I tausaga taʻitasi, e papatiso ai le toʻatele o talavou o ē na tausia aʻe o ni Molimau a Ieova. Po o e mafaufau e faia faapea? Pe afai o lea, e manaʻomia ona e malamalama muamua i le uiga o le tuuina atu ma le papatisoga.

• O le ā le papatisoga?

• O le ā le tuuina atu?

• Aiseā e tāua ai le papatisoga?

• Tala a isi talavou

• Talafatu ma tala moni

O le ā le papatisoga?

O le papatisoga o loo taʻua i le Tusi Paia e faasino atu i le faatofu atoa o le tino i le vai ae e lē o le faatulutulu o le vai i luga o se tasi. E faaata mai foʻi e le papatisoga se mea e sili ona tāua.

• O le faatofu atoa i le vai i le taimi o le papatisoga e faailoa atu ai i le lautele e te lē o toe ola mo oe lava.

• O le ea aʻe mai le vai e faailoa atu ai o le a uaʻi atu lou olaga i le faafiafiaina o le finagalo o le Atua.

O le papatisoga, e faailoa atu ai i le lautele e iā Ieova le pule e faatulaga ai tapulaa o le mea saʻo ma le mea sesē, ma faailoa aloaʻia atu i le lautele lau tautoga e ofoina atu oe ma le lotomalie e fai lona finagalo.

Ia mafaufau i ai: Aiseā e tatau ai ona e naunau e faailoa atu i le lautele o le a e ola i se olaga e usiusitaʻi iā Ieova? Tagaʻi i le 1 Ioane 4:19 ma le Faaaliga 4:11.

O le ā le tuuina atu?

Ae e te leʻi papatiso, e tatau ona e faia se tuuina atu iā Ieova. E faapefea?

E ala i sau oe lava tatalo iā Ieova, ia tautō o le a e auauna e faavavau iā te ia ma faia lona finagalo e tusa po o ā tulaga e ono tulaʻi mai ma mea e filifili isi e faia.

O le papatisoga o se faailoaga lenā i le lautele o lou tuuina atu. E faailoa atu ai i isi ua e lē toe pule oe iā te oe lava ma ua pule Ieova iā te oe.—Mataio 16:24.

Ia mafaufau i ai: E faapefea ona faaleleia lou olaga i le pule a Ieova? Tagaʻi i le Isaia 48:17, 18 ma le Eperu 11:6.

Aiseā e tāua ai le papatisoga?

Na faavae e Iesu le papatisoga o se mea e manaʻomia ina ia avea ai ma ona soo. (Mataio 28:19, 20) O lea, o loo avea pea le papatisoga ma mea e manaʻomia ina ia avea ai se tasi ma Kerisiano. O le mea moni, o loo taʻua i le Tusi Paia e tāua le papatisoga ina ia faasaoina ai.—1 Peteru 3:21.

Peitaʻi, e tatau ona avea lou alofa ma lou talisapaia o Ieova ma uunaʻiga e te papatiso ai. E tatau ona pei ou faalogona o le faisalamo o lē na tusi: “O le ā se mea ou te totogi atu iā Ieova ona o mea lelei uma ua ia faia iā te aʻu? Ou te . . . valaau atu i le suafa o Ieova. Ou te avatu iā Ieova mea na ou tautō ai.”—Salamo 116:12-14.

Ia mafaufau i ai: O ā mea lelei ua faia e Ieova mo oe, ma e faapefea ona faaalia atu lou talisapaia? Tagaʻi i le Teuteronome 10:12, 13 ma le Roma 12:1.

Afai o loo e ola e tusa ma tapulaa a le Tusi Paia ma atiaʻe se faiā ma le Atua, atonu la o loo e mafaufau e te papatiso. E faapefea ona e iloa ua e sauni e uia lenā laasaga?a

I lenei mataupu

• O le ā le tele e manaʻomia ona ou iloa?

• O le ā e tatau ona ou faia?

• Tala a isi talavou

O le ā le tele e manaʻomia ona ou iloa?

