Ia Mafuta Atu i le Atua

“Loʻu Atua e, ia e Manatu Alofa Mai iā te Aʻu”

NA TUSI se fafine Kerisiano faamaoni o lē na tauivi ma lagona ua lē aogā, e faapea, “Ou te manatu e lē taitai ona alofa Ieova iā te aʻu ona e na te silafia lelei oʻu vaivaiga.” Pe na oo iā te oe ni faalogona faapea, e lē o fiafia mai le Atua iā te oe. Afai o lea, ua faalaeiauina oe i upu i le Neemia 13:31.

Na faia e Neemia, le kovana o tagata Iutaia i le senituri lona lima T.L.M., le mea sili e faafiafia ai le Atua. Sa taʻimua o ia i le toe fausia o pā o Ierusalema e ui i le tetee mai o fili. Sa ia faamalosia le Tulafono a le Atua, tausia ē e mafatia, ma atiaʻe le faatuatua o ona uso Isaraelu. Pe na mātauina e le Atua mea lelei na faia e lenei tagata faamaoni? Pe na finagalo malie Ieova iā Neemia? E tatou te maua le tali i upu faaiʻu o le tusi o loo faaigoa i lona igoa.

Na tatalo Neemia: “Loʻu Atua e, ia e manatu alofa mai iā te aʻu.”a Pe na popole Neemia ina neʻi lē mātauina e le Atua ana galuega lelei, pe e galo o ia? E leai. E mautinoa, sa iloa e Neemia mea na tusia e uluaʻi tusitala o le Tusi Paia, e uiga i le naunau mai o Ieova i ona tagata tapuaʻi faamaoni, ma a latou galuega lelei. (Esoto 32:32, 33; Salamo 56:8) O le ā la o loo ia talosaga atu ai ia faia e le Atua? Ua taʻua e se lomifefiloi, o le uiga o le upu Eperu ua faaliliuina “ia manatua,” e faaalia ai “le fiafia i se mea, ma galuega e ō faatasi ma le manatua o lea mea.” O le faatuatua atoatoa i le mana o le tatalo, na talosaga atu ai Neemia i le Atua ia manatu alofa mai iā te ia ma faamanuia mai iā te ia.—Neemia 2:4.

Po o le a talia e Ieova le tatalo a Neemia ia manatua o ia? Ioe, na talia. O le mea moni, na manatu alofa mai Ieova iā Neemia, ona sa finagalo o Ia, ia tusia le tatalo a Neemia e avea ma vaega o le Tusi Paia faagaeeina. Ae e sili atu mea o le a faia e le “Faafofoga tatalo,” e tali mai ai i le talosaga mai i le loto a Neemia.—Salamo 65:2.

O le a tauia e Ieova Neemia ona o mea lelei uma na ia faia mo le tapuaʻiga mamā. (Eperu 11:6) Ua folafola mai e Ieova, o le a ia faamanuia Neemia i le toe faatūina o ia mai i le oti, i le lalolagi fou amiotonu i le lumanaʻi.b (2 Peteru 3:13; Faaaliga 21:3, 4) I lona mauaina o le faamoemoe o le ola e faavavau i le lalolagi parataiso, o le a iloa ai e Neemia, ua manatua o ia e Ieova ona o mea lelei na ia faia.

Ua faamaonia e le tatalo a Neemia upu a le tupu o Tavita: “O oe Ieova e, e te faamanuia i so o se tagata amiotonu, o lou finagalo malie e te siʻosiʻomia ai i latou e pei o se talita tele.” (Salamo 5:12) Ioe, e mātau e le Atua ma e tāua iā te ia a tatou taumafaiga faamaoni e faafiafia o ia. O lou faia o le mea sili e auauna ai iā te Ia, e te mautinoa ai, e manatu alofa mai o ia iā te oe ma e matuā faamanuia mai iā te oe.

Faitauga Tusi Paia mo Fepuari:

◼ Neemia 1-13

[Faamatalaga pito i lalo]