Amataina o Suʻesuʻega Faale-Tusi Paia i ni Talanoaga Pupuu Faapea ma le Telefoni

1, 2. E faafefea ona tatou fetuunaʻi la tatou polokalame o le faia o suʻesuʻega faale-Tusi Paia ina ia fesoasoani i tagata e pisi o latou olaga?

¹ E ese le pisi o tagata i aso nei. Ae peitaʻi, e toʻatele lava e fiafia i mea faaleagaga. E faapefea ona tatou fesoasoani iā i latou e faamalieina o latou manaʻoga faaleagaga? (Mata. 5:3) E toʻatele tagata talaʻi ua mafai ona suʻesuʻe le Tusi Paia ma tagata i le faia o ni talanoaga pupuu, po o le telefoni foʻi. Pe e mafai ona e faalautele atu lau faiva i lenei auala?

² Ina ia amata suʻesuʻega faale-Tusi Paia, e manaʻomia ona tatou sauniuni e faataʻitaʻi se suʻesuʻega faale-Tusi Paia po o fea lava e tulaʻi mai ai le avanoa. E faafefea ma o fea e mafai ona fai ai?

3. Aiseā e faataʻitaʻi ai se suʻesuʻega faale-Tusi Paia i lau uluaʻi asiasiga, ma e faapefea ona faia lea tulaga?

³ Suʻesuʻega Pupuu: Pe a e feiloaʻi atu i se tagata e naunau e talanoa i le Tusi Paia, ona suʻe lea i se palakalafa na e muaʻi saunia, e pei o le palakalafa muamua o le lesona muamua i le polosiua o le Manaomia ma amata le talanoaga. Faitau le palakalafa, talanoaina le fesili, ona talanoa lea o se mau faasino se tasi pe lua. E mafai lava ona fai ni talanoaga pupuu i le lima i le sefulu minute. Afai e fiafia le tagata i le talanoaga, ona fai lea o se fuafuaga e toe talanoaina le isi palakalafa e tasi pe lua i se isi taimi.—O isi fautuaga i le faaaogāina o le faafeiloaʻiga tuusaʻo e amata ai se suʻesuʻega faale-Tusi Paia o loo maua i La Tatou Faiva o le Malo, Ianuari 2002 itu. 6.

4. E faapefea ona tatou amata se suʻesuʻega puupuu faale-Tusi Paia a o faia toe asiga?

⁴ O le auala foʻi lenā e amata ai suʻesuʻega faale-Tusi Paia pe a faia ni toe asiga. Mo se faataʻitaʻiga, e te ono faailoa atu le polosiua o le Manaomia ma faamatilatila le suafa o le Atua, i le faaaogāina o le lesona e 2, palakalafa 1-2. I le isi asiasiga, lua te ono talanoaina ai le mea ua faaalia e le Tusi Paia e faatatau i uiga o Ieova, i le faaaogāina o le palakalafa e 3-4. I le talanoaga o loo sosoo ai, lua te ono talanoaina le palakalafa e 5-6 ma le ata i le itulau e 5 e faamanino ai le auala e fesoasoani ai le suʻesuʻeina o le Tusi Paia iā i tatou ia iloa lelei Ieova. O nei mea uma e fai i sina taimi puupuu.

5, 6. (a) Aiseā e sili atu ai i nisi tagata ona suʻesuʻe le Tusi Paia e ala i le telefoni? (e) O le ā se faafeiloaʻiga tatou te faaaogā pe a ofo atu se suʻesuʻega e faaaogā ai le telefoni?

