Talaʻiga ma le Aʻoaʻo Atu i le Lalolagi Atoa Mai i le Tusi Tausaga 2010

Vaega 1

Itulau e 45 palakalafa 1:

Ghana.

Ona o le vave tele ona taatele telefoni feaveaʻi i Aferika, na faaupuina ai e tusa ua oo mai le “suiga tele i fesootaʻiga.” Ina ia faatosina tagata e iai telefoni, o le tele o kamupani e iai ni itula patino i le pō e mafai ona e talanoa fua ai i le telefoni. Sa faaaogā lelei e se tuafafine e suafa iā Grace lenei avanoa. Sa ia mātauina e lē faigofie ona fai le la suʻesuʻega ma lana tagata aʻoga e igoa iā Monica, ona o le pisi tele o Monica i le tele o mea e fai. Sa fai e Grace mea uma e mafai ona fai ina ia faaauau ai le suʻesuʻega, e oo lava i le faatulaga e alu i le fale o Monica i le 5:00 i le taeao. Peitaʻi na suia le faasologa a Monica, ma ua lē talafeagai ai foʻi le 5:00 i le taeao. Ona mafaufau loa le o Grace e faaaogā le fuafuaga lea e talanoa fua ai i pō i le telefoni. Na malie i ai Monica, ona fai lea o le fuafuaga e fai le suʻesuʻega i luga o le telefoni i le 4:00 i le vaveao. Sa la mātauina le toʻatele o tagata e faaaogāina laina i le taimi lea ma lē faigofie ai ona maua se fesootaʻiga lelei. Ona la fuafua lea e vave feala pe tusa o le 3 i le vaveao, e ui lava o se luʻitau lenei mea mo nei tinā e taufai faigaluega uma. Fai mai Grace: “Sa ou tatalo iā Ieova ma ole i ai mo le malosi ma le faanaunauga e faamalosi pea ina ia faatumauina le fiafia o laʻu tagata aʻoga. Sa seti le alarm o laʻu telefoni ma faamalosi e nofo i luga i le taimi e pei ona fuafuaina. E ui lava sa ou lagona le vaivai, e leʻi avea lenā ma mea ou te faavaivai ai.” Maʻeu le fiafia na iʻu i ai ona o lona faamalosi, ina ua ia auai ma molimauina le papatisoga o Monica i le Tauaofiaga Itumalo i le 2008 “Ia Taʻitaʻia e le Agaga o le Atua.” Na toe faaaogā foʻi mulimuli ane ai e Grace le fuafuaga lava lea o le talanoa fua i pō e fai ai se suʻesuʻega ma se fafine lea ua amata ona auai mai i sauniga.

Itulau e 56, palakalafa 2:

Filipaina.

I le nuu e taʻua o Zamboanga e iai le mauga aupito i maualuga i Filipaina, e mafai ona e iloa mamao atu le tumutumu o le mauga mai le mamao e 125 maila (200 km). O uso e nonofo latalata i le mauga e masani ona fai a latou tala tausua a o iai i le auaunaga i le fanua ma faapea ane: “O le ā la tatou mea e fai pe a iai se tagata fiafia e nofo i le tumutumu o le mauga?” I se tasi aso a o latou galulue i autafa o le mauga, na alu ane ai se tamāloa ma fai atu o loo ia saʻilia Molimau a Ieova. Na talosaga mai na te manaʻomia la latou fesoasoani i le suʻesuʻeina o le Tusi Paia. Ona fesili atu lea o uso po o fea e nofo ai. Ina ua faasino le lima o le tamāloa i le tumutumu o le mauga, na taufai gūgū uma le ʻauuso. Ae na atili ai ona gūgū ma tetemū ina ua faapea mai le tamāloa e lē o luga o le mauga e iai lona fale, ae o le isi itu o le mauga, ae na pau lava le auala e oo ai i lona fale o le aʻe lea i le tumutumu o le mauga ona ifo ai lea i lalo i le isi itu o loo iai lona fale. Ina ua uma sina taimi na faateʻia ma taumānatu ai uso, ona ioe atu loa lea ma latou ō loa ma le tamāloa. Na amata ai lava i inā le suʻesuʻega faale-Tusi Paia, ma ua auai nei le tamāloa i sauniga i le Maota mo Sauniga, e ui lava i le mamao o le mea e iai lona fale. Ua avea nei lenei tamāloa, e pei foʻi o le toʻatele o isi, ma vaega o tagata mai i nuu uma o loo gasolo i “le fale o Ieova i luga o tumutumu o atumauga.”—Isa. 2:2.

