Ofo le Tusi Fiafia i le Aiga i so o se Ituaiga o Tagata

¹ Na faamatala e se tama e 11 tausaga le matua mai Kalefonia lona talisapaia o le tusi, Le Ala e Maua ai le Fiafia i le Aiga. Na ia tusi mai e faapea: “Ou te matuā loto faafetai mo lenei tusi, ma ou te faalaeiauina isi aiga ina ia faitau i lenei tusi auā e matuā silisili ona lelei. Ua fesoasoani . . . i loʻu aiga e maua ai le filemu ma le fiafia i lo matou fale.” O le mea na oo i lenei talavou e tatau ona faalaeiauina ai i tatou e ofoina le tusi Fiafia i le Aiga i so o se ituaiga o tagata. O ni nai fautuaga nei atonu e te manao e faataitai i lau faiva ia Fepuari.

² Pe a feiloai ma se tagata talavou, e mafai ona e faapea atu:

◼ “E toatele talavou e pei o oe le matutua o loo mafaufau e faaipoipo. Ae o fea e mafai ona e maua mai ai ni faamatalaga maufaatuatuaina mo le mataupu? [Faatali mo se tali.] E toatele talavou e masani lava ona faapea mai e latou te lē o mautinoa po ua nofo sauni e faaipoipo. Seʻi oʻu faamatala atu ia te oe le mea o fai mai ai lenei tamai tusi e uiga i lea mataupu.” Suʻe i le itulau e 14 o le tusi Fiafia i le Aiga, ma faitau le palakalafa e 3. Ona faasino lea i ai o ulutala taitasi i le mataupu. Ofo le tusi, ma fuafua e toe asiasi atu.

³ Pe a talanoa ma se matua, e mafai ona e faapea atu:

◼ “O loo matou fiafia e tufa atu i mātua ni taiala aogā e matuā aogā lava mo le tausia aʻe o fanau. O na taiala, ua mafai ona tuufaatasia i lenei tamai tusi, Le Ala e Maua ai le Fiafia i le Aiga.” Suʻe i le itulau e 55. Faitau le palakalafa e 10, pe a uma, ona faitau lea o le Teuteronome 6:6, 7, i le palakalafa e 11. Ona faasino lea i ai o fuaiupu na e tusi faasisipa i le palakalafa e 12 e oo i le 16. Ona faaauau lea i lou faapea atu: “Ua fesoasoani lenei tusi i le toatele o mātua ina ia sili atu ai ona taulau manuia. Afai e te fia faitau i ai, ou te fiafia lava e tuu mo oe le kopi lenei.”

⁴ Pe afai e te talanoa atu i se tagata ua matua, e mafai ona e faapea atu:

◼ “Pe a uma ona ou faitauina lenei faamatalaga puupuu, faamolemole, faailoa mai ia te au po o le ā sou manatu.” Suʻe le tusi Fiafia i le Aiga i le itulau e 169, ma faitau uluai fuaiupu e lua o le palakalafa e 17. Ona fesili lea mo se manatu. E faalagolago lava la i le tali, e mafai ona e faitauina nisi faamatalaga atili mai le tusi a o lei ofoina.

⁵ Pe a toe asia tagata na tuu ai lomiga o le tusi Fiafia i le Aiga, ia manatua le taumafai e amataina se suesuega faale-Tusi Paia. O le Lesona e 8 i le polosiua o le Manaomia po o le mataupu e 15 i le tusi o Le Poto, e ono avea o se vala talafeagai e amata ai. Ae i le taimi nei, seʻi o tatou taumafai e fesoasoani i so o se ituaiga o tagata ina ia ati ae se olaga faaleaiga Kerisiano fiafia.