Ua Tatou Nofo Aitalafu i Isi

¹ Sa lagona e le aposetolo o Paulo le iā te ia o se tiute tauave e talaʻi atu i isi. Na iloa e Paulo e mafai e Ieova ona faaolaina ituaiga uma o tagata e ala i le toto tāua o Lona Alo. (1 Timo. 2:3-6) O le pogai lea, na faapea mai ai Paulo: “Ua [“ou nofo aitalafu,” NW] iā Eleni atoa ma nuu ese, o ē popoto atoa ma ē valelea.” Na ia galue ma le naunau ma le lē faavaivai e totogi lana aitalafu i ona uso a tagata e ala i le tufaina atu o le tala lelei iā i latou.—Roma 1:14, 15.

² I le pei o Paulo, ua taumafai Kerisiano i aso nei e tufa atu le tala lelei i o latou tuaoi i so o se avanoa lava e maua. Ona ua i faitotoʻa le “puapuaga tele,” ua matuā faanatinati ai lava a tatou taumafaiga e saʻilia tagata loto faamaoni. Tau ina ia avea lo tatou alofa faamaoni i tagata, e uunaʻia ai i tatou e filigā i lenei galuega faasaoola.—Mata. 24:21; Eseki. 33:8.

³ Totogia o la Tatou Aitalafu: O le auala autū e tatou te oo atu ai i tagata, o le talaʻi lea mai lea fale i lea fale. I oganuu e tele ina leai ni tagata i aiga, e fesoasoani le fai o ni faamaumauga lelei ma toe foʻi atu i ni taimi eseese, e tatou te maua ai le tele o tagata. (1 Kori. 10:33) E mafai foʻi ona tatou oo i tagata e ala i le molimau atu i oganuu o pisinisi, i luga o auala, i paka, ma mea e paka ai taavale, ma le telefoni. Ia tatou fesili ifo iā i tatou lava: ‘Po o oʻu faia le mea sili ou te mafai e talaʻi atu ai i so o se auala ina ia tufa atu le feʻau o le ola i tagata?’—Mata. 10:11.

⁴ Sa lagona e se tasi o tuafafine paeonia le tatau ona oo atu i tagata uma i lana oganuu. I se tasi o fale e masani lava ona tapunipuni ona pola, ma leai se tagata e maua atu i ai. Ae i se tasi aso e leʻi talaʻi ai le tuafafine paeonia lea, na ia iloa atu ai se taavale i luma o le fale lenei, lea e lē maua atu lava i ai se tagata. E leʻi manaʻo le tuafafine e misi le avanoa lea, ae alu atu loa ma faatatagi le logo i le faitotoʻa o le fale. Sa tali ane le tamāloa, ma amata ai loa se talanoaga, ma faapea ona faaauau ai loa ona asia e le tuafafine ma lana tane le tamāloa lea. Na oo ina taliaina e lenei tamāloa se suʻesuʻega faale-Tusi Paia, ma ua avea nei o ia o se uso papatisoina. Sa ia loto faafetai ona o le lagonaina e lenei tuafafine o lona nofo aitalafu i le talaʻi atu i isi.

⁵ Ona ua televave tele le oo mai o le iʻuga, o le taimi la lenei e totogi ai la tatou aitalafu i o tatou uso a tagata e ala i le galulue ma le faamalosi i le galuega talaʻi.—2 Kori. 6:1, 2.

Vaega 11—Faia o Suʻesuʻega Faale-Tusi Paia e Agaʻigaʻi i Luma

Fesoasoani i Tagata Talaʻi Fou ia Faia Toe Asiga

¹ Pe a amata ona auai se tagata aʻoga o le Tusi Paia i le galuega talaʻi, o le a ia feiloaʻi atu i tagata e faaalia le fiafia i le tala lelei. E faapefea ona tatou fesoasoani i le tagata talaʻi fou e fai ni toe asiga uigā, ma ati aʻe le fiafia o le tagata ua ia mauaina?

² O le sauniuni mo le faia o se toe asiga, e amata i le taimi muamua e asiasi atu ai. Ia faalaeiau le tagata aʻoga e faaalia le naunau moni iā i latou e talanoa i ai. (Fili. 2:4) Ia faasolosolo ona toleni le tagata talaʻi fou e faatalanoa tagata o aiga e faaali mai o latou manatu, ia faalogologo atu i ai, ma mātau mea o loo latou manatu mamafa i ai. Pe a faaalia le naunau o se tasi, ia tusia i lalo e le tagata talaʻi fou faamatalaga tāua e faatatau i le talanoaga lea sa fai. Ia faaaogā faamatalaga na e fesoasoani iā te ia e fuafua ai isi talanoaga o le a fai.

³ Sauniuni e Toe Foʻi Atu: Ia toe autalu le uluaʻi asiasiga, ma faailoa i le tagata aʻoga le auala e filifili ai se vala o le feʻau o le Malo, o le a fiafia i ai le tagata o le aiga. (1 Kori. 9:19-23) Ia sauniuni faatasi se taulimaga puupuu e faamatilatila ai se mau, faatasi ai ma se palakalafa i se lomiga o loo faia ai suʻesuʻega. E lē gata i lea, ia sauniuni se fesili e fai i le faaiʻuga o le talanoaga ina ia faataatia ai se faavae mo le isi toe asiga. Ia faailoa i le tagata talaʻi fou le auala e faalautele ai le iloa o le tagata i le Afioga a le Atua, i asiga faasolosolo taʻitasi.

⁴ E fesoasoani foʻi i le aʻoaʻoina o le tagata aʻoga le faia o se faatomuaga faigofie i se toe asiga. Pe a uma ona faafeiloaʻi le tagata o le aiga, ona ia faapea atu lea: “Sa ou fiafia lava i la tatou talanoaga talu ai nei, ma ua ou toe foʻi mai e talanoaina atili nisi faamatalaga o le Tusi Paia e ala i le [ia taʻua le mataupu].” E manaʻomia foʻi ona e faaali i le tagata talaʻi fou le auala e tali atu ai pe a faapea e ese le tagata lea e tali maia le faitotoʻa.

⁵ Ia Tinoū e Fai Toe Asiga: Ia faalaeiau le tagata aʻoga e faataatia se faaaʻoaʻoga lelei i le vave ona toe asia tagata uma na faaalia le fiafia. O le maua o tagata i aiga, e ono manaʻomia ai le filigā e asiasi atu pea. Ia aʻoaʻo le tagata aʻoga i le auala e fai ai fuafuaga mo le toe asiasi atu, ma fesoasoani iā te ia e malamalama i le manaʻomia ona toe foʻi i le tagata e pei ona e folafola atu. (Mata. 5:37) Ia toleni le tagata talaʻi fou e agalelei, magafagafa, ma ia faaaloalo a o saʻili atu mo i latou e pei o ni mamoe, ma ati aʻe lo latou fiafia.—Tito 3:2.