O le sauniuni mo le papatisoga e lē uiga atu i le taulotoina o faamatalaga e pei o le mea e ono faia e se tasi e pasi ai lana suʻega i le aʻoga. Peitaʻi, o le a manaʻomia ona faaaogā lou “mafaufau lelei” e faamalosia ai lou talitonuga e moni mea o loo aʻoaʻo e le Tusi Paia. (Roma 12:1) Mo se faaaʻoaʻoga:

• Pe e te talitonu o loo iai moni le Atua ma e tatau ona e tapuaʻi i ai?

  Ua faapea mai le Tusi Paia: “O lē e faalatalata atu i le Atua, e tatau ona ia talitonu o loo soifua o ia, ma e na te tauia ē e matuā saʻili iā te ia.”—Eperu 11:6.

  Ia fesili ifo: ʻAiseā ou te talitonu ai i le Atua?’ (Eperu 3:4) ʻAiseā e tatau ai ona ou tapuaʻi iā te ia?’—Faaaliga 4:11.

  Fesoasoani atili: Tagaʻi i le mataupu “Creation or Evolution?—Part 1: Why Believe in God?”

• Pe e te talitonu moni o le feʻau o loo i le Tusi Paia e mai i le Atua?

  Ua faapea mai le Tusi Paia: “O Tusitusiga Paia uma e mai i le agaga o le Atua, ma e aogā e aʻoaʻo ai, e aʻoaʻi ai, e faasaʻo ai mea, e faatonu ai i le amiotonu.”—2 Timoteo 3:16.

  Ia fesili ifo: ʻAiseā ou te talitonu ai o le Tusi Paia e lē o se tusi o loo iai manatu o tagata?’—Isaia 46:10; 1 Tesalonia 2:13.

  Fesoasoani atili: Tagaʻi i le mataupu “E Faapefea Ona Fesoasoani le Tusi Paia iā te Aʻu?—Vaega 1: Suʻesuʻe Lau Tusi Paia”

• Pe e te talitonu o loo faaaogā e Ieova le faapotopotoga Kerisiano e faataunuu lona finagalo?

  Ua faapea mai le Tusi Paia: “Ia iā te ia [le Atua] le mamalu e ala i le faapotopotoga, ma e ala iā Keriso Iesu, i tupulaga uma e faavavau, faavavau lava.”—Efeso 3:21.

  Ia fesili ifo: ʻPo ou te manatu o mea ou te aʻoaʻoina mai i le Tusi Paia i sauniga faa-Kerisiano e mai i tagata po o Ieova?’ (Mataio 24:45) ʻPo ou te auai e lē aunoa i sauniga e tusa pe e lē auai oʻu mātua (pe a la faatagaina oe e faia faapea)?’—Eperu 10:24, 25.

  Fesoasoani atili: Tagaʻi i le mataupu “Aiseā e Auai ai i Sauniga i se Maota mo Sauniga?”

O le ā e tatau ona ou faia?

E lē manaʻomia ona e lelei atoatoa ina ia mafai ai ona papatiso. E ui i lea, e tatau ona e faaalia e te manaʻo moni e “liliuese mai i mea leaga ma fai mea lelei.” (Salamo 34:14) Mo se faaaʻoaʻoga:

• Po o e ola e tusa ai ma tapulaa a Ieova?

  Ua faapea mai le Tusi Paia: “Ia taofimau i se lotofuatiaifo lelei.”—1 Peteru 3:16.

  Ia fesili ifo: ʻUa faapefea ona ou faailoa atu ua toleniina loʻu “mafaufau e iloa le mea saʻo ma le mea sesē”?’ (Eperu 5:14) ʻPe e mafai ona ou mafaufau i ni tulaga patino na ou teena ai omiga mai i isi e faia se mea sesē? Pe e faalaeiauina aʻu e aʻu uō e faia le mea saʻo?’—Faataoto 13:20.

  Fesoasoani atili: Tagaʻi i le mataupu “E Faapefea Ona Toleni Loʻu Lotofuatiaifo?”

• Pe e te malamalama e te tali atu iā Ieova mo au gaoioiga?

  Ua faapea mai le Tusi Paia: ʻE taʻitasi i tatou uma ma tala atu lana amio i le Atua.’—Roma 14:12.

