Po o se Pisinisi Lotu?
Pe na e mātauina o le tele o lotu e foliga mai o loo uaʻi atu i le saʻilia o tupe nai lo le avatu o le fesoasoani faaleagaga i tagata? E latou te faalauiloa atu a latou auaunaga faapisinisi ma oloa o loo latou faatauina. O le toʻatele o latou taʻitaʻi lotu e tetelē totogi ma e ola i ni olaga taugatā. Mātau nisi o faataʻitaʻiga:
Na faaalia e se suʻesuʻega na faia e leoleo, ua silia ma le 13 tausaga o faaaogā e se epikopō Katoliko tupe a le lotu e totogi ai le toetoe 150 o ana malaga i vaalele totogi pau, ma le pe ā ma le 200 taavale taugatā na ia faaaogāina. E silia ma le fā miliona tālā na ia faaaogāina e toe faaleleia ai le fale a le lotu na nofo ai.
E faitau afe tagata e auai e lē aunoa i faiga lotu a se taʻitaʻi lotu e nofo i se atunuu Aferika. E faatau so o se ituaiga oloa i le fale telē e fai ai lana lotu. E na te faatauina se suāuu lea e faapea mai e mafai ona faamālōlō ai so o se maʻi, ma solo afu ma mitiafu o loo lolomi ai lona ata. E matuā mauoloa lenei taʻitaʻi lotu, ae o le toʻatele o lana ʻaulotu e matitiva.
I Saina, e fā mauga paia e pulea e le lotu Puta ma o mauga e lua o na mauga o loo lesitalaina o ni kamupani. E tele foʻi faiga faapisinisi o loo faia i le malumalu taʻutaʻua o Shaolin. E lauiloa le taʻitaʻi o alii monike o lenā malumalu, o se pule o se pisinisi.
Ua amata ona faafaigaluegaina e kamupani i Amerika tagata popoto faapitoa i mataupu tau lotu. E tusa ai ma se tasi o lipoti, e faaaogā e nei tagata tū masani faalelotu e faia aʻe ai sauniga paia faalelotu, ma e latou te saunia foʻi isi auaunaga faaleagaga mo na kamupani.
O le ā sou manatu e faatatau i lotu o loo aafia i faiga faapisinisi? Pe na e taumānatu po o le ā le silafaga a le Atua e faatatau i tagata o loo taumafai e faaaogā meafai a lotu e maua ai a latou tupe?
O le ā le silafaga a le Atua e faatatau i le nini faatasi o lotu ma faiga faapisinisi?
E lē taliaina e le Atua le nini faatasi o lotu ma faiga faapisinisi. O loo faailoa mai i le Tusi Paia le lē fiafia o le Atua i ositaulaga na faapea mai o i latou o sui o le Atua, ae na “totogi” lo latou aʻoaʻoina o tagata. (Mika 3:11) Na taʻusalaina e le Atua faiga faapisinisi matapeʻapeʻa lea na avea ai lona malumalu tapuaʻi ma “ana o ē e faomea.”—Ieremia 7:11.
Na faailoa mai e Iesu le ʻinoʻino o le Atua i ē faaaogā lotu e suʻe ai tupe. I aso o Iesu, na faataga e taʻitaʻi lotu le faia o pisinisi a tagata faatauʻoa matapeʻapeʻa i totonu o le malumalu i Ierusalema, ma na maua mai ai e na taʻitaʻi lotu tupe. Na latou gaoia tupe a tagata na ō atu e tapuaʻi. Na lototele Iesu e tutuliese na faatauʻoa lē faamaoni mai i le malumalu ma faapea atu: “Aua neʻi toe faia le fale o loʻu Tamā ma fale faatauʻoa!”—Ioane 2:14-16.
Na faailoa mai foʻi e Iesu le finagalo o le Atua i le auala na faia ai lana faiva. (Ioane 8:28, 29) E leʻi aoina e Iesu ni tupe mai i tagata e totogi ai le aʻoaʻoina o i latou e faatatau i le Atua. E leʻi tāpā foʻi e Iesu ni tupe ina ua ia faia vavega, e pei o le fafagaina o ē na fia aai, faamālōlōina maʻi, ma le faatutūina o ē na maliliu. E leʻi faaaogāina e Iesu lana faiva ina ia mauʻoa ai, e leʻi iai foʻi sona fale.—Luka 9:58.
