Talaʻia o le Malo—O se Tofiga Tāua

¹ I aso taʻitasi, e faitau piliona tagata o le lalolagi o loo faamanuiaina i sauniuniga agalelei a Ieova mo le faatumauina o le ola. (Mata. 5:45) E ui i lea, e toʻaitiiti i latou o loo olioli i le faaeaga tutasi, o le faaalia lea o le lotofaafetai i Lē na faia i latou, e ala i le talaʻia o le tala lelei o le Malo o le Atua. (Mata. 24:14) O le ā le tele o loo e faatāuaina ai lenei faaeaga tāua?

² O le talaʻia o le Malo e faamamaluina ai le Atua, ma aumaia ai le faamoemoe ma le filemu i tagata o loo mafatia i nei taimi ona o le fesouaʻiina i faafitauli. (Epe. 13:15) Iā i latou o loo tali lelei mai i le feʻau, e mafai ona maua ai le faamoemoe o le ola e faavavau. (Ioa. 17:3) O fea se galuega e ofo maia na faamanuiaga? Na faaalia e le aposetolo o Paulo lona lotofaafetai i le faiva i le auala na ia faia ai. Na ia manatu i ai o se tofiga e tāua tele.—Galu. 20:20, 21, 24; 2 Kori. 4:1, 7.

³ Ia Lotofaafetai i lo Tatou Faaeaga Tautele: O se tasi o auala e faaalia ai lo tatou lotofaafetai mo le faaeaga o le talaʻi, o le uaʻi atu lea i le tulaga o loo iai la tatou auaunaga. Po o tatou faaalu se taimi ma taumafaiga e sauniunia ai se taulimaga e pāʻia ai loto o ē o loo tatou talaʻi atu i ai? Pe e iai se mea e tatou te fai, e faaleleia ai lo tatou tomai i le faaaogāina o mau ma fefulifulisaʻiga ma tagata? Po o māeʻa lelei ona galueaʻiina la tatou oganuu? Pe e tatou te iloa amata ma faafoe se suʻesuʻega faale-Tusi Paia? I le pei o Kerisiano faamaoni i aso ua mavae ma aso nei, ua uunaʻia i tatou ia iai se vaaiga saʻo i lenei galuega ma ia tatou faapelepele i lo tatou faaeaga ua iai.—Mata. 25:14-23.

⁴ Pe afai o loo tatou feagai ma āuga o le tagata matua, lē lelei le soifua mālōlōina, po o isi lava tulaga faigatā, e matuā faamāfanafanaina lava le iloa faapea, o a tatou taumafaiga maelega ina ia auai i le faiva e mautinoa le matuā faatāuaina lava. Ua faamautinoa mai e le Afioga a le Atua e tāua iā Ieova na taumafaiga i le auaunaga iā te ia, e ui lava o na taumafaiga e lē o mātauina ma mataʻina i isi.—Luka 21:1-4.

⁵ O le talaʻia o le Malo o le puna o le loto malie. Na faapea le tala a se tuafafine matua e 92 tausaga: “Maʻeu se faaeaga o le toe tepa atu i le silia i le 80 tausaga o le auaunaga i le Atua—e leai se mea faapea na faanoanoa ai! Ana fai e mafai ona ou te toe foʻi i tua e amata mai loʻu olaga, o le mea moni ou te toe filifili e ola i le olaga lava lea e tasi, ona o le ‘⁠alofa o le Atua e sili ona lelei i le ola.’ ” (Sala. 63:3) Seʻi o tatou faatāuaina lenei faaeaga tāua mai le Atua—o le talaʻia o le Malo.

Vaega 12—Faia o Suʻesuʻega Faale-Tusi Paia e Agaʻigaʻi i Luma

Fesoasoani i Tagata Aʻoga e Amata ma Faafoe Suʻesuʻega Faale-Tusi Paia

¹ Pe a amata ona auai a tatou tagata aʻoga o le Tusi Paia i le faiva i le fanua, e ono matamumuli pe a mafaufau e amata ma faafoe ni a latou lava suʻesuʻega faale-Tusi Paia. E faafefea ona tatou fesoasoani iā i latou e ati aʻe se uiga mautinoa i lenei vala tāua o la tatou faiva?—Mata. 24:14; 28:19, 20.

² O le taimi lava e agavaa ai se tagata aʻoga o le Tusi Paia e avea ma tagata talaʻi e leʻi papatisoina, o le taimi lea ua uma ona tusia lona igoa i le Aʻoga o le Faiva Faatiokarate. O le toleniga lea ua ia maua i le saunia ma le faia o lauga i le aʻoga, o le a fesoasoani iā te ia e ati aʻe ai tomai e manaʻomia e se tagata “o lē faigaluega e leai se mea e mā ai, na te talaʻitonuina le upu moni.”—2 Timo. 2:15.

³ Aʻoaʻo Atu e Ala i Lau Faaaʻoaʻoga: Na toleni e Iesu ona soo e ala i le avatu o faatonuga manino ma faataatia se faaaʻoaʻoga lelei. Na ia fetalai: “A ua taʻitasi ma faapei o lona aʻoaʻo o ē ua atoatoa ona aʻoaʻoina.” (Luka 6:40) O lou faaaʻoaʻo iā Iesu i le faataatia o se faaaʻoaʻoga lelei i lau lava faiva e matuā tāua tele. A o mātauina e lau tagata aʻoga lau faaaʻoaʻoga i le faiva, o le a ia malamalama ai, o le sini i le faia o toe asiga o le amataina lea o suʻesuʻega faale-Tusi Paia.

⁴ Faamatala i le tagata aʻoga, pe a tatou ofoina atu se suʻesuʻega faale-Tusi Paia i se tagata o le aiga, e lē tau faamatala auʻiliʻilia fua i ai le faatulagaga mo le faia o suʻesuʻega. E masani lava ona lelei le tau ina faataʻitaʻi le auala e fai ai le suʻesuʻega i le faaaogā o se palakalafa se tasi pe lua mai se lomiga e fai ai suʻesuʻega. O fautuaga aogā i le faia o lenā mea, o loo maua i le itulau e 6 o le faiva lenei ma le itulau e 6 o La Tatou Faiva o le Malo o Ianuari 2002.

⁵ Pe a talafeagai, ia valaaulia le tagata aʻoga e te lua ō faatasi, po o le ō foʻi ma se isi tagata talaʻi tomai i isi suʻesuʻega faale-Tusi Paia. E mafai ona fai sona sao i se palakalafa po o se mau autū o loo iai. O lea la, e ala i mea na te mātauina, o le a aʻoaʻoina ai e le tagata aʻoga le tele o mea e faatatau i le faia o suʻesuʻega faale-Tusi Paia e agaʻigaʻi i luma. (Faata. 27:17; 2 Timo. 2:2) Ia faamālō atu iā te ia, ma talanoa i le auala e faaleleia atili ai.

⁶ O le toleniina o tagata talaʻi fou e avea ma faiaʻoga o le Afioga a le Atua, o le a aʻotauina ai i latou i “galuega lelei” o le amata ma faafoe a latou lava suʻesuʻega. (2 Timo. 3:17) Maʻeu le faamalieina ai i le galulue soosootauʻau ma i latou i le faalautele atu o le valaaulia alofa: ‘O lē manaʻo i ai, inā ave fua ia le vai o le ola’!—Faaa. 22:17.