Tatou te Manaomia le Faapotopotoga
1 Na faaalia i se tasi taimi e atalii o Koru lo latou talisapaia o le faapotopotoga a Ieova i lenei auala: “E sili le aso e tasi i ou lotoā i lo le afe [“i se isi mea,” NW].” (Sala. 84:10) Ia i latou, e leai se mea o ofoina mai e le lalolagi pe a faatusatusa atu i ai. Afai e ia te oe na lagona, e ao la ona avea le faapotopotoga ma taulaiga autū o lou olaga.
2 E mai lava i lona amataga, na faaalia ai e le faapotopotoga Kerisiano lona maua o le faamanuiaga a Ieova. (Galu. 16:4, 5) E lē tatau ona iai se tasi o i tatou e lē loto faafetai mo le faapotopotoga, pe iai se lagona e faapea ua na o se auala e tatou te faapotopoto faatasi ai i le itu faaletino. O le faapotopotoga, o le nofoaga autū lea mo Molimau a Ieova i nuu uma lava. Ua saunia mo le mafutaga autasi ina ia mafai ai ona aʻoaʻoina i tatou e Ieova ma faamaopoopoina ai mo le galuega o le Malo.—Isa. 2:2.
3 O le faapotopotoga o le auala autū lea mo le aʻoaʻoina ai o i tatou i le upu moni. (1 Timo. 3:15) E tatau i soo o Iesu ona “tasi i latou uma”—i le autasi ma le Atua, ma Keriso, ma le tasi i le isi. (Ioa. 17:20, 21; faatusatusa i le Isaia 54:13.) E tusa lava po o fea o le lalolagi tatou te ō i ai, ae e savavali o tatou uso e talitonu, i aʻoaʻoga ma mataupu silisili o le Tusi Paia, ma ola ai o latou olaga e tusa ma na mataupu silisili.
4 Ua aʻoaʻoina ma faaauupegaina i tatou e faataunuuina lo tatou tofiga, o le faia o soo. I masina taitasi, e aumaia ai i Le Olomatamata, le Awake!, faapea ma La Tatou Faiva o le Malo faamatalaga aogā e fesoasoani ia i tatou e amataina ai ni talanoaga faale-Tusi Paia. Ua fuafuaina sauniga e faailoa mai ai ia i tatou le auala e sailia ai ma atiina aʻe ai le naunau i tagata. O le faatelega ua tatou vaaia i le lalolagi aoao, ua faamaonia ai o loo iai le lagolagosua faalelagi i lenei galuega.—Mata. 28:18-20.
5 E ala i le faapotopotoga, ua tatou maua ai e lē aunoa faalaeiauga e ‘taufaatupu ai ia i tatou le alofa ma galuega lelei.’ (Epe. 10:24, 25) E faamalosia ai i tatou ina ia tumau ma le faamaoni i tofotofoga. Ua fesoasoani ia i tatou ovasia alolofa i le feagai ai ma omiga ma popolega. (Fai. 4:9-12) E aumaia ai ia i tatou fautuaga manaomia pe a oo ina lamatia i le sese ese mai le faapotopotoga. O ai se isi faalapotopotoga o saunia sea tausiga alofa e pei o lenei?—1 Tesa. 5:14.
6 O le finagalo o Ieova ia tatou mafuta vavalalata atu i lana faalapotopotoga ina ia tumau ai lo tatou autasi. (Ioa. 10:16) O le tasi o auala ua fesoasoani ai le faapotopotoga ia i tatou e tausia ai pea la tatou fesootaiga ma le vasega o le auauna faamaoni ma le mafaufau, o le auina mai lea o ovasia faimalaga e faamalosiau ia i tatou. O lo tatou tali atu i lena taʻitaʻiga alofa, ua tosina faatasi ai i tatou i se faiā vavalalata mafana lea ua mafai ona fesoasoani ia i tatou e tumau ai i le malolosi faaleagaga.
7 E matuā tāua le faapotopotoga mo le faasaoina o i tatou i le tulaga faaleagaga. O le a lē mafai ona auauna i se auala e talia e Ieova e ese mai i le faapotopotoga. O lea, seʻi o tatou mafuta vavalalata atu i le mea ua saunia e Ieova. Seʻi o tatou galulue e tusa ai ma ona sini, ma faatatauina ma le faamaoni fautuaga ua tatou maua mai ai i inā. E na o le pau lava lea o le auala, e mafai ai ona tatou faaalia po o le ā le tele o tatou faatauaina ai le faapotopotoga.—Sala. 27:4.