Mea na Tutupu Mai le Tusitausaga 2010

Aitiope

O Arega, e nofo i se nuu maotua na manaʻo e kava le pito i totonu o le puipui o lona fale (wallpaper). E ui lava o nisi tagata o lona atunuu e latou te faaaogāina nusipepa e faia ai faapea, ae na manaʻo Arega e faaaogā se mea e lanu. A o iai i le maketi na ia iloa ai se tamāloa o ofo atu le polosiua Olioli i Le Ola i Le Lalolagi e Faavavau! Na ave e Arega se polosiua, ae nai lo le faitau i ai, na ia saesaeina itulau ma faapipii i le puipui o lona fale. Lua tausaga mulimuli ane ai, na ia mātauina ai i pepa ia na faapipii i le puipui o lona fale le faaupuga: “O Iesu o le Alo o le Atua.” E ese lenei mea mai le Tasitolu e lē mafai ona faamatalaina lea na aʻoaʻoina ai o ia. Ona ua faaosofia lona naunau fia iloa, na savali ai Arega mo le iva itula agaʻi i le taulaga na latalata ane e saʻili ai tagata ia o loo faapea mai e iai le Alo o le Atua. E leʻi manuia lana uluaʻi taumafaiga, ma toe foʻi ai i lona aiga ma le faanoanoa. Mulimuli ane, na ia toe taumafai atili, ma i le taimi lea, na faasino ai ia e tagata i le fale o le uso lea na ia maua mai ai le polosiua i le amataga. Sa tofotofoina atili le onosaʻi o Arega, ona e faitau itula o faatali a o leʻi taunuu ane le uso. E uma ane le talanoaga sa fai ua amata le suʻesuʻega faale-Tusi Paia. I isi masina mulimuli ane ai, sa faaauau pea ona malaga atu Arega i le taulaga lea ina ia aʻoaʻoina atili e faatatau i le Atua. Ina ua amata ona talanoa i tagata o lona nuu e faatatau i mea ua ia aʻoaʻoina, na matuā tetee le tele o tagata ma na ʻalofia o ia e le toʻatele. Ae e leʻi faavaivai ai Arega, ma na iʻu ina amata ona fiafia mai isi. Ina ua oo le aofaʻi o tagata fiafia i le 13, na tofia paeonia faapito e toʻalua e galulue i lea vaipanoa. E leʻi pine lava, ae oo atu le aofaʻi o a la suʻesuʻega faale-Tusi Paia i le 40, ma o le aofaʻi foʻi lenā o tagata ua auai mai i sauniga. E toʻa valu le ʻautalaʻi mai lava i le vaipanoa lenā o loo galulue maelega ai i inā i le taimi nei. Mo si o tatou uso fou la o Arega, e lē gata ina mananaia ata o loo faapipii i le puipui o lona fale, ae ua sili atu isi mea mananaia ua maua mai ai.

Mozambique

Iā Aokuso 2008, na paʻū mai ai se jacket i se taavale a o pasia luma o le fale faatauvaa e fai i palapala o se tuafafine mativa ua oti lana tane. Na aumai e le tuafafine le jacket ma maua ai i taga ni pepa tāua, o ni tamaʻi taga se tolu o loo iai ʻasoa taugatā, ma se tupe e latalata i le afe tālā. Sa taumafai le tuafafine i tagata o le nuu ina ia suʻe se telefoni e vili ai le numera sa iai i pepa sa maua i le ofu ina ia lipoti ai le ofu lea na ia maua. I le afiafi lava lenā, na taunuu ai se taavale i le nuu lea e ō mai ai ni tamāloloa e toʻa fā. Sa molimauina e taʻitaʻi o le nuu le toe faafoʻi atu e lo tatou tuafafine o le jacket i lē e ana, faatasi ai ma mea uma sa i le ofu. Na maligi loimata o le tamāloa ma faapea mai, ana maua e se isi tagata e ese mai i Molimau a Ieova, e itiiti lava se avanoa e toe maua mai ai ana mea na leiloa. E ui e lē tagolima si o tatou tuafafine, ae o lona faamaoni, na avatu ai se molimau i lona nuu, ma na matuā viiviia ai Ieova lo tatou Atua.

Fiti

O se alii talavou e suafa iā Viliame sa mataʻina le lelei o lana taalo lakapi ma sa faanaunau e taalo i le ʻau a lona atunuu. E iai lona uso e igoa iā Leone, sa naunau foʻi ia lelei lana taalo lakapi, ae ina ua uma ona ia talia se suʻesuʻega ma se paeonia faapito, na ia iloa ai e lē mafai ona ia auauna i ni matai e toʻalua. Na amata ona ia auai i sauniga ma ua lē toe lakapi foʻi. O lona tinā, o se Molimau, ma na ia faatau mai ni lavalava mo ia e faaaogā i sauniga. Ae na fai se taugāupu a Viliame ma Leone ona alu ai lea o Viliame ua saei uma lavalava sauniga o Leone. Sa matuā faanoanoa ai Leone, ae na filifili e lē toe tauimasui atu. I se taimi mulimuli ane, na tau ai le faatoʻaga meleni a Leone ma ave i le maketi e faatau. Na ia faaaogā se vaega tupe na maua ai e faatau ai ona lavalava sauniga, se Tusi Paia, peni ma ni peni lanu e faaaogā i sauniga. Na ia faatauina foʻi mea uma lava na mo Viliame. Na matuā ootia le loto o Viliame i le agalelei o lona uso pe a mafaufau i uiga lotovale na ia faaalia. Na ia faaaogāina ofu fou na faatau mai, ma na faateʻia lona uso ina ua alu atu i le sauniga. Na talia foʻi e Viliame se suʻesuʻega faale-Tusi Paia, ma na taufai agaʻigaʻi uma i luma faaleagaga lenei ʻauso. A o sauniuni atu mo lo la papatisoga, ae maua e Viliame se ofo e taalo lakapi ai i Europa mo se tupe telē lava, o se ofo o loo moe miti i ai le tele o tama talavou, auā e lē gata e tele tupe e maua ai ae o le viiga ma le mamalu. Peitaʻi, ua sui lona faanaunauga ua iai nei, nai lo le lakapi ua ia filifili e tuuina atu lona ola iā Ieova. O loo taufai auauna nei Viliame ma Leone o ni paeonia lagolago mo le uluaʻi ono masina talu mai lo la papatisoga. Ina ua mātauina faaaʻoaʻoga lelei a lana fanau, na talia ai foʻi e lo la tamā o Waisea se suʻesuʻega faale-Tusi Paia. E mataʻina ni suiga na faia e Waisea, ma na papatiso faatasi ma ona afafine e toʻalua i se aso faapitoa mo fonotaga.