  Ia fesili ifo: ʻPo ou te faamaoni iā te aʻu lava ma isi?’ (Eperu 13:18) ʻPo ou te taʻutino aʻu mea sesē, nanā, pe tuuaʻia foʻi isi?’—Faataoto 28:13.

  Fesoasoani atili: Ia tagaʻi i le mataupu “How Can I Deal With My Mistakes?”

• Po o e faatumauina se faiā ma Ieova?

  Ua faapea mai le Tusi Paia: “Ia outou mafuta vavalalata atu i le Atua, ona mafuta vavalalata mai lea o ia iā te outou.”—Iakopo 4:8.

  Ia fesili ifo: ʻO ā mea o loo oʻu faia e mafuta vavalalata atu ai iā Ieova?’ O se faaaʻoaʻoga, ʻPo o fai ma aʻu masaniga le faitau o le Tusi Paia?’ (Salamo 1:1, 2) ʻPo ou te tatalo e lē aunoa?’ (1 Tesalonia 5:17) ʻPe e patino aʻu tatalo? Po ou te faauō atu i ē o loo avea ma uō a Ieova?’—Salamo 15:1, 4.

  Fesoasoani atili: Tagaʻi i le mataupu “E Faapefea Ona Fesoasoani le Tusi Paia iā te Aʻu?—Vaega 2: Ia Maua le Fiafia i le Faitauina o le Tusi Paia” ma le “Aiseā e Tatau ai Ona Ou Tatalo?”

FESOASOANI: Ina ia e sauni mo le papatisoga, faitau i le mataupu 37 o le tusi Fesili ua Fesili Mai ai Talavou—Tali e Aogā, Tusi 2. Ia mātau le pusa o loo i lenā mataupu.

Pe e faapopoleina oe i le tau ina mafaufau i le tuuina atu iā Ieova ma le papatisoga? Pe afai o lea, o le a fesoasoani lenei mataupu e foʻia ai na popolega.

I lenei mataupu

• Ae ā pe a ou faia se agasala matuiā pe a uma ona papatiso?

• Ae ā pe afai e lē mafai ona ou tauaveina tiute tauave o le papatisoga?

• Ae ā pe afai ou te lagona e lē aogā aʻu e auauna iā Ieova?

• Tala a isi talavou

Ae ā pe a ou faia se agasala matuiā pe a uma ona papatiso?

Le popolega: Atonu e te iloa se tasi na faia se agasala matuiā ma aveesea mai i le faapotopotoga. (1 Korinito 5:11-13) Atonu e te popole ina neʻi tupu lenā mea iā te oe.

“O le taimi muamua na ou mafaufau ai i le papatisoga, na ou fefe ina neʻi oʻu faia se mea sesē mulimuli ane. Na faaata i loʻu mafaufau le faalumaina o oʻu mātua ona o lenā mea.”—Rebekah.

Mau autū: “Ia lafoaʻi e le tagata amioleaga lona ala . . . ma ia foʻi mai o ia iā Ieova, o lē e alofa mutimutivale iā te ia, ma lo tatou Atua, auā e na te matuā faamagaloina lava.”—Isaia 55:7.

Ia manatunatu i ai: E ui e aveeseina mai i le faapotopotoga tagata fai mea sesē e lē salamō, ae e alofa mutimutivale Ieova iā i latou e salamō moni ma talia aʻoaʻiga.—Salamo 103:13, 14; 2 Korinito 7:11.

O le mea moni: E ui e te lē lelei atoatoa, ae e mafai ona e teena faaosoosoga i le fesoasoani a le Atua. (1 Korinito 10:13) E lē mafai ona pulea e se isi le auala e te gaoioi ai, e na o oe lava.

“Na ou fefe ina neʻi oʻu faia se agasala matuiā pe a uma le papatisoga, ae na ou iloa mulimuli ane o le agasala foʻi le faatuai ona papatiso. Na ou iloa foʻi e lē tatau ona avea mea e ono tutupu i le lumanaʻi ma mea e taofia ai aʻu mai i le faia o le mea saʻo.”—Karen.

Le manatu tāua: E mafai ona e filifili e ʻalofia le faia o se agasala matuiā e pei ona faia e le toʻatele o auauna a Ieova.—Filipi 2:12.

Fesoasoani atili: Tagaʻi i le mataupu “E Faapefea Ona Ou Teena Faaosoosoga?”

