Alalaga i le Ulumatua a Ieova!

¹ I le Aso Sa, Nisani 9, 33 T.A., na alalaga ai se motu o tagata e toatele o loo iai laupama i o latou lima, i le Alo ulumatua a Ieova, le Alii o Iesu Keriso, o “le tupu o loo maliu mai i le suafa o le Alii.” (Luka 19:38; Epe. 1:6) I le Aso Gafua ma le Aso Lua, Nisani 10 ma le 11, sa matuā faatumulia ai Iesu i lana faiva i le lautele, i le avea o na aso mulimuli ma aso matuā pisi o lona olaga faalelalolagi.

² I aso nei, o se motu foi o tagata e sili atu o loo iai laupama faafaatusa i o latou lima, o loo alalaga atu ma ni leo tetele e faapea: “O i ai le faaolataga i lo tatou Atua o lē tietie i le nofoālii, atoa ma le Tamai mamoe.” (Faaa. 7:9, 10) Ia Mati 26, o le a tatou faatasitasi ai e faamanatu le Faamanatuga o le maliu o Keriso. A o latalata mai lena aso, pe e mafai ea ona faateleina a tatou taumafaiga i le faiva ma faapea ona faaopoopo ai i lenei alaga aoao o viiga?

³ Faateleina Gaoioiga i le Fanua: Ua maeʻa ona tusia igoa o le toatele o le au talaʻi o ni paeonia lagolago a o faagasolo Mati. Pe e te fiafia e aufaatasi ma i latou? Afai o lea, ia vave ona talosaga. O le a fiafia se tasi o le autoeaina e talia so o sau fesili o iai e faatatau i le galuega.

⁴ E tusa pe mafai ona e auauna o se paeonia lagolago pe leai, o le a e manao e faia se sao atoatoa i le faiva a o faagasolo Mati. E ono mafai i le faapotopotoga ona fuafua mo vaega e molimau i aso uma a o faagasolo le masina. E ao ona lava oganuu e tuuese mo lena fuafuaga.

⁵ E tatau i faapotopotoga uma ona fuafua mo se feiloaiga faapitoa mo le auaunaga i le fanua mo le Aso Toonai, Mati 26. E ui e tele mea e faia e sauniuni ai mo le Faamanatuga, ae o loo fautuaina faapea o i latou uma o ē e mafai ona auai, ia iai i le faiva i le fanua i le taeao o le Aso Toonai. E faaopoopo i le galulue mai lea fale i lea fale, ia faamautinoa o i latou ua e valaaulia e auai i le Faamanatuga ua iai ni auala, ma ua manino i o latou mafaufau le taimi ma le nofoaga o le sauniga.

⁶ Valaaulia ma Faalaeiau Isi: Na faatonu e Iesu ona soʻo: “Ia outou faia lenei mea ma faamanatuga ia te au.” (1 Kori. 11:24) A o usiusitai soʻo faauuina o loo mulimuli i tulagaaao o Iesu i lena faatonuga, o loo valaaulia foi auauna uma a Ieova ina ia auai ma matau le faamanatuina o le Faamanatuga. E lē gata ia i latou, ae e tatau ona e valaaulia tagata aʻoga o le Tusi Paia, o tauaiga, i latou sa e talanoa i ai i le Tusi Paia, o paaga lē talitonu, ma ē e te masani ai i galuega. Fai se lisi ina ia lē galo se tasi.

⁷ O le a iai avanoa faaopoopo mo le faalaeiauina o tagata naunau i le Faamanatuga lava ia. Ia mautinoa le vave taunuu ina ia mafai ona e faafeiloaia tagata fou o ē o loo auai mo le uluai taimi. Afai e auai le tele o au tagata aʻoga o le Tusi Paia, atonu e lelei mo se isi tagata talaʻi ona nonofo ma nisi o i latou a o faagasolo le sauniga. Valaaulia ē fou e auai i le Sauniga Lautele a le faapotopotoga e masani ai. E tatau i le toeaina ua tofia e taulimaina le lauga lautele, ona sauniuni lelei e tauaao se lauga faagaeeina.

⁸ I le faaiuga o le faamanatuina o le Faamanatuga, a o aufaatasi o tatou leo i le usuina o le pese 46, “Alalaga i le Ulumatua a Ieova!,” seʻi o tatou toe tepa i tua ma le lotomalie i se masina o gaoioiga maelega faatiokarate i le viiga o Ieova!

