O le feʻau autū lava o le Tusi Paia, e faatatau atu i le Malo o le Atua. O le a faaaogā e Ieova lenā Malo e faataunuuina lona finagalo na iai mo le lalolagi. O le ā lenā Malo? E faapefea ona tatou iloa ua pule nei lenā Malo? O ā mea ua uma ona faataunuuina e le Malo, ma o ā mea o le a faataunuuina i le lumanaʻi? O le a taliina nei fesili i le lesona lenei, ma lesona e lua o loo sosoo mai.

1. O le ā le Malo o le Atua, ma o ai o le a avea ma Tupu?

O lenei Malo o se faigāmalo ua faavaeina e Ieova le Atua. O lona Tupu o Iesu Keriso, ma e pule mai i le lagi. (Mataio 4:​17; Ioane 18:36) Ua faapea mai le Tusi Paia e uiga iā Iesu: “O le a fai o ia ma Tupu . . . e faavavau.” (Luka 1:​32, 33) I le avea ai o Iesu ma Tupu o le Malo o le Atua, o le a ia pule mai i tagata uma i luga o le lalolagi.

2. O ai e pule faatasi ma Iesu?

E lē na o Iesu o le a avea ma pule. E iai tagata “mai i ituaiga uma, ma gagana uma, ma nuu uma, ma atunuu uma . . . e latou te pule mai foʻi o ni tupu i le lalolagi.” (Faaaliga 5:​9, 10) E toʻafia i latou o le a pule faatasi ma Keriso? E faitau miliona Kerisiano ua avea ma soo o Iesu, talu mai le taimi na afio mai ai o ia i le lalolagi. Ae e na o le 144,000 i latou e ō atu i le lagi e pule faatasi ma Iesu. (Faitau le Faaaliga 14:​1-4.) O isi Kerisiano uma i le lalolagi, o le a avea ma tagatānuu o le Malo.​—Salamo 37:29.

3. Aiseā e sili atu ai le faigāmalo a le Atua nai lo faigāmalo a tagata?

E tusa pe taumafai taʻitaʻi o malo e faia mea lelei, ae e lē o iā i latou le malosi e faataunuu ai mea uma e mananaʻo e fai. A o faagasolo taimi, o le a suia i latou e nisi taʻitaʻi manatu faapito ma e lē mananaʻo e faia mea lelei mo tagata. Ae e lē mafai e se tasi ona suia le Pule o le Malo o le Atua, o Iesu. Ua ʻfaatūina e le Atua le malo e lē faaumatia lava.’ (Tanielu 2:​44) O le a pule mai Iesu i le lalolagi atoa, ma e na te lē faaalia le faailoga tagata. Ae o le a ia faaalia le alofa, agalelei ma le faamasinotonu, ma o le a ia aʻoaʻoina tagata e feutagaʻi foʻi ma isi i lenā lava auala.​—Faitau le Isaia 11:9.

4. O le a pulea e se faigāmalo malosi le lalolagi atoa

E sili atu le pule o loo iā Iesu Keriso, nai lo o se isi lava pule i le talafaasolopito. Faitau le Mataio 28:​18, ona talanoa lea i le fesili lenei:

• E faapefea ona sili atu le pule a Iesu na i lo pule faaletagata?

E fesuisuiaʻi faigāmalo a tagata, ma e na o ni nai vaega o le lalolagi e latou te pule ai. Ae ā le Malo o le Atua? Faitau le Tanielu 7:​14, ona talanoa lea i fesili nei:

• Aiseā o se tala lelei ai le iloa, ʻe lē faaumatiaina’ le Malo o le Atua?

• Faamata o ā ni aogā e tatou te maua pe a pulea e le Malo o le Atua le lalolagi atoa?

5. E tatau ona suia faigāmalo a tagata

Aiseā e tatau ai ona suia e le Malo o le Atua faigāmalo a tagata? Faaali le VITIŌ, ona talanoa lea i le fesili lenei:

VITIŌ: O le ā le Malo o le Atua?​—Vaaiga Puupuu (1:​41)

• O ā iʻuga o pulega a tagata?

Faitau le Failauga 8:​9, ona talanoa lea i fesili nei:

• Pe e te manatu e tatau ona suia e le Malo o le Atua faigāmalo a tagata? Aiseā?

