Le Manatu o le Tusi Paia

Pe Avea le Mativa ma Faamolemolega e Gaoi Ai?

“O Le mativa o se fili sili o le fiafiaga faaletagata; e mautinoa le faatamaia ai o le fiafia i mea lelei ma ua lē faia ai e nisi le amio lelei, ae o isi ua matuā faigata lava ona faaalia atu ai le amio lelei.”—Samuel Johnson, o se tusitala i le senituri e 18.

UA FAAPEA mai se tagata Roma e tomai i mataupufai a le Malo, o Magnus Aurelius Cassiodorus: “O le mativa ua māfua ai le solitulafono.” E peiseai ua fautuaina e nei manatu faapea ua avea nisi solitulafono o se iuga masani o le mativa. O le toatele i aso nei ua ioe i ai, ae maise pe afai o le solitulafono o le gaoi.

E fai si taatele o le talitonuga faapea e mafai ona avea omiga ma le mativa, ma faamolemolega e gaoi ai. Seʻi manatu i pese lauiloa a Peretania o le senituri e 14 e faatatau ia Robin Hood, o loo faamatala ai se tagata solitulafono taʻutaʻua o lē na gaoi mai tagata maumea ma tufatufa solo atu nei mea i tagata matitiva. Mo le tele o senituri, ua manatu ia te ia o se tagata toa.

O le mea moni, o le toatele i aso nei o loo fesagai ma tulaga sili ona faigata tau tamaoaiga. E lei leva ona lipotia mai e le World Bank e faapea e 1.3 piliona tagata o loo ola e itiiti ifo ma le tasi le tālā Amerika i le aso. I se tasi o suesuega, o le 70 pasene o tagata Filipaina latou te manatu ia i latou lava o ni tagata matitiva. I se faatusatusaga i Pasili, e 32 taimi e sili atu ai tupe e maua e tagata pito i mauoa ia e faia aʻe ai le 20 pasene o le aofaiga o tagata, nai lo tagata pito i matitiva ia e faia aʻe ai le isi 20 pasene o le aofaiga o tagata. O le lē tutusa o tulaga tau tamaoaiga, e mafai ona faalotovaivaia ai nisi tagata i le tulaga o loo latou faaaogā ai so o se auala, e oo i le gaoi, ina ia tausia ai manaoga e ola ai i aso taitasi.

Ua manino mai le taʻusalaina e le Tusi Paia o le gaoi. Ua faapea mai le tulafono lona valu o Tulafono e Sefulu: “Aua e te gaoi.” (Esoto 20:15) Ae peitai, ua manatu le toatele o loo talitonu i le Tusi Paia e faapea, e lē afaina pe a gaoi se tasi pe afai o fesagai ma tulaga matuia tau tamaoaiga.

O lenei tulaga ua lāgā ai ni fesili tāua: Pe mafai moni ona avea le mativa ma faamolemolega e gaoi ai? Po o le ā e faia e se tagata pe afai o loo ola i tulaga e sili ona faigata tau tamaoaiga? Faapefea pe afai o loo ia tausia ni fanau mamaʻi pe fia ʻaai? Faamata e faataga e Ieova le Atua le gaoi i tulaga faapena, ae maise pe afai e lē manaomia moni e na tagata o loo gaoi mai ai, na mea?

Po o le ā o Fetalai Mai ai le Atua?

Talu ai na faaatagia e Iesu uiga o lona Tamā, o lana faataitaiga la e fesoasoani ia i tatou ina ia malamalama ai i le silafaga a le Atua. (Ioane 12:49) A o i le lalolagi, sa tele le alofa mutimutivale o Iesu i ana feutagaiga ma tagata matitiva. Ua faapea mai le Tusi Paia ina “ua silafia e ia le motu o tagata, ona mutimuti vale ai lea o lona alofa ia te i latou.” (Mataio 9:36) E ui i lea, na ia lē faatagaina lava se tasi e gaoi e tusa lava po o le ā le tulaga. E faapena foi le Atua, e ui ina manatu mai o ia i tagata matitiva, ae e lē finagalo o ia e avea le mativa ma faamolemolega e gaoi ai. Ua taʻu mai e le Tusi Paia ia i tatou i le Isaia 61:8 e faapea, e “ʻinoʻino” le Atua “i mea ua faoa faaletaupulea.” Ma ua faapea mai ma le manino le aposetolo o Paulo, o tagata gaoi e lē fai mo latou tofi le Malo o le Atua. O lea la, ua tatou malamalama manino i le silafaga a le Atua.—1 Korinito 6:10.