Lagolago Atoatoa Polokalama o Sauniga Lautele a Lau Faapotopotoga

¹ I nai tausaga ua mavae, sa maua e se tama talavou se tamai pepa o loo faasalalauina ai sauniga a le faapotopotoga e lata ane. Talu ai sa ia sueina le upu moni, na ia filifili ai e auai i le Sauniga Lautele i le Aso Sa lava lena, ma na vave ona taunuu i le maota. Sa faafeiloaia mafana e se tagata talaʻi o ia ma, a o faagasolo le talanoaga, sa ofo atu ia te ia se suesuega faale-Tusi Paia lea na ia teena. Ae peitai, na suia lona mafaufau ona sa ia matuā fiafia i le lauga lautele saunia lelei, ma sa taliaina e ia le suesuega ina ua maeʻa le sauniga. Na vave ona agaigai i luma lenei tama talavou, ma sa papatisoina i ni nai masina mulimuli ane. E mafai ona tatou aʻoaʻoina pe ā ma le tolu lesona aogā mai lenei mea na tupu.

² Muamua, sa faasalalauina le Sauniga Lautele. Pe e te faaaogāina tamai pepa ua lomia e faasalalauina ai polokalama o sauniga a lau faapotopotoga? A o faasilasila e le taitaifono le matua o le lauga lautele o le a tauaaoina i le vaiaso e sosoo ai, mafaufau ia i latou i lau oganuu atonu e naunau faapitoa i le mataupu, e tusa pe o latou faitauina a tatou lomiga pe leai. O nisi tagata latou te lē fiafia e faitau, pe faigata mo i latou ona faitau, ae atonu latou te lotomalilie e faalogo i se lauga i se mataupu faale-Tusi Paia.

³ Lona lua, sa avatu i lē fou mai se talileleia mafana. Afai e te fuafua e taunuu i le maota i le vave e mafai ai, e mafai ona e faafeiloaia ou uso ma tuafāfine ma so o se tasi e loto naunau. (Epe. 10:24) Afai faatoʻā auai lē o fou mai mo le taimi muamua, atonu na te lē o iloa po o le ā e faatalitalia. Faamatala i ai o a tatou sauniga e amata i le pese ma le tatalo, ma taʻu ia te ia le auala o le a faia ai le sauniga. A talafeagai, valaaulia o ia lua te nonofo faatasi ina ia mafai ona lua faaaogā faatasi lau Tusi Paia ma le tusi pese. Valaaulia o ia e te lua talanoa faatasi i so o se fesili atonu o loo iā ia pe a maeʻa le sauniga.

⁴ Lona tolu, sa saunia lelei le lauga. O i latou o loo iai le faaeaga o le avea ma sui o le faapotopotoga o ni failauga i le lautele, e faaalu le tele o itula e saunia ma aʻoaʻoina faamatalaga ina ia uunaia le aofia i le alofa e sili atu ma i galuega lelei. I aso nei, ua tatou iai uma i lalo o omiga, ma o upu moni faafouina mai le Afioga a le Atua, o mea tonu ia tatou te manaomia e fesoasoani ia i tatou ia tumau. O le mea moni, e tusa po o le ā le aogā o le lauga lautele, o le a itiiti sona tautele ia i tatou totino seʻi vaganā ua tatou uai totoʻa atu i mea o taʻua. Pe masani ona faigata ia te oe i nisi taimi ona faalogo ma le lē gasē a o faagasolo le lauga? Atonu e fesoasoani le faia o ni faamaumauga pupuu, lea e masani ona tatou faia a o faagasolo a tatou tauaofiaga. Ia faamautinoa le mulimuli i lau Tusi Paia a o faitau ma faatatauina mau taitasi o le Tusi Paia.

⁵ Ua saunia e le Sosaiete i lauga lautele ni mataupu eseese se tele faale-Tusi Paia. I le galulue e ala i le ovasia taʻitaʻi po o se uso ua ia tofia, e faamaopoopoina e le autoeaina polokalama o Sauniga Lautele a le faapotopotoga. O mataupu e faaauivi mai e le Sosaiete ua filifilia e taulimaina manaoga fou. Aua neʻi misia se tasi o nei faamatalaga matuā tāua, ma ia lagolago atoatoa Sauniga Lautele faalevaiaso a lau faapotopotoga.