Le Auala e Sauniuni ai se Taulimaga o se Mekasini

1. Aiseā e sili ai ona lelei le sauni o se taulimaga o se mekasini a le tagata lava ia na i lo le taumafai e tauloto se faataʻitaʻiga o loo maua mai i La Tatou Faiva o le Malo?

¹ E te ono taumānatu faapea, ‘Aiseā e ao ai fua ona tatou sauniuni ni taulimaga o mekasini, ona o loo maua taulimaga i lomiga taʻitasi o La Tatou Faiva o le Malo?’ E ui e toʻatele e aogā i ai nei taulimaga faataʻitaʻi, e manaʻomia sauniuniga a le tagata lava ia. O se taulimaga e aogā i se tasi oganuu atonu e lē aogā i se isi oganuu. O le mea lea e lē tatau ona tatou manatu faapea, e ao lava ona ofo atu mekasini i le auala o loo faaupu mai ai i taulimaga faataʻitaʻi. E tusa foʻi pe tatou te filifili e faaaogā se taulimaga faataʻitaʻi, e sili atu ona lelei le fai iā tatou lava upu.

2. O le ā e aofia ai i le filifilia o se mataupu e te faatomua?

² Filifili se Mataupu: Pe a uma ona e faitauina le mekasini, ona filifili lea o se mataupu e te fiafia i ai ma talafeagai i lau oganuu. O lou talitonu, atoa ai ma lou maumauaʻi a o e faamatala atu le mataupu e ono uunaʻia ai le tagata o le aiga e manaʻo e faitau i ai. E ui o le a e faamatilatilaina se mataupu o loo fetaui mo le toʻatele i le oganuu, e ao foʻi ona e faamasani i isi mataupu o loo i le mekasini. O le faia faapea e faigofie ai ona fetuunaʻi lau taulimaga pe a e feiloaʻi i se tagata e sili atu ona fiafia i se isi mataupu.

3. O le ā le ituaiga faatomuaga e sili ona lelei e te faaaogā?

³ Fai se Fesili: Ia sosoo ai, ma le sauniuni lelei o lau faatomuaga. E tāua tele lau faatomuaga. E ono fesoasoani le fai o se fesili faatupu manatu i le tagata o le aiga ina ia faagaee ai lona naunau i le mataupu lea ua e filifili e faamatilatila. E aogā tele fesili e faaali mai ai manatu. ʻAlofia le faia o fesili tauluʻiluʻi ma ono faapogaia ai le tagata o le aiga e tali mai e puipui ona manatu.

4. O ā ni aogā o le faitau o se mau i le tagata o le aiga, pe a talafeagai ma le tulaga o le tagata?

⁴ Ia Faitau se Mau: O le mea mulimuli, filifili se mau e te faitau pe a talafeagai ma le tulaga o le tagata e ona le fale, atonu o se mau o iai i le mataupu. O le faitau o se mau o le a fesoasoani ai i le tagata o le aiga e iloa faapea, o la tatou feʻau e mai le Afioga a le Atua. (1 Tesa. 2:13) O le a mafai foʻi ona avatu e le Tusi Paia se molimau e tusa lava pe na te lē talia mekasini. O nisi e latou te faagaee le naunau o le tagata o le aiga e ala i le faitau o se mau a o leʻi fai atu se fesili patino. E te ono faatomua se mau i le faapea atu, “Ou te fia iloa sou finagalo i le manatu o loo taʻua i le mau lenei o le Tusi Paia.” Ona faasino lea o le tagata i se manatu e fesootaʻi i ai o loo i le mekasini, ma fai se faamatalaga puupuu e faagaee atili ai lona fiafia a o leʻi ofoina i ai mekasini.

5. O ā taʻiala masani e te mafaufau i ai a o sauniuni au taulimaga o mekasini?

⁵ E leai ni tulafono maumaututū i le auala e ofo ai mekasini. O le tulaga masani, e sili atu pe a faafaigofie ma faapuupuu le taulimaga. Faaaogā le taulimaga e faigofie iā te oe ma maua ai ni iʻuga lelei. Ia taulaʻi atu faamatalaga i le tāua o manatu o loo i le mekasini, ma ia ola lau taulimaga. A lelei ona e sauniuni, e sili atu lou taulau manuia i le ofoina o le Olomatamata ma le Ala Mai! iā i latou “ua saunia i le ola e faavauvau.”—Galu. 13:48.

Le Tala e Fai Atu e Uiga i Mekasini

Le Olomatamata Nove. 15

“Ona o le tele o faiga piʻopiʻo i le lalolagi, ua taumānatu ai nisi e faapea, ‘Aiseā ou te saga tauivi malosi ai e fai le mea ua tonu?’ Pe na iai se taimi na oo ai iā te oe lagona faapena? [Faatali mo se tali.] Seʻi mātau mai upu faalaeiau nei. [Faitau le Faataoto 2:21, 22.] O loo faamatalaina i le mekasini lenei le māfuaaga tāua o le faia o le mea ua tonu.”

Ala Mai! Oke.-Tese.

“Pe na e taumānatu pe aiseā ua tatou ola matutua ai ae meaanē, o loo iai i le tino le malosi e faaleleia ma faafou ai e sela i latou lava? [Faatali mo se tali. Ona faitau lea o le Salamo 139:14.] O loo faamatalaina i le mekasini lenei le māfuaaga ua tatou ola matutua ai, atoa ma le taimi o le a ola ai le tagata e lē mo ni nai tausaga, ae o le a ola e faavavau.” Itu. 3-9.

Le Olomatamata Tese. 1

“Pe e te manatu ua faataunuuina i aso nei le valoaga lenei a le Tusi Paia? [Faitau le Mataio 24:11. Ona faatali lea mo se tali.] O loo talanoaina i le mekasini lenei nisi o aʻoaʻoga o loo taatele i aso nei. O loo faaalia ai foʻi le auala e tatou te ʻalofia ai le faasesēina e aʻoaʻo pepelo.”

Ala Mai! Oke.-Tese.

“E eseese manatu o tagata i le māfuaaga ua oo mai ai le agasala i le lalolagi, ae o le ā sou taofi e faatatau i lea mataupu? [Faatali mo se tali. Faitau le Roma 5:12.] O loo talanoaina i le mataupu lenei le māfuaaga o le oo mai o le agasala i le tagata, ma le auala o le a aveesea ai le agasala ma ona aafiaga uma.” Itu. 10-11.