Faia Toe Asiga Faatasi ma se Fuafuaga
1 Pe a faia se toe asiga, e tatau ona e taumafai e faaaogā se mau, lea o le a faaopoopo i le iloa o le tagata e uiga i le mataupu o le Tusi Paia lea na lua talanoaina talu ai.
2 O le tasi o sini i le faia o toe asiga i mekasini na tuu, o le faavae ai lea o se alā mekasini. O se taulimaga faigofie faapenei atonu o le a maua ai se iuga lelei:
◼ “Ou te faamoemoe na e fiafia i mataupu o Le Olomatamata lea na ou tuua ia te oe, na o loo faamatala mai ai le pogai e tatau ai ona tatou matatau i le Atua. I le asō, e iai se mataupu i le Awake! lea o loo ou aumaia lea e fesili mai ai e faapea, Aisea ua Matuā Puupuu ai le Olaga?” O se fesili lelei lena, a ea? E mafai ona e faaauau i lou fai atu: O fetalaiga lauiloa a “Iesu i le Ioane 3:16 o loo aumaia ai se folafolaga i le ola e faavavau. Faamolemole ia talia lenei mekasini ma ia faalaeiauina ai oe i le faamoemoe mausalī ua ofoina mai e le Afioga a le Atua.” Ona faamatala lea i ai o le a e toe foi atu e avatu isi lomiga ma atonu o le a talanoa atili ai i le mea ua folafola mai e le Atua mo tagata usiusitai. Ia manatua, o taimi uma e te avatua ai mekasini, e mafai ona e lipotia se toe asiga.
3 Afai sa e tuu le mataupu “Se Lalolagi e Aunoa ma ni Taua—O Afea?” (Le Olomatamata, o Oketopa 1), e mafai ona e faapea atu:
◼ “Faamata o le a faapeī le olaga i le lalolagi pe afai e lē toe iai ni taua? [Faatali mo se tali.] Seʻi ou faailoa atu ia te oe le mea ua folafola mai e le Atua na te faia.” Faitau le Salamo 37:10, 11, ma faamatala le tulaga o le a iai mea pe a faia le finagalo o le Atua i inei i le lalolagi. Faamanatu i le tagata le mea na aʻoaʻo e Iesu ona soo ina ia tatalo i ai e pei ona faamauina i le Mataio 6:9, 10. Fesoasoani ia te ia ina ia malamalama i le uiga o upu a Iesu. Afai e iai se naunau moni, e mafai ona e ofo se tusiga o Le Olomatamata po o le Awake! ma fuafua e te toe foi atu mo se isi talanoaga atili.
4 O le amataina o se suesuega faale-Tusi Paia o se sini tāua lea i la tatou faiva. Atonu e tele ni asiasiga na e faia i se tagata na talia mekasini. Aisea e lē taumafai ai le taulimaga lenei i se isi taimi e te toe asiasi atu ai?:
◼ “E matuā tele naua manatu eseese o tagata e uiga i le lotu ma lona tāua mo le olaga i aso nei. E iai talitonuga feteenai e uiga i le pogai ua faataga ai e le Atua le amio leaga po o le pogai ua tatou ola matutua ai ma oti. Ua mananao nisi tagata e fia iloa pe faapefea ona tatalo ma talia mai e le Atua.” Suʻe se tasi o a tatou lomiga mo suesuega faale-Tusi Paia i se mataupu e te iloa o le a faaoso ai le naunau o lē ona le fale, ma faataʻitaʻi puupuu le auala e faia ai se suesuega.
5 O Ieova o le Atua o fuafuaga. Seʻi o tatou faataʻitaʻi la ia te ia a o faagasolo Oketopa i le faia o toe asiga faatasi ma se fuafuaga lelei.