Ae ā pe afai e lē mafai ona ou tauaveina tiute tauave o le papatisoga?

Le popolega: Atonu e te iloa nisi o talavou ua siitia mamao mai i a latou aiga ma uō ina ia faalautele la latou auaunaga iā Ieova. E te popole ina neʻi faatalitalia oe e faia foʻi faapea.

“E agavaa se Kerisiano papatiso mo nisi faaeaga, ae e lē o sauni isi e faaavanoa atu i latou pe e lē o talafeagai foʻi o latou tulaga e faia ai faapea.”—Marie.

Mau autū: “Ia taʻitasi le tagata ma faamaonia po o faapefea ana galuega, ona iai lea o se mea e mitamita ai iā te ia lava, ae aua le faatusatusa atu i le isi tagata.”—Kalatia 6:4.

Ia manatunatu i ai: Nai lo le faatusatusa o oe i isi, ia manatunatu i upu o loo i le Mareko 12:30: “Ia e alofa atu iā Ieova lou Atua ma lou lotoatoa.”

Ia mātau e tatau ona e auauna iā Ieova ma lou lotoatoa. O le auauna ma le lotoatoa iā Ieova e faalagolago i au gaoioiga, ae lē o mea o loo faia e isi. Pe afai e te alofa moni iā Ieova, e te saʻilia auala e faia ai le mea sili e tusa ai ma ou tomai e auauna ai iā te ia.

“E moni o le papatisoga o se laasaga e ao ona manatu mamafa i ai, ae e lē o se avega mamafa. Pe afai e te faauō atu i ni aumea lelei, o le a latou fesoasoani iā te oe. O le faasolosolo ona talia o tiute tauave, o le a e maua ai le fiafia. E lē lelei mo oe lava le faatuai ona e papatiso.”—Julia.

Le manatu tāua: Ia atiaʻe lou talisapaia mo le alofa ua faaalia e Ieova iā te oe. O le a uunaʻia ai oe e faia le mea sili e te mafaia mo ia.—1 Ioane 4:19.

Fesoasoani atili: Tagaʻi i le mataupu “O le ā le Tele e Maufaatuatuaina ai Aʻu?”

Ae ā pe afai ou te lagona e lē aogā aʻu e auauna iā Ieova?

Le popolega: O Ieova o le Pule Silisili Ese o le vateatea, ma e lē mafaatusalia i ai tagata! Atonu e te taumānatu po o silafia mai oe e Ieova.

“Talu ai o oʻu mātua o ni Molimau a Ieova, na ou popole ai e leai saʻu lava faiā ma Ieova ma e na te leʻi tosina atu aʻu iā te ia.”—Natalie.

Mau autū: “E lē mafai ona sau o se tagata iā te aʻu pe a lē tosina mai o ia e le Tamā o lē na auina mai aʻu.”—Ioane 6:44.

Ia manatunatu i ai: O lou manatunatu i le papatisoga e ono faailoa atu ai o loo tosina atu oe e Ieova i se faiā vavalalata ma ia. O se mea talafeagai le talia o lenā valaaulia.

Ia manatua foʻi o Ieova e faia tapulaa mo i latou o le a ia tosina atu iā te ia. Ua faamautinoa mai i lana Afioga pe afai e te “mafuta vavalalata atu i le Atua, ona mafuta vavalalata mai lea o ia iā te [oe].”—Iakopo 4:8.

“O lou iloa e faatatau iā Ieova ma lona tosina atu o oe iā te ia, o faamaoniga na o lona alofa mo oe. O lea, pe a e mafaufau e lē aogā oe e auauna iā te ia, ia faamanatu iā te oe lava e lē o sona finagalo lenā. E saʻo le finagalo o Ieova i taimi uma.”—Selina.

Le manatu tāua: Afai ua e ausia agavaa faale-Tusi Paia mo le papatisoga, ua e agavaa foʻi la e tapuaʻi iā Ieova. Ia manatua, e tatau ona e tapuaʻi iā te ia.—Faaaliga 4:11.

Fesoasoani atili: Tagaʻi i le mataupu “Aiseā e Tatau ai Ona Ou Tatalo?”