Tauia Ona o le Onosai

¹ “O lo outou onosai tou te maua ai lo outou ola.” (Luka 21:19) O na upu o se vaega o le valoaga a Iesu e faatatau i “le faaiʻuiʻuga o le faiga o mea,” (NW) ua faamanino mai ai e faapea, o le tausia o lo tatou faamaoni, e ao ona tatou sauniuni e feagai ma le tele o tofotofoga. Ae i le malosi mai iā Ieova, e mafai ai e i tatou taʻitoʻatasi ona “tumau seʻia oo i le gataaga” ma “faaolaina” ai.—Mata. 24:3, 13; Fili. 4:13.

² O sauāga, faafitauli o le soifua mālōlōina, faigatā tau tupe, ma mafatiaga taufaalogona, e avea ai aso taʻitasi ma taimi faigatā. Ae peitaʻi, e lē tatau ona tatou faagaloina o loo taumafai Satani e gausia lo tatou faamaoni iā Ieova. O aso taʻitasi e tatou te tumau ai i le faamaoni i lo tatou Tamā, o le isi foʻi lea aso ua faia ai so tatou sao e tali atu ai i le luʻi a Lē o loo fāifai mai. Maʻeu le faamalieina i le iloa faapea, e lē o faagaloina o tatou “loimata” i taimi o puapuaga! E matuā tāua iā Ieova na loimata, ma o lo tatou faamaoni e faafiafiaina ai lona finagalo!—Sala. 56:8; Faata. 27:11.

³ Faaleleia Atili e Ala i Tofotofoga: O tofotofoga e mafai ona faaalia ai se vaivaiga i lo tatou faatuatua, po o se faalētonu i o tatou uiga e pei o le faamaualuga po o le lē onosai. Na i lo le taumafai e ʻalofia pe faamuta tofotofoga i auala e lē faale-Tusi Paia, e tatau ona tatou utagia fautuaga a le Afioga a le Atua ina ia ‘atoatoa galuega a le onosai.’ Aiseā? O le onosaia ma le faamaoni o tofotofoga e fesoasoani iā i tatou ia “atoatoa ai ma ia sao ona lelei.” (Iako. 1:2-4) O le onosai e fesoasoani iā i tatou e ati aʻe ai uiga e sili ona tāua, e pei o le magafagafa, tigā alofa, ma le alofa mutimutivale.—Roma 12:15.

⁴ Le Faatuatua ua Uma Ona Tofotofoina: Pe a tatou onosaia tofotofoga, o lona uiga ua tatou maua se faatuatua ua uma ona tofotofoina, lea e tāua tele i le silafaga a le Atua. (1 Pete. 1:6, 7) O lenā faatuatua e fesoasoani iā i tatou e tumau ai i tofotofoga e oo mai i le lumanaʻi. E lē gata i lea, e tatou te lagonaina ai le faamaoniga a le Atua, ma faamalosia ai lo tatou faamoemoe, ma sili atu ai ona moni le faamoemoe iā i tatou.—Roma 5:3-5.

⁵ O le taui sili ona o le onosai, o loo faamatilatila mai i le Iakopo 1:12, lea o loo faapea mai: “Amuia le tagata o lē onosai i le faaosoosoga; auā a uma ona tofotofoina e maua e ia le pale o le ola.” O lea la, ia tatou tumau ma le lē faagaeetia i lo tatou tuutoina atu iā Ieova, ma le mautinoa o le a ia tauia ē “e alolofa atu iā te ia.”

Vaega 2—Faia o Suʻesuʻega Faale-Tusi Paia e Agaʻigaʻi i Luma

Sauniuni i le Faia o Suʻesuʻega

¹ O le lelei o le aʻoaʻo atu i suʻesuʻega faale-Tusi Paia, e tele atu mea e aofia ai na i lo le na ona talanoaina o le mataupu ma suʻeina mau faasino. E manaʻomia ona tatou avatu manatu i se auala e uunaʻia ai le loto o le tagata suʻesuʻe. E manaʻomia ai le lelei o sauniuniga ina ia maua e le tagata suʻesuʻe aogā o le suʻesuʻega.—Faata. 15:28.

² Le Auala e Sauniuni Ai: Ia amata i le tatalo iā Ieova e faatatau i le tagata suʻesuʻe ma ona manaʻoga. Tatalo iā Ieova e fesoasoani iā te oe ia uunaʻia le loto o le tagata suʻesuʻe. (Kolo. 1:9, 10) Ina ia manino le matua o le mataupu i lou mafaufau, ia mafaufau mo sina taimi i le matua o le mataupu po o le lesona, o tamaʻi ulutala, ma so o se fesoasoani o loo iai pei o faataʻitaʻiga, o ata ma mea faapena. Fesili ifo iā te oe, ‘O le ā le mea autū o loo taulaʻi atu i ai le mataupu?’ O le a fesoasoani lea iā te oe e taulaʻi atu ai i manatu autū a o faia le suʻesuʻega.

³ Ia autalu faasolosolo lelei le mataupu mai lea palakalafa i lea palakalafa. Ia mātau lelei tali i fesili, ma faailoga na o upu tāua ma sina vaega o le fuaiupu. Ia iloilo pe faafefea ona sootaga atu mau sii i le manatu autū o le palakalafa, ma filifili po o fea mau sii e faitau i le suʻesuʻega. E fesoasoani le faia o ni faamatalaga pupuu e faatatau i le mau, i autafa o le palakalafa. E tatau ona malamalama lelei le tagata suʻesuʻe, o mea o loo ia aʻoaʻoina e mai le Afioga a le Atua.—1 Tesa. 2:13.

⁴ Faatulaga le Lesona i Manaʻoga o le Tagata: O le mea e sosoo ai, o le mafaufau i le lesona ina ia fetaui lelei ma mea o loo manaʻomia e le tagata suʻesuʻe. Taumafai e mafaufau muamua po o ā fesili e ono fesili mai ai, ma manatu e faigatā ona malamalama i ai pe na te taliaina. Fesili ifo iā te oe: ‘O ā mea o loo manaʻomia ona malamalama i ai le tagata suʻesuʻe, pe galue i ai ina ia faia se agaʻigaʻi i luma faaleagaga? E faapefea ona ou pāʻia lona loto?’ Ona fetuunaʻi faatatau lea o lau aʻoaʻo atu. I nisi o taimi, e te ono iloa ai e manaʻomia ona saunia se talafaatusa, se faamalamalamaga, po o ni fesili e fesoasoani i le tagata suʻesuʻe e malamalama ai i le uiga o se manatu patino po o se mau. (Nee. 8:8) Ia ʻalofia le faaofi atu o faamatalaga faaopoopo lea e lē manaʻomia mo le faamaninoina o le matua. O se autaluga puupuu i le iʻuga o le suʻesuʻega, o le a fesoasoani iā te ia e manatua ai manatu autū.

⁵ Maʻeu se olioli e tatou te maua pe a fua mai e tagata fou, fua o le amiotonu e viia ai Ieova! (Fili. 1:11) Ina ia fesoasoani iā i latou e ausia lenā sini, ia sauniuni lelei i taimi taʻitasi e faia ai suʻesuʻega faale-Tusi Paia.