Tala o Mea na Tutupu Mai i le Tusi Tausaga 2010
Itulau e 149-150
Alapania
I le 1959, na aauina atu ai e uso i Alapania ni feʻau, e faailoa atu ai le tulaga faigatā ua iai, ae na faaalia foʻi lo latou maumauaʻi e tumau i le faamaoni. Ae o le taimi lea, sa taumafai ai le ofisa ulu i Brooklyn e faafesootaʻi le ʻauuso i Alapania. O le uso o John Marks, na fanau i Alapania i saute, ae o loo nofo i Amerika i le taimi lea, na fai i ai e taumafai e fai sona pemita e malaga atu ai i Alapania.
I le tausaga ma le ʻafa mulimuli ane, na maua ai le pemita o John e alu ai i Alapania, ae e leʻi maua se pemita o lona toʻalua o Helen. Iā Fepuari 1961, na taunuu ai John i Durrës, ma malaga loa i Tiranë. O i inā na la feiloaʻi ai ma lona tuafafine o Melpo, o lē ua amata ona fiafia i le upu moni. Na fesoasoani o ia iā John ia mafai ona feiloaʻi ma le ʻauuso i le aso na sosoo ai.
Na umi o talanoa John ma le ʻauuso, ma ave loa i ai lomiga sa nanā lilo i lana atopaʻu. Na matuā fiafia le ʻauuso, ona ua sili atu ma le 24 tausaga talu ona lē toe asia i latou e uso mai i se isi atunuu.
O le fua i ai a John, e tusa ma le 60 le ʻauuso o loo iai i aai e lima, faapea ma nisi i nuu lāiti. Sa taumafai le ʻauuso i Tiranë e feiloaʻi faalilolilo i Aso Sa, e faatasi i le vaiaso, e autalu mataupu o lomiga sa latou nanāina talu mai le 1938.
Ona ua leva e leʻi toe fesootaʻi uso i Alapania ma le faalapotopotoga, o lea sa manaʻomia ai ona faaauiluma lo latou malamalama, ia ōgatusa ma faatulagaga ma aʻoaʻoga fou o le upu moni. O se faaaʻoaʻoga, e fai uma vaega a uso ma tuafāfine i sauniga, ma e fai foʻi e tuafāfine tatalo. Na tusi mai John i se taimi mulimuli ane: “Sa lē mautinoa e le ʻauuso po o le a talia e tuafāfine fetuunaʻiga fou, ma na latou talosaga mai ia ou faamalamalama atu tau o tuafāfine, ma sa ou faia faapea. Sa ou fiafia lava ona na latou talia.”
E ui i lo latou lē tagolima, ae sa maelega nei auauna faamaoni e lagolagoina le galuega o le Malo. O se faataʻitaʻiga, na mātauina e John ni uso matutua se toʻalua mai i Gjirokastër, na la sefe “se tupe mai i si tupe itiiti na la maua, ma la foaʻi atu i le Sosaiete.” E sili atu ma le 100 tālā tupe auro a le uso e toʻatasi na sefe.
Na matuā talisapaia e le ʻauuso i Tiranë le mauaina o le tamaʻitusi Preaching and Teaching in Peace and Unity (Talaʻi ma Aʻoaʻo Atu i le Filemu ma le Autasi), o loo iai taʻiala i le auala e faagaoioi ai faapotopotoga, e ui lava ina faasāina le galuega. Iā Mati, na faia ai e John le Faamanatuga i Tiranë i le fale o Leonidha Pope, ma e 37 ē na auai. Ina ua māeʻa le lauga, ona folau atu loa lea o John i se vaa i Eleni.
Itulau e 175-179
MAUA MAMOE MAOTUA
Ina ua talanoa i le agaʻi i luma o le galuega talaʻi i Alapania, na fesili uso: “Pe e iai ni Molimau i Vlorë?” E na o le pau le tagata sa iloa e nisi, o se fafine sa masani ona faamatala mai ua valevale matua. Na iai se fafine na sau i le ofisa ma faapea mai, o ia ma lona aiga o ni faievagelia (ungjillorë), ma sa aʻoaʻo i latou i le upu moni e se tagata e igoa iā Areti i Vlorë. O lea, na malaga ai loa uso mai Tiranë i Vlorë e suʻe Areti.
O Areti Pina, o se fafine puupuu ua matua, na ia valaaulia le ʻau asiasi i lona fale, ae e foliga mai e pei e lē tautala. Ina ua faamatala atu e uso iā te ia o i latou o ona tuagane faaleagaga, e leʻi tali ane o ia.
Ae ina ua mavae sina taimi, ona faafuaseʻi lea ona fesili mai Areti: “Pe mafai ona ou fesili atu?” Ona amata loa lea ona saputu mai ana fesili: “Pe e tou te talitonu i le Tolutasi? O ai le suafa o le Atua? E tou te talitonu i le afi i seoli? O le ā e tupu pe a tatou feoti? Ae faapefea le lalolagi? E toʻafia o le a ō i le lagi?”
Na tali e uso fesili taʻitasi uma.
Ona toe fesili mai lea o Areti: “E tou te talaʻi?”
Na tali ane se tasi o uso: “Ioe, e matou te talaʻi.”
Na toe fesili mai Areti: “Ae e faapefea ona outou talaʻi?”
Na tali le uso: “E matou te talaʻi mai lea fale i lea fale.”
Na tagi Areti ona o le fiafia, ma oso mai fusi le uso.
Na ia faapea mai: “Ua ou iloa nei, o outou o uso! E na o tagata o Ieova e talaʻi mai lea fale i lea fale!”
Na faalogo tagata lotu Porotesano i Vlorë, o Areti o se tagata lotu, ona fai atu lea iai e sau latou te lolotu faatasi. Na faamatala e Areti i uso: “Ae ou te leʻi manaʻo e fai saʻu vaega iā Papelonia le Aai Tele! O le mea lea ua ou manaʻo ai e faamautinoa, o outou o loʻu aiga moni faaleagaga!”
Na papatiso Areti i tuā i le 1928 ina ua 18 ona tausaga. Sa aʻeaʻe ma ifoifo o ia i mauga e talaʻi ai, e ʻuʻu le Tusi Paia i lona lima. E ui lava ua leva ona lē toe fesootaʻi Areti ma le ʻauuso, ae sa faamaoni pea e talaʻi na o ia.
Na fai mai Areti ma le maligi o loimata: “E ese le agalelei o Ieova. E na te leʻi faagaloina lava aʻu!”
Sa manatu tagata e valea Areti ona o lona faamaoni i le Atua, e ui i pulega faatautalatasi a Alapania. Ae e leʻi valevalematua Areti. Sa lelei pea lona mafaufau e pei ona iai muamua!