6. E malamalama lelei pule o le Malo o le Atua iā i tatou

Talu ai na soifua lo tatou tupu o Iesu o se tagata, e mafai la ona ia “tigā alofa faatasi ma i tatou i o tatou vaivaiga.” (Eperu 4:15) O tane ma fafine faamaoni e 144,000 lea o le a pule faatasi ma Iesu, na filifilia e Ieova “mai i ituaiga uma, ma gagana uma, ma nuu uma, ma atunuu uma.”​—Faaaliga 5:9.

• Pe e faamāfanafanaina oe i le iloaina, e malamalama lelei Iesu ma i latou e pule faatasi ma ia i tulaga o tagata? Aiseā?

7. E sili atu ona lelei tulafono a le Malo o le Atua

E saunia e faigāmalo a tagata tulafono mo le lelei ma le puipuiga o tagatānuu. E iai foʻi tulafono a le Malo o le Atua e tatau ona usitaʻia e ona tagatānuu. Faitau le 1 Korinito 6:​9-​11, ona talanoa lea i fesili nei:

• O le a faapeʻī le lalolagi pe a mulimuli tagata uma i tulafono tauamio a le Atua?a

• Pe e talafeagai ona faatalitalia e Ieova tagatānuu o le Malo e usitaʻia nei tulafono? Aiseā?

• E faapefea ona tatou iloa, e mafai e tagata e lē usitaʻia nei tulafono ona faia suiga?​—Tagaʻi i le fuaiupu 11.

AOTELEGA

O le Malo o le Atua o se faigāmalo moni i le lagi, ma o le a pule mai i le lalolagi atoa.

Fesili Autalu

• O ai pule o le Malo o le Atua?

• E faapefea ona sili atu le Malo o le Atua nai lo o faigāmalo a tagata?

• O ā nisi o mea e faatalitalia e Ieova mai i tagatānuu o le Malo?

MANATU FAAOPOOPO

Iloilo aʻoaʻoga a Iesu e faatatau i le nofoaga moni e iai le Malo.

“Po o le Malo o le Atua o se Mea e i le Loto o le Tagata?” (Mataupu i le jw.org)

Aiseā e sili atu ai i Molimau a Ieova le faamaoni i le Malo o le Atua nai lo o faigāmalo a tagata?

Tuutoina Atoatoa i le Malo o le Atua (1:​43)

Iloilo le faamatalaga a le Tusi Paia e faatatau i le 144,000 lea ua filifilia e Ieova e pule faatasi ma Iesu.

“O Ai e Ō i le Lagi?” (Mataupu i le jw.org)

O le ā na faatalitonuina ai se fafine na faafalepuipui, e na o le Atua e mafai ona aumaia se lalolagi amiotonu?

“Aʻoaʻoina le Mea Moni e Faatatau i Faiga Lē Tonu” (Mataupu o le Ala Mai!)

Na amata ona pule le Malo o le Atua i le lagi i le 1914. O le taimi foʻi lenā na amata mai ai aso e gata ai o pulega a tagata. E faapefea ona tatou iloa? Seʻi iloilo valoaga o le Tusi Paia, o mea o loo tutupu i le lalolagi, ma amioga a tagata talu mai le 1914.

1. O le ā na valoia e le Tusi Paia?

Na faailoa mai e le tusi o Tanielu, o le a amata ona pule le Malo o le Atua, pe a mavae atu “taimi e fitu.” (Tanielu 4:​16, 17) I senituri mulimuli ane, na taʻua e Iesu na taimi, o “taimi atofaina o nuu ese.” Na ia faailoa mai foʻi e leʻi oo i le faaiʻuga o na taimi. (Luka 21:24) O le a tatou aʻoaʻoina mai i lenei lesona, na faaiʻuina taimi e fitu i le tausaga 1914.

2. O ā mea ua tutupu ma amioga a tagata ua vaaia talu mai le 1914?

Na fesili atu soo o Iesu iā te ia: “O le ā foʻi le faailoga o lou faatasi mai, ma le taufaaiʻuiʻuga o le faiga o mea a le lalolagi?” (Mataio 24:3) Na faailoa atu e Iesu iā i latou le tele o mea o le a tutupu, pe a amata ona pule o ia i le lagi o se Tupu o le Malo o le Atua. O nisi o nei mea e aofia ai taua, oge ma mafuiʻe. (Faitau le Mataio 24:7.) Na valoia mai foʻi e le Tusi Paia, o amioga a tagata i “aso e gata ai” o le a oo mai ai aso e “sili ona faigatā.” (2 Timoteo 3:​1-5) O nei mea uma ua tutupu ma amioga a tagata, na amata ona vaaia talu mai le 1914.

