FESILI MAI LE ʻAUFAITAU
Po o le uiga o le manatu o Tavita o loo i le Salamo 37:25 ma le fetalaiga a Iesu i le Mataio 6:33, e faapea o le a lē faatagaina e Ieova se Kerisiano e fia ʻai?
Na tusi Tavita e na te “leʻi iloa lava se tagata amiotonu ua tuulafoaʻiina, po o ana fanau o ʻaisi mo ni meaʻai.” Sa faia e Tavita lenei faamatalaga e fua i mea sa tutupu iā te ia. Sa ia iloa lelei le tausiga faaauau pea a le Atua. (Sala. 37:25) Peitaʻi, e lē o uiga atu upu a Tavita e faapea, o le a matuā leai lava se taimi e fia aai ai auauna a Ieova.
Sa iai taimi na feagai ai Tavita ma tulaga e sili ona faigatā. O se tasi o na taimi, a o ia fesolasolataʻi mai iā Saulo. Ina ua lē lava meaʻai a Tavita, sa talosaga atu mo ni falaoa mo ia ma ē na latou faatasi. (1 Samu. 21:1-6) I lenā taimi, sa oo ai Tavita i se tulaga ua “ʻaisi mo ni meaʻai.” E ui i lenā tulaga matuā faigatā, ae sa ia iloa lelei o le a lē tuulafoaʻia o ia e Ieova. O le mea moni, e leai se vaega o le Tusi Paia e tatou te faitau ai e faapea, o Tavita o se tagata na ʻaisi solo.
I le Mataio 6:33, na faamautinoa mai ai e Iesu, o le a faamalie e le Atua manaʻoga o auauna faamaoni o loo faamuamua manaʻoga o le Malo i o latou olaga. Na fetalai o ia: “O lea, ia faaauau pea ona outou saʻili muamua le malo ma le amiotonu a le Atua, ona faaopoopoina ai lea o nei mea uma [e aofia ai meaʻai, mea inu ma lavalava] iā te outou.” Peitaʻi, na taʻua foʻi e Iesu, atonu e fia aai ona “uso” ona o sauāga e latou te fesagaʻia. (Mata. 25:35, 37, 40) O le mea lenā sa tupu iā Paulo, sa iai taimi na fia ʻai ai ma fia inu.—2 Kori. 11:27.
Na faailoa mai e Ieova o le a sauāina i tatou i auala eseese. Atonu e faataga i tatou e Ieova e feagai ma tulaga faigatā, a o tatou fesoasoani e tali tuuaʻiga na lāgā e le Tiapolo. (Iopu 2:3-5) O se faataʻitaʻiga, o nisi o o tatou uso Kerisiano e pei o ē na ave i nofoaga o faasalaga a le ʻau Nasi, sa lamatia ona o sauāga. E leʻi lava meaʻai na tuu atu i Molimau, ma o se tasi lea o metotia e sili ona leaga sa faaaogā e lepeti ai lo latou faamaoni. Sa tutumau ma usiusitaʻi Molimau faamaoni iā Ieova; ma e na te leʻi faagaloina i latou. Sa ia faataga i latou e fesagaʻia nei puapuaga, e pei ona ia faataga Kerisiano uma e feagai ma ituaiga o faigatā eseese. E ui i lea, e mautinoa o le a fesoasoani Ieova i ē uma e pagatia ona o lona suafa. (1 Kori. 10:13) Ia teu i manatu le Filipi 1:29: “Ua tuuina atu iā te outou le faaeaga ona o Keriso, e lē gata ina ia outou faatuatua ai iā te ia, ae ia puapuagatia foʻi ona o ia.”
Na folafola mai e Ieova o le a ia faatasi ma ana auauna. O se faataʻitaʻiga, o loo taʻua i le Isaia 54:17: “O so o se auupega ua faia e faasagatau iā te oe e lē manuia.” O lenā folafolaga ma isi folafolaga, ua faamaonia ai o le a puipuia tagata o le Atua o se vaega atoa. Peitaʻi, e ono fesagaʻia e Kerisiano taʻitoʻatasi ni tofotofoga, lea e mafai ona oo ai i le oti.