Vaega 3—Faia o Suʻesuʻega Faale-Tusi Paia e Agaʻigaʻi i Luma

Faaaogāina ma le Uigā o Mau

1. Aiseā tatou te faamamafaina ai Mau pe a faia suʻesuʻega faale-Tusi Paia?

¹ O lo tatou sini i le faia o suʻesuʻega faale-Tusi Paia, o le ‘faia o soo’ e ala i le fesoasoani atu i tagata ina ia malamalama ma talia aʻoaʻoga a le Afioga a le Atua ma faatatauina i o latou olaga. (Mata. 28:19, 20; 1 Tesa. 2:13) O lea la, e ao ona taulaʻi atu i le Tusi Paia le faia o le suʻesuʻega. Muamua lava, e lelei ona faaali i le tagata aʻoga le auala e suʻe ai ni mau patino i a latou lava Tusi Paia. E faapefea la ona tatou faaaogā le Tusi Paia e fesoasoani ai iā i latou na ia agaʻigaʻi i luma faaleagaga?

2. E faapefea ona tatou filifili po o fea mau o le Tusi Paia e faitau ma talanoaina?

² Filifili Mau e Faitau: I lau sauniuniga, ia iloa pe faapefea i mau faasino taʻitasi o le lesona ona fesootaʻi atu i le manatu o loo talanoaina, ma filifili po o fea mau e suʻe ma talanoaina i le suʻesuʻega. O le tulaga masani, e lelei ona faitauina mau na e faaalia ai le faavae faale-Tusi Paia o o tatou talitonuga. O mau ia e maua atili ai nisi faamatalaga, e ono lē manaʻomia ona faitau. Ia teu i le mafaufau manaʻoga ma tulaga o tagata aʻoga taʻitoʻatasi.

3. O le ā le aogā o le faia o fesili, ma e faapefea ona tatou faia lenā mea?

³ Faaaogā Fesili: Na i lo le faamatala atu o le mau i le tagata aʻoga, ia tuu atu iā te ia e faamatala mai iā te oe. E mafai ona e uunaʻia o ia e faia faapea, i lou muaʻi faaaogā ma le tomai o fesili. Afai e manino mai le faatatauina o se mau, e te ono fesili i ai pe faapefea ona lagolagoina e le mau mea o loo taʻua i le palakalafa. I nisi o tulaga, e manaʻomia ai ni fesili patino po o le auauaʻi ona fai atu fesili ina ia tataʻi ai le tagata aʻoga i se faaiʻuga saʻo. Pe afai e manaʻomia atili nisi faamalamalamaga, e mafai ona fai pe a māeʻa ona fai mai se manatu o le tagata aʻoga.

4. O le ā le tele o mea e manaʻomia ona faamatala atu i mau o loo tatou faitauina?

⁴ Ia Faafaigofie: O se tagata fanafana ū tomai, e masani ona tasi lava le ū e na te manaʻomia e fana ai le mea o loo taulaʻi atu i ai. I se tulaga tutusa, o se faiaʻoga tomai e na te lē manaʻomia ni upu se tele ina ia faamamafa ai le manatu. E na te faamatalaina atu faamatalaga i se tulaga e faigofie, malamalama lelei, ma saʻo. I nisi o taimi, e manaʻomia ai ona faia ni saʻiliʻiliga loloto i lomiga faa-Kerisiano ina ia malamalama ai i se mau ma saʻo le faamatalaina. (2 Timo. 2:15) Ae ia ʻalofia le taumafai e faamatala vala uma o mau taʻitasi i le suʻesuʻega. Ia faaaofia na o ni faamatalaga e manaʻomia ina ia maua ai le manatu o loo talanoaina.

5, 6. E faapefea ona tatou fesoasoani i tagata aʻoga e faatatauina le Afioga a le Atua i o latou olaga, ae o le ā e tatau ona tatou ʻalofia?

⁵ Ia Fai ni Faatatauga Aogā: Pe a talafeagai, ia fesoasoani i le tagata aʻoga e iloa pe faapefea ona aogā iā te ia mau o le Tusi Paia. Mo se faataʻitaʻiga, pe a talanoaina le Eperu 10:24, 25 ma se tagata aʻoga e leʻi auai lava i se sauniga faa-Kerisiano, e te ono talanoaina se tasi o sauniga ma valaaulia o ia e auai. Ae ia ʻalofia le faamalosia o ia. Ia tuu atu i le Afioga a le Atua e uunaʻia o ia e fai ni gaoioiga e manaʻomia e faafiafia ai Ieova.—Epe. 4:12.

⁶ A o tatou usitaia le faatonuga o le faia o soo, seʻi o tatou “usiusitai i le faatuatua” e ala i lo tatou faaaogāina ma le uigā o Mau o le Tusi Paia.—Roma 16:26.

Le Tala e Fai Atu e Uiga i Mekasini

Le Olomatamata Nove. 1

“E toʻatele tagata ua leai se faatuatuaina o le tomai o taʻitaʻi faaletagata e foʻia ai faalētonu o loo iai i aso nei. Pe e te manatu e iai se tasi e mafai ona faataunuuina mea o loo aumaia i fuaiupu nei? [Faitau le Salamo 72:7, 12, 16. Ona faatali lea mo se tali.] O loo faamatalaina i lenei mekasini po o ai le taʻitaʻi lea na muaʻi valoia mai ma mea o le a ia faataunuuina.”

Awake! Nove. 8

“E manaʻomia e fanau se taʻitaʻiga e faafetaiaʻia ai omiga o loo latou feagai i aso nei, pe e te lē ioe ea i lenā manatu? [Faatali mo se tali. Ona faitau lea o le Efeso 6:4.] O loo iloiloina i lenei mekasini le uiga moni o le aʻoaʻiga. O loo faamatalaina ai foʻi le auala e saunia ai e mātua taʻiala ma faasaʻoga e aunoa ma le faalotovaivaia ai o a latou fanau.”

Le Olomatamata Nove. 15

“O le toʻatele o tagata e mananaʻo ia maua le soifua mālōlōina ma faafualoa le soifua. Ae afai e mafai, pe e te manaʻo e soifua pea e faavavau? [Faatali mo se tali. Ona faitau lea o le Ioane 17:3.] O loo talanoaina i lenei mekasini folafolaga a le Tusi Paia i le ola e faavavau. O loo iloiloina ai foʻi le tulaga o le a iai le olaga pe a faataunuuina lenā folafolaga.”

Awake! Nove. 22

“I tausaga e 20 ua tuanaʻi, ua tele se agaʻigaʻi i luma i le malamalama ma le auala e togafitia ai le AIDS. Ae peitaʻi, e toʻatele lava tagata o loo talasesēina. [Faaali i ai le pusa “Myths About AIDS,” ona faatali lea mo se faamatalaga e fai mai.] O loo talanoaina i lenei mekasini le auala e puipuia ai e mātua a latou fanau mai lea gasegase.” Faitau le Teuteronome 6:6, 7.