Potifara. Aiseā? Ua faapea mai o ia: “Pe faapefea ona ou faia lenei mea leaga tele ma ou agasala ai i le Atua?” (Kene. 39:7-9) Ioe, sa moni Ieova iā te ia. Afai e moni le Atua iā i tatou, e tatou te lē matamata la i faafiafiaga matagā, pe faia se mea e lē finagalo i ai le Atua pe a na o oe. E tatou te ioe faatasi i upu a le faisalamo: “Ou te savali ma le faamaoni o loʻu loto i totonu o loʻu fale. Ou te lē tuu i oʻu luma se mea e lē aogā.”—Sala. 101:2, 3.

Leoleo Lou Loto e Ala i le Amio Pulea

16, 17. (a) E pei ona taʻua i le tusi o Faataoto, e faapefea ona maileia i le agasala se tauleʻaleʻa “ua leai sona mafaufau”? (e) E faapefea ona tupu se mea talitutusa i aso nei, e tusa lava po o le ā le matua o le tagata, e pei ona faaalia i le ata i le itulau e 26?

¹⁶ O le amio pulea, o le vala mulimuli lea o le fua o le agaga, e mafai ai ona tatou teena mea ua taʻusalaina e le Atua. E fesoasoani foʻi ina ia leoleoina ai o tatou loto. (Faata. 4:23) Seʻi manatu i le tala o loo i le Faataoto 7:6-23, lea na faamatala mai ai “se tasi tauleʻaleʻa . . . ua leai sona mafaufau” lea na lolo atu i se fafine talitane. Ua maileia o ia a o “ui ane i le ala e latalata i le tulimanu e nofo ai le fafine.” Atonu ua oo i lenā vaipanoa ona o lona isuisu fua. Ae pagā lea, e na te leʻi iloa ua taʻitaʻiina o ia e fai se gaoioiga valea e “lamatia ai lona lava ola.”

¹⁷ Na ono ʻalofia faapefea e lenei tauleʻaleʻa lenei mea sesē? E ala i le usitaʻia o le lapataʻiga: ʻAua neʻi e ui atu i ona ala.’ (Faata. 7:25) E iai se lesona mo i tatou: Afai e tatou te mananaʻo ina ia taʻitaʻiina i tatou e le agaga o le Atua, aua neʻi tuua i tatou i tulaga e ono faaosoosoina ai i tatou. O se tasi o auala e mafai ai ona faia e se tasi nei gaoioiga valea, e pei ona faia e le tauleʻaleʻa “ua leai sona mafaufau,” o le fesuisuiaʻi solo o ālā ata o le TV, po o le saʻiliʻili solo i luga o le Initaneti. Po o le faia ma le loto i ai pe leai, ae e ono tau le vaai i ata e faaosofia ai faalogona i feusuaʻiga. E faasolosolo mālie lava ona masani i le matamata i ata matagā o feusuaʻiga, ma oo ai ina afāina lona lotofuatiaifo, ma lana faiā ma le Atua. E mafai foʻi ona lamatia ai lona ola.—Faitau le Roma 8:5-8.

18. O ā gaoioiga e mafai ona faia e se Kerisiano ina ia puipuia ai lona loto, ma e faapefea ona aofia ai le amio pulea?

¹⁸ O le mea moni, e mafai ma e tatau ona tatou faaalia le amio pulea, e ala i le gaoioi vave pe a tatou vaai i se ata faatosina. Ae pe e lē sili ea le ʻalofia atoatoa o tulaga faapena! (Faata. 22:3) O le faia o ni gaoioiga e puipuia ai ma tausisi i ai, e manaʻomia ai le amio pulea. O se faataʻitaʻiga, o le tuu o le komepiuta i se nofoaga e iloa lelei atu e isi pe a faaaogā, o se puipuiga lea. O isi ua manatu e sili ona matamata i le TV pe faaaogā le komepiuta, pe afai o loo iai isi tagata. A o isi ua latou manatu e sili pe a lē faaolaina le Initaneti i a latou komepiuta. (Faitau le Mataio 5:27-30.) Tau ina ia tatou faia gaoioiga uma ina ia puipuia ai o tatou aiga ma i tatou lava, ina ia tatou tapuaʻi iā Ieova “i se lotomamā ma se lotofuatiaifo lelei, ma le faatuatua e lē faatagāfai.”—1 Timo. 1:5.

19. O ā aogā o le taʻitaʻia o i tatou e le agaga paia?

¹⁹ O le fua e maua mai i le gaoioiga a le agaga paia, e maua ai aogā e tele. O le agamalu ma le faapalepale e faatupu ai le filemu i le faapotopotoga. O le agalelei ma le mataalofa, e atiaʻe ai le fiafia i se aiga. O le faatuatua ma le amio pulea e fesoasoani ina ia tatou mamā ma faalatalata atu ai pea iā Ieova. Ma ua faamautinoa mai i le Kalatia 6:8: “O lē e lūlū e tusa ma le agaga, e na te selesele mai le ola e faavavau mai i le agaga.” Ioe, e faavae i le togiola a Keriso, o le a faaaogā e Ieova le agaga paia, ina ia maua ai le ola e faavavau e i latou ua taʻitaʻia e le agaga.

E Faapefea Ona E Tali?

• E faapefea ona faatupu le filemu i le faapotopotoga e ala i le agamalu ma le faapalepale?

• O le ā e fesoasoani i Kerisiano e faaalia ai le agalelei ma le mataalofa i le aiga?

• E faapefea ona leoleoina le loto o se Kerisiano i le faatuatua ma le amio pulea?