MATAUPU 1
Pe Iai se Ala e Maua ai le Fiafia i le Aiga?
1. Aisea e tāua ai aiga o loo mausalī i le sosaiete faaletagata?
O LE aiga, o le faatulagaga ua pito sili lea ona leva i le lalolagi, ma ua ia faia se vaega e tāua tele i le sosaiete faaletagata. I le gasologa o talafaasolopito, ua iloa ai, o aiga o loo mausalī ua fesoasoani lea i le atiina aʻe o ni sosaiete malolosi. O le aiga o le faatulagaga ua sili ona lelei lea mo le tausia aʻe o le fanau ina ia avea o ni tagata matutua e taʻumatuaina.
2-5. (a) Faamatala mai le saogalemu e lagona e se tamaitiiti i totonu o se aiga fiafia. (e) O ā faafitauli ua lipotia mai i nisi aiga?
2 O se aiga fiafia, o le nofoaga lea o lagona saogalemu ma le malupuipuia. Seʻi faaāta teisi i le mafaufau se aiga e sili ona lelei. A o faia le latou taumafataga o le afiafi, o loo nonofo faatasi ai mātua alolofa ma le la fanau, ma o loo latou talatalanoa i mea sa tutupu i le aso. O loo talanoa sanisani le fanau a o latou faamatala atu i lo latou tamā ma le tinā mea na tutupu i le aʻoga. O le taimi paganoa ua latou faaaluina faatasi, e faafouina ai tagata uma i le sauni atu mo le isi aso e sosoo ai lea o le a latou auai atu ai i se isi siomaga e ese mai le aiga.
3 I totonu o se aiga fiafia, e iloa ai e se tamaitiiti o le a tausia o ia e lona tamā ma lona tinā pe a maʻi, atonu pe la te auauai e nonofo i tafatafa o lona moega i le po atoa. Na te iloa e mafai ona ia alu atu i lona tinā po o lona tamā e taʻu atu i ai faafitauli o lona olaga o se tamaitiiti ma maua mai ai fautuaga ma se lagolagosua. Ioe, e lagona e le tamaitiiti le saogalemu, e tusa lava po o le ā le tele o faafitauli o loo faatumulia ai le siomaga i fafo atu o le aiga.
4 Pe a matutua le fanau, e masani ona latou faaipoipo ma amata ona atiaʻe foi ni o latou lava aiga. Ua faapea mai se alagaupu mai atunuu i Sasaʻe: “E iloatino e se tagata le tele o lona nofo aitalafu i ona mātua, pe a oo foi ina fai sana ia tama.” Ona o le uiga loloto o le agaga faafetai ma le alofa, e taumafai ai fanau ua matutua e atiina aʻe o latou aiga ina ia fiafia, ma latou tausia foi o latou mātua ia ua matutua, o ē o loo fiafia i le aufaatasiga ma fanau a a latou fanau.
5 Atonu i lenei tulaga ua e manatu ai: ʻOu te alofa i loʻu aiga, ae lē tutusa ma le aiga lea na faatoʻā uma ona faamatalaina. E eseese a ma faasologa ma te galulue ai ma laʻu paaga, ma e seāseā lava vaai le tasi i le isi. E tele lava ina ma talanoa i faafitauli tau tupe.’ Pe e te faapea mai ea, ʻE ese le nuu o loo nonofo ai la ma fanau ma a latou fanau, ma e lē taitai ona maua se avanoa ou te alu ai e asi i latou’? Ioe, ona o ni mafuaaga ua lē mafai ona faafoeina e i latou o loo aafia ai, ua tele ai olaga faaleaiga ua lē o avea o ni aiga e sili ona lelei. Peitai e iai nisi o loo ola aʻe i ni olaga fiafia faaleaiga. E faapefea? Pe e iai se ala e maua ai le fiafia i le aiga? O le tali i ai o le ioe. Peitai a o lei talanoaina po o le ā lena ala, e tatau ona tatou taliina se fesili tāua.
O LE Ā LE AIGA?
6. O ā ituaiga o aiga o le a talanoaina i lenei tusi?
6 I atunuu i Sisifo, o le tele o aiga e aofia ai le tamā, le tinā, ma le fanau. Atonu e nonofo lava na o mātua o mātua i o latou fale pe afai o latou mafaia pea. E ui ina iai pea fesootaiga ma isi tauaiga e vavamamao o latou sootaga, ae faatapulaa ni tiute agaʻi atu ia i latou na. O le mea moni lava, o lenei aiga (le tamā, le tinā, ma le fanau) o le aiga lena o le a tatou talanoaina i lenei tusi. Peitai ane, ua agaʻi ina matuā taatele isi ituaiga o aiga i ni tausaga e lei leva atu—le aiga e toatasi le matua, le aiga ua toe suia paaga faaipoipo a mātua, ma le aiga ua lē o nonofo faatasi mātua ona o nisi o mafuaaga.
