Aogā e Maua i le Suʻesuʻeina o le Tusi, Faalatalata Atu iā Ieova
1. E faapefea ona tatou maua aogā mai i a tatou suʻesuʻega?
1 E amata iā Fepuari ona tatou talanoaina le tusi Faalatalata Atu iā Ieova, i Suʻesuʻega Faale-Tusi Paia a le Faapotopotoga. E faapefea ona tatou maua aogā mai i a tatou suʻesuʻega? E tāua tele ona sauniuni. E lua vaiaso e talanoaina ai mataupu taʻitasi, ma e lē tele ni palakalafa e faatulaga mo suʻesuʻega i vaiaso taʻitasi. O le faia faapea o le a lava ai le taimi e sauni ai ni au tali mai le loto, e faavae i au lava suʻesuʻega ma le manatunatu loloto i le mataupu. E lē gata i lea, e itiiti ni palakalafa o le a talanoaina i vaiaso e autalu ai le vaega faaiʻu o se mataupu, ina ia maua ai le taimi e iloilo ai se vala tāua o lenei tusi.
2. O ā vala o le tusi o le a faaaogā e le faisuʻesuʻega?
2 E amata i le mataupu e 2, e iai se pusa e lata i le faaiʻuga o mataupu taʻitasi, e faaulutalaina “Fesili e Mafaufau Loloto i Ai.” Pe a uma ona iloiloina le palakalafa mulimuli o le mataupu, ona talanoa lea e le faisuʻesuʻega ma le faapotopotoga le pusa. E na te faalaeiau tagata o le faapotopotoga, e faailoa mai ni aogā o lo latou manatunatu loloto i mau o le Tusi Paia. (Faata. 20:5) E ese mai i fesili o loo i le pusa, e mafai ona ia fai atu nisi fesili e pei o nei: “O le ā ua taʻu mai e nei faamatalaga e uiga iā Ieova? E faapefea ona aafia ai lou olaga? E faapefea ona e faaaogā e fesoasoani ai i isi?” O lona sini, o le utufia mai lea o faamatalaga mai le loto, ae lē o le tofotofo o le faapotopotoga i ni manatu e lē tāua.
3. O le ā o loo talanoaina faapitoa i lenei tusi?
3 O le tusi Faalatalata Atu iā Ieova, e ese mai i isi lomiga. E ui o lomiga uma a “le pologa faamaoni ma le faautauta” e faamamaluina ai Ieova, a o lenei tusi ua faapitoa i le talanoaina o uiga o Ieova. (Mata. 24:45-47) Maʻeu se avanoa lelei ua tatou maua! O le a tele aogā e tatou te maua, pe a suʻesuʻe loloto i uiga o Ieova. Tau ina ia aogā lenei suʻesuʻega e faalatalata atili atu ai i lo tatou Tamā o i le lagi, ma tatou taulau manuia ai i le fesoasoani atu i isi e faia faapea.—Iako. 4:8.