Faamāfanafana i Ē Loto Momomo
1 Ua matuā manaʻomia i le taimi nei se faamāfanafanaga na i lo se isi lava taimi i le talafaasolopito o tagata. I le pei o lo tatou Tupu o Iesu Keriso, o loo tatou galulue foʻi e “fufusi i ē loto momomo.”—Isa. 61:1.
2 Auala e Faia Ai: E ao ona iloga la tatou talaʻiga i taulimaga e fetaui lelei ma aogā, ina ia faamāfanafana ai tagata. Ia tele lou talanoa i le faamoemoe faamāfanafana loto a le Atua, ae lē o mea leaga o loo tutupu i le lalolagi faapea ma a latou aʻoaʻoga sesē. E lē faapea o le a lē talanoa ai e faatatau iā Amaketo. O la tatou galuega, o le talaʻi lea o le “tausaga e talileleia mai ai e Ieova, ma le aso e taui ai ma sui e lo tatou Atua,” ma ia “apoapoaʻi atu i lē ua amio leaga ia liliu ese i lona ala leaga.” Ae e lē tatau ona faamamafa lo tatou talanoa iā Amaketo ma mea o le a iʻu i ai, ma lē iloa ai le tāua o le tala lelei o le Malo o le Atua.—Isa. 61:2; Eseki. 3:18; Mata. 24:14.
3 Mai Lea Fale i Lea Fale: E maua pea tagata o ē loto mafatia ona o maʻi, le maliu o se tasi e pele iā i latou, o faiga lē tonu ma faafitauli tau tamaoaiga. I le pei o Iesu, e tatou te “mutimuti alofa” ma tigā alofa iā i latou e feiloaʻi i ai i le galuega talaʻi. (Luka 7:13; Roma 12:15) E ao ona tatou “faataalise ona faalogologo” a o talanoa mai le tagata, e ui lava o loo e faasoa atu se mau se tasi pe lua foʻi e fetaui ma lo latou faafitauli. (Iako. 1:19) O le a tatou nofo sauni e avatu se faamāfanafanaga, pe a uma ona faalogologo lelei.
4 I se taimi talafeagai a o fai le talanoaga, e ono tatou faapea atu, “Ou te fia taʻu atu iā te oe se faalaeiauga mai le Tusi Paia.” E manaʻomia le magafagafa ina ia aua neʻi teena manatu sesē uma o loo fai mai ai le tagata. Ae ao ona tatou taulaʻi i le avatuina o se faamāfanafanaga e ala i le faaaogā o mau faale-Tusi Paia e faamalosia ai le loto. Atonu e lelei ona e avatu le sāvali Faamāfanafanaga mo Ē Loto Mafatia i le tagata o le fale, ma talanoa i faalaeiauga o loo iai.
5 Faaaogā Avanoa e Faamāfanafana ai i Isi: Po o e iloa sou tuaoi, se uō i le galuega ma le aʻoga, po o se tauaiga o loo manaʻomia se faamāfanafanaga? Aiseā e te lē taumafai ai e asiasi iā i latou na, ina ia e avatu se faamāfanafanaga mai le Tusi Paia? O lou iloa o le māfuaaga e manaʻomia ai se faalaeiauga, e mafai ona e sauniuni ai mo lenā vala patino. O nisi ua latou tusia ni tusi pe telefoni atu foʻi ina ia faamāfanafana atu i isi. O le a uunaʻia i tatou e le alofa i tuaoi e faaalia le tigā alofa, ma avatu se faamāfanafanaga mai le Tusi Paia.—Luka 10:25-37.
6 O le mea moni, ua tofia i tatou e faamāfanafana i ē faavauvau, faalaeiau i ē faanoanoa, ma taʻu atu le faamoemoe mo se lumanaʻi matagofie. O le faamāfanafanaga lenā o loo manaʻomia e tagata i le lalolagi. O le talatalanoa fiafia i le tele o mea lelei ua folafola mai e le Atua, o le a faamāfanafanaina ma maua ai le faamoemoe mo ē loto mafatia. Seʻi tau ina tatou manatua pea le manaʻoga e fufusi i ē loto momomo.