7. O le ā le aiga lautele?
7 E taatele i nisi aganuu le aiga lautele lea e aofia ai ma tauaiga. I lenei faatulagaga pe afai e mafai, ua tatau ai ona tausia mātua o mātua e a latou fanau, ma o tiute ma avega tauave e faasafua atu foi le faia i tauaiga e vavamamao o latou sootaga. Mo se faataʻitaʻiga, atonu e fesoasoani atu tagata o le aiga e lagolagosua, tausia, e oo lava foi i le totogiina o aʻoga a fanau a o latou uso po o tuafāfine, po o isi o latou tauaiga e vavamamao o latou sootaga. O mataupu silisili o le a talanoaina i lenei lomiga e faatatau atu foi i aiga lautele.
UA MAFATIA LE AIGA
8, 9. O ā faafitauli i nisi atunuu e faaalia ai o loo suia tulaga o aiga?
8 Ua suia le aiga i aso nei—e faanoanoa e faapea atu, e lē o suia i se tulaga manuia. Ua vaaia le faaaoaoga o lena mea i Initia, lea atonu e nofo ai se avā i le aiga o lana tane ma faia ana galuega i le fale i lalo o le taʻitaʻiga a tagata o le aiga o lana tane. Ae i aso nei, ua taatele i avā Initia ona suʻe galuega atu i nisi nofoaga e ese mai le aiga. Peitai, e manino mai le faatalitalia pea o i latou e faia a latou matafaioi i le aiga e tusa ai ma tū ma aganuu. O le fesili ua lāgā i le tele o atunuu o le, I le faatusatusa atu i isi tagata o le aiga, o le ā le tele o galuega e tatau ona faia i totonu o le aiga e se fafine o loo faigaluega?
9 I sosaiete i atunuu i Sasaʻe, o sootaga malolosi tau i aiga lautele o se mea e masani ai. Ae peitai, ona o aafiaga mai uiga tutoatasi o faiga mai atunuu i Sisifo, ma mafatiaga i faafitauli tau i le tamaoaiga, ua tau mou atu ai faiga e masani ai le aiga lautele. Ua toatele ai la tagata e manatu i le tausia o tagata ua matutua o se aiga e faapea, o se avega mamafa nai lo o se tiute po o se faaeaga. O nisi mātua ua matutua ua agaleagaina. O le mea moni, o faiga lē alofa ma le lē tausia o tagata ua matutua ua iai i le tele o atunuu i aso nei.
10, 11. O ā mea moni e faaalia ai o loo suia tulaga o aiga i atunuu o Europa?
10 Ua matuā taatele talagā faaipoipoga. I Sepania, na oso aʻe ai se faatatauga o talagā faaipoipoga i le 1 mai le 8 faaipoipoga, ina ua amata tausaga mulimuli e sefulu o le 20 senituri—o se faatelega tele lea o le 1 mai le 100 sa iai i le na o le 25 tausaga na muamua atu i ai. I Peretania, o le lipotia mai pea o le faatatauga e sili ona maualuga o talagā faaipoipoga i Europa (e 4 mai le 10 faaipoipoga ua lē taulau), ua vaaia ai se faatelega vave i le numera o aiga e taitoatasi mātua.
11 E toatele tagata i Siamani e foliga mai ua latou matuā lafoaia le faiga faavae o aiga. I tausaga mai le 1990 ma faasolo mai ai, na iloa ai e 35 pasene o aiga Siamani uma ua iai na o se tagata e toatasi, ae 31 pasene o aiga ua iai na o ni tagata se toalua. Ua tau lē toe toatele ni tagata Falani e faaipoipo, ma o i latou ua faaipoipo ua masani ona vave toe talai a latou faaipoipoga, ua ese ai nai lo le tulaga na iai muamua. Ua faatoateleina le aofai o ē e sili ia i latou le nonofo faatasi e aunoa ma le faia o ni tiute tauave tau i le faaipoipoga. O āʻega lava na ua vaaia i le lalolagi aoao.
12. Ua faapefea ona puapuagatia tamaiti ona o suiga i totonu o aiga i ona po nei?
12 Ae o le ā o loo tupu i tamaiti? I le Iunaite Setete ma le tele o isi atunuu, o loo faateleina pea tamaiti e fananau mai i mātua e lē o faaipoipo, o nisi e faananau mai i ni talavou laiti lava. E toatele teine talavou ua iai ni a latou fanau e eseese uma tamā. O lipoti mai le lalolagi aoao ua taʻua ai le faitau miliona o tamaiti ua leai ni aiga e nonofo ai, o loo feofeoai solo i magāala; e toatele ua sosola ese mai aiga o loo leaga ona tausia ai i latou pe ua tutuli ese e aiga ona ua lē mafai ona latou toe tausia nei tamaiti.