3. Aiseā ua matuā leaga ai le tulaga o le lalolagi talu ona pule le Malo o le Atua?

E leʻi leva talu ona avea Iesu ma Tupu o le Malo o le Atua, ae ia tauina loa se taua i le lagi faasaga iā Satani ma ana temoni, ma faatoʻilaloina ai Satani. Ua taʻua i le Tusi Paia “ua lafo ifo o ia i le lalolagi, ua lafo ifo foʻi ana agelu faatasi ma ia.” (Faaaliga 12:9, 10, 12) Ua matuā lotoa Satani ona ua ia iloa o le a faaumatia o ia. O lea, ua ia faapogaia ai tigā ma mafatiaga i le lalolagi atoa. E lētioa la a matuā leaga le tulaga o le lalolagi! Ae o le a aveesea e le Malo o le Atua nei faafitauli uma.

SAʻILIʻILI ATILI

4. Ua faailoa mai i le faasologa o taimi o le Tusi Paia, na amata pule le Malo o le Atua i le 1914

VITIŌ: Na Amata Pule le Malo o le Atua i le 1914 (5:02)

Na faapogaia e le Atua le miti a Nepukanesa le tupu o Papelonia, e faailoa mai ai mea o le a tutupu i le lumanaʻi. O le faamatalaina o lenā miti i le tusi o Tanielu, e iloa ai o loo faatatau atu i le pulega a Nepukanesa ma le Malo o le Atua.​—Faitau le Tanielu 4:​17.a

Faitau le Tanielu 4:​20-​26, ma faaaogā le siata e tali ai fesili nei:

• (A) O le ā na vaaia e Nepukanesa i lana miti?​—Tagaʻi i fuaiupu 20 ma le 21.

• (E) O le ā na tupu i le laau?​—Tagaʻi i le fuaiupu 23.

• (I) O le ā na tupu i le iʻuga o “taimi e fitu”?​—Tagaʻi i le fuaiupu 26.

Le Fesootaʻiga o le Miti a Nepukanesa i le Laau, ma le Malo o le Atua

VALOAGA (Tanielu 4:​20-​36)

Pulega

(A) Se laau telē

Taofia le pulega

(E) “Tātuu i lalo le laau,” seʻia ‘mavae taimi e fitu’

Toe faafoʻisia le pulega

(I) ‘E te toe maua lou malo’

I le faataunuuga muamua o lenei valoaga . . .

• (O) O ai na faaata mai e le laau?​—Tagaʻi i le fuaiupu 22.

• (U) Na faapefea ona taofia lana pulega?​—Faitau le Tanielu 4:​29-​33.

• (F) O le ā na tupu iā Nepukanesa ina ua mavae “taimi e fitu”?​—Faitau le Tanielu 4:​34-​36.

FAATAUNUUGA MUAMUA

Pulega

(O) Nepukanesa le tupu o Papelonia

Taofia le pulega

(U) Ina ua mavae le 606 T.L.M., na lē lelei le mafaufau o Nepukanesa ma lē mafai ai ona faaauau lana pulega mo le fitu tausaga

Toe faafoʻisia le pulega

(F) Na toe lelei le mafaufau o Nepukanesa ma toe faafoʻisia ai lana pulega

I le faataunuuga lona lua o le valoaga . . .

• (G) O ai sa faaata mai e le laau?​—Faitau le 1 Nofoaiga a Tupu 29:23.

• (L) Na faapefea ona taofia le latou pulega? E faapefea ona tatou iloa na taofia pea lenā pulega a o iai Iesu i le lalolagi?​—Faitau le Luka 21:24.

• (M) O anafea ma o fea na toe faafoʻisia ai lenā pulega?

FAATAUNUUGA LONA LUA

Pulega

(G) Na faaata mai e tupu o Isaraelu le pulega a le Atua

Taofia le pulega

(L) Faatoʻilaloina Ierusalema ma taofia ai le faasologa o tupu o Isaraelu mo le 2,520 tausaga

Toe faafoʻisia le pulega

(M) Amata ona pule Iesu i le lagi o se Tupu o le Malo o le Atua

5. Ua suia le lalolagi talu mai le 1914

Faaali le VITIŌ.

VITIŌ: Ua Suia le Lalolagi Talu Mai le 1914 (1:10)

Na valoia e Iesu mea o le a tutupu i le lalolagi, pe a avea o ia ma Tupu. Faitau le Luka 21:​9-​11, ona talanoa lea i le fesili lenei:

• O fea o nei mea o loo e vaai ma faalogo i ai?