Itulau e 58, palakalafa 1:

Peretania.

O se paeonia sauatoa e suafa iā Kirsty sa ia aʻoaʻoina le gagana Falani ma le gagana Lingala ina ia mafai ai ona molimau atu i tagata Congolese i lana oganuu. I se tasi aso na ia vaaia ai se tinā Congolese o laʻu atu le tele o afīfī i luga o se pasi. Na talanoa atu i ai Kirsty i le gagana Lingala, ma fai i ai e fia fesoasoani atu e laʻu ana afīfī i le pasi. Na fesili mai le fafine, “Na faafefea ona e iloa le gagana Lingala, ae o oe o le palagi?” Na faamatala i ai e Kirsty o ia e auai i se faapotopotoga o Molimau a Ieova e tautatala i le gagana Lingala, ma na latou aʻoaʻoina o ia i le gagana ina ia mafai ai ona ia talanoa i tagata e faatatau i le Tusi Paia. Sa manaʻo Kirsty e ofo i le fafine se suʻesuʻega faale-Tusi Paia, ona malaga ai lava lea i le pasi seʻi oo i le mea e nofo ai le fafine. Sa fesoasoani Kirsty i le laʻuina o afīfī a le fafine i luga i lona potu i le fogāfale tolu o le fale e mautotogi ai tagata. Na talia fiafia Kirsty i totonu o le fale e le tane a le fafine ma le la fanau e toʻafā, ona ia faaali lea i le aiga le auala e fai ai se suʻesuʻega faale-Tusi Paia i le tusi O ā Aʻoaʻoga Moni a le Tusi Paia? O loo faaauau le suʻesuʻega a le fafine ma tamaiti matutua e toʻalua. O loo taufai galulue uma lenei toʻatolu e faamalie le finagalo o Ieova.

Itulau e 59, palakalafa 1:

Georgia.

Na filifili ni uso paeonia talavou se toʻalua e siitia atu i vaega maugā o le atunuu e lē toʻatele ni Molimau e iai. Sa amata loa ona la talaʻi mai lea nuu i lea nuu, ma e mataʻina le tali mai a tagata. E faitau selau lomiga na la ofoina atu ma amata le tele o suʻesuʻega faale-Tusi Paia. Ina ua amata ona galulue uso i vaega maualuluga, e leʻi tele ni mea mo le tausia o i laʻua na iai, ma e leai foʻi se nofoaga e momoe ai. Peitaʻi, sa la maua lava le tausiga na la manaʻomia. E valaaulia i laʻua e tagata o le nuu i o latou aiga e nonofo ai i pō. O nisi taimi, e oo lava i tagata e lē fiafia i le la feʻau, ae e valaaulia lava i laʻua i o latou fale ma latou aai faatasi i se pō. Na iʻu ina tofia mulimuli ane uso o ni paeonia faapito i le vaipanoa lea. O se tulaga e masani ai le feiloaʻi i tagata i luga o auala ma ofo i ai se suʻesuʻega faale-Tusi Paia. Ona o le tele o ā la suʻesuʻega o loo fai, ua taumafai ai e faaitiitia le aofaʻi o suʻesuʻega e la te faia. Ae ui lava i lea, e oo atu lava le aofaʻi o suʻesuʻega a le tagata e toʻatasi i se fuafaatatau e taʻi 20 suʻesuʻega a le uso e toʻatasi i le masina.

Vaega 2

Itulau e 43, palakalafa 1-2:

Benin

Ua 27 nei tausaga o auauna Claude ma lana avā o Marie-Claire o ni misionare i inā. Iā Fepuari, na see ai Marie-Claire ma afāina ai lona vae taumatau. Lua vaiaso mulimuli ane ai, a o galue i le fale misionare, na paʻū ai le uso o Claude ma gau ai lona vae agavale. Ua taufai faasimā nei o la vae, o Marie-Claire i lona vae taumatau a o Claude i lona vae agavale. Na tala tausua mai Claude, “o maʻua e ma te mananaʻo lava e ma te toʻalua i so o se mea e fai!”