13. O ā faafitauli taatele ua mou ese atu ai le fiafiaga mai aiga?
13 Ioe, ua tele faafitauli i le aiga. E lē gata i mea ua uma ona taʻua, ae o fouvalega mai talavou, o faiga leaga i tamaiti, o faiga sauā i paaga, le puleaina e le ava malosi, ma isi faafitauli matautia ua mou ese atu ai le fiafiaga mai le tele o aiga. I manatu o le toatele o tamaiti ma tagata matutua, o le aiga ua matuā mamao ese lava mai le avea o se nofoaga e saogalemu ai.
14. (a) E tusa ai ma manatu o nisi, o ā mafuaaga o le tele o faafitauli i le aiga? (e) Na faapefea ona faamatalaina mai e se loia i le uluai senituri, le lalolagi i aso nei, ma o ā aafiaga ua faia e le faataunuuga o ana upu i olaga faaleaiga?
14 Aisea ua tele ai faafitauli i le aiga? Ua tuuaʻia e nisi le malaia o aiga i aso nei ona o le faataga o fafine e faigaluega i falefaigaluega. O nisi ua latou tuuaʻia le paʻū maulalo o amioga tatau i aso nei. Ua iai foi nisi mafuaaga ua taʻua. I le toetoe lava luaafe tausaga ua tuanai, na valoia ai e se loia lauiloa e faapea, e tele omiga o le a aafia ai le aiga, ina ua ia tusi mai: “O ona aso e gata ai e oo mai ai aso faigata. Auā e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e le ma faaleleia, o e faatuaupua, o e le taofi manao o le tino, o e faasaua, o e inoino i le amio lelei, o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua.” (2 Timoteo 3:1-4) Pe e iai ea se isi o le a tau masalomia le faataunuuina o nei upu i aso nei? I se lalolagi o loo iai ni tulaga e pei o nei mea, pe o se mea ea la e ono ofo ai o le tele o aiga ua anoanoai ai faafitauli?
LE ALA E MAUA AI LE FIAFIA I LE AIGA
15-17. I lenei tusi, o le ā le taʻiala o le a faasino atu i ai o loo iai le ala e maua ai le fiafia i le aiga?
15 O fautuaga mo le auala e ausia ai le fiafia i le aiga ua ofoina mai i tagata eseese. I atunuu i Sisifo, ua lē mapu le solo mai o tusi ma mekasini o loo ofoina mai ai fautuaga i auala e maua ai fesoasoani. O le faafitauli, e feteenai manatu o le ʻau faufautua faaletagata, ma o fautuaga o loo fetaui i lenei aso e mafai ona vaai i ai e lē toe aogā taeao.
16 O fea la, e mafai ona tatou saili atu i ai mo taʻiala maufaatuatuaina faaleaiga? Pe o le a e saili atu ea i se tusi na tusia i ni tausaga e 1,900 ua tuanai? Pe o le a e manatu faapea o se tusi faapena ua pasiā ona manatu e lē maua ai se faamoemoe? O le mea moni, o le ala moni i le fiafia i le aiga ua maua tonu lava i lena taʻiala.
17 O lena taʻiala o le Tusi Paia lea. E tusa ai ma faamaoniga uma, na faagaeeina lea tusi e le Atua lava ia. Tatou te mauaina i le Tusi Paia le faamatalaga lenei: “O tusi paia uma lava e mai le Agaga o le Atua ia, e aoga foi ia e aʻoaʻo ai, e aoai ai, e faatonu ai, e faapoto ai foi i le amiotonu.” (2 Timoteo 3:16) I lenei lomiga o le a matou faalaeiauina ai oe ina ia e iloiloina le auala e mafai ai e le Tusi Paia ona fesoasoani ia te oe i le ʻfaasaʻoina o mea’ a o taulimaina mafatiaga ma faafitauli o loo fesagai ma aiga i aso nei.
18. Aisea e talafeagai ai ona taliaina le Tusi Paia e avea o le taʻiala mo le fautuaina o faaipoipoga?
18 Pe afai e te tau mānatu e ono lē mafai ona fesoasoani le Tusi Paia i le faafiafiaina o aiga, seʻi manatu i lenei mea: O Lē na faagaeeina le Tusi Paia, o Ia o Lē na Amataina le faatulagaga o le faaipoipoga. (Kenese 2:18-25) Ua fai mai le Tusi Paia o lona suafa o Ieova lea. (Salamo 83:18) O ia o Lē na Foafoaina Mea ma o ʻle Tamā, ua faaigoaina ai aiga uma.’ (Efeso 3:14, 15) Ua mātauina e Ieova le olaga faaleaiga talu mai lava ona amata le tagata. Na te silafia faafitauli e mafai ona mapuna aʻe ma ua ia tuuina mai fautuaga mo le foiaina o na faafitauli. I le gasologa o talafaasolopito, o i latou ua faatatauina ma le faamaoni mataupu silisili o le Tusi Paia i o latou olaga faaleaiga, ua latou maua le fiafiaga tele.
