O Laʻu Filifiliga a o Tamaitiiti

I le 1985 ina ua sefulu oʻu tausaga, na taunuu mai ai ni tamaiti mai i Cambodia i le aʻoga na ou aʻoga ai i Columbus i Ohio, i le Iunaite Setete. Sa iai se tamaitiiti e malamalama i nai upu o le gagana Peretania. Sa ia faaaogā ata e faamatala mai ai faiga sauā, o fasiotiga tagata ma solaaga sa tutupu i lona atunuu. Sa maligi oʻu loimata i le pō pe a ou mafaufau i nei tamaiti. Sa ou manaʻo e faailoa atu iā i latou le faamoemoe o le Parataiso ma le toetū, ae e latou te leʻi malamalama i laʻu gagana. O lea, na ou filifili ai e aʻoaʻo le gagana Cambodia, ina ia mafai ona ou talanoa atu iā i latou e faatatau iā Ieova. O lenā filifiliga na aafia ai loʻu lumanaʻi.

Sa leʻi faigofie le aʻoaʻoina o le gagana Cambodia. E faalua ona ou mafaufau e tuu le aʻoaʻoina o le gagana, ae sa faamalosia aʻu e Ieova e ala mai i oʻu mātua. Mulimuli ane, na uunaʻia aʻu e loʻu faiaʻoga ma aʻu uō e saʻilia se galuega e lelei le totogi. Peitaʻi, sa ou manaʻo e avea ma paeonia ma sa ou filifilia ai ni mataupu i le aʻoga, e mafai ai ona maua se galuega faavaitaimi ina ia taulau ai lenā sini. Pe a tuua le aʻoga i aso taʻitasi, sa masani ona ou faatasi atu i nisi o paeonia ma matou galulue faatasi i le auaunaga. Sa ou tauofo foʻi e fesoasoani i tamaiti i le aʻoaʻoina o le gagana Peretania, ma sa matuā telē le aogā iā te aʻu i se taimi mulimuli ane.

O le 16 o oʻu tausaga na ou iloa ai e iai se vaega o tagata talaʻi Cambodia, i Long Beach i Kalifonia i le Iunaite Setete. Sa ou asiasi atu i lenā vaega, ma aʻoaʻoina ai laʻu faitau i le gagana Cambodia. Ina ua ou faauu mai i le aʻoga, ona amata lea ona ou paeonia ma talaʻi atu i tagata Cambodia e nonofo i loʻu vaipanoa. I le 18 o oʻu tausaga na ou mafaufau ai e siitia atu i Cambodia. O se atunuu e lē saogalemu, peitaʻi ua ou iloa e iai nisi mai i le sefulu miliona o tagata o loo nonofo i Cambodia ua faalogo i le tala lelei o le Malo. I lenā taimi e tasi le faapotopotoga, ae na o le 13 tagata talaʻi i le atunuu atoa. O le 19 o oʻu tausaga, na ou malaga muamua ai i Cambodia, ae i le lua tausaga mulimuli ane, na ou filifili ai e malaga atu ma nofo mau ai. Na maua laʻu galuega faavaitaimi e faaliliu ma aʻoaʻo le gagana Peretania, ma na lagolagoina ai laʻu auaunaga. Na ou maua mulimuli ane se avā e tutusa o ma sini, ma sa ma galulue faatasi e fesoasoani i tagata e auauna iā Ieova.

Sa faataunuu e Ieova “mea e manaʻo i ai loʻu loto.” (Sala. 37:4) O le faia o soo o se galuega e sili ona maua ai le faamalieina nai lo o se isi lava galuega. I le 16 tausaga a o oʻu iai i Cambodia, ua iai se faatelega maoaʻe mai i le 13 o tagata talaʻi, i le 12 o faapotopotoga ma le 4 vaega i oganuu maotua ua iai nei.​—Faamatalaina e Jason Blackwell.