Ofoina Laʻu Tusi o Tala o Le Tusi Paia
1 A o tatou talaʻi i lea fale ma lea fale, i magaala, ma tulaga lē fuafuaina, tatou te feiloai ai ma tagata o ē taʻutino mai e talitonu i le Tusi Paia ae faalēlava lo latou iloa i talafaasolopito o le Tusi Paia po o anafea foi na tutupu ai na mea. Ua iloa e le toatele le faigata ona manatuaina o na manatu, pe na soifua muamua Aperaamo ia Noa pe mulimuli ane ia te ia, o anafea na maua ai e Mose le Tulafono, po o ai le uluai tupu o Isaraelu? Ia Tesema o le a tatou ofoina ai le tusi Laʻu Tusi o Tala o Le Tusi Paia ma e mafai ona fesoasoani lenei i ē faapena e faatulaga saʻo ai mea tutupu o le Tusi Paia e tusa ma le gasologa o le taimi ma e fesoasoani foi ia i latou ia iloa le fuafuaga a Ieova le Atua. O lea e mafai ai ona tatou fesoasoani i le toatele e mafaia ia maua le poto saʻo e taʻitaʻi ai i le ola.—2 Timo. 3:16; Ioane 17:3.
2 I le taualumaga o la tatou faiva, tatou te feiloai ai ma tagata o tapuaiga eseese ae o le toatele e faapea mai latou te talitonu i le Tusi Paia. E mafai ona tatou faailoa atu ma le agalelei le mea moni faapea e ese a latou tapuaiga ma atonu e fai i ai: “O se mea fiafia le feiloai ma tagata o tapuaiga eseese e tele. Ou te talitonu e te naunau ia matuā iloa lelei le Afioga a le Atua e pei foi o i matou. Ua loa ona saili le fanau a tagata ia maua le Atua i talafaasolopito ma ua Ia saunia Lana Afioga ina ia mafai ai ona tatou faia o lenei mea. [I inei, e mafai ona e faaaogā se (ni) mau mai le Mataupu mo Talanoaga, e tusa ma aiaiga.] E ui i lea, ina ia saili mo le Atua, e manaomia ona tatou iloa lelei lana Afioga le Tusi Paia. E aofia i lenei e lē gata i le iloaina o mea matalasi ua faia e le Atua i ana fesanoaiga ma le fanau a tagata, ae o anafea foi na tutupu ai na mea. O se fesoasoani tele ia i tatou i le faia faapea o le tusi lenei, Laʻu Tusi o Tala o Le Tusi Paia. Ua ia faatulaga maia mea tutupu i le faasologa na oo mai ai ma faaalia mai foi lo latou uiga. [Faaali i ai nisi vaega i le tusi.] Ua tusia lenei tusi i se auala e patino ona lelei mo fanau ae e mafai foi ona fesoasoani i ē matutua e faalautele ai lo latou iloa o le Tusi Paia.” Ona sue lea i isi itulau e faaali i ai nisi o ata. Faamatala puupuu faapea o oe o se tagata faigaluega tauofo ma ua lomia le tusi o se vaega o le taumafaiga i le lalolagi aoao e fesoasoani ai i tagata loto faamaoni i la latou sailiga mo le Atua. Afai e folasia e le tagata le naunau moni, faalaeiau o ia e talia ma faitauina le tusi.
3 A talafeagai, faamatala foi i ai faapea o lenei galuega ua lagolagoina i foai tauofo, ma ia faia ni fuafuaga e toe asia.
4 O se isi faafeiloaiga o le sue saʻo lava i se tasi o tala ma lagā ai nisi o manatu faatosina e faatatau i ai. Atonu e mafai ona e faasino i le Vaega 1, tala e 3, ma folasia faapea na foafoaina le uluai tamaloa ma le fafine ia ola i le lalolagi ma sa i luga o le lalolagi le parataiso, ae lē i le lagi. Mulimuli ane e te ono faasinoina i tala faaiʻu e lua i le Vaega 8 e faaalia ai faapea ua fuafuaina e Ieova le Atua e faafoisia le lalolagi i se tulaga parataiso.
5 Pe, atonu e te manao e faaali i lē ona le fale tala i a Noa, Aperaamo, Iopu ma Mose ma faasino i ai po o anafea na ola ai nei tane i le gasologa mai o le taimi. E aunoa ma le siligia tuusaʻo o lē ona le fale pe na te silafia o anafea na ola ai nei tane faatuatua, e mafai ona e lagā le manatu faapea ua faigata i le toatele ona faatulagaina mea tutupu o le Tusi Paia i lo latou faasologa saʻo. E mafai i lenei auala ona e faasino atu ai le aogā o le tusi i le faatulagaina mai o mea tutupu e tusa ma le faasologa o gafa. O lenei vala o Laʻu Tusi o Tala o Le Tusi Paia atonu e faapogaia ai nisi e ave.
6 O le Vaega 6 lea e feagai ma mea tutupu talu mai ona fanau Iesu seia oo i lona maliu ua na aumaia le tele o avanoa e faatosina ai le naunau o lē ona le fale. Mo se faaaʻoaʻoga, e mafai ona faaaogā le tala numera 86 e faaalia ai le mea moni e uiga i le fetu lea sa taʻitaʻia tagata popoto ia Iesu. E patino ona talafeagai lenei e pei ona tatou molimauina i le taimi o aso malōlō. Pe, e mafai ona faaaogā le tala e 92 i le faatuina e Iesu o ē na maliliu, e aofia ai Lasalo, e faaalia ai faapea o i latou ua maliliu e leʻi ō saʻo i le lagi.
7 A feiloai ma i latou o ē e iai fanau laiti, atonu e te manao e faasino i le faatomuaga i le tusi ma faamatilatila faapea ua tusia i se gagana faigofie ina ia mafai ai e tamaiti ona faitauina mo i latou lava. Faaali foi i ai faapea o vaega o le Tusi Paia ua faavaeina ai tala o loo faaalia i le faaiʻuga o tala taitasi.
8 E manino la, ina ia fetuutuunai a tatou taulimaga i tagata taitoatasi, e manaomia ona tatou iloa mea o iai i le tusi ma faamasani ma le faasologa o tala ma ata. O le faia faapea, atonu e mafai ai ona tatou luluina fatu o le upu moni i se taulimaga faautauta o lenei tusi. (1 Kori. 9:19-23; Kolo. 4:5, 6) Afai e faanaunau lē ona le fale e faitau le tusi, ia mautinoa ua faia ni faatatauga e toe asia i se taimi talafeagai. Atonu e mafai i lenei auala ona e amataina ai se suesuega ma fesoasoani i le tagata ia taulau i lana sailiga mo Ieova le Atua.