19-21. O ā mea tutupu i ona po nei e faaalia ai le mana o le Tusi Paia i le foiaina o faafitauli tau i faaipoipoga?
19 Mo se faaaoaoga, o se avā tausi aiga i Initonesia, sa avea o se tagata sa matuā malosi i le pelētupe. I le tele o tausaga na ia faatamala ai i le tausiga o lana fanau e toatolu, ma misa i le tele o taimi ma lana tane. Ona amata lea ona ia suesueina le Tusi Paia. Na faasolosolo mālie ona talitonu lea fafine i mea sa fai mai ai le Tusi Paia. Ina ua ia faatatauina fautuaga a le Tusi Paia, ona avea ai lea o ia ma avā ua sili atu ona lelei. O ana taumafaiga, e faavae aʻe i mataupu silisili o le Tusi Paia, na aumaia ai le fiafiaga i lona aiga atoa.
20 Ua faapea mai se avā tausi aiga i Sepania: “Sa na o le tasi le tausaga talu ona ma faaipoipo ae amata ona iai o ma faafitauli matuia.” Sa tau leai ni mea la te fiafia faatasi i ai ma lana tane, ma sa seāseā la talanoa sei vaganā ua la tauaimisa. E ui ina iai se la tama teine laitiiti, ae na la filifili e faia se teteaga faaletulafono. Peitai, a o lei faataunuuina lena mea, sa faalaeiauina i laua ina ia saili atu i le Tusi Paia. Na la suesueina fautuaga a le Tusi Paia mo tane ma fafine faaipoipo ma amata ona la faatatauina. E lei umi lava, ae mafai ona la fetalanoaai ma le toafilemu, ma toe autasia ai ma le fiafia si o la aiga ausage.
21 E fesoasoani foi le Tusi Paia i tagata matutua. Mo se faataʻitaʻiga, seʻi manatu i le mea na tupu i se ulugalii Iapani. Sa itaitagofie tele le tane, ma o nisi taimi na te faia ai ni uiga sauā. Muamua, na amata ona suesueina e le fanau teine a le ulugalii le Tusi Paia, e ui lava ina tetee i ai o la mātua. Na iu ina auai atu le tane i lana fanau teine, ae sa tetee pea le avā. Peitai, a o faagasolo tausaga, sa mātauina ai e le avā āuga lelei o mataupu silisili o le Tusi Paia i lona aiga. Sa tausia lelei o ia e lana fanau teine, ma na amata foi ona sili atu le agamalu o lana tane. O na suiga na uunaia ai le fafine e suesueina e ia lava le Tusi Paia, ma na ia maua ai foi na lava āuga lelei. Na taʻua soo e lenei tinā matua e faapea: “Ua avea i maʻua o se ulugalii faaipoipo moni lava.”
22, 23. Ua faapefea ona fesoasoani le Tusi Paia i tagata o atunuu uma ina ia maua le fiafiaga i o latou olaga i le aiga?
22 O nei tagata o loo iai faatasi i se vaega tele o ē ua latou aʻoaʻoina le ala e maua ai le fiafia i le aiga. Ua latou talia fautuaga a le Tusi Paia ma faatatauina. E moni, o loo latou ola uma lava i le lalolagi lea o loo iai faiga sauā, o amioga lē mamā, ua pagatia i tulaga tau tamaoaiga e pei foi ona iai uma isi. E lē gata i lea, e lē lelei atoatoa i latou, ae ua latou maua le fiafiaga i le taumafai e faia le finagalo o Lē na Amataina mai le faatulagaga o le aiga. E pei ona fai mai le Tusi Paia, o Ieova le Atua o ia “o loo aʻoaʻo ia te oe i mea e aoga, o loo taʻitaʻiina oe i le ala e te ui ai.”—Isaia 48:17.
23 E ui ina ua maeʻa ona tusiaina le Tusi Paia i le toetoe luaafe tausaga ua mavae, ae o ana fautuaga o loo matuā aogā e oo mai lava i aso nei. Sa tusiaina foi lena tusi mo tagata uma. O le Tusi Paia e lē o se tusi mo Amerika po o se tusi mo atunuu Sisifo. O Ieova “ua faia foi e ia nuu uma o tagata i le toto e tasi,” ma e silafia e Ia le fausaga o tagata i so o se vaipanoa. (Galuega 17:26) E aogā mataupu silisili o le Tusi Paia mo tagata taitoatasi. Pe afai e te faatatauina, o le a e iloaina ai foi le ala e maua ai le fiafia i le aiga.