Ae peitai, ua faapea mai le Faataoto 6:30, ‘e lē inosia e tagata le gaoi pe a gaoi o ia e tali ai lona manava, ina ua fia ʻai.’ Pe faataga e lenei mau le gaoi? E leai. Ua faaalia e fuaiupu o loo siomia ai e faapea e faasalaina e le Atua le tagata gaoi ona o le mea sese na ia faia. Ua faapea mai le fuaiupu e sosoo ai: “A e a maua o ia, ona taui atu lea e ia e taifitu; na te avatu ai oloa uma o i lona fale.”—Faataoto 6:31.

E ui e lē matuā nofosala le tagata lea e gaoi ona o le fia ʻai, e pei o le tagata e gaoi ona o le manao tele po o le fia faaleaga i lē ua faoa mai ai mea, ae o i latou e naunau ina ia talileleia e le Atua, e lē tatau ona nofosala i so o se faiga faagaoi. E oo lava i tulaga o le mativa masaesae, o le gaoi e lē o se āva lea i le Atua. Ua faapea mai le Faataoto 30:8, 9: “Ia e fafaga mai ia te au i ni mea e ʻai e tatau ma aʻu; . . . ina neʻi ou mativa foi, ma ou gaoi, ma ou taʻufuaina le suafa o loʻu Atua.” Ioe, e taʻuvalea e lē gaoi le suafa o le Atua. Ona o le gaoi o se gaoioiga lē alofa, ua avea ai o se agasala, e tusa lava pe e gaoi mai i se tagata mauoa po o se tagata mativa foi. Mo i latou e alolofa i le Atua ma o latou tuaoi, e leai lava se faamolemolega e gaoi ai.—Mataio 22:39; Roma 13:9, 10.

E lē fetaui la le faamatalaga lea faapea o le tagata e faalētagolima ua ia te ia le aiā e gaoi ai. O le faia o lenei faamatalaga ua pei o le faapea atu e mafai e se tagata taalo e lē tino lelei, ona tagofia fualaau faasaina e faamalosia ai lona tino ina ia manumalo ai. E tusa lava pe e manumalo, ae ua ia uia se auala lē faamaoni. Ua manatu ma le saʻo isi i le faapea ua ia faoa lo latou avanoa e manumalo ai e ala i le faaaogaina o auala faasolitulafono. E faapena foi le tagata gaoi. Ua ia avea mea a isi i se auala lē faamaoni. E lē avea lona limavaivai ma faamolemolega e gaoi ai.

O so o se tagata gaoi lava e manao e talileleia e le Atua, e manaomia ona salamō mai ana gaoioiga. Ua lapatai mai le Tusi Paia e faapea: “O lē gaoi aua neʻi toe gaoi, a e lelei ina faamalosi o ia i galuega a ona lima i mea aoga.” (Efeso 4:28) O ē na avea muamua ma tagata gāoi ae ua salamō moni, e mafai ona latou mautinoa o le a faamagalo e Ieova i latou.—Esekielu 33:14-16.

O le ā e Mafai Ona Faia e Tagata Matitiva?

Ua folafola mai e le Tusi Paia e faapea: “E le faalāina e Ieova o e amiotonu; a o le manao o e amio leaga, e teena lea e ia.” (Faataoto 10:3) E lē fesoasoani le Atua ia i latou o ē soli ana tulafono ma le loto i ai, ina ia faamalie o latou manaoga. Ae e alofa mutimutivale o ia ia i latou o loo naunau moni e faafiafia o ia, ma o le a ia faamanuiaina a latou taumafaiga ina ia maua ai mea o loo moomia.—Salamo 37:25.

Ua iloa e le faitau miliona e faapea afai latou te mulimuli i mataupu silisili tauatua, o le a faaleleia ai o latou tulaga. Mo se faataitaiga, o le faatatauina o fautuaga faale-Tusi Paia e pei o le galue mamafa ma alofia faiga e faaleagaina ai e pei o le pelē tupe, onā, ulaula tapaa ma le faaaogaina o fualaau faasaina, ua mafai ai ona latou maua mea e sili atu nai lo mea latou te moomia. (Kalatia 5:19-21) E manaomia ai e lenei mea lo latou faatuatua, ma o i latou ua faia faapea ua latou iloaina “e lelei Ieova” ma e fesoasoani moni ia i latou e faalagolago atu ia te ia.—Salamo 34:8.

[Ē Ana le Ata i le itulau 24]

Robin Hood: General Research Division/The New York Public Library/Astor, Lenox and Tilden Foundations