Se Tusi Mai le Vaega Pule

I Molimau a Ieova Peleina:

Sa faaaogā e le aposetolo o Paulo so o se avanoa e faaalia ai lona alofa ma lona talisapaia o ana aumea talitonu. O lana tusi atu lenei i Kerisiano i Roma: “E muamua lava ona ou faafetai i loʻu Atua e ala iā Iesu Keriso ona o outou, auā ua taʻua lo outou faatuatua i le lalolagi atoa.” (Roma 1:8) Ioe i le Emepaea atoa o Roma, sa lauiloa ai na Kerisiano i lo latou faatuatua malosi, atoa ai ma lo latou maelega i le galuega talaʻi. (1 Tesa. 1:8) E lētioa ona pele iā Paulo ona uso!

I le pei o Paulo, matou te faafetai iā Ieova i taimi uma matou te mafaufau atu ai iā te outou. Matou te alolofa tele mo outou uma! Ma e mautinoa foʻi le alofa o Ieova iā te outou taʻitoʻatasi. O nisi o outou o loo feagai ma ni teteega malolosi, ae o loo faaauau pea ona outou talaʻi. E mautinoa le faafiafiaina o le finagalo o Ieova i le agaga lototele lē fefe o loo outou faaalia!—Faata. 27:11.

Pe a outou faitauina ma manatunatu loloto i “Galuega a Molimau a Ieova i Aso Nei,” e faaoso naunau ma faamalosia ai le faatuatua e pei ona faamatalaina i le vaega lenei o le Year Book, (Tusi Tausaga) o le a outou mātauina ai faamaoniga manino o le agaʻi atu o le Alii o Iesu Keriso “ina ia manumalo, ma e oo ina manumalo aʻiaʻi” ma e so o se auupega e fai e faasagatau i soo o Keriso e lē taulau ia.—Faaa 6:2; Isa. 54:17.

O le tusi atu lenei a Paulo i Kerisiano i Filipi: “Ou te faafetai pea i loʻu Atua . . . ona o le fesoasoani ua outou faia i le tala lelei.” (Fili. 1:3-5) E faapena o matou lagona, i matou o le Vaega Pule mo outou. I le tausaga faaleauaunaga o le 2007, e 6,691,790 le ʻautalaʻi na latou faaaluina le 1,431,761,554 itula e talaʻia ai le tala lelei i atunuu e 236 i le lalolagi atoa. Maʻeu se taumafaiga tele sa outou faia i le faaauilumaina o le tala lelei! Seʻi manatu i le faitau selau afe o ola ua oo atu i ai le fesoasoani e ala i a tatou taumafaiga tuufaatasi, ma ua viia ai Ieova.

I se tasi taimi, na faaalia ai e Paulo lona matuā tigā alofa mo ona uso. Na ia tusi atu i ē na i Tesalonia e faapea: “I le silafaga a lo tatou Atua le Tamā, ua matou manatua ai pea . . . lo outou tumau ona o le faamoemoe i lo tatou Alii o Iesu Keriso.” (1 Tesa. 1:2, 3) Ioe, e iai pea faafitauli o le olaga. E iai pea faafitauli, peitaʻi e tāua ona tatou tumau. O ā ni luʻi o e fesagaʻia? Po ua e lotovaivai ea ona o se gasegase tugā ua tapulaa ai mea e mafai ona e fai i le auaunaga iā Ieova? Po ua avea ea si au paaga pele na iai mo le tele o tausaga e le fili sili e lē faamalieina, o le tuugamau lea? (Faata. 30:15, 16) Po o oe o se tasi ua lē o maua se paaga faaipoipo e tutusa o oulua alofa mo Ieova, ae peitaʻi o loo faaauau pea ona e usitaʻi faamaoni i le fautuaga mai le Tusi Paia ia faaipoipo tau lava o lē ua i le Alii? (1 Kori. 7:39) Po o e tauivi e tausia aʻe lau fanau a o feagai ai ma faafitauli tautupe? Po o le ā lava lou tulaga o iai, afai e te faamuamua manaʻoga o le Malo, e mafai ona e mautinoa o le a lē mafai e Ieova ona “faagalogalo . . . la outou galuega, ma lo outou naunau tele i lona suafa.” Faamolemole uso e, ma tuafāfine, “aua neʻi o tatou fiu e faia le mea lelei”!—Epe. 6:10; Kala. 6:9.

O le ā e mafai ai ona e tumau? E pei lava o Kerisiano i Tesalonia, ona o le “faamoemoe i lo tatou Alii o Iesu Keriso.” E iai la le māfuaaga tāua na faatusa ai e Paulo le “faamoemoe o le faaolataga” i se puloutau malosi e mafai ona puipuia se Kerisiano mai le lotovaivai ma masalosaloga faaumiumi.—1 Tesa. 5:8.

O le mea ia mautinoa, e ala i lo outou tumau ma le olioli, ua outou saunia ai se tali i le luʻi a Satani i le finauga e faatatau i le pule silisili ese i le aoao o mea. O loo finau mai Satani e faapea o auauna a le Atua e manatu faapito, e ui e foliga mai o loo latou naunau e auauna i le Atua mo sina taimi, ae afai e faateteleina tofotofoga po o le faaauau pea foʻi ona iai lenei faiga o mea nai lo le mea na latou manatu i ai, o le a mou atu lo latou aasa i le latou tapuaʻiga. Ua iā te outou se avanoa tutasi e faaalialia ai i lumāmea Satani o ia o le pepelo silisili! O le gasolo atu o aso, o lo tatou latalata atu foʻi lea i faataunuuga o lo tatou faamoemoe.

E pei lava ona faaaogā e Paulo avanoa e faamālō ai i ona uso ona o lo latou faatuatua malosi, le faia ma le loto o so latou sao i le galuega talaʻi, ma lo latou tumau, matou te faaaogā foʻi lenei avanoa e faamālō atu ai ma faamautinoa atu lo matou alolofa mo outou. Ia faaauau ai i le galuega lelei!

Tau ina ia faatumuina lenei tausaga i faamanuiaga mai le Atua. Talia mai o matou alofaaga mo outou, o i matou o

Outou uso,

Vaega Pule o Molimau a Ieova