‘Tausia i Upu o le Faatuatua’

¹ E manaʻomia ona finafinau ina ia faaalia le amioatua. (1 Timo. 4:7-10) Pe a fai i lo tatou lava malosi, e lē umi ae tatou vaivai ma tautevateva ai. (Isa. 40:29-31) O se tasi o auala e tatou te maua ai le malosi mai iā Ieova, o le ‘tausia i upu o le faatuatua.’—1 Timo. 4:6.

² E Anoanoaʻi Taumafa Faaleagaga: Ua saunia e Ieova le anoanoaʻi o taumafa faaleagaga, e ala i lana Afioga ma “le auauna faamaoni ma le mafaufau.” (Mata. 24:45) Po o tatou faaaogāina na taumafa faaleagaga? Po o tatou faitau ea i le Tusi Paia i aso taʻitasi? Po o faatulaga se taimi maʻoti mo suʻesuʻega a le tagata lava ia ma mafaufau loloto i ai? (Sala. 1:2, 3) O na taumafa lelei faaleagaga e faamalosia ma puipuia ai i tatou mai āuga leaga o le lalolagi a Satani. (1 Ioa. 5:19) A taulaʻi o tatou mafaufau i mea lelei ma faatatau i o tatou olaga, o le a faatasi Ieova ma i tatou.—Fili. 4:8, 9.

³ E faamalosia foʻi i tatou e Ieova e ala i sauniga a le faapotopotoga. (Epe. 10:24, 25) O faatonuga faaleagaga ma aumea lelei o loo iai, e faamalosia ai i tatou ia tumau e ui i puapuaga. (1 Pete. 5:9, 10) Na faapea mai se talavou Kerisiano: “Ou te alu i le aʻoga i le aso atoa, ma e lagona ai lava le lotovaivai. A o sauniga, ua pei o se lafitaga i le toafa, lea e faafouina ai aʻu ina ia ou fesagaʻia le aʻoga i le isi aso.” Maʻeu le faamanuiaina o i tatou pe a taumafai e auai i sauniga!

⁴ Folafola Atu le Upu Moni: Sa avea le talaʻiga e pei o se meataumafa iā Iesu. Sa ia maua ai le malosi. (Ioa. 4:32-34) E faapena foʻi pe a tatou talanoa atu i isi i folafolaga mataʻina a le Atua, e faafouina ai i tatou. O le toʻaʻaga e talaʻi, e taulaʻi atu ai pea o tatou loto ma mafaufau i le Malo, ma faamanuiaga e lē o toe mamao ae oo mai. E mautinoa e faafouina ai i tatou.—Mata. 11:28-30.

⁵ Maʻeu le faamanuiaina o i tatou ona o le anoanoaʻi o taumafa faaleagaga ua saunia e Ieova mo ona tagata i aso nei! Ia faaauau ona tatou alalaga fiafia i ona viiga.—Isa. 65:13, 14.

Vaega 5—Faia o Suʻesuʻega Faale-Tusi Paia e Agaʻigaʻi i Luma

Ia Fuafua le Telē o le Mataupu e Talanoaina

¹ A o aʻoaʻo atu Iesu, sa ia malamalama i mea e gafatia e ona soo ma fetalai iā i latou “e faatatau i mea ua mafai ona latou lagona.” (Mare. 4:33; Ioa. 16:12) E ao foʻi i faiaʻoga o le Afioga a le Atua i aso nei, ona fuafua le telē o le mataupu e mafai ona fai i le suʻesuʻega faale-Tusi Paia. O le telē o le mataupu e talanoaina, e fua i le tomai ma le tulaga o le faiaʻoga ma le tagata aʻoga.

² Ia Faamalosia le Faatuatua: O isi tagata aʻoga e ono manaʻomia ni lesona se lua pe tolu e malamalama ai i se mataupu lea e tasi le lesona e fai ae malamalama i ai isi tagata aʻoga. E sili atu ona tāua le fesoasoani i le tagata aʻoga ia malamalama lelei i le mataupu, na i lo le telē o le mataupu e suʻesuʻe i se taimi puupuu. E tatau ona mautū le faavae o le faatuatuaga o le tagata aʻoga fou i le Afioga a le Atua.—Faata. 4:7; Roma 12:2.

³ A o fai le suʻesuʻega i vaiaso taʻitasi, ia faamautinoa ua malamalama lelei le tagata aʻoga ma talia mea ua ia aʻoaʻoina mai le Afioga a le Atua. Ia ʻalofia le faatopelau ona fai, lea e lē maua ai e le tagata aʻoga aogā mai upu moni ua aʻoaʻoina. Ia lava le taimi e taulaʻi atu ai i manatu tāua ma ia iloiloina mau autū ia e faavae aʻe ai mea ua aʻoaʻoina.—2 Timo. 3:16, 17.

⁴ Aua Neʻi See Ese Mai le Suʻesuʻega: A o tatou taumafai e ʻalofia le faatopelau o le suʻesuʻega, e tatou te mananaʻo foʻi e ʻalofia le see ese mai le suʻesuʻega. Afai e manaʻo le tagata aʻoga e talanoa umi i se mea e patino lava iā te ia, e ono manaʻomia ona talanoaina lea mea pe a uma le suʻesuʻega.—Fai. 3:1.

⁵ O le isi itu, o lo tatou naunau i le upu moni e faigatā ai iā i tatou ona faaitiiti la tatou talanoa i le taimi o le suʻesuʻega. (Sala. 145:6, 7) O se manatu faaopoopo po o se mea na tupu, e mafai ona aogā i le suʻesuʻega, ae e tatou te lē mananaʻo e tele se taimi e talanoa i na mea, ma faalavelavea ai le tagata aʻoga mai le iloa o aʻoaʻoga faavae a le Tusi Paia.

⁶ O le talanoaina o se vaega e talafeagai lona umī i lesona taʻitasi, e tatou te fesoasoani ai i tagata aʻoga o le Tusi Paia e ‘savavali ai i le malamalama o Ieova.’—Isa. 2:5.