Na faapefea ona faaesea e Kerisiano i le uluaʻi senituri la latou tapuaʻiga mai i faiga faapisinisi?
Na faatonuina e Iesu ona soo ina ia aua neʻi o latou suʻeina tupe mai i a latou meafai faalelotu. Na fetalai Iesu: “Ia outou avatu fua, auā ua outou maua fua.” (Mataio 10:8) Na mulimuli soo o Iesu i le uluaʻi senituri lea na taʻua o Kerisiano i ana faatonuga. Mātau nisi o faataʻitaʻiga:
Na malaga faatasi Iesu ma le aposetolo o Peteru a o fai le faiva a Iesu i le lalolagi. E iai se aso na ofo atu ai e se tamāloa e igoa iā Simona ni tupe iā Peteru, ona na manaʻo e na te maua le agaga paia. Na vave ona teena e Peteru tupe na ofo atu e Simona ma aʻoaʻia o ia i lona faapea atu: “Ia fano au siliva faatasi ma oe, auā ua e manatu e mafai ona e maua le meaalofa foaʻifua a le Atua i tupe.”—Galuega 8:18-20.
Na iloa le aposetolo o Paulo o se faifeʻau femalagaaʻi. E ui na galue mamafa mo le tele o tausaga i le tele o faapotopotoga, ae e leʻi suʻea ai ni tupe a Paulo i lona tofiga. E leʻi ‘suʻe tupe Paulo ma ona uso talitonu i le afioga a le Atua e pei o le toʻatele o isi.’ (2 Korinito 2:17) Ae na tusi Paulo: ‘Na matou galulue i le pō ma le ao, ina neʻi faatigāina so o se tasi o outou, a o matou talaʻia atu le tala lelei a le Atua iā te outou.’—1 Tesalonia 2:9.
O le mea moni, na manaʻomia e Kerisiano i le uluaʻi senituri ni tupe e faatupe ai le talaʻia o le tala lelei i le tele o nofoaga ma fesoasoani ai i Kerisiano lē tagolima. Ae e latou te leʻi tāpā ni totogi mo le aʻoaʻoina o tagata e auauna i le Atua. E filifili se tasi pe e fai se foaʻi tauofo pe a manaʻo i ai, e tusa ma mataupu silisili o loo mulimuli mai:
2 Korinito 8:12: “Auā afai e lotomalie se tasi e foaʻi atu, e talileleia lea e tusa ma mea ua iā te ia, ae e lē tusa ma mea e lē o iā te ia.”
Le uiga: E sili ona tāua le uunaʻiga e faia ai se foaʻi tauofo, nai lo le telē o le foaʻi.
2 Korinito 9:7: “Ia taʻitoʻatasi ma faia e tusa ma le mea ua filifili i lona loto, aua le faia ma le tigā, aua foʻi le faia faamalosi, auā e alofa le Atua i lē e foaʻi ma le lotofiafia.”
Le uiga: E lē finagalo le Atua e fai faamalosi e se tasi se foaʻi. E faafiafiaina o ia pe a filifili se tasi e fai se foaʻi ona e manaʻo i ai.
O le ā ua toeitiiti tupu i lotu matapeʻapeʻa?
O loo taʻua manino i le Tusi Paia e lē talia e le Atua lotu po o tapuaʻiga uma. (Mataio 7:21-23) O loo faatusa i se valoaga i le Tusi Paia lotu sesē uma i se fafine talitane, ona e latou te faifaimea faatasi ma malo ina ia maua ai tupe ma meafaitino, ma e latou te faaaogā foʻi tagata o atunuu uma e suʻe ai tupe. (Faaaliga 17:1-3; 18:3) O loo taʻua foʻi i lenā valoaga ua toeitiiti ona faaumatia lea e le Atua lotu sesē uma.—Faaaliga 17:15-17; 18:7.
E lē finagalo le Atua e avea gaoioiga leaga a lotu sesē e faasesēina ai tagata pe taofia ai i latou i le vavalalata atu i le Atua. (Mataio 24:11, 12) O loo ia uunaʻia tagata lotofaamaoni, e aʻoaʻo le auala e na te taliaina e auauna atu ai iā te ia ma sosola ese mai lotu sesē.—2 Korinito 6:16, 17.