Sa mafai e Claude ona fai ni nai feʻau, ae o Marie-Claire e leʻi alu ese ma le fale mo ni nai vaiaso. E ui lava sa ia faatulagaina ana suʻesuʻega e fā e faia i le fale misionare mai ana suʻesuʻega faale-Tusi Paia e 12, ae sa ia misia lava isi vala o le faiva. Ona ia faatulaga lea o se nofoa e nofo ai ma se laulau e tumu i lomiga i luma o le fale misionare ma talanoa atu i tagata uma e ui ane ai. Ia Mati na ia faaalu le 83 itula e talaʻi ai i lana laulau. Pe sa faamanuia e Ieova ana taumafaiga? I le masina lenā na ia ofoina ai tusi e 14, e 452 polosiua, 290 mekasini, ma le silia i le 500 sāvali.

Itulau e 59, palakalafa 2:

Hagakeri.

O taimi uma lava e tiliva atu ai fagu susu a se tuafafine, e tuu i se ato ona tautau lea i lana pā. Ina ua toe faafoʻi fagu ua uma le susu i se tasi aso, na ia tuuina i totonu o le ato se sāvali Pe E te Fia Iloa le Upu Moni? Na faateʻia le tuafafine, ona ina ua toe tiliva mai fagu susu fou, na fafao mai ai e le fafine tiliva susu se fasipepa o loo iai ni fesili e faatatau i le sāvali ma talosaga mai ai mo se suʻesuʻega faale-Tusi Paia. E leʻi faamaʻimauina e le tuafafine se taimi ae alu atu loa i le fale o le fafine i lana faatoʻaga ma amata loa le suʻesuʻega faale-Tusi Paia, i le tusi O ā Aʻoaʻoga Moni a le Tusi Paia? O le fafine lenei, e tele lotu na alu i ai ona o le saʻilia o tali i ana fesili, peitaʻi e leʻi faamalieina ai lona gālala faaleagaga. O le mea moni, sa na ona atili ai ona tele fesili na oso aʻe i lona manatu. Sa faaalia foʻi e lana tama teine le fiafia, ona ave lea i ai e le tuafafine o le tusi Faalogo i le Faiaʻoga Silisili. Na taʻua e le tinā o lana tama e tele ina moeteʻiteʻi ona o ana miti leaga e fai, peitaʻi, talu ona faitau i nai mataupu o le tusi, ua faaitiitia le fefevale o le teine, ma a oo foʻi ina moe e matuā moe gapēpē lava. O loo faaauau le suʻesuʻega faale-Tusi Paia, ua auai e lē aunoa le tinā ma lana fanau teine e toʻalua i sauniga i Aso Sa.

Itulau e 62, palakalafa 2 e oo i le itulau e 63 palakalafa 1:

Niu Sila

Na asiasi atu ni tuafāfine se toʻalua i se matagaluega a le malo e gafa ma le vaavaaia o aiga ona faatulaga lea o se taimi e feiloaʻi ai ma le tamaʻitaʻi pule. A o fai a la sauniuniga, sa la tuufaatasia se seti o tusi ma mekasini e ‘patino lava mo aiga,’ sa aofia ai mataupu e ono fiafia i ai le tamaʻitaʻi pule ona e fesoasoani i lana galuega i le feagai ai ma aiga. O se seti o lomiga e aofia ai tusi e lua o Le Ala e Maua ai le Fiafia i le Aiga ma le Fesili ua Fesili Mai ai Talavou—Tali e Aogā, faatasi ai ma mekasini o le Awake! o Aokuso 2007 lea o loo iai le faasologa o “Auala e Fitu e Avea ai Oe o se Matua Lelei” ma le Awake! o Oketopa 2007 o loo faamatilatila ai le faasologa o mataupu “Le Auala e Puipuia ai Lau Fanau Mai le Faaleagaina.” (Keep Your Children Safe!)

Ina ua asiasi atu tuafāfine na faamatala e i laʻua la tatou galuega e lagolago e foaʻi tauofo ma taʻu i ai tatou te matuā naunau lava e fesoasoani i aiga, aemaise lava i le itu faaleagaga. Sa la faaalu se taimi e faamalamalama ai mataupu sa iai i le seti. Sa faalogologo ma le totoʻa le tamaʻitaʻi pule, na ia talia tusi, ma faapea mai e manaʻo ia faamatala atu foʻi faamatalaga uma ia i lana ʻaufaigaluega e toʻatolu sefulu ma le lima. Na ia toe faapea mai, e aogā tele mataupu i le Awake! i aiga uma e lima selau ma le tolu o loo iai i lana lisi. Na mafai e tuafāfine ona toe maua atu isi Awake! e lima selau lima sefulu ma le fitu. Lua vaiaso mulimuli ane ai, ae maua le telefoni mai le tamaʻitaʻi pule e taʻu mai ai iā i laʻua ua uma ona faaoo atu mekasini uma i aiga.