[mai i le agavale i le taumatau] Marcelo, Yomara, ma Hiver. O loo tofu i latou ma se kopi o le Faaliliuga a le Lalolagi Fou i le gagana patupatu faa-Sepania
Na Latou Tofo i le Alofa o le Faapotopotoga
E NONOFO Yomara ma ona tuagane o Marcelo ma Hiver i se tamaʻi nuu i Guatemala. Na amata ona faia se suʻesuʻega faale-Tusi Paia a Yomara ma Molimau a Ieova, ma na mulimuli ane faatasi atu i ai ona tuagane. Ae na iai se faafitauli. E pō uma le vaai a Yomara ma ona tuagane ma e lē mafai ona latou faitauina le gagana patupatu. O lea, e faitau atu e lo latou faiaʻoga o le Tusi Paia le mataupu ma mau iā i latou.
O se isi luʻi na latou fesagaʻia o le auai i sauniga. E lē mafai ona ō na o i latou i se Maota o Sauniga lata ane, lea e 40 minute le mamao mai i lo latou fale. Ae na faatulaga e uso i le faapotopotoga se fesoasoani ina ia latou auai ai i sauniga uma. Ina ua fai vaega a Yomara ma ona tuagane i sauniga amata o le vaiaso, na fesoasoani i ai uso e tauloto a latou vaega.
Iā Me 2019, na amata ai ona fai sauniga i lo latou nuu. I lenā taimi na siitia atu ai se ulugalii paeonia sauatoa i lo latou nuu. Na la uaʻi atu e fesoasoani iā Yomara ma ona tuagane ina iloa faitau ma tusitusi i le gagana patupatu e ui e la te lē iloa faaaogā lenā gagana. Na la ō i se faletusi ma suʻesuʻe ai lenā gagana ina ia mafai ona la aʻoaʻoina ai isi.
O loo faia le tali a Marcelo i se sauniga a le faapotopotoga
I ni nai masina ae ua faigofie i lenei tuafafine ma ona tuagane ona faitauina le gagana patupatu, ma na faaauau ai ona latou agaʻigaʻi i luma faaleagaga. I le taimi lenei ua avea uma Yomara, Marcelo, ma Hiver o ni paeonia sauatoa. Ua avea foʻi Marcelo o se auauna o le faiva. E ese lo latou maelega e auauna iā Ieova i vaiaso taʻitasi. O lo latou maelega ua avea ma faaaʻoaʻoga lelei i isi.
E lotofaafetai Yomara ma ona tuagane i le lagolagosua a le faapotopotoga. Ua faapea mai Yomara: “E mai lava i le taimi muamua na matou feiloaʻi ai ma Molimau a Ieova, na latou faaalia ai iā i matou le alofa moni faa-Kerisiano.” Na faapea mai foʻi Marcelo: “Ua matou maua ni uō lelei i la matou faapotopotoga ma o i matou o se vaega o le ʻauuso i le lalolagi aoao ua autasi i le alofa.” O loo tulimataʻia e Yomara ma ona tuagane le aso o le a avea ai le lalolagi o se parataiso.—Sala. 37:10, 11; Isa. 35:5.