O le Tusi Paia o le Lalolagi Fou i le Gagana Samoa
1 O se fiafiaga mo i tatou uma le mauaina O le Tusi Paia o le Lalolagi Fou o Tusitusiga Eleni i le gagana Samoa i la tatou Tauaofiaga Itumalo talu ai nei. (Iako. 1:17) E mautinoa lava ua toʻatele le ʻautalaʻi ua amata faaaogāina lenei Tusi Paia i a latou faitauga Tusi Paia i aso taʻitasi.
2 O le ā le auala e tatou te maua ai ni aogā se tele mai lenei Tusi Paia i a tatou suʻesuʻega totino, faapea ma le talaʻiga? E ao ona tatou faamasani i ona vaega eseese. I le itulau e 6, o loo iai se lisi o upu ua faapupuu o tusi faasino o loo faaaogā i le Tusi Paia. O nisi taimi e faasino i faamatalaga pito i lalo, ma faamatalaga faaopoopo. E tāua ona tatou faamasani i nei vaega, ina ia faateleina lo tatou talisapaia o faamatalaga faaopoopo o upu faigatā o le Tusi Paia.
3 Faigofie ona Faitau: Na matuā iloiloina lelei le gagana a tagata lautele, ina ia faaaogā faaupuga e malamalama i ai tagata Samoa i aso nei. Na viiviia e Iesu lona Tamā ona o le faaalia o le upu moni i “tamaiti.” (Mata. 11:25) Na taʻua e le aposetolo o Paulo e faapea, ‘e lē toʻatele ē e popoto i la le tino, e lē toʻatele foʻi ni tamālii na valaauina.’ O le mea lenā na faaaogā ai e Iesu ma Paulo, ma isi aʻoaʻo i le uluaʻi senituri ia gagana e faigofie ma malamalamagofie. E latou te lē faaaogāina ni “upu faigatā” lea e lē malamalama i ai tagata.—1 Kori. 1:26; 2:1.
4 Na tusia Tusitusiga Eleni i le gagana a tagata lautele i Eleni, ae lē o le gagana Eleni na faaaogā e ē popoto i le uluaʻi senituri. E ui ina manatu faatauvaa nisi i le gagana na faaaogā, ae na aogā tele i le folafolaina atu o le tala lelei i le toʻatele. O lea la, ua matou mautinoa, o le a outou maua aogā faatasi ai ma ē talavou, i le faitauina o lenei Tusi Paia fou i le gagana Samoa.
This article is unique to Samoa.