Na faamatala mai e le aposetolo o Paulo uiga faaalia o tagata i aso e gata ai. Faitau le 2 Timoteo 3:​1-5, ona talanoa lea i le fesili lenei:

• O fea o nei uiga o loo faaalia e tagata i aso nei?

6. Talu ai ua pule le Malo o le Atua, o le ā e tatau ona tatou faia?

Faitau le Mataio 24:​3, 14, ona talanoa lea i fesili nei:

• O le ā le galuega e sili ona tāua e iloa ai ua pule le Malo o le Atua?

• E faapefea ona faia sou sao i lenei galuega?

Ua pule nei le Malo o le Atua, ma ua lata mai le taimi e na te pulea ai le lalolagi atoa. Faitau le Eperu 10:​24, 25, ona talanoa lea i le fesili lenei:

• O le ā e tatau iā i tatou taʻitoʻatasi ona faia, a o “iloa ua matuā latalata mai lava le aso”?

AOTELEGA

O valoaga o le Tusi Paia, o le faasologa o taimi na tutupu ai na valoaga, ma mea o tutupu i le lalolagi, ua faamaonia ai ua pule nei le Malo o le Atua. E faaalia lo tatou talitonu i nei mea, e ala i le talaʻi atu ma auai i sauniga a le faapotopotoga.

Fesili Autalu

• O le ā na tupu ina ua faaiʻuina taimi e fitu lea na valoia mai i le tusi o Tanielu?

• Aiseā e te mautinoa ai na amata ona pule le Malo o le Atua i le 1914?

• E faapefea ona faailoa atu ua e talitonu ua pule nei le Malo?

MANATU FAAOPOOPO

Iloilo faamatalaga a tusitala o le talafaasolopito ma isi, e faatatau i suiga o le lalolagi talu mai le 1914.

“Le Vaitaimi na Amata ai Ona Paʻū Maulalo Tapulaa Tau Amio” (Mataupu o le Ala Mai!)

Iloilo pe na faapefea ona suia le olaga o se tamāloa, i le valoaga o loo i le Mataio 24:14.

“Sa Sili Atu Ona Ou Fiafia i le Taaloga Pesipolo Nai lo o se Isi Lava Mea!” (Le Olomatamata Nu. 3 2017)

E faapefea ona tatou iloa o le valoaga o loo faamauina i le Tanielu mataupu e 4, e faatatau atu i le Malo o le Atua?

“O Anafea na Amata Pule ai le Malo o le Atua? (Vaega 1)” (Le Olomatamata, Oketopa 1, 2014)

E faapefea ona tatou iloa na faaiʻuina i le 1914, taimi e fitu ia e taʻua i le Tanielu mataupu e 4?

“O Anafea na Amata Pule ai le Malo o le Atua? (Vaega 2)” (Le Olomatamata, Novema 1, 2014)

Ua pule nei le Malo o le Atua, ma ua toeitiiti ona ia suia atoatoa lea o le lalolagi. Seʻi tatou iloiloina nisi o mea mananaia e mafai ona e tulimataʻia i le pulega a le Malo.

1. O le a faapefea ona aumaia e le Malo o le Atua le filemu ma le faamasinotonu i le lalolagi?

O le a faaumatia e le Tupu o le Malo o le Atua, o Iesu, tagata leaga ma faigāmalo i le taua o Amaketo. (Faaaliga 16:​14, 16) I lenā taimi, o le a faataunuuina atoatoa ai le folafolaga lenei a le Tusi Paia: “Ua toeitiiti lava ona lē toe iai lea o le tagata amioleaga.” (Salamo 37:10) E ala i le Malo, o le a faamautinoa e Iesu o le a iai le filemu ma le faamasinotonu i le lalolagi atoa.​—Faitau le Isaia 11:4.

2. O le a faapeʻī le olaga pe a faataunuuina le finagalo o le Atua i le lalolagi?

Pe a pule le Malo o le Atua, ona fai loa lea o “le lalolagi mo ē e amiotonu, e nonofo ai pea i latou e oo i le faavavau.” (Salamo 37:29) Seʻi faaata le ola i se lalolagi e tumu i tagata amiotonu ma alolofa iā Ieova ma isi. O le a lē toe iai se tagata e maʻi ma o le a ola e faavavau tagata uma.

