O le ā le Manufeʻai Lanu Mūmū Sesega o loo Taʻua i le Faaaliga e 17?
Le tali a le Tusi Paia
O le manufeʻai lanu mūmū sesega lea o loo faamatalaina i le Faaaliga mataupu e 17, ua faaata mai ai le faalapotopotoga o loo taumafai e autasia atunuu ma fai ma sui o atunuu o le lalolagi. Na iloa muamua lenei faalapotopotoga o Malo Sosoo, ae ua taʻua nei o Malo Aufaatasi.
Auala e iloa ai le manufeʻai lanu mūmū sesega
O se faalapotopotoga faapolotiki. O “ulu e fitu” o le manufeʻai lanu mūmū sesega e faasino atu i “mauga e fitu” ma “tupu e toʻafitu,” po o malo malolosi. (Faaaliga 17:9, 10) O loo faaaogā i le Tusi Paia mauga ma manufeʻai e faaata ai faigāmalo.—Ieremia 51:24, 25; Tanielu 2:44, 45; 7:17, 23.
E faaata mai ai faiga faapolotiki i le lalolagi. E tutusa le manufeʻai lanu mūmū sesega ma le manufeʻai e fitu ona ulu o loo taʻua i le Faaaliga mataupu e 13, lea e faaata mai ai faiga faapolotiki i le lalolagi atoa. E taʻi fitu ulu, sefulu seu, ma e iai o la igoa faifai. (Faaaliga 13:1; 17:3) E lē o se mea e faateʻia ai le tutusa o nei manufeʻai. O le manufeʻai lanu mūmū sesega o se faatusa po o se faaataga o faiga faapolotiki i le lalolagi.—Faaaliga 13:15.
E maua lona malosi mai i isi faigāmalo. O le manufeʻai lanu mūmū sesega e “tupuga mai,” pe ua iai ona o isi faigāmalo.—Faaaliga 17:11, 17.
E faifaimea faatasi ma lotu. O le tiʻetiʻe o Papelonia le Aai Tele po o lotu sesē uma o le lalolagi i luga o le manufeʻai lanu mūmū sesega, e faaalia ai o loo taaʻina e lotu le manufeʻai.—Faaaliga 17:3-5.
E na te lē faamamaluina le Atua. O le manufeʻai, e “tumu i igoa faifai.”—Faaaliga 17:3.
E lē toe gaoioi mo sina taimi. O le a iai le manufeʻai lanu mūmū sesega i “le tō,”a pe e lē toe gaoioi mo sina taimi, ae o le a toe alu aʻe mai i le tō.—Faaaliga 17:8.
Faataunuuga o le valoaga a le Tusi Paia
Mātau pe na faapefea ona faataunuuina i Malo Sosoo lea na iai muamua, ma Malo Aufaatasi, le valoaga a le Tusi Paia e faatatau i le manufeʻai lanu mūmū sesega.
O se faalapotopotoga faapolotiki. E lagolagoina e Malo Aufaatasi faiga faapolotiki, e ala i le faatāuaina o le “iai o tulaga tutusa o ona Sui auai uma.”b
E faaata mai ai faiga faapolotiki i le lalolagi. I le 2011, na faaopoopo ai le atunuu lona 193 i sui o Malo Aufaatasi. O lea, ua mafai ona faapea atu, ua fai Malo Aufaatasi ma sui o le tele o atunuu ma tagata i le lalolagi.
E maua lona malosi mai i isi faigāmalo. Ua iai Malo Aufaatasi ona o atunuu ia e faia aʻe ai, ma e fua lona malosi i le pule ua tuuina atu i ai e na atunuu.
E faifaimea faatasi ma lotu. Na maua e Malo Sosoo le lagolagosua a lotu o le lalolagi, ma o loo faaauau pea ona maua e Malo Aufaatasi.c
E na te lē faamamaluina le Atua. Na faavaeina Malo Aufaatasi e “tausia le filemu ma le saogalemu i le lalolagi.”d E ui o se sini lelei, ae ua lē faamamaluina ai e Malo Aufaatasi le Atua, e ala i le taumafai e faia se mea na fetalai le Atua, e na o lona Malo e mafai ona faataunuuina.—Salamo 46:9; Tanielu 2:44.
E lē toe gaoioi mo sina taimi. E leʻi mafai e Malo Sosoo lea na faavaeina ina ua uma le Taua Muamua a le Lalolagi e tausia le filemu, ona aveesea fetauaʻiga i le vā o atunuu. Na lē toe gaoioi ina ua amata le Taua Lona Lua a le Lalolagi i le 1939. Ina ua uma lenā taua i le 1945, na faavaeina loa Malo Aufaatasi. Na tutusa lelei lona fuafuaga ma le auala na faagaoioi ma faatulaga ai, ma Malo Sosoo.
a E tusa ai ma le tusi Vine’s Expository Dictionary of Old and New Testament Words, o le upu Eleni lea e faaliliuina i le “tō,” e uiga atu i “se loloto e lē mafai ona fuatia.” O loo faaliliuina i le King James Version o se “lua maulalō e lē gata mai.” I le Tusi Paia, e faasino atu i se nofoaga po o se tulaga saisaitia ma lē mafai ona gaoioi.
b Tagaʻi i le Article 2 o le Charter of the United Nations.
c O se faataʻitaʻiga, i le 1918, na faalauiloa ai e se komiti o loo iai le tele o vaega o le lotu Porotesano i Amerika, o le a avea Malo Sosoo “o se sui faapolotiki o le malo o le atua i le lalolagi.” I le 1965, na faapotopoto ai i San Francisco sui o le lotu Puta, Katoliko, Eastern Orthodoxy, Hinitū, Isalama, Iutaia, ma le Porotesano, e lagolagoina ma tatalo mo Malo Aufaatasi. I le 1979, na faailoa atu ai e Pope Ioane Paulo II lona faanaunauga, ina ia “avea pea [Malo Aufaatasi] ma auala autū o le mauaina o le filemu ma le faamasinotonu.”
d Tagaʻi i le Article 1 o le Charter of the United Nations.