⁵ E Ala i le Telefoni: O isi e sili atu iā i latou le suʻesuʻe o le Tusi Paia e ala i le telefoni na i lo le suʻesuʻe faafesagaʻi ma se tagata. Seʻi mātau mai mea nei na tutupu: A o talaʻi se tuafafine mai lea fale i lea fale, na feiloaʻi ai i se tamaʻitaʻi talavou e fai sana fanau, ma e pisi tele i lana galuega. Ina ua lē toe mafai ona maua atu o ia e le tuafafine i le aiga, ona telefoni atu lea iā te ia. Na taʻua e le tamaʻitaʻi talavou faapea, e matuā leai lava se taimi e talanoa ai i le Tusi Paia. Na faapea atu le tuafafine: “E mafai ona e aʻoaʻoina se mea fou i le na o le 10 i le 15 minute, e tusa lava pe faia i le telefoni.” Na tali atu le tamaʻitaʻi talavou afai e fai i le telefoni, e lelei atu lenā. E leʻi umi, ae amata loa se suʻesuʻega e lē aunoa i luga o le telefoni.

⁶ Pe e fiafia nisi o loo tou asiasi atu i ai e suʻesuʻe e ala i le faaaogāina o le telefoni? E mafai ona e faataʻitaʻi le faafeiloaʻiga lea na faatoʻā taʻua, pe na ona e faapea atu foʻi: “Afai e te manaʻo i ai, e mafai ona ta talanoaina le Tusi Paia e ala i le telefoni. Pe e lelei atu lenā iā te oe?” O le fetuutuunaʻi atu o la tatou polokalame o le faia o suʻesuʻega faale-Tusi Paia ia talafeagai ma tulaga o isi, e tatou te ono fesoasoani ai iā i latou ina ia “maua ai le poto i le Atua.”—Faata. 2:5; 1 Kori. 9:23.

Le Tala e Fai Atu e Uiga i Mekasini

Le Olomatamata Aoku. 1

“E toʻatele tagata i aso nei o loo tauivi ma lagona faapea ua lē toe aogā. O le ā sou manatu i se mea e mafai ona fai e fesoasoani ai iā i latou? [Faatali mo se tali.] O loo talanoaina i le mekasini lenei, le auala e fesoasoani ai le Tusi Paia iā i latou na, ina ia maua le olioli moni.” Ia faamatilatila mau o loo tusi faasisipa olaola tetele i le mataupu, “E Aogā le Tusi Paia i Lou Mauaina o le Fiafia.”

Ala Mai! Iulai-Sete.

“E ui lava e ono sili atu ona lauiloa Iesu Keriso na i lo se isi lava tane na soifua mai, ae toʻatele o loo taumānatu po o ai moni lava Iesu. Pe e te silafia ea i ona aposetolo sa latou taumānatu po o ai o ia? [Faatali mo se tali. Ona faitau lea o le Mareko 4:41.] O loo iloiloina e lenei mekasini le mea ua fai mai ai le Tusi Paia e uiga i le tulaga moni o Iesu.”

Le Olomatamata Aoku. 15

“Pe a tuanaʻi atu se maliu na matuā faanoanoa ai, e toʻatele e taumānatu po o le ā e tupu pe a oti se tasi. Pe e te manatu e mafai ona maua se malamalamaga i le tulaga o le tagata oti? [Faatali mo se tali.] O loo faamatalaina i le mekasini lenei le mea ua fai mai ai le Tusi Paia e faatatau i le tulaga o le tagata oti. O loo talanoaina ai foʻi le folafolaga a le Tusi Paia i le toe faatutūina mai o i latou e pele iā i tatou ua maliliu.” Faitau le Ioane 5:28, 29.

Awake! Aoku. 22

“Pe e te silafia o tagata tafafao maimoa mai fafo e numera tasi i le lalolagi i le mauaina ai o galuega a tagata? [Faatali mo se tali.] O le faatupulaʻia o tagata tafafao maimoa mai fafo ua aumai ai aogā faapea ma faafitauli. O loo iloiloina i le mekasini lenei tulaga lelei faapea ma tulaga faalēlelei i pisinisi tau turisi. O loo ofo mai ai foʻi ma ni fautuaga lelei mo tagata femalagaaʻi mai lea atunuu i lea atunuu.”