3. O le ā o le a faataunuuina e le Malo o le Atua pe a uma ona faaumatia ē amioleaga?

Pe a uma ona faaumatia ē amioleaga, ona pule loa lea o Iesu o se Tupu mo le 1,000 tausaga. A o faagasolo lenā taimi, o le a ia fesoasoani mai ma le 144,000 lea latou te pule faatasi, ina ia lelei atoatoa tagata i le lalolagi ma saʻoloto mai le agasala. E oo atu i le iʻuga o le 1,000 tausaga, ua avea le lalolagi ma parataiso matagofie, ma maua e tagata le fiafia ona o le usitaʻia o tulafono a Ieova. O le a toe tuuina atu i lenā taimi e Iesu le pule i lona Tamā, ma “faapaiaina [le] suafa” o Ieova e sili atu i lo se isi lava taimi. (Mataio 6:​9, 10) O le a faamaonia ai o Ieova o se Pule lelei ma manatu mamafa i ona tagatānuu. Pe a māeʻa lenā, ona ia faaumatia loa lea o Satani ma ana temoni, ma so o se tasi e fouvale i lana pule. (Faaaliga 20:​7-​10) O le a tumau e faavavau le tulaga lelei atoatoa lea o le a aumaia e le Malo o le Atua.

SAʻILIʻILI ATILI

4. O le a faaumatia e le Malo o le Atua faigāmalo a tagata

ʻUa pule le tagata i le isi tagata ma ua matuā afāina ai o ia.’ (Failauga 8:9) O le a faaiʻuina e Ieova na faiga lē tonu e ala i lona Malo.

Faitau le Tanielu 2:​44 ma le 2 Tesalonia 1:​6-8, ona talanoa lea i fesili nei:

• O le ā o le a faia e Ieova ma lona Alo o Iesu i faigāmalo a tagata, ma i latou o loo lagolagoina?

• E faapefea i mea ua e aʻoaʻoina e faatatau iā Ieova ma Iesu, ona e mautinoa ai o le a la faaalia le amiotonu ma le faamasinotonu?

5. O Iesu o se Tupu e sili ona lelei

I le avea ai o Iesu ma Tupu o le Malo o le Atua, o le a ia faia le tele o mea lelei ina ia maua ai e tagata uma aogā. Faaali le VITIŌ ma mātau pe na faapefea ona faailoa mai e Iesu, o loo iā te ia le faanaunauga ma le mana ua tuuina atu e le Atua, ina ia fesoasoani ai i tagata.

VITIŌ: Faailoa Mai e Iesu Mea o le a Faataunuuina e le Malo (1:​13)

O mea na faia e Iesu a o iai i le lalolagi, ua faaata mai ai mea o le a faataunuuina e le Malo. O lē fea faamanuiaga e sili ona e tulimataʻia i le lumanaʻi? Faitau mau o loo faamatala atili mai ai nei faamanuiaga.

6. O le a aumaia e le Malo o le Atua se faamoemoe matagofie

VITIŌ: Se Faaataga o se Lumanaʻi Matagofie (4:​38)

Faitau le Salamo 145:​16, ona talanoa lea i le fesili lenei:

• O ā ou lagona i le iloaina, o le a “faamalie [e Ieova] le manaʻo o meafaiola uma lava”?

AOTELEGA

O le a faataunuu e le Malo o le Atua lona finagalo. O le a suia le lalolagi e avea ma parataiso, e tumu i tagata lelei e auauna iā Ieova e faavavau.

Fesili Autalu

• O le a faapefea ona faapaiaina e le Malo o le Atua le suafa o Ieova?

• Aiseā e tatou te talitonu ai o le a faataunuu e le Malo o le Atua folafolaga a le Tusi Paia?

• O le ā se mea o le a faataunuuina e le Malo e sili ona e tulimataʻia?

MANATU FAAOPOOPO

Iloilo po o le ā e uiga i ai Amaketo.

“O le ā le Taua o Amaketo?” (Mataupu i le jw.org)

Iloilo mea o le a tutupu a o faagasolo le vaitaimi lea na taʻua e Iesu o “le puapuaga tele.”—Mataio 24:21.

“O le ā le Puapuaga Tele?” (Mataupu i le jw.org)

Mātau le auala e mafai ai e aiga ona manatunatu i faamanuiaga o le Malo i le lumanaʻi.

Vaai iā Oe i le Parataiso (1:​50)

Faitau i le tala “E Tele Fesili na Oo Mai i Loʻu Mafaufau,” ma mātau pe na faapefea ona maua e se tagata na fouvale i le faigāmalo, tali o fesili na ia saʻilia.

“E Mafai e le Tusi Paia Ona Suia Olaga” (Le Olomatamata, Ianuari 1, 2012)